عالم تركيب

أول مرة

2012-02-05T15:11:00.005+01:00

يااااه أول مرة أشوف بجد لمسة إيديكي وما أحسش بيها....أول مرة أدوق طعم دموعك من غير ما أشوفها.....صدقيني أنا شايفك برغم كل اللي حواليا ده ومانعني عنك...شايف الحزن في عينيكي و شايف حضنك بس يا خسارة مش حاسه ومش قادر حتى أضمك ليا زي زمان.............زمااااااااااااااااان ..........ياه الكلمة دي ح توحشني أووي ...هو إيه اللي إتغير؟ مش عارف...إحساس غريب والله بأحسه لأول مرة ..بس عارفة؟ زمان كنت بأنسى الدنيا خالص لما كنت بتحضنيني كدة...طب إنت ليه ماسكة فيا دلوقتي كدة؟ هو أنا يعني ح أطير؟ شويتين بالكتير وح تلاقيني يا ستي مستنيكي في أودتي أول ماتروحي.....جايز مش ح تقدري تشوفيني بس أكيد ح تحسي بوجودي فيها...طب دول حتى والله كل ما بيبعدوني دلوقتي عنك وبيقفلو المكان دة بأحس بيكي أكتر وأكتر..المهم دلوقتي إنك تكوني خلاص سامحتيني إن رحت غصب عنك ومن وراكي ولو بتحبيني يبقى ياريت برضة تسيبي إخواتي يكملو اللي بدأناه سوا.. وأوعديني كمان إنك برضة ح تستنيني كل يوم ولا خلاص بقى ياست الكل البعيد عن العين بعيد عن القلب؟ وأنا ح أوعدك ياستي ماعدتش أتأخر زي زمان ولعلمك أنا ح بقى أرجع وابص عليكي كل شوية ومعدتش ح أخرج خالص بقى زي زمان وأسيبك تقلقي.. بس إنت بقى تنسى طلبات البيت والمشاوير ياجميل ..مش كدة؟ غريبة...إنت ما بتضحكيش ليه؟ طب خلاص يلا بقى إمسحي دموعك الغالية دي ...وبعدين إنت زعلانة ليه دلوقتي يا ستي؟ هو أنا يعني لوحدي ولا أول واحد يروح؟ أنا معايا أصحاب كتير...وبعدين إنت مش بابا كان برضة واحشك أووي؟ انا خلاص ح أوصله سلامك وسلام شريف ولوزة..يالا بقى سلام ياحبي وربنا يقويكي ويقوي شريف على الايام الجاية

بلاها سوسو خد نادية

2012-01-31T09:08:00.002+01:00

عيد الجواز الذهبي

2012-01-10T23:00:00.007+01:00

-كل سنة وانت طيبة يا حبيبتي

- وانت طيب يا برعي

-ياه خمسين سنة جواز يا حياتي ..ده أكتر من مؤبد يا نبوية

- ربنا يطول سجنك كمان وكمان يا رب

-عارفة يا نبوية ده أنا عيشت معاكي تقريبا أكتر ما عيشت مع أبويا وأمي

-الله يرحم الجميع....عارف في حاجة بجد خلتني أعيش معاك طول الفترة دي ؟

- أكيد العيال أو ولادهم طبعا

-آه طبعا بس في حاجة أهم من كدة برضه يا برعي

-حاجة أهم؟ إنت لسة برضة ح تلاعبيني في السن ده يا ولية ؟

-ماله السن ده يا راجل؟ إنت ناسي إنك أكبر مني بسبع سنين يا عجوز

-عجوز؟ أنا عجوز يا نغة ...ماشي ... بس ماتنسيش إنك في سبتمبر الجاي ح تكملى خلاص التمانين

-تمانين في عينك راجل ... ده أنا لسة ماشية في التلاتة والسبعين

-ماشي يا شابة إيه هي بقى الحاجة ؟

-حاجة إيه؟

-الحاجة ياولية اللي خليتك تفضلي معايا المدة دي كلها

-الاولاد طبعا يا برعي

-الأولاد؟ إنت مش لسة قايلة لي ..لأ... في حاجة تانية غير العيال

-آه صحيح....آه...عارف؟ لولا ان أهلى وأصحابي كلهم ماتو وشبعو موت كنت زماني بقى شفت حالي وسيبتك يا كركوبة من زمان

-كدة برضة يا نبوية؟ بعد العشرة دي كلها عايزة تسيبيني؟

-ههههههههه أنا بقولك لولا يا برعي...ماتخافش دي تأبيدة يا إبن ستيتة وقاعدة يا أخويا كدة على قلبك لحد آخر العمر

-ربنا يديكي طولة العمر يا نبوتي

-ويديك ويخليكي ليا يا بروعتي

-هي أينعم كانت أيامنا مش كلها عسل كدة على طول ..بس هي دي الدنيا

-لا صدقني يا برعي لما بافكر في عيشتنا سوا بأحمد ربنا أوي وأقول ربنا يديمها عيشة يا رب

-نبوية...نبوية

-في إيه ياراجل؟ طلع عليك عفريت إسمه نبوية؟ ما تتكلم في إيه؟

-بقول يعني...يعني بعد الفترة الطويلة دي لازم نبقى صرحا مع بعض...صح؟ مش كدة؟ ............إيه رأيك؟

-طبعا يا برعي ..هو إحنا لينا غير بعض دلوقتي

-طيب في حاجة عايزة أسألها بس هى محرجة شوية

-حاجة إيه؟ وغوشتني يا راجل قول

-يعني ...يعني ....كنت يعني مخلصة ليا كل الفترة دي كلها؟ قصدي يعني ...دول خمسين سنة.. ...يعني نص قرن بحاله....إوعي تكوني لعبتي بديلك كدة ولا كدة يا نبوية

-لعبت بديلي؟ إخص عليك راجل؟ أنا برضة؟ طب إنت؟ قول ..قول وماتخافشي وسرك في بير يا برعي

-خلاص بقى راحت أيام الشقاوة يا نبوية........منها لله بقى البروستاتا والليمباجو

- البروستاتا والليمباجو؟ يعني ماكنتش مخلص طول الوقت ده يا بتاع البروستاتا؟ قول ...طب قول بقى وماتخافشي يا خلبوص

- بصراحة كل مرة كنت بتكوني فيها حامل كنت بألعب بديلي براني

-كل مرة؟ يخرب بيت أمك ستوتة يا منيل...كل مرة يا مفتري...يعني خنتني؟ يعني خنتني كدة يجي إتناشر مرة...دستة بحالها يعني؟...دستة خيانة زوجية يا أبو العيال؟...إخس عليك راجل دني ماكنتش قادر يعني تستنى لما أولد وأشد نفسي يا ديك البرابر

-ديك برابر؟ ماشي يا نبوية...طيب وإنت؟ برضة مش ناوية تعترفي؟ ولا نظام داري على سمعتك تقيد؟ ياولية قولي بقى ....أهو برضة تكفري شوية عن ذنبك...ما إحنا خلاص بقى يالا حسن الختام

-ذنبي؟ وحسن الختام؟ ماشي يا برعي ماشي يا سبعي.. على العموم أنا كنت مخبية عليك حاجة كدة صغيرة بس أدام إنت بقى راجل طفس وبتلعب بديلك خلاص أنا ح أقولك وأمري لله

