Sunday, February 22, 2015

مفيش فايدة





-خير يا دكتور طمني الله يخليك؟
-للأسف يا حاج سعد مفيش فايدة
-ليه كدة بس يعني مفيش حتى أي أمل؟
-للاسف لا
-حاول تاني والنبي يا دكتور يمكن تلاقي أي مخرج
-حاولت صدقني بس ع الاقل عندي لك خبرين
-خبرين؟ طب ماهو في أمل أهو يا مسهل يارب
 -بس للاسف يا حاج سعد فيهم واحد بصراحة وحش
-وحش؟ لا بقى الحكاية مش ناقصة، طيب خلينا في الحلو يا دكتور ربنا يكرمك
-يعني مش ح تزعل يا حاج لو قلتلك؟
-إزعل؟ بالذمة ده كلام؟ حد يزعل م الاخبار الحلوة؟ ده الغريق بيتعلق بقشة يا دكتور
-غصب عني والله يا عم سعد
-قول بقي يا دكتور سيبت مفاصلي
-شوف يا حاج سعد إنت للأسف ح تعيش بالكتير يومين بحالتك دي
-يا نهار أسود إنت بتقول إيه يا دكتور؟ يومين مش ممكن؟ هو ده بقى بالذمة الخبر الحلو؟ بقي ح أعيش يومين وتقولي ده حلو؟ بذمتك ده كلام؟  ده كلام؟ هو فيه بذمتك أوحش من كدة؟
-في يا حاج
-لا والله ما في أوحش من كدة
-لا في ياحاج وخليني ساكت
-خلاص قول بقي،  قال ساكت قال؟ ما خلاص خربت بقى يا دكتور، قول بقى لو سمحت، وصدقني وربنا مش ح ازعل، مش ح أزعل صدقني
-شوف يا حاج سعد الخبر الوحش هووو
-يادكتور قول بقي أبوس إيديك، العمر بيجري خلاص وإنت سيد العارفين
-شوف يا حاج الخبر الوحش هو إني بقالي يومين عمال أحاول أوصلك عشان تعمل حسابك بسرعة بس للإسف حضرتك كنت قافل الموبايل بتاعك

Sunday, February 15, 2015

حركة سبعة الصبح






-  لعلمك  يا دكتور أنا معنديش مشكلة خالص في الإخراج
-  طب كويس
-  وزي ما قلت لحضرتك تقدر تظبط عليها الساعة بالظبط
-    ممتاز
-   و أول كدة ما تيجي الساعة سبعة الصبح بيبقي ده ميعادها الطبيعي
-       عال عال أكيد يا حاج بتاكل خضار وفواكة كتير
-       طبعا يا دكتور
-       برافو عليك إنت قدوة يا حاج وياريت كل الناس تبقى زييك
-       وبصراحة بقى من يوم ما جربت البروكلي وأنا نسيت كلمة الأمساك دي خالص
-       إيوة صحيح البروكلي ده صحي جدا ومضاد كمان للأوارم
-       بس يا دكتور
-       بس إيه يا حاج سيد
-       أنا تعبان اوووي بصراحة من حكاية إنتظام الاخراج ده
-       تعبان؟ في حد يا راااااجل بالذمة يزعل إن جسمه بقى شغال بإنتظام وزي الساعة؟
-       أنا بقي يا دكتور
-       إنت؟ وربنا إنت بجد حاجة غريبة يا عم الحاج
-       تعبان نفسيا جدا وقرفت من نفسي أووووي وربنا
-       قرفان؟ وتعبان؟ إنت بجد حالة غريبة وعمرها بصراحة ما وردت عليا أبدا
-      يا دكتور با قولك بتجيلي بإنتظام وبتيجي الساعة سبعة الصبح بالظبط زي ماتكون ظابط عليها المنبه يعني
-       طب وايه يعني يا سيدي؟ ما تيجي الساعة سبعة ما براحتها، إنت خايف تعملها لتجوع ولا إيه؟ أما صحيح حاجة غريبة دي
-       المشكلة يا دكتوووور
-       مالها المشكلة يا سيدي
--       المشكلة إني
-     تاني إني؟ يا عم قوووووووووووول بقى
-       المشكلة يا دكتور إن ميعاد صحياني هو تمانية بالظبط وده بقى برضة مظبوط هو كمان زي المنبه.

