Wednesday, April 4, 2012

عادي

-الجميل قاعد لوحده ليه؟

-وإنت مالك يا غلس؟

-غلس؟ الله يسامحك..الحق عليا برضة اللي خايف عليكي؟

-خايف عليا؟ من إيه يا خفيف؟

-لا والله بأتكلم جد دي منطقة مقطوعة وتخوف بجد

-عادي

-عادي؟ يا قلبك و في الساعة المتـأخرة دي؟ وكمان في الإنفلات الأمني بتاع اليومين دول؟ لا بجد ده كتير أووي

-عادي ربك بيستر يا حشري أفندي

-حمادة ...إسمي حمادة العايق يا أنسة .....؟

-وإنت مالك بإسمي؟ هو إحنا ح نتعرف ولا إيه؟

-طب ماتزقيش طيب يا بخيلة هانم

-بخيلة؟

-آه بخيلة وستين بخيلة كمان

-ليه بس كدة يا عايق اللون ده ع المسا كدة؟ ما كنا كويسين وكنت قاعدة كافية خيري شري

-يعني بتاكلى لوحدك يا حلوة ومش عايزاني أقولك يا بخيلة؟

- بقى يعني كل الهيصة دي عشان عينك ع اللقمة اللي بتسممها؟

- مش برضة اللي بياكل لوحده بيزور؟

-خلاص إتفضل بالسم الهاري وماطرح ما يسري يهري

-كدة برضة يا طعم إنت؟ ماشي مقبولة منك ومرضية إن شاء الله وأهو برضة ع الأقل إسمه ح يبقى بينا عيش وملح يا غزال

-عيش وملح؟ لا خفيف يا واد والنبي

-آه عيش وملح واهو برضة نحلي بحاجة عرفت طريق البق المسمسم ده؟

-المسمسم؟ الله ما طولك ياروح...جرى إيه يا أفندي ما تلم نفسك بقى بدل ما أقوم ألمك في ليلتك السودة دي

-وربنا عسل وبقك بينقط عسل والنبي قشطة والنبي طعم

-ماشي أديني إتنيلت وعرفت إني بقى عسل وملزق كمان

-وحياة ربنا خاتم سليمان

- خاتم سليمان؟ فيه إيه يا جدع؟ إنت عينك كانت مركزة كمان في بقي ولا إيه؟

- ومين سمعك؟ وعهد الله أنا كلى مش عيني بس اللي نفسي فيه أوووي

-نفسك فيه؟ لعبت نفسك على عود صحيح راجل هذق ما يختشيش

-حلاوتك يا أبيض إديني وإشجيني كمان وكمان والنبي قشطة

-أشجيك؟

-آه أصلك بجد بتبقى عسولة أوووي لما بتتحمقي

-أتحمق؟ هههههههههه إنت إتجننت ولا إتهبلت يالا ولا إيه؟ أنا أتحمق منك؟ أنا أتحمق منك إنت يا عايق؟ ما يحكمشي...يا إبني ولا عشرة زيك

-يعني لو أخدتلي دلوقتي بوسة م الشفايف اللي عاملة زي مربة الورد والمشطشطة دي مش ح تضايق يا حلو إنت يا حلو؟

-مابلاش يا إبني أحسنلك

-طب ولو اخدتها بالعافية بقى؟ برضة ح تتحمقي ؟

-أتحمق ههههههههههه إجري إلعب يا لا......يا إبني عادي

-عادي؟ هو إيه ده اللي عادي؟ يعني أبوسك وبرضة عادي

-آه عادي مش إنت قلت بالعافية يبقى خلاص عادي

-عادي بجد؟ يعني أبوس؟ يعني أتكل على الله .....ههههههههه وأهو يبقى بقى بوس وملح

-آه عادي

-عادي عادي؟ ولا كلام؟

-هي سيرة ما قلتلك عادي ح تتنيل تبوس وتخلصني ولا لأ؟

-لا والله كنت بس بأتأكد قبل ما أتهور وأعمل العمل الكبير ده

-عمل كبير؟ بقى كل الهيسة دي عشان حتة بوسة؟ جتك خيبة.. خلص هات بقك يالا وخد دي....مممممممممممممممممم......مبسوط كدة؟ أهو بوسة أهي ولا بتاعت السيما؟ أي خدمة يا معلم

