Sunday, November 25, 2012

Thursday, July 26, 2012

Saturday, May 19, 2012

جعلوني مكوجي


سيد شبطة شخصية مصرية خنيقة أخترعتها من حوالي سنتين في سلسلة حكواتي ومغنواتي اللي تقريبا بعمل كل حاجة فيها.......كتابة القصة والتمثيل والمونتاج والإخراج وتقريبا كدة أنا كمان المستمع الوحيد لها عشان كدة إستمرت وربنا يخلي المنتج والمخرج والممثلين.... يمكن الحكاية دي بعمل فيها كل اللي كان نفسي أعمله زمان بس ربنا ستر ع الناس وما سلكتش الطريق ده.....المهم بقى إن الشخصية دي من غلاستها وتلامتها بتخلى الواحد يخرج بجد عن شعوره و تعتبر نموذج للكوميديا السودا المنيلة بستين نيلة عشان كدة مفيش مهنة واحدة وإشتغلها سيد وفلح فيها...شفناه مثلا محامي ومرة بياع أو دكتور وبعد الثورة مخبر بوليس والنهاردة قرر سيد إنه يشتغل مكوجي ويملى الفراغ بعد ما شعبان ساب الكار. الغريب بقى إن مفيش واحد بيفهم هوب تقريبا ناحية المحل بتاعه تجنبا لغلاسته وخصوصا سكان العمارة اللي محله وشقته كانو فيها عشان كدة بدأ سيد للأسف للجوء لطرق أخري ملتوية للحصول على قوته وقوت عياله اللول والبول........ إزاي؟ ده اللي ح تعرفه لو ربنا إعطاك الصبر وما إتفرستش وسمعت الحكاية للآخر. طبعا مستني رأيك بأمانة وياريت بعد ما تسمع.

Sunday, May 6, 2012

مية مسا



-اهلا بيك يا عمو إيه الأخبار النهاردة؟
-لا أهلا ولا سهلا يا دكتور
-ليه بس كدة إيه اللي حصل؟
-مش عارف إنت عملت معايا إيه يا تامر يا إبني؟
-عملت إيه بس فهمني لو سمحت؟
-إفتكر كدة
 -أفتكر؟ آخر مرة كنت عندي في العيادة كانت تقريبا من إسبوع....إيه بقى اللي جد؟
-طبعا إنت فاكر أنا كنت عندك ليه؟
-آه فاكر طبعا.....موضوع الإنتفاخ والغازات اللي كانت مضايقة حضرتك
- آه
-بس ده عادي وحاجة بتحصل لكل الناس وعلاجها سهل
-عادي؟ لا مش عادي أنا كانت حالتي بسيطة ومش زي كل الناس يا إبني
-بسيطة ومش زي كل الناس؟ إزاي يعني؟
-أينعم كانت حالتي فيها غازات كتيرة ومستمرة على طول بس يا إبني كانت من غير صوت وريحة
- من غير صوت وريحة؟
- آه وأنا تقريبا كنت الوحيد اللي بأحس بيها
-طيب ما أنا كتبت ليك ساعتها دوا ويارب يكون عمل نتيجة كويسة معاك
-آه طبعا عمل نتيجة بس للأسف عكسية خالص يا إبني
- عكسية؟
-آه..... كدة برضة تعمل فيا العاملة دي إبني؟
-يا حاج شابوكشي فهمني من فضلك..إزاي يعني نتيجة عكسية؟
-كان الأول زي ما إنت عارف من غير صوت وريحة ودلوقتي بقي يا إبني بريحة وحشة أوووي ومن ساعتها مش طايق نفسي خالص
-عال عال
-عال؟ بقولك مش طايق نفسي وإنت تقولي عال؟ إتخنقت خلاص ...بس الحمد لله لسة برضه من غير صوت
-طب كويس يبقى نقط المناخير عملت نتيجة معاك ورجعتلك خلاص حاسة الشم من تاني يا سيدي......والنهاردة بقى نشوف كمان مالها حكاية السمع وياك واكيد طبعا حنلاقى حل ولو حكم بقى نبقى نعملك سماعة ولا تزعل نفسك تاني يا حاج شابوكشي وبكدة تبقى بقيت طبيعي وزي كل الناس

