Friday, March 6, 2015

وجع القلوب





-تعبان اووي يا أحمد وربنا
-قلبي عندك يا صاحبي ربنا يقويك إجمد بقي شوية
-تصدق كدة كنا داخلين بالظبط على خمس شهور
-ياه خمسة
-إيوة ليل نهار ع النت و ع الموبايل وزي ما تقول كنا بجد سمنة على عسل
-أيوة ما إنت ياما حكتلي عنها ياشقي زمان، معلش بقى اللي خلقها أكيد خلق اللي أحسن منها  يامعلم
-ماتفكرنيش بقى يا أحمد
-ياراجل بكرة تنسى وتنسى أبوها كمان
-أنسى؟ أنسى إيه ولا إيه؟ بقولك ده أنا طلعت أكبر مغفل قال وإيه؟ كنا بنفيبرو وعلى طول في حب
-تفيبرو؟ ايه ياعم اللغة الغريبة دي
-قصدي يا أخي إننا كنا بنتكلم ع الفايبر وهاتك بقى يا رغي طول الليل والكلام الفاضي ده وكدهوه
-ههههه تصدق تمشي تفيبرو دي، هههههه بصراحة أول مرة أسمعها الكلمة دي
-والنبي ما تمسكليش بقى ح الواحدة يا أحمد خليني بقى في اللي أنا فيه، أنا خلاص ح أطرشق وربنا
-ياعم فكك بقي، تلاقيك بس إنت اللي ادمنت صوتها يا نمس، الا صحيح هى صوتها كان حلو يا ولا ياسيد؟
-اوووي يا أحمد وهو ده بقى بصراحة اللي جابني علي بوزي بس يا خسارة
-ياخسارة؟ خير كفى الله الشر؟
-تصدق بعد كل الثقة دي وإيشي هدايا ليها وفواتير رايحة وفواتير جاية ده أنا طلعت أكبر كروديا وايه؟ مغفل كبير أوووي
-هدايا؟ وفواتير؟ يخربيتك يا سيد إنت يالا ما بتحرمش؟ حرام عليك وربنا فلوسك دي اللي بتضيعها كل شوية ع النسوان هو إنت بتلاقي الفلوس دي ياجدع؟
-نسوان؟ حلوة أوووي نسوان دي خليني ساكت بقى أحسن يا صاحبي ههههههه  
-أيوة كدة روق يامعلم محدش واخد منها حاجة
-واخد؟ من جهة واخد فأنا واخد وواخد جامد يا أحمد
-إزاي؟ هو حصل إيه تاني؟
-بسلامتها ذات الصوت العاطفي اللي كنت مابعرفش أنام الا لما أسمعه
-مالها بس المزة أم صوت عاطشفي يا أبو السيييد؟
-طلعت راجل
-آحيييييييييييييه، رااااااجل؟ لا بجد؟ مش ممكن راجل راجل؟ لا مش ممكن يمكن متهيألك يا سيد؟
-آه والله زي ما بقولك كدة طلعت راجل
-طب وعرفت إزاي؟ مش يمكن تكون ظالمها يا أخي؟
-ظالمها؟ برضه بيقولي ظالمها؟ قصدك ظالمه يمكن؟ هههههه إنت اللي باين عليك على نياتك وربنا إنت كمان، بقولك راجل وراجل وحش كمان
-وحش؟ وحش شكلا ولا وحش ههههههههههه
-كله يا معلم و دخلت عليه إبن الهرمة من كذا أكاونت عملتهم كدة خصوصي عشان بس أتأكد بعد م الفار لعب في عبي
-واتأكدت؟
-إلا إتأكدت؟ إبن النصابة عمل معايا نفس السناريو، وقال إيه؟ إنه إرتاحلي بقى واداني النمرة عشان أكلمها قصدي يعني أكلمه وقال إيه بقى يا أخويا؟ الكيميا بينا عملت قال إيه عمايلها معانا و ديه بقى اللي جذبتني ليها وكدة يعني، إبن الإيه كان فاضله تكة بقى ويرمي علي الهلب ويطلب بقى هدايا ومحسوبك يكع
-طب إحمد ربنا بقى يا سيد وبوس إيدك وش وضهر أنك كشفته بدري بدري، كان زمانك لسه مضحوك عليك وأهو درس يا صاحبي وإتعلمته وحرم بقى
-مش قادر يا أحمد
-مش قادر؟ هو ايه اللي مش قادر؟
-أصل واحشني كلامنا أووي 


31 comments:

مدونة الفرسان said...

