Thursday, June 23, 2011

صياد القلوب

-وحياتك يجي أكتر من عشر سنين

-ياه عشر سنين ياحبيبي؟ لا ده إحنا نحمد ربنا بقى إنه فرجها من وسع

-فرجها ؟ إلا فرجها ... بقولك على طول يوماتي راكب المترو.. ومحشور فيه من مبارك لحد أخر الخط .. ورايح نايم وراجع نايم ..وعمر ماحد عبرني أو حتى بص في خلقتى

-لا مش ممكن؟ ده كتير أووووي والله يا حسن .....ههههههههه يكونشي النحس بتاعك إتفك لما إسم المحطة خلاص إتغير؟

-تصدقى؟ وربنا جايز ....ده كان راجل وش فقر ..داهية لا ترجعه.....كان قاطع علينا المية والنور ...عارفة يا حبي؟ أنا وربنا كنت خلاص فقدت الأمل إني أحب واتحب زي كل الناس وببوس إيدي دلوقتي والله وش ودهر إني قابلتك

-لا متقولش كدة ياحسونتي ..ده إنت أي واحدة تتمناك يا جدع ..طب إنت عارف؟ أنا إمبارح اول ما شوفتك في المترو قلت هو ده يا بت...هو ده يا سوسو اللي بتدوري عليه.....أحمدك يارب وأشكر فضلك

-بجد يا سوسو؟ بجد يابت؟ قد كدة أنا جذاب وحليوة في عينيكي؟ طب إيه اللي والنبي شدك ليا بالظبط؟ قولي بقى يابت...حلفتك بالنبي

-يا حبيبي الحاجات دي ما تتوصفشي ...دي تتحس كدة على طول.......دي حاجة كدة زي الكيميا يا سونسن...........كيميا بتخرج طوالي م القلب للقلب

-كيميا؟ يا صلاة النبي وهي الكيميا بقى يابت هي برضه اللي خليتك تصيعي إمبارح في المترو وترميلي نمرة الموبايل بتاعك ؟

-هههههه لم لسانك يا حبي...شوف.. يا حسن يا حبيبي الفرصة بتيجي في العمر مرة واحدة .... فاهم يا شقى؟ والبت الخايبة هي أكيد بقى اللي بتضيعها

-أنا للأمانة كنت ساعتها مذهول....بصراحة متخيلتش إن صاروخ...سوري... قصدي يعني واحدة حلوة كدة زيك ومفيهاش غلطة وزي ما الكتاب بيقول هي اللي تعاكسني .....وقال ايه تجيبيني كمان هنا عندك في الشقة الأبهة دي.......ده ولا في الأحلام وربنا

-طب ودي فيها إيه بس يا حبي؟

-فيها إيه؟ إنت هابلة يابت ولا بتستعبطي؟ ده إحنا لسة إمبارح يا دوبك متعرفين على بعض............طب بذمتك هو في حد الإيام ديه برضه بيعمل كدة؟ تجيبي واحد عندك في البيت كدة من غير إحم ولا دستور...طب مش خايفة من أهلك؟

-أهلى؟ هههههههههههههه.....ده بيتي وانا حرة فيه .....ادخل فيه اللي انا عايزاه

-آه طبعا بيتك بس برضه أمك ولا أبوك ح يقولو إيه دلوقتي لما يشوفوني هنا قاعد ومرحرح ولابس كمان حتة بيجاما ستان عمري جدي ما حلم حتى إنه يلبسها أو يملس عليها؟

-ماما؟ وبابا؟ لا ماتخافشي .... أنا يا سيدي مقطوعة من شجرة وواخدة ع الوحدة من زمان

- الوحدة ؟ الوحدة إزاي بس؟ أمال رجلين مين دول يا أختي اللي رايحين جايين من ساعة ما جيت ده زي ما يكون واحد قاعد جوة ومش على بعضه....ماله عم الحج اللي جوة ده؟ حد مزعله في حاجة؟

-اللي جوة؟ آه ........ده تلاقيه هيثوم ما تشغلشي بس إنت بالك ..ربنا يشفيه يارب

-هيثوم؟ هيثوم مين؟ حد اعرفه يعني وأنا مش واخد بالي؟

-هيثم جوزي يا حسن

-جججوزك؟ إيه؟ هو انت متجوزة؟..يا نهار أبوكي إسوس...متجوزة وجايباني هنا؟..والله عال وجايباني على ملى وشي وفي الآخر الاقى جوزك مستنيني جوة..وده بيتنيل بيعمل إيه جوة ؟ بيسخن بقى؟ ولا بياخد فكرة؟ يالهوي يا أمة ده أكيد حيقطعني ..ح يقطعني؟ ده ح يشويني...وأنا اللي فرحان قال بحتة البيجاما الستان يا أخي إتنيل على خيبتك وخيبة أم حسن...أهي ح تبقى حمرا م الدم اللي ح ينزل للركب

