Thursday, April 19, 2012

ع الطاير

1

-في حاجة ؟ إنت ح تصورني ولا إيه؟

-أصورك؟

-آه ح تصورني...... عمال تبصلي م الصبح يا أستاذ وماشلتش عينك من عليا خالص

-متأسف يا آنسة.... بجد متأسف

- خلاص حصل خير

- أصل بصراحة بأشبه عليكي وح أموت وأعرف شفتك فين .....شفتك فين؟

-شفتني فين؟ مش عارفة... جايز هنا؟

- هنا؟ جايزبرضه

- أصلي بصراحة متعودة أتعشى هنا على طول....... زي متقول يعني بعزم نفسي كل يوم والتاني

-تعزمي نفسك؟ طب ما تخليها عليا أنا بقى المرة دي

-ميرسي ...تعيش

-لا والله أنا بأتكلم بجد...........إنت لوحدك وأنا لوحدي ...وأهو برضه نفتح نفس بعض

-نفتح نفس بعض؟ ............ طب بس حاسب أحسن أنا النهاردة نفسي مفتوحة ع الآخر

-ولا يهمك إنت تأمري يا مدموزيل

-تعيش

-وبعدين هو في حد بذمتك يعني بجد يقدر يسيب فرصة زي دي؟

-فرصة زي دي؟ قصدك إيه؟

-قصدي إنه ياكل يعني مع واحدة شيك كدة زي حضرتك

-تعيش يا أستاذ........؟

-أحمد............أحمد حلاوة

-أحمد حلاوة؟ هههههه يا حلاوة

- آه بس والله مش ملزق زي إسمي

-لا ماتقولش كدة..........وبعدين باين على حضرتك إنك حد بجد محترم

-متشكر أووووي يا آنسة........؟

-لازم يعني تعرف إسمي؟

-آه طبعا مش ح يبقى بينا عيش وملح؟

-ههههههههه لا وإنت الصادق عيش وسمك يا حلاوة

-وإن شاء الله ح تكون معرفة خير

-إن شاء الله يا حلاوة بس المهم تكون عند حسن ظني وتكون مؤدب عشان ماتخلنيش بقى أندم إني قبلت دعوتك دي

-لا ما تخافيش ...وأنا بصراحة بقى ما ليش في نظام المعاكسات والكلام الفاضي ده

-الحمد لله......ريحتني .......طب إنت عارف إن بابايا ممكن يروح فيها لو بس عرف إن قعدت مع شاب وسيم زيك كدة؟

-وسيم؟ ربنا يخليكي...لا بقى دي إحلوت قوي يا جدعان

-افندم؟ قلت حاجة

-لا بس قلت إن شاء الله ما يحصلشي أي مشاكل خالص.....وده شرف ليا بجد

-ميرسي أوووووي

-جرسووووووووووووون لو سمحت المنيو!!!!!

*******************************************

2

-ميرسي أوووي ع العزومة اللذيذة دي

-ألف هنا وشفا يا آنسة

-أنا آسفة والله عشان أكيد العزومة دي كلفتك مبلغ وقدرة

-لا ماتقوليش كدة

-على فكرة أنا برضة حذرتك م الأول

-بس أنا برضه أكلت معاكي ...مش كدة؟ ده معرفة الناس كنوز يا آنسة.......وبعدين هما يعني الخمسمية جنية بقو بيعملو إيه الأيام دي؟ كلام فاضي صدقيني

-خمسمية جنية؟ ياه بقى دفعت كل المبلغ ده عشاني؟ أنا آسفة بجد

-ولا يهمك صدقيني

-عارف؟ أنا لما بأبقى لوحدي هنا مش بطلب يعني حاجات كتيرة كدة ...........بس بصراحة الجمبري والأستاكوزا كانو يهبلو...أما السبيط هههههههههههه فحدث بقى ولا حرج

-ألف هنا وشفا أنا برضة أول مرة أكل السنجاري ده ...تصدقي إنه مش عندنا خالص في كايرو ولا نعرفه؟

