Friday, December 17, 2010

أخر زمن

 

ـ إنت هنا من إمتى بالظبط؟
ـ ياه....ده سؤال صعب أوووي يا دكتور......دي حكاية فات عليها زمن
-
طب من إمتي بالتقريب كدة يا حاج خشبة؟
-
والله كل اللي أنا فاكره اني جيت صباحية يوم لما الزمالك خد الدوري
ـ يا نهار أبيض ده أنت قديم أوووي يا حاج... ده أنت خللت هنا يا راجل-ما انا قلتلك يا أبني وإنت مصدقتنيش...بس غريبة مش كدة؟
-
غريبة؟ هي إيه دي اللي غريبة؟ إن الزمالك خد الدوري؟
-
لا....إني جيت هنا م النجمة يعني

ـ لا خلاص مش شرط يا حاج.... الدنيا خلاص إتغيرت دلوقتي ....وماعدتشي زي زمان
-
بس تفتكر في أمل يا دكتور؟-في إيه بالظبط؟
-
في الحاجة نيفين؟
-
مالها الحاجة نيفين؟
قصدي يعني إنها ترضي بيا وتسيبها بقى من النعرة الكدابة اللي هى فيها دي...آينعم إحنا قرايب بس هى كمان حاطة في العلالي أووووي وفاكرة نفسها بنت بارم ديله
-
لا ما يهمكش أنا ممكن أكلمهالك لو تحب؟ ماهي موجودة جنبنا على طول هي ح تروح فين يعني؟
-
أحب؟ دا أنا ميت لشوشتي يادكتور..وبحلم باليوم اللي يجمعنا سوا ..عارف لايق عليها اللون الأبيض أووووي؟....زي الملايكة سبحان الله
-
بس لازم تغير شوية من منظرك يا حاج وتهتم شوية بقى بنفسك...ياراجل ده إنت بقيت هيكل عضمي خالص ...فين العضلات بتاعة زمان..إنت مش بتبص لنفسك في المرايا دلوقتي ولا إيه؟
ـ لا والله دا أنا نسيت حتى شكلي بقى ايه
-
أنا خايف وربنا إنك تخوفها بشكلك ده...ومتنساش كمان إنها واخدة بَرْضُه ع العز يا عم خشبة؟
-
يعني ح تشوفلي صرفة؟
-
طبعا وإن شاء الله حلك عندي ...بس سيبني شوية كدة أمخمخ وأرد عليك بعدين..
-
أنا لسة ح استنى يا إبني؟ يا دكتور الوقت عمال بيجري وأنا بَرْضُه لسة محلك سر...بموت فيها مش قادر خلاص
ـإنت مستعجل على إيه بس يا عمي؟ يعني وراك الديوان؟ ما أنت مرزي هنا بقالك سنين لما خلاص عفنت
-
عفنت؟ إيه الالفاظ دي يا ولد؟ عمال أكلمك عن الحب والرومانسية وإنت تقولى عفنت..طب إحترم سني...بلاش دي ....ده أنا اقدم منك يا أخي ..أنا غلطان وربنا إني سايب التربة كلها وجاي أتكلم مع عيل ناقص ولسة ماطلعشي م البيضة.....يا عبد الحميد.....يا عبحميد .....يا عبحميد يا أخويا تعالى شوف الواد إبنك اللي لسه مدفون طازة وجاي عاملي فيها دكتور على أخر الزمن

Thursday, November 25, 2010

ناجح يا سيد

القاهرة ....زي النهاردة ....