-الله إنت إتكهربت ليه كدة يا حسن؟ تفرق معاك إيه يعني اذا كان هيثم هنا ولا لأ؟

-تفرق؟ الا تفرق؟ يا ستي إنت ناسية إن هيثوم ده يبقى جوزك؟ آه صحيح هو إنت خاسس على مامتك إيه؟ ما هو أنا اللي ح أتقطع مش إنت... ياحظك المنيل يا أم حسن ...إبنك ملحقشى يتهنى بأنجازات الثورة يا حاجة....تكونيش فلول يا بت وأنا مش عارف؟ .............وانا اللي بغبائي ما صدقت وأخدت ديلي في سناني وجيت زي الكبنش على ملى وشي

-إهدى بس يا حسونتي

-حسونتي إيه وزفت إيه؟ يا خرابي على إم المراوح اللي مركباها على قلبك دي ...إنت بتهزري يابت مش كدة؟ ايوة بتهزري؟ معقولة؟ لا مش معقولة؟ مفيش هيثم؟ صح؟ مفيش هيثم ؟

-لا طبعا في هيثم ...وقاعد جوة كمان وسامع وشايف كل حاجة

-وسامع وشايف كل حاجة؟ يا صلاة النبي ..ع البركة ....يعني ضعنا والحمد لله

-شوف انا بصراحة مقدرشي انكر إنك بجد عجبتني...مش قولتلك كيميا بقى

-يخرب ييت ام الكيميا دي اللي وديتني خلاص في داهية...ياستي أنا مليش في أم الكيميا دي خالص أنا كنت أدبي ... ...فاهمة؟ أدبييييييييييييييييييييييييييييي

-لا بجد إستنى بقى وبلاش خيابة....أنا اول ما شوفتك قلت ياه ....مش ممكن...فيه كدة يا ناس؟

-لا والله مفيش أوسخ من كدة.....ما المترو ياستي كات مليان شباب زي الورد ...إيشمعنى أنا؟...إيشمعنى أنا ياربي من وسط كل دول البشر؟

- عشان إنت عجبتني ياسيدي ..أيوة عجبتني..... ..صدقني....إنت اللي بادور عليه..يا سبحان الله زي ما يكون ربنا حطك في طريقى إمبارح لهدف في نفس يعقوب

-هدف؟ هدف أيه ونيلة إيه؟ بقولك ح اتقطع دلوقتي وإنت تقوليلي هدف؟....الله يخرب بيتك على بيت أم اليوم اللي حفرو فيه المترو ...على اليوم اللي قابلتك فيه يا شيخة.......حبكت يعني طول عمرك نايم يا حسن في المترو...كان إيه بس اللي هفك في نفوخك وصحاك؟ أشرب بقى يا حلو

-عسل ....وحياة ربنا تحفة

-إنت شاربة حاجة يا بت ولا إيه؟

- شاربة؟ ياريت ده أنا حتى وربنا ميتة م العطش

-عطشانة؟..طب ما تشربي يا أختى هو حد حايشك؟ مالعصير بالهبل أهو قدامك ..فالحة بس عمالة تسقيني منه م الصبح لما نفسي ماعت خالص

-اعملك إيه بس يا حسونتي ؟ ده أنت مصفح ياجدع..عارف؟ أنت واخدلك لحد دلوقتي شوية منوم وحياة ربنا تنيم جمل ومراته وولاده

-منوم؟ يانهار أبوووكي ....ياه إيه ده؟ انا مش عارف اتلم على نفسي خلاص..ودايخ خالص ..إيه ده؟ هو انا ح أمممموت ياسوسو؟ ح أممموت يا بت؟

-إنت ح تستعبط؟ ما أنت من ساعتها ماسك نفسك إيه اللي جد يعني؟

-آه والله دايخ ..خلاص مش قادر أمسك نفسي خلاص ..أنا حموت؟ صح ؟ مش كدة يا سوسو

-بصراحة آه ....معلش بقى ياحبي ح تموت ياحرام أول ما الدكتور أحمد يجي .......بس ماتخافش هما ساعتين ... هما ساعتين زمن يا قمر وبعدها ح يتنقل قلبك الكميل الطيب ده لهيثومتى حبيبتي....ربنا يقومه بالسلامة يارب........عارف؟ ساعتها والله يا حسن ح تحس بحبي ليك؟ ....وح تحس بده أكيد لما قلبك يبقى ينام في حضني كل يوم.....عارف؟ ساعتها ح تحس والله بالكيميا وتحبها كمان ....سونة ...سونة انت خلاص نمت يا حبيبي؟ نمت يا مضروب؟

Monday, June 13, 2011

جاسوس المشاكل


وفي البيان العسكرى أعلن السيد المسئول أن المتهم قد تواجد في أماكن عديدة مثل ميدان التحرير أثناء الثورة ، وخناقة أم صفوت مع جوزها خمامة في السيدة زينب وكما تواجد في إمبابة أثناء حرق الكنيسة و قسم الأزبكية وقت وقوع حادثة قتل سائق الأزبكية وفجر خط الغاز ...
الله يرحمك يا هجان كنت مركز في شغلك والنسوان

Wednesday, June 1, 2011