أول تعليق
ههههههههههه

مدونة الفرسان said...

نقرأ ونرجع تانى

مدونة الفرسان said...

على رأى الأسكنرانية
ههههه
مش هقول
طلعت راجل وهو طلع لطخ
يستاهل أكتر من كدة
هههه
تحياتى ودام إبداعك

طيوري said...

كنت باحسب اني اول تعليق بس النت باعوك ياريتشارد هههههه

Tarkieb said...

مدونة الفرسان

ههههههههه مكتسح المركز الاول علي طول تعيش وتكسب

Tarkieb said...

مدونة الفرسان
إقري يا باشا ومستنين رأيك

Tarkieb said...

مدونة الفرسان

ههههههههه انا فهمتك بس انت قاصدك مش أسكندراني لا مصري أصيل نصها أكيد ...تسلم يا معلم

Tarkieb said...

طيوري
ههههههههه ياخسارة طار المركز الاول والتاني والتالت ههههههههه ابو الفوراس واخد تلات مراكز مرة واحدة

طيوري said...

ﻫﻬﻬﻬﻬﻬﻬﻬﻪ ﻟﻠﺪﺭﺟﺎﺩﻱ ﻓﻲ
ﺑﺮﺍﻣﺞ ﺍﺻﻮﺍﺕ ﻣﻤﻜﻦ ﺗﺘﺰﻳﻒ؟
ﺍﻧﺖ ﻣﻌﺎﻧﺎ ﻭﻻ ﻣﻊ ﺍﻟﻨﺎﺱ
ﺍﻟﺘﺎﻧﻴﻴﻦ
ﻳﻌﻨﻲ ﻋﺎﻭﺯ ﺗﺜﺒﺖ ﺍﻟﺘﺴﺮﻳﺒﺎﺕ
ﻣﻔﺒﺮﻛﺔ ﻫﻬﻬﻬﻬﻬﻬﻬﻪ
ﻻ ﻣﺶ ﺑﺲ ﻣﻐﺸﻮﺵ ﻻ ﻭﻛﻤﺎﻥ
ﺻﻮﺗﻬﺎ ﺣﻠﻮ ﻫﻬﻬﻬﻬﻬﻬﻬﻪ
ﻳﻼ ﺑﺎﻟﺸﻔﺎ ﻫﻮ ﻣﻦ ﺍﻻﺻﻞ ﻋﻨﺪﻩ
ﺍﺳﺘﻌﺪﺍﺩ ﻟﻼﺳﺘﻐﻔﺎﻝ
اجمل مافي كتاباتك هو برغم تنوع الشخصيات التام واختلاف الحدوتة الا ان بصمة قلمك علامة مميزة من بين الف قلم سبحان الله
تسلم الايادي
مبدع ودماغ

طيوري said...

مش ممكن التعليق مش راضي يتكتب خمس مرات
ومرة يخرجني من بلوجر ويقولي امشي ياروبوت ومرة يتكتب غلط لا دي مؤامرة

طيوري said...

لالالا تاني وتالت ايه التكرار لايفيد ههههههه
انا المركز التاني بردو اهو كدة وخلاص

زهــــراء said...