Sunday, February 8, 2015

ليلة العمر





الإثنين , 2015 02:02

-       وافقي بقى يا سيدة حرام عليكي
-       مقدرش أظلمك معايا إنت كمان؛ ضميري يا حمودة، ضميري، مقدرشي والله
-       ضميرك؟ ضميرك إيه وكلام فاضي إيه يابت؟ الاعمار بيد الله يا هبلة، مش ذنبك يعني إن كل اللي إتجوزوكي يا إما ماتو يا طفشو؟ نصيبهم بقي ح نعمل إيه يعني؟
-       نصيبهم؟ لا ياحمودة ده مش نصيب، أمي بتقولي ده عمل ومعمولي وبيطفش مني العرسان وتقريبا في ليلة الدخلة
-       عمل إيه وكلام فاضي إيه؟ بلاش هبل، إنت بتصدقي في الكلام الخايب ده؟ با بت ده نصيب وبكرة  لما توافقي ونتجوز ح تعرفي إنه ده كله تهيؤات مش أكتر، وافقي بقي يا سيدة، وربنا ما ح تندمي، مش معقولة يعني ح أفضل أستناكي أكتر من كدة، كل مرة بتتجوزي فيها ببقى ح أتجنن خالص، طب عارفة؟ وربنا ساعتها بأحس إنك خلاص مش ح تبقي بتاعتي وإني ضعت خلاص، يا سيدة إنت حلم حياتي من وإحنا صغيريين وبجد بقى مقدرش أعيش من غيرك، يا ريت تفهمي ده،  وافقي بقي أحب علي أيدك
-       ياحمودة تلاتة غيرك قالولي نفس كلامك ويوم الصباحية قالولي مش طايقين ريحتك، دول قالولي ان ريحتي بتخنقهم يا حمودة، طب اعمل إيه بذمتك؟ دي حاجة بتاعة ربنا ومش بإيدي، وربنا باستحمي يجي خمس مرات في اليوم لما بشت خلاص يا حمودة
-       ريحتك بتخنقهم؟ إيه الهبل ده؟ دول بيستهبلو بجد يا سيدة، دي إنت فل الفل يا بت  وعاملة زي لهطة القشطة قال على رأي المثل ما لقوش في الورد عيب
-       بأقولك ريحتي ياحمودة مش شكلي
-       يا ستي وربنا ما ح تفرق معايا حتى لو بتسلكي المجاري، أنا رايدك كدة، مالكيش دعوة ، أنا عايزك إنت وبس، وان كان ع الريحة يا ستي ولا يهمك أنا حاسة الشم عندي تقريبا راحت من بعد ما رحت الجيش ومنها لله بقى الحروب الكيماوية، شفتي بقي يا ستي إن الحجة الوحيدة للي عندك بقى مالهاش أي معنى خلاص
-       بجد يا حمودة ؟ يعني مش يجي يوم و تندم إنك إتجوزتني؟
-       أندم؟ بقى ده كلام يا سيدة؟ بأقولك إنت حلم وحب عمري يا بت
-       ربنا يخليك ليا يا حمودة ، خلاص إنا  كدة أتطمنت، وخلاص وافقت وخلي ميعاد الفرح زي ما كنا أتفقنا يوم الخميس ده إن شاء الله، ومش ح أكسر بخاطرك أبدا والنبي يا غالي
-       ياه يا سيدة وربنا أنا أمي دعيالي بجد، بحبك بحبك ياروح القلب.









بوابة الأهرام
بقلم: رفعت أبوشادوف
الجمعة , 2015 06:02

لقي زوج بالمنوفية مصرعه وأصيبت زوجته باختناق شديد، إثر تسرب للغاز بحمام شقتهما بقرية أم صالح التابعة لمركز بركة السبع، وتم التحفظ على جثة الزوج ونقله إلى المستشفى أما الزوجة فقد فاقت بعد عمل الأسعافات الأولية لها وتولت النيابة التحقيق.