Sunday, August 10, 2008

حرامية ٦ أبريل

كل اللي خرجوا حرامية عالم أونطة وشوضلية

أكيد دي حاجة كيدية ووراها عالم نكدية

و دماغهم راكبة وعاكسية وقلوبهم سودة وقاسية

دي عيشتنا فل ووردية مش شايف يا أعمى الحرية

والنعمة دي حقبة ذهبية لجميع مشارعينا القومية

بنعامل بعض بوطنية وكتير في جيوبنا النقدية

ومن جهة الناحية العاطفية بصراحة سعيدة رومانسية

وبفضل الخبرة الصومالية طورنا كمان الثقافية

وحكومة عادلة وقوية وحاكمة شعب ملوخية

وزرائها رمز الشفافية ووزننا ذاد م التغذية

العيش حدانا بكمية واللحمة حمرا حميرية

والخطة الجاية الخمسية متروسة وظايف هلامية

وأخترعت وصفة طردية لعلاج مشاكلنا العكسية

وح تبني مفاعل نووية شغالة بجلة مصرية

ويا سلام ع الساحة الحزبية أجدع من دولة أوروبية

ولا عاد في مشاكل أممية فلتحيا الأمة العربية

ولا تعرف معنى الشللية دي حكومة نزيهة وشعبية

شايفينها مشاكل نفسية من قلة محو الأمية

ويذيدها الغيرة الطبقية وغياب الروح الرياضية

وسجاير البانجو المحشية عامللكو هلاوس سمعية

يامعفن أنسى المدنية ف زيارتي ح أجبيلك طحينية

وهناك ح تحلي ببونية وح تقلع برضة الجلابية

و تخدلك جرعة أمنية وتبانلك أم الرفاهية

وتبطل شغل الحرامية وكفاية أونطة وشوضلية















5 comments:

MAHMOUD said...

جامده اوى ياباشا تسلم ايديك

Anonymous said...

حلوة اوى يا تيكو تجنن وكلامها جامد جدا وانت بتنتقد الامور بشكل لطيف ودمة خفيف \\\\\\\\\\nihal

El Maghoool said...

انت مش شايف انك بتهاجم الحكومة بطرية مباشرة قوية جدا و دة مش طريقة مناسبة للتعبير عن رائيك فى حكومة بلدك المصرية اللى حاكمانا يا استاذ تركيب والفاظك قوية جدا مليئة بقسوة و الغضب على الحكومة و البلد فا اية ردك ؟؟؟

Tarkieb said...

ماتخدش على كلام العميان يامفتح

قرفة said...

انا مش عاجبني البوستات القديمة ديفاضية ومافيهاش تعليقات وخصوصا تعليقاتي طبعا لاني كنت باعلق في السايت واللي اتنقل هنا ما اتنقلش بتعلقاتي فقلت انقلها انا بقى

وبما انك عامل مودريشن فاكيد التعليقاتهتوصل مش هاتتوه ولو مؤزعجاك اكيد هتروح سبام
وبما اني فضيت تاني وقلت العب واحتل زي زمان
بس ترتر مش فاضية حاليا
تحتل معايا
وننوس مش هنا فا احتل لوحدي
وفرصة الذكريات بتاعة السايت افتكرها
وكمان