Saturday, April 17, 2010

يا حلاوة


حدوتي حكاية مصرية وبطلها هريدي وشلبية

بسلامته عجل فى جلابية وسنانه صفرا مصدية

شلبية حاجة عائلية بنظيمة كبيرة هلامية

في الطالعة ونازلة رياضية وبلوظة وسمنة طبيعية

والصدر دى حاجة خرافية و جيناته مؤكد بقرية

بترجرج أمه بعفوية وكأنه عضلة ارادية

وف اول بس الشهرية بتزورها الست سنية

وتفنن اصناف شعبية ولا اجدع ماركة تجارية

بتلزق زي العسلية وبتبقى القاعدة سحرية

تحكيلها افلام هندية ابطالها خبرة فنية

بيجيدو الناحية العملية وركوب الخيل العربية

ويجيلها هريدي العصرية تعبان من شغل الجمعية

فطش بايدها التقلية وتتدلع على امه شوية

فيقولها بوريه يا ولية قرديحى تملي الملوخية

فين ام اللحمة المشوية او حتتة كارع في صينية

فتقوله ياريتها الميزانية يا سبعي بس مكفية

فيعمر حتتة حمية ويقرفص جنب النملية

ويعيش العيشة الوهمية مع نفسه اخر شاعرية

والليلة ياعمدة دي منسية على طول في علاقة اخوية

ويقول دي مراتي كشرية على طول متضايقة وعصبية

أنا نفسي في موزة عصرية تلبسلى الموضة العالمية

ترقصلى رقصة بلدية وتزغط فيا بكمية

تك نيلة يا أبن الفقرية دا خسارة في أمك شلبية

حدوتي مؤكد حقيقية وحكتها تعيسة مصرية

Tuesday, April 6, 2010

حدث في مثل هذا اليوم


حرامية ٦ أبريل

كل اللي خرجوا حرامية عالم أونطة وشوضلية

أكيد دي حاجة كيدية ووراها عالم نكدية

و دماغهم راكبة وعاكسية وقلوبهم سودة وقاسية

دي عيشتنا فل ووردية مش شايف يا أعمى الحرية

والنعمة دي حقبة ذهبية لجميع مشارعينا القومية

بنعامل بعض بوطنية وكتير في جيوبنا النقدية

ومن جهة الناحية العاطفية بصراحة سعيدة رومانسية

وبفضل الخبرة الصومالية طورنا كمان الثقافية

وحكومة عادلة وقوية وحاكمة شعب ملوخية

وزرائها رمز الشفافية ووزننا ذاد م التغذية

العيش حدانا بكمية واللحمة حمرا حميرية

والخطة الجاية الخمسية متروسة وظايف هلامية

وأخترعت وصفة طردية لعلاج مشاكلنا العكسية

وح تبني مفاعل نووية شغالة بجلة مصرية

ويا سلام ع الساحة الحزبية أجدع من دولة أوروبية

ولا عاد في مشاكل أممية فلتحيا الأمة العربية

ولا تعرف معنى الشللية دي حكومة نزيهة وشعبية

شايفينها مشاكل نفسية من قلة محو الأمية

ويذيدها الغيرة الطبقية وغياب الروح الرياضية

وسجاير البانجو المحشية عامللكو هلاوس سمعية

يامعفن أنسى المدنية ف زيارتي ح أجبيلك طحينية

وهناك ح تحلي ببونية وح تقلع برضة الجلابية

و تخدلك جرعة أمنية وتبانلك أم الرفاهية

وتبطل شغل الحرامية وكفاية أونطة وشوضلية