Saturday, March 21, 2015

إخص




  سيد شبطة شخصية طيبة بس خنيقة وعلى طول  بيقع في شر أعماله، ودلوقتي بقى بالنسبة لي صاحبي ..أعرفه هو ومراته وبناته (البولة واللول). تاريخ الصداقة بالظبط يوم 5-2-2010 لما ظهر أول مرة في سلسلة حكواتي ومغنواتي اللي تقريبا بعمل كل حاجة فيها: كتابة القصة والتمثيل والمونتاج والإخراج. قصة اليوم تبدأ عندما حس سيد بصداع رهيب وراح لدكتور يخلصه منه..الباقي ح تعرفه لما تسمع
طبعا مستني رأيك بأمانة 
 



 
 
 

Tuesday, March 10, 2015

الحب في الحضانة





-واء
-واء واء
-واء واء واء
-بقولك إيه؟ فهماني يا آنسة؟
-آه طبعا
-أنا قلت كدة برضة ..الجمال ده أكيد بيفهمها وهي طايرة
-ميرسي
-ممكن أعرف مولودة إمتي ؟
- وانت مالك بتسأل ليه؟ صاحبي؟ أخويا؟ خطيبي؟ حبيبي؟
-طيب خلاص أعصابك يا آنسة لا البامبرز بتاعك يتملي والليل لسه طويل
-لا بجد ليه؟
-أنا قلت بس نمشي كلام بدل القعدة المملة دي
-قعدة مملة ؟
-آه....لا لبن ولا أعشاب.. عيشة بجد تخنق
-معلش بكرة تكبر وتشتغل و تشرب لبن لما تشبع
-طب لحد ما أكبر ممكن بقي تقوليلي؟ إمتى إتولدتي.. قوللي بقي يالا مليش دعوة يلا وبلاش بواخة
-إمبارح بالليل..مبسوط دلوقتي؟
-ياه ده إنت عجزتي بقي على كدة
-عجزت في عينك، مفيش كومبليمون خالص
-معلش أصلي لسة مولود طازة ومصدع حبة و ماليش بقى بصراحة في دلع البنات ده
-يا لوحي .... ده انت صغنن بقى؟ وأكيد لسة تعبان يا عيني م العملية ؟ معلش سلامتك ياكميل، يبقي علي كدة إنت ولد؟
-آه طبعا ولد واسمي شمندي
-شمندي؟ بصراحة مش مصدقة
-إن إسمي شمندي؟
-لا إنك واد يعني
-لا ولد... ...أنا عمري يا آنسة مابأكدب
-ولو برضة مش مصدقة
-ح أثبتلك
-إزاي
-سهلة
-إيه ده إنت بتعمل إيه يا قليل الأدب إنت؟
-يالا بقى فتحي عينك وبلاش كسوف
-كسوف؟ سيب البطانية يامجرم سيب
-سوفي سوفي سوفي
-أسوف إيه يامجرم إنت؟
-شايفة الحلقة الزرقا اللي في رجلي اليمين دي؟ شوفتي ؟ يلا قوام قبل ما النيرس تيجي..... عشان تعرفي إني ولد وعمري ما بأكدب أبدا

Friday, March 6, 2015

وجع القلوب





-تعبان اووي يا أحمد وربنا
-قلبي عندك يا صاحبي ربنا يقويك إجمد بقي شوية
-تصدق كدة كنا داخلين بالظبط على خمس شهور
-ياه خمسة
-إيوة ليل نهار ع النت و ع الموبايل وزي ما تقول كنا بجد سمنة على عسل
-أيوة ما إنت ياما حكتلي عنها ياشقي زمان، معلش بقى اللي خلقها أكيد خلق اللي أحسن منها  يامعلم
-ماتفكرنيش بقى يا أحمد
-ياراجل بكرة تنسى وتنسى أبوها كمان
-أنسى؟ أنسى إيه ولا إيه؟ بقولك ده أنا طلعت أكبر مغفل قال وإيه؟ كنا بنفيبرو وعلى طول في حب
-تفيبرو؟ ايه ياعم اللغة الغريبة دي
-قصدي يا أخي إننا كنا بنتكلم ع الفايبر وهاتك بقى يا رغي طول الليل والكلام الفاضي ده وكدهوه
-ههههه تصدق تمشي تفيبرو دي، هههههه بصراحة أول مرة أسمعها الكلمة دي
-والنبي ما تمسكليش بقى ح الواحدة يا أحمد خليني بقى في اللي أنا فيه، أنا خلاص ح أطرشق وربنا
-ياعم فكك بقي، تلاقيك بس إنت اللي ادمنت صوتها يا نمس، الا صحيح هى صوتها كان حلو يا ولا ياسيد؟
-اوووي يا أحمد وهو ده بقى بصراحة اللي جابني علي بوزي بس يا خسارة
-ياخسارة؟ خير كفى الله الشر؟
-تصدق بعد كل الثقة دي وإيشي هدايا ليها وفواتير رايحة وفواتير جاية ده أنا طلعت أكبر كروديا وايه؟ مغفل كبير أوووي
-هدايا؟ وفواتير؟ يخربيتك يا سيد إنت يالا ما بتحرمش؟ حرام عليك وربنا فلوسك دي اللي بتضيعها كل شوية ع النسوان هو إنت بتلاقي الفلوس دي ياجدع؟
-نسوان؟ حلوة أوووي نسوان دي خليني ساكت بقى أحسن يا صاحبي ههههههه  
-أيوة كدة روق يامعلم محدش واخد منها حاجة
-واخد؟ من جهة واخد فأنا واخد وواخد جامد يا أحمد
-إزاي؟ هو حصل إيه تاني؟
-بسلامتها ذات الصوت العاطفي اللي كنت مابعرفش أنام الا لما أسمعه
-مالها بس المزة أم صوت عاطشفي يا أبو السيييد؟
-طلعت راجل
-آحيييييييييييييه، رااااااجل؟ لا بجد؟ مش ممكن راجل راجل؟ لا مش ممكن يمكن متهيألك يا سيد؟
-آه والله زي ما بقولك كدة طلعت راجل
-طب وعرفت إزاي؟ مش يمكن تكون ظالمها يا أخي؟
-ظالمها؟ برضه بيقولي ظالمها؟ قصدك ظالمه يمكن؟ هههههه إنت اللي باين عليك على نياتك وربنا إنت كمان، بقولك راجل وراجل وحش كمان
-وحش؟ وحش شكلا ولا وحش ههههههههههه
-كله يا معلم و دخلت عليه إبن الهرمة من كذا أكاونت عملتهم كدة خصوصي عشان بس أتأكد بعد م الفار لعب في عبي
-واتأكدت؟
-إلا إتأكدت؟ إبن النصابة عمل معايا نفس السناريو، وقال إيه؟ إنه إرتاحلي بقى واداني النمرة عشان أكلمها قصدي يعني أكلمه وقال إيه بقى يا أخويا؟ الكيميا بينا عملت قال إيه عمايلها معانا و ديه بقى اللي جذبتني ليها وكدة يعني، إبن الإيه كان فاضله تكة بقى ويرمي علي الهلب ويطلب بقى هدايا ومحسوبك يكع
-طب إحمد ربنا بقى يا سيد وبوس إيدك وش وضهر أنك كشفته بدري بدري، كان زمانك لسه مضحوك عليك وأهو درس يا صاحبي وإتعلمته وحرم بقى
-مش قادر يا أحمد
-مش قادر؟ هو ايه اللي مش قادر؟
-أصل واحشني كلامنا أووي