-شاطرة يا نبويتي...قولي يالا بقى وماتخافيش ...وخلاص يا ستي اللي فات مات

-شوف يا برعي

-أيوة قولي يالا

-هما تلاتة بس

-تلاتة؟ تلاتة إيه؟

-تلات مرات بس وكانو طبعا غصب عني

-تلات مرات؟ تلات مرات وانا نايم هنا زي الكبنش

-مش إنت اللي سألت؟ خلاص ....بلاش بقى ...نسك ع الموضوع دوة عشان مانتخانقش بقى ع المسا

-لا طبعا ما ينفعشي ...قولي ده أنا لازم أعرف دلوقتي...وبالتفصيل الممل كمان

-صدقني غصب عني وربنا

-إزاي؟

- أول مرة كانت مع الجراح اللي عملك عملية القلب؟

-الجراح؟

-آه وكنا لسة متجوزين جداد ومكانشي معانا حق العملية وإضطريت ساعتها إن أجاري الدكتور أبو عين زايغة ده....وكل ده كان عشان أنقذك ساعتها م الموت وربنا...هو ده يعني جزاتي يا برعي؟ يعني كنت أسيبك ساعتها تموت؟ وبعدين قلتلك غصب عني والمضطر بيركب الصعاب

-يركب؟ ماشي يا نبوية في دي ممكن أسامحك وممكن نعتبره جميل

-بجد يا برعي؟ يعني سامحتني خلاص؟ كدة ممكن بقى أتشجع وأقولك ع المرة التانية...وأكيد برضه ح تسامحني

-أيوة يا نبوية قولي وربنا يسهل

-آه والله...وغصب عني برضة....فاكر من أربعين سنة كدة لما كانو عندكم في الشركة تقريبا ح يرفدو كل الموظفين بحجة التوفير والأحلال والتجديد؟

-آه فاكر

-فاكر؟ لما كنت إنت ساعتها زعلان أوووي؟

-آه فاكر

-فاكر بعدها برضه لما ما إترفدتش؟

-آه

وبعدها إترقيت ومسكت ساعتها المصنع

- آه فاكر طبعا

-هي دي بقى كانت المرة التانية يا برعي

-المرة التانية؟ مش فاهم

-مش فاهم؟ بقولك كنت ح تترفد خلاص ولولا إني عملت كدة وطاوعت رئيس مجلس الإدارة بتاعكم كنت زمانك طول الفترة دي عاطل وكنا متنا ساعتها م الجوع

-مدير الإدارة؟ مدير الإدارة ؟ مالقيتيش الا أبو باروكة

-أبو باروكة؟ ياراجل هو يعني كان بمزاجي؟ بقولك كنت ح تترفد وتدور صايع

-ح أترفد؟ ولو برضه....ده بباروكة يا معفنة وصابغ حواجبه

-يا راجل قلتلك غصب عني وكله ده برضه كان عشانك

-عشاني؟ ماشي يا فدائية ....ماشي يا ضحيت هنايا فداك ...طب والمرة التالتة كانت مع مين؟ قولي بقى ماهو أكيد التالتة تابتة

-خلاص ح أقولك.... بس إهدى بس شوية ...عشان أعرف بس أوصلهاك المرة دي ...أصل دي حاجة معقدة شوية يا برعي

-معقدة؟ معقدة إزاي يعني؟ خلاص مش لازم يعني تحكي بالتفصيل قوليلي بس مين وانا ح أفهم على طول

-يعني ح تفهم لو قلتلك

-طبعا بس قولي يلا

-حاضر

-يلا قولي

-مجلس إدراة نادي البلياردو

-ماله؟

-والإنتخابات بتاعتها

-مالها

-فاكرها؟

-آه طبعا فاكرها.... بس إيه علاقة ده بموضوعنا؟

-ما هو ده الموضوع يا برعي

-موضوع؟ إزاي؟ مش فاهم ..فهميني أكتر لو سمحتي

-شوف يا سيدي ...كنت إنت ساعتها ح تموت وترشح نفسك رئيس لمجلس ادارة النادي وكان ناقصلك بس ألفين صوت فاتصرفت يوميها ..

حزب الوغد

2012-01-08T13:58:00.002+01:00

لاتيز كابر

2011-12-28T11:17:00.002+01:00

الجامد أوووي

2011-12-12T19:32:00.003+01:00

-آلو مين معايا؟

-أنا واحد جامد أوووي

-جامد؟

-آه ومن طرف الواد علي وهو اللي إداني نمرتك دي

-علي مين؟

-علي زعتر يا حلوة

-وعايز إيه بقى يا سي جامد أوووي

-عايز إيه؟ غريبة أووي

-غريبة؟ هو إيه دة اللي غريبة يا واد؟

-أصل الواد علي قالي إنك بتعرفي تلاغي كويس

-ألاغي؟

-آه وح تفهمي على طول أنا عايز إيه أكيد؟

-أفهم؟ أفهم إيه؟

-يعني نظام معاكسات في التليفون وقلة أدب وكدة يعني ولا أنا غلطان؟

-لا مش غلطان يا حبيبي

-حبيبي؟ حلاوته .....أحبك يا أبيض

-بس إنت مش شايف إني كبيرة شوية عليك يا تامر؟

-تامر؟ حلاوته ..... ...إيه ده وكمان تعرفي إسمي؟....أكيد كلمك عني الواد إبن العفريتة ده؟ دوقرم ووربنا ياد يا علي

-لا طبعا ماكلمنيش عنك خالص

-ما كلمكيش ؟ طب إزاي؟ غريبة دي

-لا مش غريبة يا تامر يا سبكي

-تامر يا سبكي؟ إيه ده هو أنا بقيت مشهور للدرجة دي ولا إيه؟ ده إنت شكلك عارفاني بقى ...صح؟....طب منين؟ منين والنبي؟ قولى بقى يا حلوة ما تتكسفيش

-منين؟ م المدرسة يا حبيبي

- م المدرسة؟

-آه ...أنا ميس شادية مدرسة الإنجليش يا روح قلبي ....وقعتك سودة ومهببة بكرة يا جامد...لازم تجيب بكرة معاك باباك ...فاهم؟ قال جامد قال

-ميس شادية؟ يا نهار إسود....كدة برضة يا علي يا إبن ال......تعمل فيا المقلب ده؟ الله يخرب بيتك يا بعيد ...ضعت......ضعت وربنا .... (تراك)

- آلو.... آلو .....إنت رحت فين يا جامد.... .....إنت رحت فين يا جامد أووووي

إتنين في واحد

2011-12-09T22:57:00.002+01:00

السلف تلف والرد خسارة

2011-12-06T19:43:00.003+01:00

على نار هادئة

2011-11-01T19:00:00.005+01:00

-لو سمحت عايزة كيلو مشكل على ذوقك بس ياريت ما يكونش سمين

-عينيا يا هانم ...... شوية كباب ألف هنا وشفا ويستاهلو بق حضرتك

-يخليلي عينيك يا أخويا ...بس ياريت والنبي تكترلي الشطة , جوزي يا أخويا بيموت في حاجة إسمها الشطة
-غالي والطلب رخيص..... بس مش حرام البق المسمسم ده نشطشطوه كدة ع الصبح؟ عارفة يا مدام لو كان بس ينفع؟ كنت حطيتلك وربنا بإيديا دول عسل نحل في الكباب...أمال..... ماهو الحلو مالوش برضة غيرالحلو
-كلك ذوق يا معلم طب ياريت والنبي تتوصي كمان بقى بالبقدونس .... جوزي يا أخويا بيعشقه أووي ويقول عليه ده بيدي قوة ولا قوة مية حصان

