Thursday, June 23, 2011

صياد القلوب

-وحياتك يجي أكتر من عشر سنين

-ياه عشر سنين ياحبيبي؟ لا ده إحنا نحمد ربنا بقى إنه فرجها من وسع

-فرجها ؟ إلا فرجها ... بقولك على طول يوماتي راكب المترو.. ومحشور فيه من مبارك لحد أخر الخط .. ورايح نايم وراجع نايم ..وعمر ماحد عبرني أو حتى بص في خلقتى

-لا مش ممكن؟ ده كتير أووووي والله يا حسن .....ههههههههه يكونشي النحس بتاعك إتفك لما إسم المحطة خلاص إتغير؟

-تصدقى؟ وربنا جايز ....ده كان راجل وش فقر ..داهية لا ترجعه.....كان قاطع علينا المية والنور ...عارفة يا حبي؟ أنا وربنا كنت خلاص فقدت الأمل إني أحب واتحب زي كل الناس وببوس إيدي دلوقتي والله وش ودهر إني قابلتك

-لا متقولش كدة ياحسونتي ..ده إنت أي واحدة تتمناك يا جدع ..طب إنت عارف؟ أنا إمبارح اول ما شوفتك في المترو قلت هو ده يا بت...هو ده يا سوسو اللي بتدوري عليه.....أحمدك يارب وأشكر فضلك

-بجد يا سوسو؟ بجد يابت؟ قد كدة أنا جذاب وحليوة في عينيكي؟ طب إيه اللي والنبي شدك ليا بالظبط؟ قولي بقى يابت...حلفتك بالنبي

-يا حبيبي الحاجات دي ما تتوصفشي ...دي تتحس كدة على طول.......دي حاجة كدة زي الكيميا يا سونسن...........كيميا بتخرج طوالي م القلب للقلب

-كيميا؟ يا صلاة النبي وهي الكيميا بقى يابت هي برضه اللي خليتك تصيعي إمبارح في المترو وترميلي نمرة الموبايل بتاعك ؟

-هههههه لم لسانك يا حبي...شوف.. يا حسن يا حبيبي الفرصة بتيجي في العمر مرة واحدة .... فاهم يا شقى؟ والبت الخايبة هي أكيد بقى اللي بتضيعها

-أنا للأمانة كنت ساعتها مذهول....بصراحة متخيلتش إن صاروخ...سوري... قصدي يعني واحدة حلوة كدة زيك ومفيهاش غلطة وزي ما الكتاب بيقول هي اللي تعاكسني .....وقال ايه تجيبيني كمان هنا عندك في الشقة الأبهة دي.......ده ولا في الأحلام وربنا

-طب ودي فيها إيه بس يا حبي؟

-فيها إيه؟ إنت هابلة يابت ولا بتستعبطي؟ ده إحنا لسة إمبارح يا دوبك متعرفين على بعض............طب بذمتك هو في حد الإيام ديه برضه بيعمل كدة؟ تجيبي واحد عندك في البيت كدة من غير إحم ولا دستور...طب مش خايفة من أهلك؟

-أهلى؟ هههههههههههههه.....ده بيتي وانا حرة فيه .....ادخل فيه اللي انا عايزاه

-آه طبعا بيتك بس برضه أمك ولا أبوك ح يقولو إيه دلوقتي لما يشوفوني هنا قاعد ومرحرح ولابس كمان حتة بيجاما ستان عمري جدي ما حلم حتى إنه يلبسها أو يملس عليها؟

-ماما؟ وبابا؟ لا ماتخافشي .... أنا يا سيدي مقطوعة من شجرة وواخدة ع الوحدة من زمان

- الوحدة ؟ الوحدة إزاي بس؟ أمال رجلين مين دول يا أختي اللي رايحين جايين من ساعة ما جيت ده زي ما يكون واحد قاعد جوة ومش على بعضه....ماله عم الحج اللي جوة ده؟ حد مزعله في حاجة؟