-بس بصراحة كتير شوية المبلغ

-فداكي يا آنسة.......؟

-زينب.....إسمي زينب

-عاشت الأسامي

- وتقدر كمان تدلعني بوزة

- حاضر يا وزة

-ولعلمك محدش بيقولي كدة إلا اللي بس واخد عليا

-ياه ...يعني كدة إنت خلاص وثقتي فيا يا وزة؟ ده شرف كبير ما أستحقهوش صدقيني

-آه طبعا يا حلاوة ده عيش وجمبري يا راجل

-ميرسي أووي يا وزة وعلى فكرة إنت كدة بقى شجعتيني على إني أطلب منك حاجة

-حاجة؟ خير يا حلاوة

-لا خير إن شاء الله............ أنا بس كنت عايز رقم موبايلك

-رقم موبايلي؟ ليه خير؟

-أبدا كنت بقول يعني لو نزلت إسكندرية تاني ولا حاجة وحبيت يعني إننا بقى نتقابل تاني فممكن برضه قبلها نتكلم ونتفق وكدة يعني

-نتقابل؟ ونتكلم؟ ونتفق؟

-آه نتقابل ونتكلم فيها حاجة دي؟

-لا أبدا مفيش..... بس يعني

-بس يعني؟ إنت كمان بقيت بتقولى يعني زي حلاتي؟ بس يعني إيه؟ خير؟

-أصل أنا بصراحة عندي مشكلة كدة صغننة يعني

-مشكلة؟ خير إن شاء الله

-أصل بابا راجل محافظ أوووي

-طب ما أنا عارف وقلتيلي ده برضه

-أصله بيخاف علينا اوووي من الهوا الطاير

-عنده حق بصراحة الزمن ده بقى خلاص وحش أوووي

-آه وعشان كدة بيحرم علينا إننا نشحن موبيلاتنا خالص

-طب ليه؟

- عشان يعني مانكلمش حد وكدة يعني

-ياه ده بابا راجل محافظ أوووي

-آه أوووي وتصدق رغم كدة أنا معايا بدل الموبايل إتنين في شنطتتي

- ياه إتنين؟

-آه بس زي قلتهم لأنهم على طول بدون رصيد

-بسيطة

-بسيطة؟ بسيطة إزاي يعني؟

-تاهت ولقيناها يا وزة

-إزاي يعني؟ بليييز فهمني

-شوفي.... إديني إنت بس رقمك دلوقتي يا ستي وانا أحولك فورا رصيد من اللي معايا ..........أيه رأيك يكفوكي خمسين جنية؟

-خمسين جنية؟ آه دول كتير أوووي بس

-بس؟ بس إيه تاني؟

-أصل أنا عارفة نفسي أول ما ح يكون معايا رصيد ح أروح متصلة على طول بطنط

-طنط؟

-آه طنط توتة...دي عمتو أخت بابايا كدة لزم وبموت فيها خالص وبقالها يجي عشرين سنة في أمريكا وبصراحة هى وحشاني موووت

-بسيطة يا وزوز

-بسيطة؟ بسيطة إزاي طيب؟ بقولك دي في أمريكا يعني الخمسين جنية بتوعك دول ممكن يطيرو في ثواني

-شوفي يا ستي...أصل أنا بصراحة مش معايا دلوقتي أكترمن الخمسين جنية دول على الخط بتاعي..بس في حل تاني يا وزة

-حل تاني؟

-آه أصل أنا معايا كمان كارت شحن في المحفظة بتاعتي وده ممكن تاخديه وبكدة يبقى معاكي مية وخمسين جنية يا ستي مرة واحدة

-مية وخمسين جنية؟ ياه ده كتير خالص ..ميرسي أووي ليك بجد مش عارفة أشكرك إزاي؟

-لا عادي مفيش شكر بقى بينا دلوقتي خلاص..........ده عيش وسبيط يا وزة إنت نسيتي؟

-آه صحيح........لأ وإيه محمر وطاجن كمان

-بس إنت معاكي خط فودافون ولا إتصلات؟

-معايا كله

-كله؟

-قصدي يعني معايا الإتنين ...مش أنا قلتلك إني معايا موبيلين؟

-آه صحيح.........طب خلاص خدي الكارت بتاع فودافون ده....ده كارت بمية جنية....وإبقي إشحني بقى براحتك لما تروحي.....وعلى رأي المثل إتجمز يا جميل بالجميز لحد ما يجي التين...... والمرة الجاية يا ستي إن شاء الله أبقى أجيبلك واحد تاني لإتصلات .....مبسوطة كدة؟