-مية حصان؟ لا ربنا يقوية ويديله الصحة ع الفرسة اللي معاه

-أفندم؟

-لا بس أنا بقول أنا بحسده ع الجوهرة اللي معاه

-تحسده؟ ليه يا أخويا؟ ده إنت ألف واحدة تتمناك يا سي........؟

-عبدة...عبدة كفتة

-عبدة كفتة؟ إيه الإسم الغريب ده؟

-ده أسم وارثه أب عن جد...زي المحل ده برضة

-ياه المحل ده بتاعك؟ مع إنك لسة صغير وشاب يعني

-شاب هههههههههه الشباب شباب القلب ياهانم

-طب إنت عارف...أنا جوزي تقريبا يخلفك

-ياه...يخلفني طب وإيه رماك ع الكندوز يا لباني؟

-أفندم؟

-قصدي حتة كوتليت كدة زي حضرتك تقع في ايد واحد كبارة...صحيح يدي الموزة للي بلا سنان

-موزة؟ ربنا يكرمك...طب ده أنت ما شفتنيش قبل ما أتجوزه...كنت حاجة تانية خالص

-حاجة تانية؟ لا مش معقول ...طب إنت كدة مش ناقصك حاجة خالص ...بصراحة بقى ست الستات وزي ما الكتاب بيقول...طب إنت عارفة يا ست....؟

-نادية يا أخويا

-عاشت الاسامي ....عارفة أول ما هليتي عليا كدة قلت يا صلاة النبي على القمر اللي جاي في عز الضهرده

-قمر؟ ربنا يخليك

-آه وربنا قمر...هو البيه جوز حضرتك مش بيقولك كدة ولا إيه؟

-ينيله بنيلة ده عامل زي البرطة

-حضرتك قلتي حاجة؟

-لا بس كنت بقول خلى بالك م القطة لتخطف الكباب ....لا يا أخويا لا بيقول ولا بيعيد

-لا مالوش حق.... لما إنت مايتقلهاش يا قمر أمال يتقال بس لمين ؟

-يعني إنت بتقول لمراتك برضة كدة؟ قصدي يعني بتدلعها؟

-ياريت ....بس يا خسارة لأ

-ياريت؟ ولأ؟ إيه ده هما الرجالة خلاص إتخرسو الإيام دي ولا إيه؟

-لا حضرتك روحتي لبعيد أووووي...أنا مش متجوزأصلا

-مش متجوز؟ بجد؟ لا والله؟

آه والله أنا زي متقولي كدة متجوز الشغل....والله يرحمها إمي كانت كل حياتي

-وكمان أمك ميتة؟ يا حلاوة

-أفندم؟

-قصدي الله يرحمها ....يعني إنت عايش لوحدك؟ ومفيش حد بيراعيك؟

-آه في شقة طويلة وعريضة في المهندسين وحالتي لا تسر عدو ولا حبيب.....الوحدة وحشة

-طب ليه ماتتجوزش؟ أهو برضة تلاقى واحدة بنت حلال تاخد بالها منك وتحبك وتحبها

-دورت كتير بس للأسف مفيش نصيب

-مفيش نصيب؟ ليه كدة؟ أكيد بقى عايز حاجة خاصة ومفيش منها الأيام دي؟

-لا والله مش كدة ...كل اللي عايزها تكون بس بنت حلال وتكون برضة حلوة كدة زي حضرتك

-ميرسي ده بس من ذوقك....طب ما الحلويين كتير يا عبده....سوري قصدي يا سي عبده
-وسوري ليه؟ ما نخليها كدة بدون ألقاب...طب ده حتى أنا وربنا قلبي إتفتحلك أول ما شفتك يا ست نادية

-ست نادية؟ إنت مش قلت بلاش فهمي نظمي رسمي

-ههههههه آه صحيح....وربنا نسيت....شوفي بقى أنا بصراحة مش عايز سوسو
-سوسو مين؟
-بصراحة أنا بالصلاة ع النبي عايز نادية وماليش في النوع بتاع سوسو....يعني بصريح العبارة عايز واحدة زييك بالظبط ....وربنا ح أكون أسعد واحدة لو ده حصل
-يا خسارة لو كنت بس مش متطلقة كنت قلتلك نادية تبقى أسعد واحدة لو إتجوزت واحد زييك يا عبد

-متطلقة؟ هو أنت مش متجوزة ولا إيه؟ أمال إيه حكاية جوزك والشطة دي؟

-دي حكاية طويلة يا عبده...أبقى أحكيهالك بعدين....المهم إنت لسه برضه عايز تاخد نادية؟ ولا عشان يعني متطلقة ماتبقاش قد المقام؟

-مقام إيه وكلام إيه يا نادية ؟ هو أنا بزمتك كنت أحلم مرة بواحدة زييك؟....ياحلاوة يا أولاد ولله وح نتدلعو خلاص يا دنيا ...والله وأمك نظيرة داعيالك قبل ما تموت يا ولا ياعبده....والله أنا في حلم يا أخواتي

أيوة يا دنيا أيوة كدة عمري ما شفتك حلوة كدة.

-بذمتك مش بدل ما أنت عاملي فيها عب الحليم كنت سألتني أحسن ح أطلب إيديك من مين يا نونا؟

-حلاوته....نونا....أموت في نونا وحلاوة نونا....آه صحيح منين يا نوننة قلبي؟ ح أطلبك من مين لا مؤاخذة؟

-من مامتي يا دودو....
-من مامتك؟ طب والحاج الوالد؟ فين يعني؟ فيص لا مؤاخذة؟
-فيص؟ إيه الألفاظ البلدي دي؟ بابي الله يرحمه مات من زمان أووووي...
-الله يرحمه أكيد الحاجة ماما كانت شديدة برضة كدة زييك يا نونا وصحته خسعت يا عيني..ماهو الجمال ده يا جميل وراثة ولا مؤاخذة

-الله يرحمه...المهم لما تيجي عندنا إبقى هات معاك تشكيلة حلوة كدة ....حاكم ماما تموت هى كمان في الكباب والكفت.....ولو عايز تكسبها ياحلو من أول مرة عليك بقى والنيفا...هبراية كدة ولا فخدة عشان تعرف إنك مريش يا دودو وتوافق عليك على طول

ـياسلام غالي والطلب رخيص إن شاء الله ح أجيبلها معايا نص خروف مشوي تنأنأ فيه كدة بقى براحتها..ربنا يخليها لينا حماة المستقبل يارب

-ويخليك ليا يا غالي....ماتنساش تبقى تتصل بيا قبلها ....وده رقم موبايلي ....وإن شاء الله ناوي تيجي إمتى؟

-بكرة؟ ينفع بكرة؟

-بكرة؟ لا بكرة إيه؟ ده مش سلق بيض يا عبد....تعالى يوم الحد بعد المغرب نكون جهزنا نفسنا وإستعدينا
-ياه لسه ح أستنى ليوم الحد ...ربنا يصبرني لحد اليوم ده

