Tuesday, July 19, 2011

إنت الحب

-كدة برضه يا سعد؟ هي دي آخرتها؟ تتجوز عليا يا ناقص بعد السنين دي كلها؟

-أتجوز عليكي؟ إيه الكلام الغريب ده يا ولية؟ أنا برضه أعمل كدة؟ ده إنت الحب كله يا ظازة

-ظازة في عينك راجل كداب وأونطجي......كل بعقلى حلاوة يا واد...فاكرني هابلة ولا لسة بريالة يا سعد؟ ما سرك خلاص إنكشف وبان ...ولعلمك يا سعد أنا قلبي وربنا كان حاسس من يوميها إنك من مدة مش مظبوط كدة

- مش مظبوط ؟ مش مظبوط إزاي يعني؟ إنت ح تشتغليلي ولا إيه ع الصبح؟

-ح أشتغلك؟ أنا برضة اللي ح أشتغلك يا عمر؟......من إمتى يا شايب يا عايب بتعرف البت الصايعة دي؟

-بقولك إيه يا ظازة بلاش بقى والنبي تغلطي في سوسو عشان خاطري دي بت غلبانة ومكسورة الجناح

-سوسو؟ يا صلاة النبي وكمان إسمها سوسو؟ وليك عين تزعل عشانها يا زينة الرجالة؟ يا حلاوة يا أولاد ...الله يرحمها أمك اللي كانت بتغلط في سلامو عليكم...والله إتنجرت وبقيت بتعرف تقول سوسو ولولو يا سعد؟ سوسو يا سعد؟ سوسو يا راجل يا كبارة؟ والله عال بقينا بنعرف ستات من عينة سوسو .........لا والنبي إعملهم عليا شغل التلات ورقات دول وتعالى خش في عبي خش إنت والبت الصايعة بتاعتك دي كمان...قال سوسو قال؟

-يا ولية يا بوز الإخس هو حد يطول بذمتك يتجوز واحدة زي سوسو؟..إتلهي بقى وإتنيلي إسكتي ....... وربنا دي ضفرها برقبتك.. ويالا بقى ان كان عجبك ؟

-لا طبعا مش عاجبني وما يعجبش برضه ربنا يا إبن بهانة

-ماهو إنت السبب با حفيظة......إنت اللي خليتيني أعمل كدة....عمري في حياتي ما شفت منك ريق حلو.... على طول حرماني م الدلع والهشتكة

-الهشتكة؟ الهشتكة يا نوغة؟

-يا ولية نفسي أحس إني عايش بحق وحقيقى ...عايش زي بقية خلق الله... وبصراحة بقى.... البت سوسو خلتني احس إن الدنيا لسة بخير.... ومريحاني أوووي ع الآخر....عارفة ليه؟ عشان بتحبني وبتموت فيا كمان...طبعا إنت مالكيش في الحاجات دي؟

-بتموت فيك؟ بتحبك على إيه يا حسرة؟ على شخيرك اللي يصحي الميت؟ ولا على الكومبنيشين اللي عمرك ما بتشده ياراجل وحالف إنك لازم تغم نفسنا يوماتي ع الصبح

-كومبنيشين إيه وقرف إيه؟ يا شيخة ده الملافظ سعد برضه .....متجوز أنا سباك بايني ولا إيه؟ بالزمة إنت ست إنت؟ تعرفي إيه إنت عن الرومانسية؟

-خليتها ليك دي يا روميو الغرام

-طبعا ده حاجة بالنسبة ليكي زي تسليك البلاليع كدة؟ وبتستغربي دلوقتي إني إتجوزت عليكي؟ جتك ستين نيلة..... ده أنا وربنا ليا حق بقى أتجوز عليكي مية مرة من ساعة ليلة الدخلة