-مبسوط؟ إلا مبسوط ..طب ده أنا طاير م الفرحة ......طب تصدقي؟ أنا وربنا دخت خلاص الظاهر من حلاوة الحب ونشوته... سكر يا أخواتي سكر

-نشوة الحب؟ ههههههههههههه إنت لحقت يا عايق؟

-إلا لحقت؟ ده أنا وربنا خلاص مش قادر أتلم على رجليا م الفرحة يا جميل

-هههههههه م الفرحة؟ لا وإنت الصادق م السم يا عايق

-السم؟ سم إيه؟

-آه السم يا روح ماما......يعني كنت متخيل إيه يعني؟ هو أنا أعرفك يا إبني ولا كنت من بقية عيلتي عشان أديك أكلى بحاله وأغني أنا بعدها ظلموه؟ وبعدين مين بزمتك ح ترضي تبوسك يا معفن إلا ما يكون فيها مرض أو علة وحاقدة ع الدنيا بحالها؟ إنت ياد مش بتشوف سنانك الصفرا والمعفنة دي في المرايا ؟ ولا عايزلك نضارة يا حبيبي؟ على العموم حظك حلو مش ح تلحق تشوف أعراض الهربس عليك لآنها كلها ثواني وتتكل على الله يا حلو وتريح وتستريح ...يابختك يا إبن المحظوظة ماشية معاك أخدت اللقمة من بقي

-إنت بتقولى إيه؟ بتقولى إيه يا بت يا هابلة إنت؟ وربنا ما فاهم حاجة

-بقولك اللي إنت مش عايز تصدقه يا روح ماما...على العموم أنا خلصت ضميري وقولتلك في الأول بالسم الهاري وإنت برضة مصدقتنيش...وحاولت أفهمك إن البوسة مش في مصلحتك وإنها ممكن تعديك وإنت برضة اللي راسك كانت عاملة زي الجذمة القديمة وصممت تاخدها ...........إشرب بقى يا حلو..............ليه كدة بس يا ربي؟ بأبعد عنهم وهما برضة اللي بيجرو ورايا.......طب أعمل إيه أكتر من كدة؟ طب منين أجيب سم تاني والنبي؟ ده أنا مصدقت جبته وقلت خلاص ح نخلص م الدنيا الوحشة دي........حكمتك يا رب

41 comments:

re7ab.sale7 said...

ههههههههههههه
يستاهل
والله بجد
انا مش عارفة انت بتجيب الافكار اللي تجنن دي منين
بس البوست ده بيفكرني بحاجة كدة

re7ab.sale7 said...

هاهاها
انا اول كومنت
عايزة حاجة حلوة بقي
صباح البنفسج

;كارولين فاروق said...

حلاوه الحب
سم هاري
وهو اللي طالب بقي
يشرب
وكل سنه وكل واحد بيعاكس مقلب
تحياتي

فاتيما said...

يا ساااااااتر
ايه دا يا تركيب
لأ كدا الواحد يخاف يهوب ناحية المدونة
لحسن تكون متكهربة
ولا فيه ازاز متكسر ع السور
ولاّ حاجة

:)

تسلم ايدك

Tarkieb said...

re7ab.sale7
ههههههه دي عمرها ماحصلت اول تعليق...ده انا ح ابل فول نابت لام هاشم بقى .....طب ماتحكي الحكاية ......نستفيد....انا كل حكاياتي كدة اسلوب كوميديا الموقف والمفاجأة.....

Tarkieb said...

كارولين فاروق

هههههههه دبور وزن على خراب عشه....محدش ضربه على إيده...منوره يا كارولين

Tarkieb said...

فاتيما
ههههه لا ماتخافيش بس ابقى انت تعالي وبعدين احنا بنشوفيك م السنة للسنة .....انت عارفة انت بتنوري اي مدونة بتزوريها .....ماتحرمنا م الزيارات وبس خلاص

ShaiMaa Gaber said...

