Wednesday, September 8, 2010

الكنبة



القاهرة ٢٧ رمضان السنة دي
---------------------------------
-
-كدة برضة؟ بقى هانيت عليك الكنبة للدرجة دي؟ يا خسارة ... نسيت إن احنا ياما قعدنا عليها كلنا كدة برابطة المعلم؟
-سامحني يا آبا وربنا غصب عني ...مراتي مش طايقة تشوفها وبتقول دي بقيت عرة خالص
-عرة؟ الله يرحم أبوها نجار الطبالي اللي طول عمره كان ماشي حافي وربنا كرمه أول ما لبس الجزمة
-طب بزمتك يا آبا دي كنبة بجد يتبكي عليها؟ طب وربنا دا أنا لما كنت بس باقعد عليها أو حتى أفكر أهوب ناحيتها كان على طول الجرب بيستلمني وأفضل أهرش طول الليل
-جرب؟ جرب إيه يا معفن؟ تلاقيه بس الأكلان اللي سرح عندكم في الشقة وعشش فيها ..إنت ياد ح تقولي على نضافة بنت نجار الطبالي ده؟...
-وربنا ما ذنبنا ياآبا...هى بقى اللي اجلها خلاص جه ولازم بقى نتخلص منها ....تعيش بقى وتفتكر يا آبا ....ومايصعبشي عليك غالي بقى يا حاج
- مفيش فايدة برضة طالع خايب زي أمك....
- الله يرحمها هى كمان يا آبا
-يرحمها؟ منها لله طول عمرها ماربيتشي عجل ونفع
-عجل؟ الله يسامحك... يعني إنت بزمتك جاي تصحيني من إحلى نومة بس عشان كدة؟ بزمتك مش ده والنبي يبقى حرام عليك ؟ أبوس إيدك بقى سيبني شوية أنام ....عندي بكرة شغل ولما أجي بعد الضهر إن شاء الله يبقى يحلها بقى ربنا
-بعد الضهر؟ إنت فاكرني ياد واخد السكة قياسة ولا إيه؟ حلني بقى ياترى مين يعيش؟ ...إبقى تعالى قابلني لو قدرت بقى اجيلك مرة تانية من أساسه
-يعنى بزمتك تاعب نفسك ده كله وعامل شبورة عشان حتة الكنبة المسوسة دي؟ دي وربنا معفنة من يوم ما وعيت ع الدنيا
-معفنة؟ وربنا إنت اللي معفن..... دي كنبة أثرية يا مغفل
-ههههههه أثرية؟ حلوة دي بجد يا آبا...طول عمرك وربنا كنت كوميدي....طب دا الراجل بتاع الروبابيكيا كان عايز عليها فلوس كمان لما إديتهاله
-إديتهاله؟ إنت خلاص بعتله الكنبة يا نانوس مامتك؟
-بعتله؟ ههههههه لا طبعا ....أنا إديتهاله كدة جدعنة ...ببلاش يعني يا حاج
-يا لهوي وكمان ببلاش؟
-إيه يا حاج إنت كمان جاي تورث معانا في الكنبة ولا إيه؟ إنت ناسي إنك خلاص دلوقتي في دار الحق؟ يعني مت وشبعت موت.... مش كفاية ماورثناش منك الا حتة كنبة يتيمة؟ وكمان جاي وعينك لسة فيها؟ سبحان الله هو مفيش عندكم كنب فوق ولا إيه؟ ولا وحشتك العفانة يا ريس؟
-وحشني العفانة؟ وربنا ح تفضل طول عمرك زي أمك وش فقر
-وش فقر ...ماشي يا أبا وش فقر ..وش فقر ....أبوس إيدك بقى...سيبني بقى وإعتقني ...و أهو اللي إنت كنت واجع دماغنا عشانها من ساعة ما مت وكل يوم طالع نازل آدينا خلاص ريحناك منها ....
-ريحتني؟ دا إنت موتني تاني ...منك لله يا بعيد.....منك لله يا بعيد......حسبي الله ونعم الوكيل......الكنبة دي كنت مأمنلك بيها مستقبلك يا طربش ....وسايبلك تحويشة عمري كله فيها...دول مليون جنية يا حمار.....فاهم؟ مليييييييييييون جنية حتة واحدة......كانو يعيشوك ملك.....حسبي الله ونعم الوكيل....حسبي الله ونعم الوكيل