Saturday, August 23, 2008

دروس تركيبية لمعرفة الرومانسية


>

سيد قراره

<



سيد قراره غار وأنحرق

وطارالملف يا آبا و الورق

بس النظام جامد ياواد ما أنخرق

واقف وراه حكومة قوية شلق

والرزق منها يا اما راح يا أتسرق

و الشعب منها ولله حس أنه أتخنق

دا اللي نافسها نخ لما أتشنق

واللي عادها شخ لما أتزنق

Sunday, August 10, 2008

غيابك طال

ياريتك تبقى جنبي يا ساكن جوا قلبي


دا نظرة عينيك تكفي و لمسة أيديك تدفي


مشدود اليك تملي ومفيش كلام تقولي


داريت حبي عليكي رغم عشقي لعنيكي


وصعبان عليا نفسي بموت فيكي وبأخبي


وبلاش تغفر ياربي لو كان حبي دا ذنبي


بس انت يالا طلي أو حتى بس مري

دا انا بحلم في يوم تقولي دا حبك ملكني كلي





<center>

شهيد العيش



غلبان وبتاع ورنيش وبيمسح ع الكورنيش


دا لاعمره شم ياميش بكتيره جبنة قريش


الصحة ضايعة مفيش وفلوسه طايرة بريش


على طول في طابور العيش ومنابه مايكفيش


ماتقولشي خناقة بجيش والنعمة تروح ماتجيش


والحل يا درويش؟
مفيش..يامين يعيش







آخر عبط

Align Centre



قاضي القضاة عندنا من بختنا آخر عبط

واجع نافوخنا من زمان بشعر النبط

وعاشق لموزة في الديوان آخر لَبَط

فنازله مسلم في الميدان من وكسته قال ده قبط

ف جيت أقول رأي كمان سب وشبط

وقعد يدش في الكلام وهاتك لغط

وملى ايديه جامد قوام وحدفني بزلط

ونسي المحبة والوئام وأبتدى الغلط

وردي عليك يا قاضي الزمان شايفه كمان دا آخر عبط




ما تلومنيش





Click on the photo to enlarge

ما تلومنيش إن كنت بأداري

وياريتك تعرف اللي جرالي

مش جايز برضة تحس بناري

نظرة عين واتبدل حالي

وقلبي إستسلم وانا مش داري

وأصبح همسك كله في بالي

وماتسيبنيش كدة برضة أعاني

بصراحة أنا شايفك شوية أناني

مع أن شفايفك على طول شداني

كدة عايش واحدك في البرج العالي

ولا عايز تنزل و لو حتى ثواني

مش جايز برضة ما أحتاجش أداري



لو

دا لو صحيح بتحبيني طب ليه ناويتي تهاجريني


قاسية وغاوية تلاعبيني والا انت بس بتعانديني


ظالم وغدره ملاقيني وبضحكة صفرا بيجيني


غدرك دا نار بتكويني ونصلك في قلبي بيأتيني


يادموع عينيه طاوعيني خاينة وناوية تباكيني


حاسس ببكرة بتسيبيني وبعد بكرة ح تنسيني


سامح يارب وداويني عبدت طيفه فأهديني



أسير الغرام


بقى آخرة دا كله تهجرني قوام

وتعذب في قلبي وتنسى الوئام

دا جرحك بيألم وسايب علام

وياخوفي ما يهدى وتذيد الآلام

انا بأحضن رسايلك على طول ع الدوام

وباكره عمايلك وما ليش في الملام

ومن خيبتي بأحايلك ساعات في المنام

وإن جيت مرة أعاتبك مش بألقى الكلام

دا انا بأصفح لذنبك ولا صفح الكرام

وح أموت و أبقى جنبك ودا غاية المرام

وياسلام لو تجيني او تبدي إهتمام

دا ساعتها تلاقيني ويروح الغمام

دا إن حتى تناديني راح أقولك تمام

ما تفكر شوية وبلاش الخصام

وحقك عليا يا وهم الغرام

وفي مسك الختام راح اقولك سلام







عندما يتحول الوهم الى حقيقة...وتتحول الحقيقة الى مرض مؤلم ...لا يبقي الا أجترار الوهم للشفاء من الحقيقة

حرامية ٦ أبريل

كل اللي خرجوا حرامية عالم أونطة وشوضلية

أكيد دي حاجة كيدية ووراها عالم نكدية

و دماغهم راكبة وعاكسية وقلوبهم سودة وقاسية

دي عيشتنا فل ووردية مش شايف يا أعمى الحرية

والنعمة دي حقبة ذهبية لجميع مشارعينا القومية

بنعامل بعض بوطنية وكتير في جيوبنا النقدية

ومن جهة الناحية العاطفية بصراحة سعيدة رومانسية

وبفضل الخبرة الصومالية طورنا كمان الثقافية

وحكومة عادلة وقوية وحاكمة شعب ملوخية

وزرائها رمز الشفافية ووزننا ذاد م التغذية

العيش حدانا بكمية واللحمة حمرا حميرية

والخطة الجاية الخمسية متروسة وظايف هلامية

وأخترعت وصفة طردية لعلاج مشاكلنا العكسية

وح تبني مفاعل نووية شغالة بجلة مصرية

ويا سلام ع الساحة الحزبية أجدع من دولة أوروبية

ولا عاد في مشاكل أممية فلتحيا الأمة العربية

ولا تعرف معنى الشللية دي حكومة نزيهة وشعبية

شايفينها مشاكل نفسية من قلة محو الأمية

ويذيدها الغيرة الطبقية وغياب الروح الرياضية

وسجاير البانجو المحشية عامللكو هلاوس سمعية

يامعفن أنسى المدنية ف زيارتي ح أجبيلك طحينية

وهناك ح تحلي ببونية وح تقلع برضة الجلابية

و تخدلك جرعة أمنية وتبانلك أم الرفاهية

وتبطل شغل الحرامية وكفاية أونطة وشوضلية