هههههههههههههههههههههه ده انت مشكلة بجد ياخبر هههههههههه
بس حقيقي أحسن ويستاهل كمان :)))

faroukfahmy58 said...

بصراحة يا تركيب بتفكرتى بحوارات باب الشعرية البنت من دول الواحد يحب يعاكسها لا لحلاوتها انما لزفارة لسانها الجذاب الملسوع
بس انا على يقين ان ماقالته ليس الا تخويفا ليبتعد عنها بعد ان اوصلته الى التقبيل اللاارادى ممكن الغلاسة تخللى البنت من دول تخوف اللى قصادها حتى يجرى ليلحق نفسه من السم الذى ابتلعه وتكون بهذه الطريقه طفشته بدون مطرود
استريح دائما لكتاباتك الشعبيه

ماما أمولة said...

يستاهل الطفس بس هي برضه تستاهل الحرق :))
سرد رائع من كاتب رائع :)

قرفة said...

هههههههههههه
عادي في المعادي وبتحصل في الزمالك
هههههههههههههه
انت بجد مشكلة تمشي على الارض
بس بجد فنان وعبقرينو
ولازم في الاخر صدمة
موفاجعاتك كترت اوي ياتركيب
جميلة اوي بجد
تسلم ايدك
وبردو الشعب يريد حكواتي من جديد

Tarkieb said...

ShaiMaa Gaber

ههههههه ده انا غلبان ومليش دعوه بيه خالص....نورتيني

Tarkieb said...

faroukfahmy58
ربنا يخليك وكله من ذوقك وبعدين السيدة وباب الشعرية واحد او ولاد عم...وبفرح اوووي بتعليق حضرتك

Tarkieb said...

ماما أمولة

ربنا يخليكي دي شهادة اعتز بها من اسطى الزمن الجميل

Tarkieb said...

قرفة

هههههههه طب بذمتك انت اتفاجأتي انت اكيد داخلة تقولي اكيد في مصيبة في الاخر ....خلاص حفظتي الاسلوب...زبون مستديم لبلاويا هههههه ..منوراني دايما يارب وحكاوتي عايزة وقت وتسجيل واخراج ومذاج فاضي وانا الايام دي مشغول شوية.....بس شوية كدة ونعمل شبطة

فاتيما said...

النور نور صاحب المطرح
وانا هنا دايما والله
ولا أفوّت تدوينة ...

:)

منحرمشى
من كلامك الطيب
ولا ذوقك ابداااا

:)

هبة فاروق said...

ههههههههههههههههه لا ده كده بقى اقدم استقالتى من الكتابه
عجبتنى نهايه القصه اللى انتهت بمفاجاه
تجنن شكرا لانك كتبت قصه جديده بجد انت مميز فى كتابه القصص يا تركيب

ويكا said...

هههههههههههههههه

reemaas said...

ههههههههههههههههه
حسستنى انى شريرة يا تراكيبو اصلى فرحت فيه بجد

rona ali said...

رهيبه رهيبه ههههههههههههههههههههههههههههههههههههههههههههههههههههههههههههههههههههههههههههههههههههههه

مش قادرة ابطل ضوحك

beautiful mind said...

هههههههههه
وانا عمال اقول ايه البنت السهله دي
يلا يستاهل
ههههههههه
بس حلوة اوي والله

Tarkieb said...

فاتيما

ربنا يخليكي ومايحرمنا من طلتك ...طب ابقى قولي هالو وامشي مش لازم تحكي المهم نحس بطلتك....وعلى العموم مرتيين اهم في موضوع يعني حنعوض اللي فات ههههههه....

Tarkieb said...

هبة فاروق

لا تستقيلي ايه ده انت الخير والبركة.....واخجلتيني بتواضعك ربنا يخليكي ويجعلك احسن كاتبة يارب وماتنسناش بقى بعد الشهرة ونورتيني....وبعدين النهاية عجبتك ههههه ما انت برضة حكايتك كدة

Tarkieb said...