Thursday, April 19, 2012

ع الطاير

1

-في حاجة ؟ إنت ح تصورني ولا إيه؟

-أصورك؟

-آه ح تصورني...... عمال تبصلي م الصبح يا أستاذ وماشلتش عينك من عليا خالص

-متأسف يا آنسة.... بجد متأسف

- خلاص حصل خير

- أصل بصراحة بأشبه عليكي وح أموت وأعرف شفتك فين .....شفتك فين؟

-شفتني فين؟ مش عارفة... جايز هنا؟

- هنا؟ جايزبرضه

- أصلي بصراحة متعودة أتعشى هنا على طول....... زي متقول يعني بعزم نفسي كل يوم والتاني

-تعزمي نفسك؟ طب ما تخليها عليا أنا بقى المرة دي

-ميرسي ...تعيش

-لا والله أنا بأتكلم بجد...........إنت لوحدك وأنا لوحدي ...وأهو برضه نفتح نفس بعض

-نفتح نفس بعض؟ ............ طب بس حاسب أحسن أنا النهاردة نفسي مفتوحة ع الآخر

-ولا يهمك إنت تأمري يا مدموزيل

-تعيش

-وبعدين هو في حد بذمتك يعني بجد يقدر يسيب فرصة زي دي؟

-فرصة زي دي؟ قصدك إيه؟

-قصدي إنه ياكل يعني مع واحدة شيك كدة زي حضرتك

-تعيش يا أستاذ........؟

-أحمد............أحمد حلاوة

-أحمد حلاوة؟ هههههه يا حلاوة

- آه بس والله مش ملزق زي إسمي

-لا ماتقولش كدة..........وبعدين باين على حضرتك إنك حد بجد محترم

-متشكر أووووي يا آنسة........؟

-لازم يعني تعرف إسمي؟

-آه طبعا مش ح يبقى بينا عيش وملح؟

-ههههههههه لا وإنت الصادق عيش وسمك يا حلاوة

-وإن شاء الله ح تكون معرفة خير

-إن شاء الله يا حلاوة بس المهم تكون عند حسن ظني وتكون مؤدب عشان ماتخلنيش بقى أندم إني قبلت دعوتك دي

-لا ما تخافيش ...وأنا بصراحة بقى ما ليش في نظام المعاكسات والكلام الفاضي ده

-الحمد لله......ريحتني .......طب إنت عارف إن بابايا ممكن يروح فيها لو بس عرف إن قعدت مع شاب وسيم زيك كدة؟

-وسيم؟ ربنا يخليكي...لا بقى دي إحلوت قوي يا جدعان

-افندم؟ قلت حاجة

-لا بس قلت إن شاء الله ما يحصلشي أي مشاكل خالص.....وده شرف ليا بجد

-ميرسي أوووووي

-جرسووووووووووووون لو سمحت المنيو!!!!!

*******************************************

2

-ميرسي أوووي ع العزومة اللذيذة دي

-ألف هنا وشفا يا آنسة

-أنا آسفة والله عشان أكيد العزومة دي كلفتك مبلغ وقدرة

-لا ماتقوليش كدة

-على فكرة أنا برضة حذرتك م الأول

-بس أنا برضه أكلت معاكي ...مش كدة؟ ده معرفة الناس كنوز يا آنسة.......وبعدين هما يعني الخمسمية جنية بقو بيعملو إيه الأيام دي؟ كلام فاضي صدقيني

-خمسمية جنية؟ ياه بقى دفعت كل المبلغ ده عشاني؟ أنا آسفة بجد

-ولا يهمك صدقيني

-عارف؟ أنا لما بأبقى لوحدي هنا مش بطلب يعني حاجات كتيرة كدة ...........بس بصراحة الجمبري والأستاكوزا كانو يهبلو...أما السبيط هههههههههههه فحدث بقى ولا حرج

-ألف هنا وشفا أنا برضة أول مرة أكل السنجاري ده ...تصدقي إنه مش عندنا خالص في كايرو ولا نعرفه؟

-بس بصراحة كتير شوية المبلغ

-فداكي يا آنسة.......؟

-زينب.....إسمي زينب

-عاشت الأسامي

- وتقدر كمان تدلعني بوزة

- حاضر يا وزة

-ولعلمك محدش بيقولي كدة إلا اللي بس واخد عليا

-ياه ...يعني كدة إنت خلاص وثقتي فيا يا وزة؟ ده شرف كبير ما أستحقهوش صدقيني

-آه طبعا يا حلاوة ده عيش وجمبري يا راجل

-ميرسي أووي يا وزة وعلى فكرة إنت كدة بقى شجعتيني على إني أطلب منك حاجة

-حاجة؟ خير يا حلاوة

-لا خير إن شاء الله............ أنا بس كنت عايز رقم موبايلك

-رقم موبايلي؟ ليه خير؟

-أبدا كنت بقول يعني لو نزلت إسكندرية تاني ولا حاجة وحبيت يعني إننا بقى نتقابل تاني فممكن برضه قبلها نتكلم ونتفق وكدة يعني