-ح تصبر ياعبده أكيد ...يعني صبرت ده كله مش قادر تصبر كمان يومين؟

-يا مسهل يارب
-إن شاء الله خير...أنا ماشية بقى أحسن إتأخرت
-ماشية؟ طب والطلبية؟ دي زمانها حتى بردت خلاص
-ياه....تصدق نسيتها خالص.....متشكرة أوووي يا عبده......خلينا بقى على موبيلات ....أهي النمرة بتاعتي معاك....تقدر تتصل بيا أي وقت....يالا باي

**********************************

-ألو أيوة يا متولي أنا نادية
-أيوة إنت فين م الصبح كل ده بتجيبي الكباب يا ولية
-ولية في عينك.... طلقني يا متولي
-إنت إتهبلتي يا بت ولا إيه؟...كل ده عشان بعتك تجيبي كيلو كباب وكيلو حلاوة طحينية؟
-طلقني يا متولي

إنت عليكي عفريت النهاردة إسمه طلقني ولا إيه؟ مالك يا نونو؟ في حد زعلك عند الكبابجي؟

-برضة لازم تطلقني وتبعتلى ورقتي النهاردة على بيت ماما

-النهاردة؟ كدة برضة يا نونس عايزة تسيبيني وكمان يوم الخميس يا وحشة؟ طب ده أنا محضر نفسي لليوم ده من إسبوع ......طب إسمعي...تعالي وهاتي الكباب والحلاوة وبكرة أطلقك...ماشي؟ إتفقنا؟
-ياراجل يا ناقص ح تفيد بإيه الحلاوة ولا الكباب معاك؟ ده إنت خلصان خالص من يوم ماعرفتك...والنبي لو كلت حتى قالب الحلاوة بحاله برضة مفيش فايدة...خلاص يا متولي...إنسى ....أنا رايحة لماما دلوقتي ومستنية ورقة الطلاق وسايبالك الجمل بما حمل يا سبع البرمبة........سلام يا جامد....سلام يا جامد أووووي
-ألو.....ألو....الو ....ردي يانادية أبوس إيديكي ردي ....ألوووووووووو

الديب السحلاوي

2011-10-28T21:03:00.004+02:00

الدلدول

2011-10-15T19:16:00.002+02:00

المصيدة

2011-10-10T21:21:00.004+02:00

تمام يا أفندم

2011-09-25T17:16:00.004+02:00

تمام يا افندم هي أحدث حكاية لي من سلسلة حكواتي ومغنواتي. بطل الحكاية هو سيد شبطة الشهيرالذي أنضم أخيرا لجهاز الشرطة بعد قيام ثورة 25 يناير والتعديلات الاخيرة في وزارة الداخلية وذلك في محاولة من الوزارة للقضاء على البلطجة التي انتشرت في الشارع المصري. يعني نظام من دقنه وأفتله ...ياتري سيد ح يساهم بجد في تقليص عدد البلطجية؟ طب إزاي؟ ياترى اللي بيقتل بيكرم ولا يتقتل؟ واللي بيسرق بيروح السجن ولا يروح مارينا؟ اسمعوا بقى معايا شبطة في وظيفة ميري بعد ما آخر مرة سمعناه من 11 شهر تقريبا ..ياترى ح يكون عامل ازاي ؟ وكيف انه بعبقريته جعل أخيرا للمصري سعر؟ ياتري حتسمع تسع دقائق بحالهم؟ ياتري النت ح يساعدك تسمع بدون تقطيع؟ ياتري بجد ح تضحك؟..ده اللي ح أشوفه في تعليقاتكم.. وبجد كل تعليق بيسعدني .. أسيبكم بقى مع الحكاية

لو بتقطع دوووس على ستوب اول ما تشتغل لحد ما تتحمل كلها واسمعها

تمام يا أفندم from tarkieb on Vimeo.

اللينك للام بي ثري
http://www.4shared.com/audio/tRp-LNIT/tamam.html

شيكولاتة بالبندق

2011-09-13T16:51:00.005+02:00

--مامي أنا بحبك أووي وعايز أتجوزك

ههههههههههههه - .........يا خبر؟ تتجوز ماما؟ لا طبعا ماينفعش يا زيزو

-ماينفعشي ليه؟ هو إنت مش بتحبيني؟

-طبعا بحبك ........بس ما يصحش.... حد برضه يجوز مامته؟...... عيب وحرام كمان

-لا ماليش دعوة انا عايز أتجوزك

- قلتلك ما ينفعشي بطل زن بقى

-طب ليه بس؟ هو أنا وحش؟

-وحش؟ يا خراااااااااشي ده إنت قمرايا

-طب ليه بس بقى بتقولى ماينفعشي؟

ماينفعشي عشان ...عشان........عشان أنا كبيرة وإنت أنن

-أنن؟ أنا خلاص دخلت الحضانة

-آه صحيح كبرت بس الفرق بينا برضه كبير

-فرق إيه؟

- تلاتين سنة يا زيزو ودول مش شوية

-تلاتين سنة؟ هو ده كتير؟

-آه كتير

- طب وإيه يعني......... عادي

-لا مش عادي.....

-طب ليه؟

-يا بيبي العريس لازم يكون قد العروسة

-قدها؟ في الطول يعني؟

-مش في الطول بس

-طب وإيه تاني؟

-السن مثلا

-إيشمعنى؟

-أكيد عشان يقدرو يفهمو بعض

-يفهمو بعض؟ إيه ده؟ هما يلعبو سوا؟

-آه حاجة زي كدة

-وعشان كدة لازم يبقو قد بعض؟

-آه بالظبط كدة

-طب إيشمعنى نوسة؟

-نوسة؟ نوسة مين؟ أختك؟

-أه نوسة

-مالها نوسة؟

-بتحب عمو صابر ...وهو عجوز وهى أنن

-عمو صابر؟ عمو صابر مين يا واد؟

-عمو صابر جوز طنط فيفي

-جوز الست فيفي جارتنا ؟

-آه

-آه ده عادي يا حبيبي

-عادي؟ إزاي عادي؟

-يعني اكيد حب كدة وكدة

-إزاي يعني؟

-يعني بتحبه زي باباها

-لا يا مامي دي بتحبه بجد مش كدة وكدة... وح تتجوزه كمان

-تتجوزه؟

-آه أصلها بترقصله

- يا نهار أبوك إسود ومنيل .. بترقصله؟ إزاي يا واد؟

- زي ما إنت كدة بترقصي لبابا يوم الخميس

-وعرفت منين؟

-شفتها

-شفتها فين؟ وإزاي يا مزغود؟ إتكلم

-في الكوبوتر

-في الكوبوتر؟ قصدك الكومبيوتر.....طب إزاي؟ فهمني

-كانت فاتحة الكاميرة وبترقص

-كاميرة إيه؟ الكومبيوتر؟

-اه كاميرة الكوبوتر

- طب إنت إيش عرفك إنها كانت بترقص لعمو صابر؟ مش يمكن مظلومة وكانت بترقص مع نفسها؟