ويكا

شكرا عالتعليق ويارب نشوفك تاني

Tarkieb said...

reemaas

ههههههه شوفتي بقى الرجالة بيقفو وقفة رجالة مع الحق حتى لو كان ضد راجل برضه....يعني مظلوميين ههههههه....منور يا نجم يا صاعد

Tarkieb said...

rona ali


ربنا يضحكك كمان وكمان وميرسي عالضحكة ههههههههههههههههههههههههههههههههههههههههههههههههههههههههههههههههههههههههههههههههههههههه الطويلة دي

Tarkieb said...

beautiful mind

امال يامعلم مفيش حد ساهل الايام دي لا لللي بيعاكس ولا اللي بتتعاكس ههههههه....نورتني وكل حناني وانت طيب ياراجل يا طيب

بسمة الورد said...

ههههههههههه

مش بقلك انت مشكله فى الضحك والكتابه الساخرة ياتراكيب

بجد سرد جميل شدتنى لاخر نقطة سم اقصد لاخر كلمه ههههههههه

اضحك الله سنك وادام عليك خفة ادم الراقية

احسنت اخى
كل الود والاحترام لقلمك وموهبتك الجميله

Tarkieb said...

بسمة الورد

ربنا يخليكي يا فنانة ومايحرمنا من تعليقاتك....وسعيد اووووي انك ضحكتي وماجالكيش تسمم هههههه....نورتيني

Amr Oamr said...

فكرتنا بأيام زمان و اللزقة قدام الثانوية بنات ... و أحلى كلام و غمزات و ضحك و ردح و شتيمة و أجري ياض أحسن البوكس جاي


حلوة :)

صاحب الحبر الأسْوَد said...

بصراحة صدمتني في البداية بس في الاخر قلبت معايا بهستريا ضحك
يللا بالهنا والشفا
اهي قصة حب قريبة من روميو وجوليت
بس هي جوليت طلبت معاها بندالة في الاخر
مواكبة للعصر برده
: )
تحياتي لقلمك المبدع
وشكراً ع الابتسامة

Tarkieb said...

Amr Oamr

هههههههههه هو انت كنت زينا بقى؟ انا قلت بتوع المعادي مش زي بتوع السيدة..أحنا كنا في اعدادي لازقين لامين سامي وفي ثانوي للسنية بس ماكنش في بوكس ولا حاجة.. ح يلمو مين ولا مين دي كانت كل المنطقة بتعاكس

Tarkieb said...

صاحب الحبر الأسْوَد

ههههههه لسة ما اخدتش على اسلوبي كل قصصي كدة اخرتها سودة....نورتني يافنان

Amr Oamr said...

هو انت فاكر بتوع المعادي فرافير بجـد و الا أيه .. و مين قالك أننا برده معلمناش على السنية و امين سامي ... ده أنا كان عندي أبونيه اساسي في سينما الشرق يا باشا :)

ابو المفاصل الواصل said...

سعدت بزيارة مدونتك
تحياتى

Tarkieb said...

Amr Oamr
لا طبعا مش قصدي يامعلم اصل انت ماشفتش بس الاشكال اللي كانت عندنا هههههههه...يعني كنت بتشوف افلام بروسلي بقى وبتشرب عصير من النسر وانا بقول شفتك فين ..منورني يا باشا

Tarkieb said...

بو المفاصل الواصل

وانا الاسعد ياريس

zeze said...

انا اول مرة ادخل هنا بس بجد استمتعت اوي ،وكنت متضايقة من البت في الاول علشان رضيت تبوسه بس معرفش انهاحتطلع مفتريةاوي كده ههههههه
دمت بأمان الله

Tarkieb said...

zeze
ياهلا ياهلا ويارب ما تكون اخر زيارة والحمد لله انها عجبتك شرفتيني

norahaty said...

وخلصت منه ومن شره
وخلصت الدنيا كمان
تُشكر الأمورة بجد
على عملتها الحلوة

Tarkieb said...

norahaty

وانا كمان باشكر الامورة انها جابتك هنا تعلقى ...نورتني يانور