-اللي جوة؟ آه ........ده تلاقيه هيثوم ما تشغلشي بس إنت بالك ..ربنا يشفيه يارب

-هيثوم؟ هيثوم مين؟ حد اعرفه يعني وأنا مش واخد بالي؟

-هيثم جوزي يا حسن

-جججوزك؟ إيه؟ هو انت متجوزة؟..يا نهار أبوكي إسوس...متجوزة وجايباني هنا؟..والله عال وجايباني على ملى وشي وفي الآخر الاقى جوزك مستنيني جوة..وده بيتنيل بيعمل إيه جوة ؟ بيسخن بقى؟ ولا بياخد فكرة؟ يالهوي يا أمة ده أكيد حيقطعني ..ح يقطعني؟ ده ح يشويني...وأنا اللي فرحان قال بحتة البيجاما الستان يا أخي إتنيل على خيبتك وخيبة أم حسن...أهي ح تبقى حمرا م الدم اللي ح ينزل للركب

-الله إنت إتكهربت ليه كدة يا حسن؟ تفرق معاك إيه يعني اذا كان هيثم هنا ولا لأ؟

-تفرق؟ الا تفرق؟ يا ستي إنت ناسية إن هيثوم ده يبقى جوزك؟ آه صحيح هو إنت خاسس على مامتك إيه؟ ما هو أنا اللي ح أتقطع مش إنت... ياحظك المنيل يا أم حسن ...إبنك ملحقشى يتهنى بأنجازات الثورة يا حاجة....تكونيش فلول يا بت وأنا مش عارف؟ .............وانا اللي بغبائي ما صدقت وأخدت ديلي في سناني وجيت زي الكبنش على ملى وشي

-إهدى بس يا حسونتي

-حسونتي إيه وزفت إيه؟ يا خرابي على إم المراوح اللي مركباها على قلبك دي ...إنت بتهزري يابت مش كدة؟ ايوة بتهزري؟ معقولة؟ لا مش معقولة؟ مفيش هيثم؟ صح؟ مفيش هيثم ؟

-لا طبعا في هيثم ...وقاعد جوة كمان وسامع وشايف كل حاجة

-وسامع وشايف كل حاجة؟ يا صلاة النبي ..ع البركة ....يعني ضعنا والحمد لله

-شوف انا بصراحة مقدرشي انكر إنك بجد عجبتني...مش قولتلك كيميا بقى

-يخرب ييت ام الكيميا دي اللي وديتني خلاص في داهية...ياستي أنا مليش في أم الكيميا دي خالص أنا كنت أدبي ... ...فاهمة؟ أدبييييييييييييييييييييييييييييي

-لا بجد إستنى بقى وبلاش خيابة....أنا اول ما شوفتك قلت ياه ....مش ممكن...فيه كدة يا ناس؟

-لا والله مفيش أوسخ من كدة.....ما المترو ياستي كات مليان شباب زي الورد ...إيشمعنى أنا؟...إيشمعنى أنا ياربي من وسط كل دول البشر؟

- عشان إنت عجبتني ياسيدي ..أيوة عجبتني..... ..صدقني....إنت اللي بادور عليه..يا سبحان الله زي ما يكون ربنا حطك في طريقى إمبارح لهدف في نفس يعقوب

-هدف؟ هدف أيه ونيلة إيه؟ بقولك ح اتقطع دلوقتي وإنت تقوليلي هدف؟....الله يخرب بيتك على بيت أم اليوم اللي حفرو فيه المترو ...على اليوم اللي قابلتك فيه يا شيخة.......حبكت يعني طول عمرك نايم يا حسن في المترو...كان إيه بس اللي هفك في نفوخك وصحاك؟ أشرب بقى يا حلو