-لا يامامي أنا شوفته

-شوفته؟ شوفته فين يا زيزو؟

-في المونيتول وكان بيقلع

-بيقلع فى المونيتور؟ خراب إسود ............نهارك زي وشك يا صابر الكلب . بقى تعمل كدة في عيلة لسة مراهقة وقد بنتك؟.....شوية بس لما يجي باباك وأنا أقوله

-بس أنا خايف يا مامي

- خايف ليه بقى؟ ماتخافشي... أبوك قدها وقدود

-خايف إن طنط فيفي مش تجيبلى شيكولاتة تاني؟

-طنط فيفي؟ وهي فيفي مرات صابر كانت بتجيبلك أساسا شيكولاتة؟ دي ست جلدة طول عمرها

- يا مامي اصلها بتحبني

-بتحبك؟ حبك برص وعشرة خرس ...ومن إمتى الكرم ده بتاعها؟ ....إتوكس يا واد

- طب دي كل ما تيجي تديني شيكولاتة

-فيفي بتديك إنت شيكولاته؟

-آه وربنا وبالبندق كمان

-طب إمتى؟

-الصبح يا مامي

-الصبح؟ إمتى؟ لما بروح الشغل؟

-آه وتدينا إحنا الإتنين

-تديكم؟ إنت ومين يا واد؟

-أنا وبابا

-وإنت وبابا؟ يا لهوي...يا خرابي ...طب وبعدين؟

-بعدين بابا يقولها لو مسكتك يا فوفة ح تاخدي إنت الشيكولاتة كلها

....
-وبيمسكها يا واد؟

-آه وياكلها في بوقها كمان

-يا نهار أبوك إسود ....بيأكلها في بوقها؟

-مامي.....أنا بحب طنط فيفي ونفسي لما أكبر أبقى أبوسها

-تبوسها؟

-آه زي بابا كل يوم

-كل يوم؟

آه كل يوم.....بيهريها بوس

-كل يوم؟ يخرب بيت أبوك ....كل يوم يا حسين؟ كل يوم بتبوس فيفي يا خاين؟ ده إنت بقالك عمر مابوستني...إخص عليك راجل دني

- ماما إنت زعلانة عشان بابا بياكل شيكولاته وإنت لأ؟

-لا يا حبيبي...أنا زعلانة من باباك عشان معندوش دم وراجل عينه فارغة؟

-عينه فارغة؟ يعني إيه يا مامي؟

-يعني بيشوف ستات

-بيشوف؟ آه ......بيشوف كدة زي أونكل عادل؟

-زي أونكل عادل؟ عادل أخويا؟

-آه خالو عادل

-وده ماله هو كمان؟

-بيشوف

-بيشوف؟ ما هو كلنا بنشوف يا واد

بس هو بيهش الحمام

-بيهش الحمام؟ حمام إيه؟ أنا مش فاهمة منك أي حاجة...فهمني بشويش وبالراحة كدة

-لما كنت عند تيته

-آه ............وبعدين؟

قال لتيتا انا رايح اهش الحمام

-مين خالك عادل؟ قالها كدة؟

- آه

- إنه ح يهش حمام؟

- آه

- فين؟

-م الشباك اللي ع المنور

-طيب ليه؟

-معرفش

-وبعدين؟

قلتله خالو خدني معاك

-وخدك؟

-آه بالعافية

- وهشيت الحمام؟

-لأ

-لأ؟ أمال نزلتو تهببو إيه؟

-خالو كان بيدور

-بيدور؟ على إيه يا واد؟

--معرفش.... بس أكيد حاجة عند أبلة تهاني

-تهاني؟ تهاني مين يا منيل؟ بنت صفية جارة ماما؟

-أه أبلة تهاني

-وكان بيدورعندها؟

-آه

-يخرب بيتك يا عادل...... طب كان بيدور إزاي؟

-بيشوف

-بيشوف؟ ما أنا عارفة إنه بيتنيل بيشوف ...بس إزاي؟

-من خرم الشباك

-من خرم الشباك؟ هي حصلت يا عادل؟ بتفتح عين الواد ع الحاجات دي؟

بيشوف بيشوف يا واد؟ ولا كدة وكدة؟

- بيشوف وهي بتستحمى

-بتستحمى؟ يا فضيحتي..... وخلاك تشوف معاه بالمرة؟ ماهي كملت بقى.... يخرب مخك ياعادل

-لأ .....قالي إنت لسة صغير....بكرة تكبر وتستلم العهدة يا معلم...ماما يعني إيه عهدة؟

-إبقى إسأل خالك بكرة لما نروح عند تيتة

-ماما أنا عايز أكبر بقى وأشوف

-تشوف؟ يا خرابي

-آه مع خالو عادل

-عيب يا زيزو إختشي ...عيب تشوف البنات

-عيب؟ ليه؟

-عشان....عشان حرام تبص على بنت وهي مش عارفة

-يعني لازم أصفرلها يعني عشان تعرف؟

-تصفرلها؟

-آه زي خالو جمال

-خالو جمال؟ جمال أخويا؟ وإيه فكرك بيه دلوقتي؟

-بيصفر

-ما أنا عارفة إنه بيتنيل بيصفر...بيصفر لمين يعني ؟

-لطنط سلوي

-طنط سلوي؟ سلوي مين؟

-بنت طنط جيجي

-يا نهار أبوكو إسود إنت وصلتو كمان لآخرالعمارة؟

-آه

-آه؟ جاتك أوى.......دول ساكنين يا ولا فوق ماما وفي حالهم

-آه

-آه؟ إنت علقت يا واد؟

-أه

-طيب ...وخالو جمال كان بجد بيصفر لسلوي؟

-آه

-آه؟ تاني يا زيزو ح تعلق؟ فين بالظبط؟

-ع السطح

-وبعدين؟

-وبعدين الجو يبقى حر

-بيبقى حر؟ إزاي؟ واحدة واحدة عليا

-خالو يصفر

-آه

-أبلة سلوي تفتح الشباك

-آه

-هههههههههههه ....مامي إنت علقتي إنت كمان؟

-آه عديتني منك لله....طب عرفت منين إن الجو بيقى حر؟

-من خالو

-من خالو جمال؟ إزاي؟

-بيفضل يقول ناااااااااااااااااااااااار .......... ناااااااااااااااااااااااار يا بنت الإيه

-نار؟ جمال أخويا كان بيقول كدة؟

-آه وطنط سلوي تقلع

-تقلع؟ يا فضيحتي يا أمى

-م الحر يا مامي

-م الحر؟ ربنا ياخد مامي عشان ترتاح ...دي مصيبة إيه دي يا ربي؟

-مامي....مامي.........مامي

-في إيه؟ عايز إيه تاني؟

-أنا عايز أكبر بقى عشان أصفر

-تصفر؟ جتك خيبة عليك وعلى أمك يا بعيد .....يالا روح نام بقى وإتخمد ....إنت سهرت كتيرالنهاردة