-نتقابل؟ ونتكلم؟ ونتفق؟

-آه نتقابل ونتكلم فيها حاجة دي؟

-لا أبدا مفيش..... بس يعني

-بس يعني؟ إنت كمان بقيت بتقولى يعني زي حلاتي؟ بس يعني إيه؟ خير؟

-أصل أنا بصراحة عندي مشكلة كدة صغننة يعني

-مشكلة؟ خير إن شاء الله

-أصل بابا راجل محافظ أوووي

-طب ما أنا عارف وقلتيلي ده برضه

-أصله بيخاف علينا اوووي من الهوا الطاير

-عنده حق بصراحة الزمن ده بقى خلاص وحش أوووي

-آه وعشان كدة بيحرم علينا إننا نشحن موبيلاتنا خالص

-طب ليه؟

- عشان يعني مانكلمش حد وكدة يعني

-ياه ده بابا راجل محافظ أوووي

-آه أوووي وتصدق رغم كدة أنا معايا بدل الموبايل إتنين في شنطتتي

- ياه إتنين؟

-آه بس زي قلتهم لأنهم على طول بدون رصيد

-بسيطة

-بسيطة؟ بسيطة إزاي يعني؟

-تاهت ولقيناها يا وزة

-إزاي يعني؟ بليييز فهمني

-شوفي.... إديني إنت بس رقمك دلوقتي يا ستي وانا أحولك فورا رصيد من اللي معايا ..........أيه رأيك يكفوكي خمسين جنية؟

-خمسين جنية؟ آه دول كتير أوووي بس

-بس؟ بس إيه تاني؟

-أصل أنا عارفة نفسي أول ما ح يكون معايا رصيد ح أروح متصلة على طول بطنط

-طنط؟

-آه طنط توتة...دي عمتو أخت بابايا كدة لزم وبموت فيها خالص وبقالها يجي عشرين سنة في أمريكا وبصراحة هى وحشاني موووت

-بسيطة يا وزوز

-بسيطة؟ بسيطة إزاي طيب؟ بقولك دي في أمريكا يعني الخمسين جنية بتوعك دول ممكن يطيرو في ثواني

-شوفي يا ستي...أصل أنا بصراحة مش معايا دلوقتي أكترمن الخمسين جنية دول على الخط بتاعي..بس في حل تاني يا وزة

-حل تاني؟

-آه أصل أنا معايا كمان كارت شحن في المحفظة بتاعتي وده ممكن تاخديه وبكدة يبقى معاكي مية وخمسين جنية يا ستي مرة واحدة

-مية وخمسين جنية؟ ياه ده كتير خالص ..ميرسي أووي ليك بجد مش عارفة أشكرك إزاي؟

-لا عادي مفيش شكر بقى بينا دلوقتي خلاص..........ده عيش وسبيط يا وزة إنت نسيتي؟

-آه صحيح........لأ وإيه محمر وطاجن كمان

-بس إنت معاكي خط فودافون ولا إتصلات؟

-معايا كله

-كله؟

-قصدي يعني معايا الإتنين ...مش أنا قلتلك إني معايا موبيلين؟

-آه صحيح.........طب خلاص خدي الكارت بتاع فودافون ده....ده كارت بمية جنية....وإبقي إشحني بقى براحتك لما تروحي.....وعلى رأي المثل إتجمز يا جميل بالجميز لحد ما يجي التين...... والمرة الجاية يا ستي إن شاء الله أبقى أجيبلك واحد تاني لإتصلات .....مبسوطة كدة؟

-كتر خيرك...ميرسي أووووي...إنت بجد حد جميل خالص

-العفو يا وزة...بس ياريت لو سمحتي تسيفييلي دلوقتي أرقامك كلها هنا ع الموبيل بتاعي ده عشان كمان يعني أبقى أقدر أحولك رصيد تاني بالليل أول ما أروح وأهو كمان بالمرة يبقى معايا أرقامك على طول.........إتفقنا يا حلوة؟