-عسل ....وحياة ربنا تحفة

-إنت شاربة حاجة يا بت ولا إيه؟

- شاربة؟ ياريت ده أنا حتى وربنا ميتة م العطش

-عطشانة؟..طب ما تشربي يا أختى هو حد حايشك؟ مالعصير بالهبل أهو قدامك ..فالحة بس عمالة تسقيني منه م الصبح لما نفسي ماعت خالص

-اعملك إيه بس يا حسونتي ؟ ده أنت مصفح ياجدع..عارف؟ أنت واخدلك لحد دلوقتي شوية منوم وحياة ربنا تنيم جمل ومراته وولاده

-منوم؟ يانهار أبوووكي ....ياه إيه ده؟ انا مش عارف اتلم على نفسي خلاص..ودايخ خالص ..إيه ده؟ هو انا ح أمممموت ياسوسو؟ ح أممموت يا بت؟

-إنت ح تستعبط؟ ما أنت من ساعتها ماسك نفسك إيه اللي جد يعني؟

-آه والله دايخ ..خلاص مش قادر أمسك نفسي خلاص ..أنا حموت؟ صح ؟ مش كدة يا سوسو

-بصراحة آه ....معلش بقى ياحبي ح تموت ياحرام أول ما الدكتور أحمد يجي .......بس ماتخافش هما ساعتين ... هما ساعتين زمن يا قمر وبعدها ح يتنقل قلبك الكميل الطيب ده لهيثومتى حبيبتي....ربنا يقومه بالسلامة يارب........عارف؟ ساعتها والله يا حسن ح تحس بحبي ليك؟ ....وح تحس بده أكيد لما قلبك يبقى ينام في حضني كل يوم.....عارف؟ ساعتها ح تحس والله بالكيميا وتحبها كمان ....سونة ...سونة انت خلاص نمت يا حبيبي؟ نمت يا مضروب؟

55 comments:

Ramy said...

يا نهار ابيض

يعنى اول بوست طويل من فترة

يبقى على ريا و سكينة

خلااااص الدنيا مبقتش اماان مش علشان الموقف ده

لأ لأن الموقف ده عقاااااااااااب ((:

لو حضرتك فاكر فيلم ألحقونا بتاع نور الشريف كان بيتكلم عن سرقة الأعضاء البشرية

ربنا يحفظنا

برغم انى ضحكت بس الموضوع كبير صحيح

(:

Tarkieb said...

Ramy
ههههههههههههه خلى بالك بقى من نفسك وانت راكب المترو وابقى نام عشان تنجو بنفسك ..بس انت اكيد ضحكت في الاخر صح ..كنت عمال تقول ايه البت دي يا عالم عايزة قطع رقبتها ههههههه وطلعت بمية رااااجل..نورتني

Haytham Alsayes said...

نعم ياخويااااا
ههههههههههههههههههه
ايه هيثم دي
حبكت اسمي يعني هتشوه سمعتي كدة ههههههههههههههههههههههههههههههه
وطلع كمان عاوز قلب غيار ومراته بتصطاد
لا بس جامدة
واتعودت منك علي النهايات غير المتوقعة
لا حلوة

عارف لو كدة عملتها صوت كانت هتبقي تحفة
الا اخبار شبطة ايه ؟
هههههههههههههه


:)

تحياتي

ماما أمولة said...

هههههههههههه
انجازات الثورة
لا طلع صياد ولا حاجة هي اللي صادته
يستاهل هههههه

هبة فاروق said...

حلوة القصة والفكرة والحوار لذيذ ودمة خفيف
تحياتى

Ms Venus said...

ههههههههههههههه

يا روقانك

بس جميلة يا تركيب

صحيح وحشنا شبطة

(:

Tarkieb said...

Haytham Alsayes
ههههههههههههههه معلش ياريس انت ليك فضل كبير على انت اللي اوحيت لي بالعروسة الصينية وهيثوم قلت ارد الجميل بقى هنا...حقك عليا ياريس ومين عارف مش يمكن اللي جوة يكون برضه مش هيثوم ودول عصابة يابا...نورتيني يابرنس والله وياريت كنت اقدر اعملها شبطة مشكلتي الصوت الستاتي صعب اوووي اعمله بالسوفت وير

Tarkieb said...