-كتر خيرك...ميرسي أووووي...إنت بجد حد جميل خالص

-العفو يا وزة...بس ياريت لو سمحتي تسيفييلي دلوقتي أرقامك كلها هنا ع الموبيل بتاعي ده عشان كمان يعني أبقى أقدر أحولك رصيد تاني بالليل أول ما أروح وأهو كمان بالمرة يبقى معايا أرقامك على طول.........إتفقنا يا حلوة؟

-حاضر من عينيا......................إتفضل أديني سيفتلك الإتنين أهو...مرضي كدة؟

-إيه ده يا وزة؟

-إيه في حاجة غلط بعد الشر؟

-لا مفيش حاجة بس مسيفة إسمك مرتين وكمان بطريقة غريبة أووي

-إزاي يعني؟

-يعني مرة وزة فون ومرة وزة لات............. إيه الأسامي الكوميدية دي؟

-لا ده بس عشان تعرف تربط بين كل خط وشركته ..يعني مثلا وزة فون ده إختصار وزة فودافون...ووزة لات يعني وزة إتصالات...فهمت؟

-آه فهمت ...تصدقي إنها بجد طريقة حلوة أوووي وموسيقية كمان ..والله برافو عليكي

-مش كدة؟.......... إبه ده؟ ..........يا خبر!!!!!!!!!!!! ...........ده أنا إتأخرت أووووي بجد النهاردة......... ده كدة ممكن بابا يعملي مشكلة دلوقتي...طب سلام بقى وخلينا بقى على إتصال وموبيلات يا حلاوة وأهو وبدل الرقم معاك رقميين ....يلا بقى باي

*******************************************

3

-ألو.........أنا أحمد يا وزة ..أحمد حلاوة......فاكراني؟ إنت فين يا هرابة؟ بقالي إسبوع عمال أحاول أتصل بيكي وموبيلاتك على طول مشغولة يا ستي

-مين معايا؟ النمرة أكيد غلط حضرتك ....... هنا محلات فونلات ....أي خدمة يا هندزة؟

-فونلات؟ إيه الإسامي الغريبة دي ع الصبح؟

-آه فونلات...........مش عاجبك الإسم بتاعنا؟ فونلات للشحن....... ما سمعتش عنا؟ ولا سمعك تقيل....احنا أحسن شركة فيكي يا منطقة بتشحن فودافون أو إتصالات ع الطاير...... فونلات للشحن لصاحبها........أنا يعني محسوبك المعلم روقة المروق...سبعة شارع إسكندر ابراهيم بميامي بجوار محلات عصير النهضة بتاعة عم الشباب والرياضة و نايب الدايرة عن حزب النورالحاج زعزع

-روقة المروق؟ وفونلات؟ وفودافون وإتصلات؟ إيه ده؟ مش غريبة دي شوية يا معلم روقة يا مروق؟

-غريبة؟ هي إيه دي اللي غريبة يا باشمهندز

-أصل وزة كانت مسيفالي النمر بتوعها برضة كدة بنفس طريقتك ... وزة فون ووزة لات

- وزة فون ووزة لات؟ آآآآآآآآآآآآآآآآآه تكونشي إنت الجدع بتاع أكلة السمك؟ إزيك يا حلاوة؟

-أكلة السمك؟ وإزيك يا حلاوة؟ والله أصيلة يا بت يا وزة ماخبتيش أي حاجة على بابا خالص....أصيلة بجد يا وزة....أما بصحيح عيلة محافظة بحق وحقيقي....والله وعرفت تربي يا عمي