-حاضر من عينيا......................إتفضل أديني سيفتلك الإتنين أهو...مرضي كدة؟

-إيه ده يا وزة؟

-إيه في حاجة غلط بعد الشر؟

-لا مفيش حاجة بس مسيفة إسمك مرتين وكمان بطريقة غريبة أووي

-إزاي يعني؟

-يعني مرة وزة فون ومرة وزة لات............. إيه الأسامي الكوميدية دي؟

-لا ده بس عشان تعرف تربط بين كل خط وشركته ..يعني مثلا وزة فون ده إختصار وزة فودافون...ووزة لات يعني وزة إتصالات...فهمت؟

-آه فهمت ...تصدقي إنها بجد طريقة حلوة أوووي وموسيقية كمان ..والله برافو عليكي

-مش كدة؟.......... إبه ده؟ ..........يا خبر!!!!!!!!!!!! ...........ده أنا إتأخرت أووووي بجد النهاردة......... ده كدة ممكن بابا يعملي مشكلة دلوقتي...طب سلام بقى وخلينا بقى على إتصال وموبيلات يا حلاوة وأهو وبدل الرقم معاك رقميين ....يلا بقى باي

*******************************************

3

-ألو.........أنا أحمد يا وزة ..أحمد حلاوة......فاكراني؟ إنت فين يا هرابة؟ بقالي إسبوع عمال أحاول أتصل بيكي وموبيلاتك على طول مشغولة يا ستي

-مين معايا؟ النمرة أكيد غلط حضرتك ....... هنا محلات فونلات ....أي خدمة يا هندزة؟

-فونلات؟ إيه الإسامي الغريبة دي ع الصبح؟

-آه فونلات...........مش عاجبك الإسم بتاعنا؟ فونلات للشحن....... ما سمعتش عنا؟ ولا سمعك تقيل....احنا أحسن شركة فيكي يا منطقة بتشحن فودافون أو إتصالات ع الطاير...... فونلات للشحن لصاحبها........أنا يعني محسوبك المعلم روقة المروق...سبعة شارع إسكندر ابراهيم بميامي بجوار محلات عصير النهضة بتاعة عم الشباب والرياضة و نايب الدايرة عن حزب النورالحاج زعزع

-روقة المروق؟ وفونلات؟ وفودافون وإتصلات؟ إيه ده؟ مش غريبة دي شوية يا معلم روقة يا مروق؟

-غريبة؟ هي إيه دي اللي غريبة يا باشمهندز

-أصل وزة كانت مسيفالي النمر بتوعها برضة كدة بنفس طريقتك ... وزة فون ووزة لات

- وزة فون ووزة لات؟ آآآآآآآآآآآآآآآآآه تكونشي إنت الجدع بتاع أكلة السمك؟ إزيك يا حلاوة؟

-أكلة السمك؟ وإزيك يا حلاوة؟ والله أصيلة يا بت يا وزة ماخبتيش أي حاجة على بابا خالص....أصيلة بجد يا وزة....أما بصحيح عيلة محافظة بحق وحقيقي....والله وعرفت تربي يا عمي

-عرفت أربي؟ ويا عمي؟ تكونش يا جدع ولو موأخذة فاكر إن البت وزة دي تبقى بنتي؟

-إيه ده؟ هي مش بنت حضرتك يا عمي؟

-برضة بيقولي يا عمي...يا إبني وزة دي زبونة زي آي واحدة

-زبونة؟

-آه زبونة من اللي بينفعوني وأنفعهم

-بينفعوك؟ أنا مش فاهم أي حاجة وربنا خالص

- يعني دول ناس ربنا كرمهم ولا مؤاخذة بكارت شحن و واخدينه يعني جدعنة أو ساعات حضرتك رصيد لاطشنيه كدة و لا كدة من واحد سوري يعني في الكلمة كروديا.....نظام يعني ولا مؤاخذة إستحباب أو رزق الهبل ع المجانين......... وعايزين بقى ولا مؤاخذة يخلصو منهم وياخدو فلوسهم يا حلاوة......... ....,وأكيد البت وزة قالتلك إن حسنتي عشرة في المية ....إيه النظام يا هندزة؟ معاك ولا عايز رصيد؟ ومتنساش باخصم م المية عشرة.......... ......إستبينا يا هندزة؟ ونهارنا فل إن شاء الله..... ألا صحيح إنت كنت عايز البت وزة في حاجة يا حلاوة.