-
جاهز يا إبني للإمتحان النهاردة ولا زي كل مرة؟
-
جاهز سعادتك أكيد .....وإن شاء الله دلوقتي ح أثبت لحضرتك إن ولاد البلد برضة عالم كفاءة أوووي و أجدع مليون مرة من المفتش كرومبو...وربنا يسهل بقى حضرتك وناخد الشهادة الكبيرة النهاردة بالصلاة ع النبي....إنت ما تعرفش حضرتك إحنا تعبنا وربنا قد إيه عشان نخشو بس الاكاديمية الجنائية دي؟ ولا أهلى حضرتك .......دول عملو بلاوي متلتلة بس عشان يدبرولى مصاريف الدراسة هنا.... ده أنا ناوي إن شاء الله أعمل أحلى شغل النهاردة.....ودلوقتي ح تشوف حضرتك
ـ ياه !!!! أحلى شغل كده مرة واحدة يا سيد؟ طيب جميل ..جميل ...جميل أوي يا سيد ....طب يالا بقى يابطل ورينا همتك دلوقتى ..........شوف يا إبني....بص كدة.......شايف إيه؟
ـ ايه ده حضرتك؟ دي صورة واحد مجرم
ـ برافو يا ابني ....شاطر ...برافو........طب بعد ما شفتها بقى تقدر تتعرف عليه هو نفسه لو شفته في حتة تانية يعني؟
-
أتعرف عليه؟ بالزمة ده كلام؟ طبعا حضرتك...ده انا أطلعه من بين ألوف ...ده انا أطلعه وأنا مغمض عينيا حضرتك
-
بجد؟ بجد يا أبني؟ ما شاء الله عليك يا سيد....طب قولي إزاي تقدر تطلعه يا سيد كدة بكل سهولة؟
-
شوف حضرتك... المجرم ده.......المجرم ده حضرتك..... أعور....... أعور و بودن واحدة كمان ...يعني ح اجيبه ح أجيبه حضرتك.
-
أعور؟ و بودن واحدة؟ إزاي؟ يا ابني دي صورة بالجنب للراجل...صورة بروفيل يعني ...ولو صورته من الناحية التانية ح تشوف عينه وودنه التانية أكيد .....فاهم؟ ولا مش فاهم يا أبني؟
-
طبعا فاهم حضرتك....بس اكيد الراجل ده لابس عدسة...أقطع دراعي إنه لابس عدسة حضرتك.....وحياة ربنا اكيد لابس عدسة...أيوة لابس عدسة .........مش كدة؟ ولا أنا في دي برضة غلطان حضرتك؟
-
لابس عدسة؟ وإيه بقى اللي مخليك متأكد كدة يا إبني؟
-
شوف حضرتك....واحد أعور زي ده يبقى لازمله نضارة حضرتك ..بس لا مؤاخذة حضرتك ناقصه ودن...قولي بقى ح يلبس النضارة ده إزاي طيب ؟ مش قلتلك ده مؤكد لابس عدسة سعادتك؟
-
لابس عدسة؟ عدسة إيه؟ ونيلة إيه يا منيل إنت؟ جاتك ستين نيلة ......إطلع برة.......إطلع برة.........برة...... غوووووور واوعى توريني وشك تاني ...إستنى.......إستنى يا إبنى..........خلاص.......أمري لله وربنا لولا إننا في أكاديمية خاصة ده أنا كنت سقطتك فورا..........منه لله صاحب الأكاديمية بقى...... .خلاص ......ناجح يا ذكي ........ناجح يا سيد ومبروك عليك الشهادة........وربنا يكون في عون أي زبون يقع في إيدك يا إبني


Wednesday, October 27, 2010

جنة الشرق


جنة الشرق هي أحدث حكاية لي من سلسلة حكواتي ومغنواتي الهايفة بتاعتي ويارب تنول إعجابكم... مدة الحلقة 10 دقايق وسبعة وأربعين ثانية. بطل الحكاية مش غريب عليكم وراجل عشرة جامدة بس المرة دي عينه زايغة شوية. أسيبكم بقى مع الحكاية (ولو بتقطع دوووس على ستوب اول ما تشتغل لحد ما تتحمل كلها واسمعها أو حمل الام بي ثري من الفور شيرد واسمعه براحتك وبعد كده امسحه

اللينك للأم بي ثري كمان
http://www.4shared.com/audio/Pc3w0vlx/final.html

Sunday, October 10, 2010

تفتكري يا مامي؟







-
مامي أنا نفسي غمت على فجأة في المدرسة النهاردة ودخت كدة كذا مرة هناك


-
المدرسة؟ إيه ده يا زيزي هو إنت رحتى كمان النهاردة ؟ مش ممكن يا حبيبتي......أنا مش مصدقة خالص ......من إمتى يا زوزة بقيتي بتحبي كدة المدرسة؟

-خلاص بقى ...... أنا ريلي ريلي زهقت من النت والشات خالص وقلت يالا بقى أغير جو ، إيه رأيك مش كدة أحسن برضة؟