-طب مش ح نتجوز بقى؟

-إمشي جاتك جواز في عينك

-مش جايلي نوم..... وح استنى بابا

-قوم نام يالا بدل ما أقوم ألطشلك.....قوم يالا ...نامت عليك حيطة

-مامي....مامي.........مامي

-يخرب بيت مامي...... واللي جاب مامي ...في إيه؟ عايز إيه؟

-إنت وحشة....أنا مش بحبك يا وحشة

-ماشي يا سيدي أنا وحشة وبنت ستين كلب روح بقى نام وخلصني

-كل ده عشان عمو رمزي؟

- عمو رمزي؟ عمو رمزي مين يا واد؟ خد تعالي هنا يا منيل

-عمو رمزي اللي ساكن قدامنا

-مين؟ الواد الأبيضاني والحليوة ده؟

-لا الأبيض الوحش

-وده ماله هو كمان؟

-أنا شفتك إمبارح بتكلميه

-أنا؟

-آه في الشباك وبتضحكيله.كمان....إنت ح تتجوزيه؟ مش كدة يا وحشة؟

-شفتني؟ يا نهار أبوك إسود.........خد تعالى يا منيل.....خد تعالى قولي إنت بتحب الشيكولاتة سادة ولا بالبندق؟

مخبأ العقيد

2011-08-27T15:25:00.002+02:00

خلاص ح تنزل المرة دي

2011-08-18T22:57:00.002+02:00

المحاكمة

2011-08-15T19:01:00.005+02:00

الأستاذ مزيكا

2011-08-13T15:01:00.001+02:00

ثرثرة ع النيل

2011-08-06T22:43:00.006+02:00

أنفي كل هذه الاتهامات جملة وتفصيلا

2011-08-04T19:22:00.015+02:00

كل ثورة وأنتم طيبين

2011-07-29T22:13:00.002+02:00

إنت الحب

2011-07-19T21:16:00.005+02:00

-كدة برضه يا سعد؟ هي دي آخرتها؟ تتجوز عليا يا ناقص بعد السنين دي كلها؟

-أتجوز عليكي؟ إيه الكلام الغريب ده يا ولية؟ أنا برضه أعمل كدة؟ ده إنت الحب كله يا ظازة

-ظازة في عينك راجل كداب وأونطجي......كل بعقلى حلاوة يا واد...فاكرني هابلة ولا لسة بريالة يا سعد؟ ما سرك خلاص إنكشف وبان ...ولعلمك يا سعد أنا قلبي وربنا كان حاسس من يوميها إنك من مدة مش مظبوط كدة

- مش مظبوط ؟ مش مظبوط إزاي يعني؟ إنت ح تشتغليلي ولا إيه ع الصبح؟

-ح أشتغلك؟ أنا برضة اللي ح أشتغلك يا عمر؟......من إمتى يا شايب يا عايب بتعرف البت الصايعة دي؟

-بقولك إيه يا ظازة بلاش بقى والنبي تغلطي في سوسو عشان خاطري دي بت غلبانة ومكسورة الجناح

-سوسو؟ يا صلاة النبي وكمان إسمها سوسو؟ وليك عين تزعل عشانها يا زينة الرجالة؟ يا حلاوة يا أولاد ...الله يرحمها أمك اللي كانت بتغلط في سلامو عليكم...والله إتنجرت وبقيت بتعرف تقول سوسو ولولو يا سعد؟ سوسو يا سعد؟ سوسو يا راجل يا كبارة؟ والله عال بقينا بنعرف ستات من عينة سوسو .........لا والنبي إعملهم عليا شغل التلات ورقات دول وتعالى خش في عبي خش إنت والبت الصايعة بتاعتك دي كمان...قال سوسو قال؟

-يا ولية يا بوز الإخس هو حد يطول بذمتك يتجوز واحدة زي سوسو؟..إتلهي بقى وإتنيلي إسكتي ....... وربنا دي ضفرها برقبتك.. ويالا بقى ان كان عجبك ؟

-لا طبعا مش عاجبني وما يعجبش برضه ربنا يا إبن بهانة

-ماهو إنت السبب با حفيظة......إنت اللي خليتيني أعمل كدة....عمري في حياتي ما شفت منك ريق حلو.... على طول حرماني م الدلع والهشتكة

-الهشتكة؟ الهشتكة يا نوغة؟

-يا ولية نفسي أحس إني عايش بحق وحقيقى ...عايش زي بقية خلق الله... وبصراحة بقى.... البت سوسو خلتني احس إن الدنيا لسة بخير.... ومريحاني أوووي ع الآخر....عارفة ليه؟ عشان بتحبني وبتموت فيا كمان...طبعا إنت مالكيش في الحاجات دي؟

-بتموت فيك؟ بتحبك على إيه يا حسرة؟ على شخيرك اللي يصحي الميت؟ ولا على الكومبنيشين اللي عمرك ما بتشده ياراجل وحالف إنك لازم تغم نفسنا يوماتي ع الصبح

-كومبنيشين إيه وقرف إيه؟ يا شيخة ده الملافظ سعد برضه .....متجوز أنا سباك بايني ولا إيه؟ بالزمة إنت ست إنت؟ تعرفي إيه إنت عن الرومانسية؟

-خليتها ليك دي يا روميو الغرام

-طبعا ده حاجة بالنسبة ليكي زي تسليك البلاليع كدة؟ وبتستغربي دلوقتي إني إتجوزت عليكي؟ جتك ستين نيلة..... ده أنا وربنا ليا حق بقى أتجوز عليكي مية مرة من ساعة ليلة الدخلة

-ليلة الدخلة؟ يا أخي إتوكس ...ما تخلنيش أفتح عليك مواضيع قفلناها يجي أكتر من خمسين سنة.....طب بزمتك يا سعد البت الصايعة دي رضيت إنك تبوسها؟ يعني رديت تتباس وما اغماش عليها من ريحة بقك؟

-يا ولية إتكسفي بقى على نفسك..... بوس إيه وبق إيه؟ هو الجواز عندك بوس وكلام فاضي وخلاص؟ بلاش قلة القيمة دي.....إحترمي نفسك بقى شوية ده إنت ولاد ولادك متجوزين ومخلفين كمان

-أنا اللي أحترم نفسي برضه؟ أنا اللي رحت إتجوزت عيلة من دور أحفادي؟ هما الرجالة بيتهبلو يا إخواتي لما بيكبرو ولا إيه؟

-يتهبلو في عينك ولية ناقصة بصحيح

-تفرق عني إيه يا سعد؟ ؟ قول يا عريس.......صغيرة ؟ طب ما أنا كنت صغيرة .....حلوة؟ طب ما انا طول عمري برضه حلوة وزي القمر..فيها إيه يعني زيادة عني يا دني؟

-ياولية هو إنت فيكي حاجة عدلة أساسا؟ هو إنت لسة حاسبة نفسك م النسوان؟

-نسوان؟ هما دول برضه نسوان يا دغوف؟ دول عيرة وشوية سيليكون

-شوية سيليكون؟ بقى سوسو اللي زي لهطة القشطة دي بتقولي عليها شوية سيليكون؟ امال إنت إيه بقى؟ أبلاكاش؟ حجر جيري؟

-آه وربنا سيليكون.. بس هو العيب بقى ع النظر

-العيب ع النظر؟ بقى سيبتي جسمها كله اللي عامل زي أنبوبة مرهم الروماتيزم الملعلطة ومسيكتي بس في السيليكون؟ تصدقى؟ عندك حق وربنا..العيب فعلا ع النظر...تكونش دي عقدة نقص وعندك من زمان وأنا مأعرفش؟

-عقدة نقص يا ناقص؟ هو انا أتوه عن شغل التجميل وعمايله؟ بالك إنت بس يا جلدة لو كنت زمان بس طاوعتني وظبطتلي بس شفايفي ولا كنت كبرتلى الصدرشوية وربنا كنت زماني ما فرقت عنها خالص....لكن أعمل إيه في بخلك وشحك؟ يا جلدة

-ههههههههههه تفرقي عنها؟ ياولية ده إنت عايزة عمرة مش عملية تجميل..ده إنت عايزة زويل يعملك مشروع قومي لوحدك....بالك إنت؟ إنت مفيش حاجة فيكي شغالة إللا لسانك ده اللي عايز قطعه ....وكويس بقى إنك خربتيها على نفسك وآديني ح أمشي وأسيبهالك مخضرة تمرحي فيها براحتك

-تسيبهالى؟ كدة برضه؟

- تصدقى يا ولية؟ أنا بأضرب نفسي ستين جزمة إني ما روحتش للبت سوسو دي من زمان.