مساك سعاده وخير

عن جد اتخضيت من العنوان وجع القلوب ربنا يبعد عنا جميعا كل أنواع الوجع
على فكره انت واضح كده انك بقيت بخيل لأن القصه كانت تتسجل ويتعمل فيها مؤثرات ايه حدث ولا حرج يا عمي


☺☺☺☺
عم سيد بقى يستاهل اللي يجري له هو في حد يأمن لحد من صوته برضه هي الناس اصابها الفراغ للدرجه دي يا لهوي وبعد كل اللي حصل فيه بيقول وحشه صوتها احيه يا ابو سوسو احيه هي بقيت كده
لما كنت بادي كورسات سمعت عن قصص لها العجب وتنفع تتكتب ونعمل منها روايات مصريه للجيب كمان بس للأسف دلوقتي كله عايش على برامج الواتس والفايبر واللاين وغيره وغيره
بس واضح ان البت يوووووووه اقصد الواد اللي عملهم على ابو السيد طلع معلم عشان عرف يضبط نبره صوته ويعلق ابو السيد به للدرجه دي بس هينسي بسرعه لو لقى حد صوته احلى ههههههه
لازال اسلوبك متميز و متفرد ومنفرد شويه لغه عربيه والله ما هاعرف أكتب تاني زيهم
برضه لازلت أطلب منك تسجيل صوتي هاقولك بطريقه ساره بنت اخويا بعد اذنك... بليز... من فضلك.... لو سمحت... لو ما سمعتش الكلام هابقى اكمل لك هي بتقول ايه تاني بقي هههههه

دعواتي بالتميز على الدوام

محمد سلامة said...

الفراغ يعمل أكتر من كدة
هههههههههه

Gamal Abu El-ezz said...

عالم تركيب
بما غن ده أول تعليق ليه فى مدونتك الجميلة فمش لازم يبقى فيه وجع قلب :)
القصه الى حضرتك كاتبها بينطبق عليها المثل الشعبى الى بيقول الىبيشيل قربه بتخر على دماغه
سواء الى بيكلمه ولد أو بنت فهو لازم يتحمل نتيجة كلامه ده
والبعض من العواطلية بيحب يتسلى ويشحن رصيد ببلاش وممكن هدايا باشكال تانيه فبيعمل نفسه بنت ويصطاد المغفلين ومدام الإنسان بيدور على الحب فى الجناين يستحمل شوك الورد

تحياتى
وإن شاء الله هيكون فيه تواصل دائم لمدونتك الجميلة

رحاب صالح said...

هههههههههه
والله بتحصل كتير
القصة واقعية وبتتكرر كتير للأسف
صباح البنفسج

Tarkieb said...

طيوري
لا جهاز إيه ده موهبة طبيعيه بغير صوته والهبل كتير بقعو على صوت واحد زي سمير غانم لما كان عامل فوزية ههههههههه ربنا يكرمك دايما رافع من روحي المعدنية

Tarkieb said...

طيوري
النت شغل ورزقه من السيد سيد ههههههههو عشان كدة بيداري عليه وبيعمل تشويش ع القصة ههههههه منورني

Tarkieb said...

طيوري

المداليه الفضية برضة حلوة اتنين فضية بواحدة ذهبية

Tarkieb said...

زهــــراء

عندك حق والله كان ممكن تتسجل صوت واهي انن اهي والراجل اسمه سيد يعني داخل علي شبطة كمان هههههههه..بس التسجيل عايز روقان بقي بس وعد كل الحاجات ان شاء الله ح اعملها ..ابقي اسمعي الاعمال اللي فاتتك من حكواتي ولا سمعتي كله؟

Tarkieb said...

محمد سلامة

اناه الحرمان يا عزيزي مش اكتر
وناس كتيره بتستغله تقلب لقمة عيش منها وما يقع الا الشاطر
منورني يامحمد ودام الاتصال

Tarkieb said...

Gamal Abu El-ezz
يا مرحب وان شاء الله ما تكون اخر زيارة وعندك حق في كل ما قلته وبصراحة هو ده الهدف من الحكاية وانت عبرت عن رايي بالظبط ومفيش حاجة اقدر اضيفها على كلامك..تحياتي

Tarkieb said...

رحاب صالح
هههههههه اه بتحصل كتير والغريبة انها كمان مش محليه دي في دول كمان بتشارك النصابين المصريين في رزقهم وكل برغوت على قد دمه ..صباح البنفسج

زهــــراء said...