-عرفت أربي؟ ويا عمي؟ تكونش يا جدع ولو موأخذة فاكر إن البت وزة دي تبقى بنتي؟

-إيه ده؟ هي مش بنت حضرتك يا عمي؟

-برضة بيقولي يا عمي...يا إبني وزة دي زبونة زي آي واحدة

-زبونة؟

-آه زبونة من اللي بينفعوني وأنفعهم

-بينفعوك؟ أنا مش فاهم أي حاجة وربنا خالص

- يعني دول ناس ربنا كرمهم ولا مؤاخذة بكارت شحن و واخدينه يعني جدعنة أو ساعات حضرتك رصيد لاطشنيه كدة و لا كدة من واحد سوري يعني في الكلمة كروديا.....نظام يعني ولا مؤاخذة إستحباب أو رزق الهبل ع المجانين......... وعايزين بقى ولا مؤاخذة يخلصو منهم وياخدو فلوسهم يا حلاوة......... ....,وأكيد البت وزة قالتلك إن حسنتي عشرة في المية ....إيه النظام يا هندزة؟ معاك ولا عايز رصيد؟ ومتنساش باخصم م المية عشرة.......... ......إستبينا يا هندزة؟ ونهارنا فل إن شاء الله..... ألا صحيح إنت كنت عايز البت وزة في حاجة يا حلاوة.

44 comments:

Israa' A. Youssuf said...

ده طلع كروديا أوي يعني D:

بس البت وزة دي طلعت ناصحة والله D:

حلو أوي البوست :)

هبة فاروق said...

ههههههههههه
يستاهل اللى جرى له قال وزه قال
اهو بقى فى الاخر فرخه
حلو البوست وضحكت على اكثر من موقف تسلم الايادى

طيوري said...

هههههههههههههه
انت بقيت عارف كل حاجة في اسكندرية اكتر من الاسكندرانية ذات نفسهم وعرفت السنجاري والسوبيط الطواجن واسكندر ابراهيم
وتلاقيك بقيت تعرف ابو طاحون بتاع الفسيخ
وايه عصير النهضة ده فين ماشوفتوش انا
بس اكيد ماتعرفش الجندوفلي والجلاجولا والرتسا والترسا وام الخلول او بلهجة الاسكندرانية مونخلول
ادينا كسبت فيك ثواب وعرفتك اهو ما انت ياما عرفتنا
لا بجد تستحق الجنسية عن جدارة بس ماتخافش مش هاتمنعك من الترشح لاي منصب داخل مصر الا اذا
انت فسرتلي اخيرا انا ليه لما باجي اشحن والراجل يقولي مافيش كروت في شحن على الهوا لايمكن اشحن وامشي بس مكنتش عارفة السبب
اتاري الطاير فلوسه مغسولة ههههههههههههه
تسلم يادماغ
قرفة

faroukfahmy58 said...

تسلم دماغك العالية يا تركيب
مدرسة فى شئون التصب والضحك على الدقون
لا اقصد دقون السلفيين او الاخوان ربنا يسترها معاك ومعانا يا تركيب

راجى said...

بيحصل فعلا فى الواقع
تحياتى

ماما أمولة said...

النصب بقى مهنة للأسف

تسلم ايدك يا حلاوة :)

candy said...

العليه العوض ...

الصراحة زى مافى بنات هبلة وبيضحك عليها من أقل كلمة .. الرجالة أكتر وأكتر :))

norahaty said...

وضاعت عليه الخمسمية جنية
وراحت عليه حلاوة الأكلة
اياكش بقى يتعلم وما
(يندبش)
على
بوزه مرة
تانية بسرعة كدا

spiceman said...

والله شكلك انت احمد حلاوه يا حلاوه!!
معلش تكون في بوقك و تقسم لروقة المروق بتاع الفونلات!

Tarkieb said...

Israa' A. Youssuf

ههههههه وزة بتعوم وتبلبط وتغرق اي حد يقابلها....نورتيني

Tarkieb said...

هبة فاروق

ههههههههه بقى فرخة ومريش وطارو السبعمية وخمسين جنيه اونطة ...منوراني يا فنانة

Tarkieb said...

طيوري

هههههه ايه للاسم الجميل ده فكرني بواحد ابقى احكييلك عليه بعدين....اه انا اعرف ابو طحون بتاع الفسيخ ده من دسوق....واعرفالجندوفلي والترسا وام الخلول.... أما الجلاجولا والرتسا دول معرفهمش هههههه اشوف في الصيدلية هنا.....واشحن ع الطاير فلوس حلاوة حلال ههههه....نورتيني

Tarkieb said...

faroukfahmy58

هههههه لا اتكلم ع الدقون براحاتك مافيش حد منهم بيجي عندي .....نورتني وشرف ليا انها عجبت حضرتك وللعيلة الكريمة...