-ما تقدرشي.. ما تقدرشي يا سعد

-ما أقدرشي؟ ما أقدرشي إيه يا ولية؟ إنت نسيتي نفسك ولا إيه؟

-ما تقدرشي وخلاص

-وبرضه بتقولى ما تقدرش.... إنت شاربة حاجة يا ولية ع الصبح؟

-مش أنا بس اللي شاربة يا عمر

-مش إنت بس اللي شاربة ؟ وما أقدرش؟ هو في إيه بالظبط؟ كركبتي بطني ع الصبح يا بعيدة ...ما تتعدلي بقى وكلميني عدل

-ولسة يا سعد إنت لسة شوفت حاجة

-ولسة؟ في إيه يا ولية؟ إنت ح تردي عليا؟ ولا عليا الطلاق بالتلاتة أقوم أشلفط وشك أكتر ماهو متشلفط

-فاكر يا سعد ليلة الدخلة أنا قلتلك ساعتها إيه؟

-أما ولية مهوسة بصحيح..هو أنا ياولية ح أقدر افتكرده بذمتك؟ ده أنا كنت زي المتبنج وحياتك م الصدمة....ده بوز يبنج فيل وربنا لوحدة

- الله يسامحك يا سعد...ماشي يا سعد ...أنا يا سعد ساعتها قلتلك إني أوعدك إني ح أكون ليك إنت وبس.... إنت وبس دنيا وآخرة

-يا نهار أبوكي إسود .....دنيا وآخرة؟ إنت ناوية يا ولية تكبسي على قلبي في الآخرة كمان ولا إيه؟ لا يا حلوة يفتح الله....حدقنا كتير بقى في دنيتنا عايزين مرة بقى نحلي

-لا ح يحصل يا سعد وح يحصل وغصب عن عين أمك بهانة الله يرحمها وح أثبتلك دلوقتي كمان إني قد كلمتي دي

-تثبتي؟ ولية؟ إوعي تكوني؟ إوعي تكوني عملتيها؟

-ما أقدرش أستحمل يا سعد..ما أقدرش أستحمل إن بعد العشرة دي كلها تيجي بت مفعوصة زي دي وتاخدك مني...دي عشرة عمر يا سعد...يا جوزي يا أبو عيالي

-عشرة عمر؟ تقومي تسميني يا مجنونة؟ بتسميني يا رمة يا بنت الرمة؟

-ماتشتمش أمي يا سعد شويتين وح نقابلها كلنا وأنت عارف بقى هي قد إيه ماكانتش بتطيقك؟...أحترم نفسك ياراجل بقى على الآواخر ...

- ح نقابل وكلنا؟ إنت؟ إيه دة؟ إنت؟

-أيوة .....أنا شربت معاك برضه الشاي أبو سم

-يا مجنونة يابنت المجنونة

-ماتشتمش أمي يا سعد بقولك

-طب والعيال يا فالحة؟ مين ح يخلى باله منهم لما نتكل كلنا بقى كدة بربطة المعلم

-العيال كبرت خلاص وليهم رب إسمه الكريم يا حبيبي

-حبيبك؟ حبك برص يا شيخة.......ربنا ينتقم منك يا وش الفقر

-ومنك يا حبيبي

-هو في اكتر من كدة إنتقام؟ ده يكفي إنك جاية ورايا حتى فى التربة.....حسبي الله ونعم الوكيل مت شهيد الغباء يا سعد....منك لله يا بعيدة ..وربنا مظلوم وأتسميت أونطة....وماأستاهل النهاية السودة دي أبدا

-مظلوم؟ دلوقتي بقيت مظلوم؟ خلى الهشتكة تنفعك بقى يا بتاع سوسو

-سوسو إيه ونيلة إيه؟ يا ولية إعقلي هي بذمتك سوسو اللي زي القمر ح ترضى تتجوزني على إيه؟ على صحتي المخسعة؟ ولا شبابي اللي راح من أول ما شفتك؟ منك لله.....ضيعتي مستقبل حياتي أونطة

-يعني مفيش سوسو؟

-يا ولية ده شكل واحد برضه يقدر على سوسو؟ ....ده أنا مقدرتش في شبابي ح أقدر دلوقتي؟ ده أنا أعتزلت الفن من أول ما عرفتك...ده إنت تخلي الرجالة ما يهوبوش ناحية صنف الحريم ده بتاتا...ده إنت ذو قوة قتل ثلاثية يا بعيدة

-سامحني يا سعد يقطعني

-أسامحك؟ بقى بعد ما موتيني عايزاني برضة أسامحك؟

-أموتك؟ إنت صدقت يا عبيط ولا إيه؟ تتقطع إيدي يا أبو سامبو...ده كلام كان كدة وكدة بس من غيظي.....هو إنت برضه تهون عليا يا راجل؟

-لا يا شيخة ....يعني سيبتي مفاصلي وجبتيلي تلبك معوي وإسهال وعايزاني دلوقتي كدة بكل سهولة أسامحك؟......روح يا شيخة ده إنت هزارك تلم زي أمك الله يرحمها بجد

-مش إنت برضة اللي سرحت بيا وخلتني أصدق إنك إتجوزت عليا؟ خلاص سماح بقى......ودي قصاد دي يا حبي.... يالا تعالى بقى خلاص وهات بوسة وصالحني

-.بوسة إيه وقرف إيه؟ إوعي يا ولية سيبيني..عايز أخش الحمام ح أموت خلاص ....منك لله بطني سابت بسببك

-طب هات البوسة وروح الحمام

-ياولية سيبيني أخش الأول وبعدين أديك البوسة

-يعني مش زعلان خلاص؟

-يا ولية هو أنا لو كنت بزعل منك كنت قدرت إستحملك أو أمك العمر ده كله؟

-أصيل يا سعودتي

-يالا سيبيني بقى مش قادر ... مش قااااادرررر وربنا....لا بجد دي إستوت يا حلوة وطلبت الآكالة

-طب إسمع....إسمع يا سعد

-في إيه تاني؟ إشهلى بقى أحسن خلاص مش قادررررررررررررررر

-بقولك إيه؟ بقولك إيه

-يا ولية خلصي بقى.....اللهم ما طولك يا رووووووح

-ماتنساش يا حبيبي والنبي لما تخلص تبقى تشد الكومبنيشين.....إحنا يا أخويا مش ناقصين قرف ع الصبح