ماما أمولة

هههههههههه فاكر نفسة صياد اتاريه نظام تيجي تصيده يصيدك....نورتيني

Tarkieb said...

هبة فاروق
ميرسي اوووي على الزيارة والتعليق ويجعله عامر

Tarkieb said...

Ms Venus

ههههههههه فين الورد يا فينوس؟ هي الثورة منعت الورد
شبطة عايز وقت وتسجيل وربنا يسهل

I.G.B said...

كل واحد يخلي باله من لاغاليغه .. الدنيا خلاص مبقتش أمان ممكن تركب المترو النهاردة وانت زي الباشا معاك الجز اللاغاليغ بتوعك هوب كوباية عصير هب مافيش لاغاليغ يا معلم ...

Tarkieb said...

I.G.B
ههههه بس العصير كان أختياري هو اللي راح برجليه لو كان مسك نفسه كان لغلوغه فضل ههههههههه نورتني

قرفة said...

هههههههههههههههههه
مش ممكن ملك النهايات الغير متوقعة
بس يعني ايه الكبنش دي
اختراع جديد
ولا غلطة كيبوردية
فعلا منه لله اللي حفر المترو هو السبب
بجد جكاية جامدةودمها خفيف زنهايتها موفاجعة
والصورة معبرة عم القصة
وضحكني اوي تعليق اللغاليغ هههههههههههه

givara said...

يعنى حسونتى اتنصب له اى اتحلئله وفـ قلب كمان ولمين لهيثومتى
بجد بوست هايل
وعلى فكره انت شجعتنى اعمل حاجه معينه
الحمد لله انى الواحد مش بيركب مترو

Carmen said...

:‏)‏)) جامدة جدا
تسلم ايدك

Amr said...

معلش نظرة سريعة بس راحع تاني أقرى بهدوء .. مبدئيا حلوة

شمس النهار said...

ايه المدونة الجميلة دي

من زمان ماقريتش بوست كده
:))))

حَـبآيـۃْ.بـטּـدۉڷ said...

:DD

مِش مُتخيله إن بِجد فِيه كِده !
حقيقِي يعنِي !
..
البُوست تُحفه ..
:)

ابراهيم رزق said...

المنحوس منحوس و لو علقوا فيه فانوس
جميلة

خالص تحياتى

Noha Saleh said...

بجد جميل جدا
وهيثم قاعد جوه بيتابع الموقف كده عادى
رغم انها كوميدى لكن لو الواحد فكر فيها بجد هيخاف جدا
ربنا يعافينا جميعا

كريمة سندي said...

حوار خفيف وظريف سعدت بقرائته وباللفتات الجميلة الظريفة التي فيه

تحياتي الصادقة

faroukfahmy58 said...

تركيب
حقا انا اشهد انك لك تركيب قريد فى صياغة كلامك فكرا واسلوبا وحوارا
صحيح انا ضحكت من اسلوبك الذى يجمع فى نسيجه المزيج المسكر من الواقعية الشفافة والفالس الخيالى
انت اللى كنت بدور عليك .. وانت اللى قلبى هدانى اليك .. وانت اللى جت نهايتى هلى ايديك
انت مش ممكن مش ممكن انا من زمان بدور على متل هذا الاسلوب والحمد لله لقيه
قيل ما اترك مدونتك قدمت طلب اشتراكى ضمن مجموعة متابعيك حتى اتمكن من متابهة كلامك المحبب فتقبل اشتراكى

خالتى بمبة said...

موضوع جميل واسلوب رائع

faroukfahmy58 said...

تركيب
حاولت للمرة الثانية فى البحث عن مربع المتابعين والحمد لله وجدته وتقدمت بطلب الاشتراك لحبى فيك مع السلامة

ياسمين said...