Tarkieb said...

راجى

اه كتير ...ده في ستات قاعدة ع النت ليل نهار بتاخد كروت من كروديات كتيرة .....نورتني

Tarkieb said...

ماما أمولة
ههههه النصب موجود طول عمره...بس دي بتنصب وتتعشى سمك...نورتني يا ملكة

Tarkieb said...

candy

عليه العوض القرشنات راحو بس استفاد باكلة سمك واحدة تفتح نفسه. اكنها سلطة هههههههه...نورتيني

Tarkieb said...

norahaty

هههههه هو اللي كان بيشبه وعامل برم واتدب....نورتيني يا نورا

Tarkieb said...

spiceman

هههههه ياريت حد يطول موزة وسمك....لا موش انا ...كله م الخيال....بس في زي وزة بالهبل في النت ....بس عايزين حد في مصر عنده كروت .

Mona El-Gharbawy said...

جميلة وللأسف ده واقع وفيه منه كتير

شمس النهار said...

علي قد ماضحكت
علي قد ماانا فرحانة فيه
500جنيه سمك لواحدة مايعرفهاش:))))

بسمة الورد said...

بصراحه انا اسمتعت جدا بقصتك ياحلاوة قصدى ياتراكيب
ههههههههههههه

تسلم وتسعد قلوبنا بجميل ما تقدم

دمت بكل خير وسعاده وخفه دم جميله

مودتى واحترامى لما تقدم

ShaiMaa Gaber said...

أيوووووه يا حلاوة ده طلع كروديا أخر حاجة، بقي المغفل يدفع 500 جنيه في عزومة لواحدة مايعرفهاش وكمان مفجوعة بالمنظر ده، وكمان كروت شحن، تلاقي البنت وزة كانت قعدة طول العزومة تقول عليه جردل، بس نقول إيه بقي الكروديات بقي كتير في البلد.

واللهي أحسن يستاهل اللي حصل له، لأنها أكيد مش أول مرة يعمل كده، شكله واخد علي الحركة دي، خليه كده يتعلم أن الحجر الداير لابد في يوم لطه.

بس بجد يا تركيب فطست ضحك من قلبي اوي عل الموقف والحبكة الدرامية بتاعته ههههههههههههه

تحياتي

re7ab.sale7 said...

ههههههههه
كنت عارفة اللعبة دي
بس تفتكر ف حد لسة عبيط كدة؟؟
ههه
بس طريقتك تجننن

reemaas said...

6 كيلو سمك وجمبرى ههههههههههههههههه


لا عبيط عبيط يعنى يستاهل الحقيقة

P A S H A said...

هي دي اللي بيغنوا لها
"أشحن بفلوسي ليه؟؟أنا وحشة ولا إيه؟؟ "
هههههههههههههههههههههههههههههه

طبعاً صاحبنا ده لو كان شاف راجل مزنوق في مكالمة مهمة ولا كان عبره أصلاً !

تحياتي لأسلوبك الجامد جداً يا فنان
:))

Tarkieb said...

Mona El-Gharbawy
صحيح الفقر بيخلى الناس تلجأ لكده أظن ان مفيش حد نفسه يبقى نصاب بس الظروف وحشة....نورتيني بجد

Tarkieb said...

شمس النهار

هههههههه فكرني بالبوسة بتاعة محمد صبحي بوسة بسبعين جنية ده اكل سمك برضه وواحدة فتحت نفسه اكنها مخلل ....نورتيني

Tarkieb said...

بسمة الورد

ههههههههه لا والله لا حلاوة ولا ملزق زيه ...انت اللي نورتيني يا شاعرة بجد ..تحياتي

Tarkieb said...

ShaiMaa Gaber

ههههه بصفتك خبيرة تسويق في النت في واحدة افريقية نصابة زي وزة بتبعت ميل تقول جوزها مات وعندها فلوس كتيره وعايزة فلوس القضية بس والمكسب بالنص...يعني وزة في كل حته ..نورتيني

Tarkieb said...

re7ab.sale7


ياه العبط بالهبل ...ماتنسييش ان حلاوة كان بيرمي الهلب وبيصداد وفاتح صدره اوووي وعشان كدة وقع..نهارك فل وبنفسج

Tarkieb said...

reemaas said...