السوجارة في العمارة

2011-07-03T17:42:00.004+02:00

-أنا برضة اللي أروح وأجيبلك الدخان يا راجل؟

-يا ولية تعبان وشقيان م الصبح فيها حاجة دي؟

-تعبان؟ يا راجل إتكسف على نفسك بقى.....من يوم ما عرفتك وإنت يوماتي ع الاسطوانة دي ...عايزة حاجة يا سنية قبل م أروح الشغل؟ وبعدها تطلع تقعدلى برة ع الدكة... وبالليل تعبان وشقيان يا أولاد...شغل ايه ده يا أبو شغل؟ ده اللي يشوف كدة يقول ده الشغل مقطع بعضه

-أقعد ع الدكة؟ انت بتستهوني يا ولية بالقعدة دي؟ وحياتك إنت ده لولايا أنا لكانت العمارة دي وربنا إتقشطت من زمان وبقت ع الحديدة.....مش كفاية الإنفلات الأمني والفلول اللي ماليين البلد دلوقتي

-لا والنبي ضحكتني ..يا أخي إتلهي.....بزمتك إنت فيك زقة ياراجل؟..أمن إيه؟ ونيلة إيه؟ ده أنت من ساعة ما وعيت ع الدنيا وإنت قاعد القعدة المنيلة دي ... خيال مقاتة وربنا ...قاعد قدام العمارة لا بتهش ولا بتنش.....مش أنا اللي يا حسرة طالع عيني وعين أهلى بطلبات سكان العمارة اللي ما بتخلصش دي.... من كنس لمسح لمجايب خضار لطوابير العيش........بلا نيلة قال تعبان قال م الشغل؟

-يا ولية يا لوكعية روحي بقى الراجل قرب خلاص يقفل

-أروح وأتنيل إيه؟ إنت ياراجل صدقت إني رايحة بجد ولا إيه؟ ..مش كفاية إن صحتك متهببة ومقندلة م السكر تقوم تتنيل وتبوظها أكتر بشرب السجاير؟ وربنا إنت واقف عليا بخسارة وأتحسبت عليا جوازة أونطة والسلام

-يا ولية بقى داخلة ع السبعين ولسة برضة بتفكري في الحاجات دي؟ إخص عليكي... ولية ناقصة بصحيح..طب إتكسفى على دمك...ده إنت ولاد ولادك خلاص بقو بشنبات

-برضة مش رايحة وأعلى ما في خيلك إركبه بقى يا كامل

-طب عليا الطلاق لو ماروحتي دلوقتي للبقال ما انت بايته فيها خالص الليلة

-أنت يعني ح تطردني من قصر العروبة يا خي ؟ إيشحال إنك مسكني في حتة أوضة معفنة في بير السلم؟ شقة إيه دي يا أبو شقة اللي بتحلف بيها دي؟

-يا ولية يا فقرية ماتوجعيش قلبي بقى...أبوس إيدك قولي بس لأحمد البقال علبة سوبر لعم كامل وهو ح يفهم على طول

-مش رايحة

-لا ح تروحي ورجليك فوق رقبتك بقى يا سنية يا بنت أم سنية

-برضة مش رايحة يا كامل يا إبن ستوتة

-وربنا لو ما روحتي دلوقتي لا أرمي عليكي اليمين وذنبك بقى على جنبك

-ههههههههه لا والنبي ياعبده...........برضة ما تقدرشي

- إنت ح تترقصيلى ياولية ولا إيه؟ وما أقدرشي إزاي يعني؟ وما أقدرشي ليه بقى يا حلوة؟ ده أنا من بكرة ممكن وحياتك أتجوز ست ستك وأجيب هنا في الأوضة اللي مش عاجباكي دي كدة بت بدرية ...بت لوز ترجعني شباب من تاني ...توب علينا بقى يارب من صنف النسوان العتاقى ده

-بدارى؟ وعتاقى؟ يا صلاة النبي عليك يا فرارجي الغرام إنت

-وحياة ربنا إنت غلبانة ...دول نسوان بداري يا بوز الغراب ...حاجة كدة ترد الروح.... وزاويز لباني أحلى وأجمل منك ألف مرة...ومفيش أكتر منهم وربنا دلوقتي ..... دول على قفى من يشيل وحياتك...... هى بس النفس اللي تشيل

-تشيل؟ لا جامد يا ديك البرابر...مش كفاية صابرة عليك لحد دلوقتي وحاطة في بقي جزمة باتا وساكتة... وتقوم آخرتها تعملي فيها عنتر؟ لا جامد وجامد وبتشيل ياعنترة

-ياولية يا مهفوفة هو يعني حرام على دلوقتي إني أعمر الطاسة؟

-مهما تعمل برضة مش رايحة واللي يحصل يحصل بقى..هي دي بقى آخرتها ياكامل؟ بتهددني بالطلاق يا ناقص برضة عشان سوجارة ؟ إيشحال إنك كاتب عليا عرفي

-يا ولية يا مرضعة قلاوون هو كان في على أيامنا غير العرفي؟ ماهو الكفر بتاعنا كله إتجوز كدة......... إيشمعنى إحنا بس اللي ح نختلف عنهم؟

-خلاص أديك أخدت حقك مني تالت ومتلت وبربع جنيه مهر كمان..عايز إيه تاني؟ ح تنهب؟.. سيبني بقى أشوف حالي ومستقبلى وأستت نفسي

-مستقبلك؟ مستقبل إيه يا ولية يا مجنونة إنت؟ سبعين سنة زفت وطين زي وشك ولسه برضة بتفكري في المستقبل؟ ح تجيبيلى السوجارة ولا اقوم أكسر أم العصايا دي على دماغك ودماغ أمك في تربتها؟

-.................................................

- إنت ما بترديش عليا ليه يا ولية؟ فيلم جديد ده؟ ولا ملعوب من ألاعيبك السودة؟

-........................................

-ياولية ردي عليا ردت المية في زورك

-خخخخخ...............................

-يبقى أكيد نمتي...

-خخخخخخخخ......................

-نامت عليكي حيطة يا بعيدة ...

-خخخخخخخخخخخخخخخخخخخ.........

-جتك القرف ولية لزقة ..ساعة بحالها عمال أزحلق فيها وبرضة مش عارف............زي ما تقول يا أخويا قلبها حاسس إني مخبي منها البسبوسة زي كل مرة.............ممممممممممممم الله يا ناس ع والحلاوة والطعامة.......ممممممممممممم دي مش بسبوسة دي زبدة وربنا.......سبحان الله الشوام دول بجد فظاع في عمايل الحلويات.... لا تقولي عبد الهادي ولا زفت......مممممممممممم ..شقيان يا ناس وربنا .......شقيان يا عالم ومحتاج للغذا.........ممممممممممممم طعمة ... لذيذة أووي ...لا بجد إفترى ....جتك القرف ولية ساو باصالي في أم اللقمة م الصبح....ماهو يا رمة لو كنت بتتعبي زيي كدة؟ كنت أكيد ح تقدري التعب اللي الواحد بيشوفه طول النهار ع الدكة.... ....شقيان.....شقيان يا عالم .........ممممممممممممم لا وبجد أحلى من بتاعة إمبارح بكتير.