هههههههه رغم كل حاجة بس دمه خفيف لدرجة كبيرة ...بس بردو زوجها معندوش نخوة ولا حتي قلب هههه
الموضوع فظيع بس أكيد نادراا لما يجي كداا..الحمدلله مفيش ف بلدنا مترو ..بس يعني مش كل واحدة هتضحك لواحد هتيوافق انه يروح معاها شقتها االا لو كان راجل .... ودا بئا يبقي جزاؤه
ونهاية مش متوقعة نهائي بس أسلوب جميل

reemaas said...

ههههههههههههههههههههههه
يانهار ابيض اى العصابة دى

واى الواد ده

بجد قصة حلوة اوووووى واسلوب جديد فى النشل لا وايه مش منشنة على كليه مثلا ده القلب على طول
ههههههههههههههههههههه

مبسوطة انى جيت هنا على فكرة

iـــــــــــsــــــــــlــــــــــــaـــــــــm said...

هههههههههههههه
حسن ضاع يا رجاله
عشان يرضى عضو ضيع باقى اعضاءه
هههههههههههههههههههههه
جامده جدا وبجد ده درس لأى واحد بيفكر يعمل شقى

هههههههههههه
صعبت عليا والله يا حسن

Bent Men ElZaman Da !! said...

هههههههههههههههه
بقى دى اخرتها
هو اللى يستاهل عشان جرى وراها
ادى اخره الحرام هههههههههههه
بجد فكرتك تحفه
عرضت موضوع مهم اوى زى سرقه الاعضاء
بطريقه ظريفه اووووى

موناليزا said...

هو فيه كده!!!

هو عموما الحرام آخرته سودا

reem said...

يا حرام
وفرحان بنفسه اوووي
وحس انه راجل مش في بعده ولا قبله
بس هى بردو حبته
ونيتها عسولة وعاوزه قلبه يفضل معاها على طول
بجد الدنيا مش بقى فيها امان
وممكن جدا القصة دي تحصل

الحمدلله مش بركب مترو خالص
وكنت هاتجنن واركب مترو كتييير
بعد قصتك دي اكييييييد هابطل اطلب الطلب دا نهاااائياً
هههههههههههه

بوست حلو اوووووووي

Beram ElMasry said...

حبيبي وصديقي تراكيب
صاحب القلب الطيب والظل الخفيف بارك الله فيك واسعد ايامك وحقق احلامك
تحية وسلام ولاسلا مع بني اسرائيل

norahaty said...

ياااااااااااخبر
اسوووووووووووووس!
مفاجعة غير متوكعة
بالمرررة ياتراكيبووا
ياريت التدوينة تتعمل مذكرات
لـ (بردون يعنى) للهبل والهبلات
اللى فاكرين ان المترو بيرمى
عرسان وعروسات أو حتى معجبين ومعجبات

Tarkieb said...

قرفة
هههههههه دايما منوراني ورافعة من روحي المعدنية ربنا يخليكي يارب..اه الكبنش يعني مغفل واكيد جاية من كبش وحرفت... أختلاف منطقة بقى ولهجات..

Tarkieb said...

givara
اه اتحلقله شعر وقلب ههههههههههه..منورني ودايما يارب... وحتى لو ركبت احسن حاجة النوم ههههههههه

Tarkieb said...

Carmen s
وتسلم زيارتك ودايما يارب

Tarkieb said...

Amr said..

طب عيني في عينك حتقرى؟ ههههههههه المهم انك نورتني

Tarkieb said...

شمس النهار
وايه النور ده ده احنا زارنا النبي ويارب ما تكون اخر زيارة

Tarkieb said...

حَـبآيـۃْ.بـטּـدۉڷ
دي شهادة اعتز بها من الموهبة الكبيرة والله اوووي بنادول ولعلمك ان عاجبني اسلوبك جدا جدا والله الى الامام الي امام ثورة

Tarkieb said...