عب موجود موجود...صدقيني الناس دي لو الموضوع مش بينفع ما كانوش عملوه...المغفلين بالهبل...نورتيني

Tarkieb said...

P A S H A

عنك حق الناس دي بتبقى عاملة مفتحة على الناس الشريفة وبيتضحك عليهم من الهوا....بس الانواع دي كتير وفي كل مكان..نورتني

عباس ابن فرناس said...

بالمناسبه مالك بقا ومال حزب النور ياعم تركيبو احنا مش كد بكار وعصابته ههههه
وعموما زمان ليه نصابينة وليه احزابةه وكمان سلفييه

وحشتنى

تحياتى المستعطرة

rona ali said...

هههههههههههههههههههههههههههههههههههههههههههههههههههههههههههههههههههههههههههههههههههه

ودة سبب حبي للبط الوز بقي صعب اليومين دوال اوى ههههههههههههههه

لاء بس بيجد الموضوع كان واضح خلاص بس حلاوه من كتر ما كا لازق مفهمشي هههههههههههههههههه

zeze said...

ياسلااااام جميلة ما اللي بيعمل نفسه ناصح اووي لازم ينزل علي مفيش ه
هههههههه،بس شكلها شغلانة بتكسب

من كل بستان زهرة said...

كروديا....ولا مؤاخذة
ههههههههههههههههههه
يا حلاوة يا ولاد

بس مش ملاحظ كده يا تيكو أنك ناسي خاااااااااااااااالص حكاواتي ومغنواتي
ومطنش عم شبطه

أنا كل شوية بدخل أسمع الحاجات القديمة
وأقول قريبا في جميع الأسواق هلاقي العمل الجديد وأنت مطنش خالص ؟؟؟

صاحب الحبر الأسْوَد said...

احلي حاجة في كتابتك ان فيها طابع كوميدي بحت وتموت من الضحك بس دايماً بين السطور بلاقي طرح لسلبيات موجودة في المجتمع بالفعل
بالذات موضوع النصب والمنظرة وفي الاخر هتلاقيها حلقة من الغش والاستغلال
هو ينصب علي واحد تيجي وزة تنصب عليه يجي واحد تاني خالص ينصب علي وزة وهكذا

لان اكيد لو ماله حلال مية في المية وتعبان فيه ماكنش يطلع منه جنيه غير لما يحسب هيطلع ليه ولمين

ابدعت كالعادة
تحياتي لقلمك المبدع
وشكراً ع الابتسامة

P A S H A said...

يا صباح الفل يا كبير
:)
ألف مبروك ع البياض ، أنا برضة لسه مخلص نقاشة عندي في المدونة ، اللون حلو وهادي ومحترم ، ما قلتليش النقاش خد منك كام ؟؟ ولا دهنتها بنفسك زي حالاتي :D

Tarkieb said...

عباس ابن فرناس

انت كمان وحشتنا اوووي بلاش تتأخر تاني والحمد لله السلف تلف هههههه

Tarkieb said...

rona ali
ههههههههه البط تلاقيه نظام شربة وبرام مش كروت ههههههه ويتزغط احلى..نورتيني يا رونا

Tarkieb said...

zeze s

اه شغلانة حلوة اوووي في ناس بتكسب منها الشهد وحمادة فيه منه كتير اكيد.نورتيني

Tarkieb said...

من كل بستان زهرة
حمد الله ع السلامة ..اسمعي القديم الاول دول كتار بس انا بعمل واحدة دلوقتي ونازلة قريب وبرضة شبطة ويارب تعجبك

Tarkieb said...

صاحب الحبر الأسْوَد
ربنا يخليك ودي شهادة اعتز بها من واحد زيك بجد...ويارب اكون دايما عند حسن ظنك ونورتني

Tarkieb said...

P A S H A
الله يبارك فيك ياباشا هههههههههه لا مبيضها بنفسي بس والله عجبني انها هادية وكويس انها عجبت واحد صنايعي فاهم في الشغلة..نورتني