تيكو

بعض الحاجات سمعتها بس مش دروت فى القديم لانى باحب اسمع الجديد وخد بالك لازلت لسه باعرف انقد جامد اخر حاجه يعنى خد بالك من مخارج الالفاظ وخصوصا حرف الراء هههههههه

كنت سمعت بالصدفه على جوجل بلس حاجه اسمها حصوه فى عينك وعملت عليها كومنت هناك على ما اتذكر يعنى لو الزهايمر لسه ما اضربش اخر حته فى العقل

Tarkieb said...

بطة
اسمعي جعلوني مكوجي دي بجد جميلة واحلي حاجة فيها ان حسن مصطفي مثل معايا ومستني رايك ونقدك


وده اللينك
http://tarkieb.blogspot.de/2012/05/blog-post_19.html

Ebtesam Hoseen said...

هههههههههههههههه يادى الفراغ العاتيفى

مساء الفرحه والكلام الجميل تراكيب

بسعد جدا فى مدونتك يارب دايما مساء الفل

Tarkieb said...

Ebtesam Hoseen

ربنا يسعد أيامك يا قطر وما يحرمنا من كلماتك الجميلة

زهــــراء said...

تيكو

عن جد روعه تحفه القصه نفسها بس دى مش جعلونى مكوجى دى جعلونى بلطجى او فتوجى ههههههههه
سلامه اللى يسمع صوته غير صوت سيد شبطه خلاص واستحاله حد يقول انهم شخصيه واحده بس حرف الراء باين اوى مع سلامه رايح خالص بصراحه وسيد حاول
يضبط اموره فى الحرف وبقى تحفه

" تصدق كنت ناسى يا معلم " المايك كان قريب اوى والهوا اللى فى حروفك مكتوم شويه انن بس ده مش عيب على فكره مجهودك باين اوى اوى

المونتاج بقى اكتر من رائع اقسم بالله فى اعمال فنيه بتكون محتاجه مونتاج بجد والسقطات والغلطات اللى فيه بتكون باينه لاى حد والله صوت حسن مصطفى كانه قاعد معاك ونفس تون الصوت مافيش عالى او واطى وحتى ايكو الصوت مش ممكن واحد ومضبوط جدا جدا يعنى الجزء الخاص بحسن مصطفى رائع رائع

استاذ عادل ده بقى صوت مش غريب عليا بس للاسف انا سمعتها مرتين وللاسف مش قادره اعرف هو مين

اما بقى الصوت الانثوى وااااااااو ولا الست صوفينار بجلالة قدرها وبكره الست رجى وراك وتقولك امثل معاك ههههههه بس الست بتاعة بلاد بره اجدع من ملوين راجل بتوع بلاد جو وحرف الراء بتاعها هههههههههه فرنساوى خالص مش المانى

عن جد تمتعت بالقصه والاخراج مبدع والمونتاج وكله كله

norahaty mo said...

الطيور على اشكالها تقع
بدال واحشاه ياوووه قصدى واحشه
خلاص يشرب بقى ...قصدى يكع وهو ساكت

Tarkieb said...

زهــــراء
ياه برافو عليكي نقد ما يخرش المية طب كويس ان الاخراج والمونتاج عجبك وده أهم حاجة واله يا بطة بافضل اراجع كام مرة ومن كتر المراجعة مش باخد بالي ..الست بتاعة بلاد برة دي بتتعلم عندي عربي وبقت لبلب أهي ..منوراني دايما وترقبي قريبا شبط جديد

Tarkieb said...

norahaty mo

عندك حق في مثل بيقول النصاب عمره ما ينصب الا ع الطماع او الاهبل وده الاتنين ...منوراني يانووور

خدمات متميزة said...

شركة تنظيف منازل بالجبيل
شركة تنظيف بالجبيل
شركة تنظيف بيوت بالجبيل
شركة تنظيف فلل بالجبيل

شركة تنظيف بالجبيل
افضل شركة تنظيف بالجبيل
شركة تنظيف شقق بالجبيل
شركة تنظيف مسابح بالجبيل
شركة تنظيف مجالس بالجبيل
شركة تنظيف خزانات بالجبيل