ابراهيم رزق
ههههههههه ماهي حاجة بالعقل طول عمره كدة ايشمعني دلوقتي اكيد في ان ...نورتني بجد

Tarkieb said...

Noha Saleh
الكاتية كبيرة اه والله ممكن يكون في كدة والدنيا اكيد فيها بلاوي.زبس دي من الخيال العلمي ومين عارف ههه نورتيني بجد

Tarkieb said...

كريمة سندي s
انا والله اللي حصل الشرف بزيارة حضرتك ويارب دايما الزيارة

Tarkieb said...

faroukfahmy58
لا والله انت اللي كنت بادور عليه ما تعرفشي والله استمتعت بزيارة مدونة حضرتك وحكاوييك الجميلة جدا اللتي ملاينة كوميديا اعشقها رغم انها حقيقية لكن تحس انها مكتوبة باسلوب ادبي فريد... ويارب تفتح التعليقات تاني وان شاء الله يدوم الاتصال وشرف لي ان حضرتك تتابعني

Tarkieb said...

خالتى بمبة s
ربنا يخليكي ياخلتي بمبة ويارب يديم المعروف

Tarkieb said...

faroukfahmy58 s
والله القلوب عند بعضها ويعلم ربنا قلبي اتفتح لحضرتك جدا

Tarkieb said...

ياسمين said
هههههههههه كل شئ جايز في الدنيا وجوزها اكيد ايه اللي رماه ع المر وكمان مش شايف الست مضحية بنفسها عشانه قد ايه..اما المترو مش شرط ممكن في الميكروباس الترام المشروع اجتمعت الاسباب والموت واحدا نورتيني ويارب تدوم الزيارات

Tarkieb said...

reemaas
ههههههه عوصابة جامدة وجت على قلبه زي الطبطاب وضاع العمر ياولدي يالا اهو قلبه ح يسكن في شقة معتبرة ..نورتيني بجد ويارب ماتكون اخر زيارة

Tarkieb said...

iـــــــــــsــــــــــlــــــــــــaـــــــــm

اولا منورني ياريس وعندك حق ضيع عمره عشان عضو ههههههه...ربنا يخليك ويارب ماتكون اخر زيارة

Tarkieb said...

Bent Men ElZaman Da
ههههههههههه فكرني بالمثل طمعنجي بناله بيت فلسنجي سكنله فيه..ضيع شبابه عشان الطمع في اللي مش له..نورتيني بجد وخطوة عزيزة

Tarkieb said...

موناليزا
والله ياحرام صعب على ...نورتيني وماتقطعيش الزيارات بقى

Tarkieb said...

reem
تعليقك يحسسني انك استمتتعتي بجد بالقصة وده يسعدني بجد ربنا يخليكي على كلامك الجميل ويارب اكون دايما عند حسن ظنك..وزورونا كل بوست مرة وحرام تنسونا كام مرة

Tarkieb said...

Beram ElMasry
استاذي ربنا مايحرمنا من طلتك ولا صوتك يارب ويخليك لنا دايما

Tarkieb said...

norahaty said
حمد الله ع السلامة كنتح ازعل لو ما جتيش للتعليق ...عندك حق في ناس فاكرين ان الواحد ممكن يصنع نصيبه بايده..نورتيني كالعادة

عباس ابن فرناس said...

ههههههه
بس بجد صعب على
حظو دكر الغلبان

تحياتى المستعطرة
اسعتدتى بالزيارة

Tarkieb said...

عباس ابن فرناس s
ههههههههه حظه دكر وكان فاكر نفسه دكر..شرفتني بالزيارة

zizi said...

لو كان لي نصيب ودخلت انت مدونتك تقرا باقي الردود حا قولك انك لذيذ جداً ونهاياتك غير متوقعة بتاتاً ..ايه ده ولا حسن الإمام في زمانه ..والمرة الجاية حا قولك على المعلومة اللي عايز تعرفها ولا يهمك ..