-تغيري جو؟ إيه ده يا زوزة؟ هو هاني إبن تانطك فيفي خلاص بقى مشغول عنك ولا إيه؟ مش كان مواعدك تعملو دايفينج في شارم؟ إخص عليه المجرم ده...طب بس اما أشوفه ....الله يرحم أيام الواد سوسو إبن تانطك عزة ....ريلي ريلي كان ولد بجد جنتلمان.... وكان ياروحي على طول و ليل نهار لازق عندنا ... عارفة يا زوزة؟ تقريبا من يوم ما سوسو يا حبيبي دخل الجيش وإنت حاسة كدة بفراغ جامد أووي، ربنا يكون في عونك ويعدي الأيام دي بقى بسرعة


-مامي ......الحكيمة بعد ما كشفت النهاردة عليا قالتلي أنا عايزة أبقى أكلم مامتك ضروري يا زيزي وقالتلي كمان أنا مش عايزة أعملك شوشرة هنا يا بنتي أو حتى أبلغ الناظر بتاعنا دلوقتي بالحكاية دي، وقالت في الآخر ربنا يكون في عونه عشان هو كمان مش ملاحق كدة على المدرسة ومشاكلها


-
الناظر؟ هو الناظر بتاعكم يا زوزة بالزمة بقى فاضيلكم خلاص.........ده من ساعة ما شاف قصة حب في رمضان وهو عمال يعاكس معظم مامات البنات تقريبا في النت....إنت عارفة يا زوزة يا حبيبتي؟ أنا مش ملاحقة أنا كمان رد عليه، ده راجل شكله فاضي أو بقى خلاص بيحب على روحه يابنتي من ساعتها


-نت وحب إيه يامامي؟ بقولك قالتلي شوشرة بس مش عارفة هى كانت تقصد إيه بالكلام ده؟


-
سيبك منها يا زوزة......... هو أنا فاضية لدلع الستات ده..... تلاقيها يا بنتي واحدة فايقة ورايقة، ماهي لو كانت مشغولة زيي كدة في النادي ولا مواعيد الكوافير ما كانتش عملت كدة؟ صحيح الفاضي يعمل بجد قاضي


-
طب أقولها إيه طيب؟ دي كمان سألتني عن الأصحاب الأنتيم بتوعي وعددهم وسنهم وكدة يعني، أنا بصراحة مش فاهمة إيه علاقة ده كله بالدوخة اللي عندي يا مامي؟


-
سيبك منها يا زوزة يا حبيبتي...... وحياتك دي تلاقيها بس غاوية تعملي فيها دكتورة... حاكم هم بتوع التمريض كدة ... معظمهم يا حرام عنده عقد نفسية....حقد طبقي بقى..... عارفة يا زوزة؟ أنا متأكدة إنها واحدة فضولية أو جايز تكون معقدة حبة............... آه خلاص!!!!! تاهت ولاقيتها يا زوزة.....مش يمكن تكون غيرانة منك يا حبيبتي؟


-
غيرانة إيه بس يا مامي؟ دي شكلها كان ريلي زعلان أووي وكانت الدموع نازلة من عينها وهى كانت بتكلمني


-
كل ده عشان تعرف أسامي أصحابك الأنتيم؟ إيه الهبل ده؟ أما ست غريبة بجد!!!!!....خلاص إبقي قوليلها يا حبيبتي أساميهم إذا كان ده بقى اللي ح يريحها...بس إسمعي يا زوزة... إوعي يا حبيبتي تجيبي سيرة عمو عزيز لأحسن ترسم عليه هى كمان وتلهفه .........الراجل ريلي مش ناقص معجبيين


-
تفتكري عمو عزيز ممكن يفكر أصلا في الأشكال دي؟


-
وليه لأ؟....إنت لسة صغنونة يا حبيبتي على الحاجات دي ومتعرفيش الستات بتوع الأيام دول بقو إزاي بيوقعو واحد محترم


-برافو عليكي يامامي، إنت بجد حد مفيش زييك... عارفة؟ أنا نفسي ريلي لما أكبر أكون زييك كدة بالظبط


-
ماتستعجليش يا زوزة...بكرة تبقى زيي كدة وأكتر ومش بعيد ياحبيبتي تكوني أحسن مني كمان


-
تفتكري يا مامي؟