-ليلة الدخلة؟ يا أخي إتوكس ...ما تخلنيش أفتح عليك مواضيع قفلناها يجي أكتر من خمسين سنة.....طب بزمتك يا سعد البت الصايعة دي رضيت إنك تبوسها؟ يعني رديت تتباس وما اغماش عليها من ريحة بقك؟

-يا ولية إتكسفي بقى على نفسك..... بوس إيه وبق إيه؟ هو الجواز عندك بوس وكلام فاضي وخلاص؟ بلاش قلة القيمة دي.....إحترمي نفسك بقى شوية ده إنت ولاد ولادك متجوزين ومخلفين كمان

-أنا اللي أحترم نفسي برضه؟ أنا اللي رحت إتجوزت عيلة من دور أحفادي؟ هما الرجالة بيتهبلو يا إخواتي لما بيكبرو ولا إيه؟

-يتهبلو في عينك ولية ناقصة بصحيح

-تفرق عني إيه يا سعد؟ ؟ قول يا عريس.......صغيرة ؟ طب ما أنا كنت صغيرة .....حلوة؟ طب ما انا طول عمري برضه حلوة وزي القمر..فيها إيه يعني زيادة عني يا دني؟

-ياولية هو إنت فيكي حاجة عدلة أساسا؟ هو إنت لسة حاسبة نفسك م النسوان؟

-نسوان؟ هما دول برضه نسوان يا دغوف؟ دول عيرة وشوية سيليكون

-شوية سيليكون؟ بقى سوسو اللي زي لهطة القشطة دي بتقولي عليها شوية سيليكون؟ امال إنت إيه بقى؟ أبلاكاش؟ حجر جيري؟

-آه وربنا سيليكون.. بس هو العيب بقى ع النظر

-العيب ع النظر؟ بقى سيبتي جسمها كله اللي عامل زي أنبوبة مرهم الروماتيزم الملعلطة ومسيكتي بس في السيليكون؟ تصدقى؟ عندك حق وربنا..العيب فعلا ع النظر...تكونش دي عقدة نقص وعندك من زمان وأنا مأعرفش؟

-عقدة نقص يا ناقص؟ هو انا أتوه عن شغل التجميل وعمايله؟ بالك إنت بس يا جلدة لو كنت زمان بس طاوعتني وظبطتلي بس شفايفي ولا كنت كبرتلى الصدرشوية وربنا كنت زماني ما فرقت عنها خالص....لكن أعمل إيه في بخلك وشحك؟ يا جلدة

-ههههههههههه تفرقي عنها؟ ياولية ده إنت عايزة عمرة مش عملية تجميل..ده إنت عايزة زويل يعملك مشروع قومي لوحدك....بالك إنت؟ إنت مفيش حاجة فيكي شغالة إللا لسانك ده اللي عايز قطعه ....وكويس بقى إنك خربتيها على نفسك وآديني ح أمشي وأسيبهالك مخضرة تمرحي فيها براحتك

-تسيبهالى؟ كدة برضه؟

- تصدقى يا ولية؟ أنا بأضرب نفسي ستين جزمة إني ما روحتش للبت سوسو دي من زمان.

-ما تقدرشي.. ما تقدرشي يا سعد

-ما أقدرشي؟ ما أقدرشي إيه يا ولية؟ إنت نسيتي نفسك ولا إيه؟

-ما تقدرشي وخلاص

-وبرضه بتقولى ما تقدرش.... إنت شاربة حاجة يا ولية ع الصبح؟

-مش أنا بس اللي شاربة يا عمر

-مش إنت بس اللي شاربة ؟ وما أقدرش؟ هو في إيه بالظبط؟ كركبتي بطني ع الصبح يا بعيدة ...ما تتعدلي بقى وكلميني عدل

-ولسة يا سعد إنت لسة شوفت حاجة

-ولسة؟ في إيه يا ولية؟ إنت ح تردي عليا؟ ولا عليا الطلاق بالتلاتة أقوم أشلفط وشك أكتر ماهو متشلفط

-فاكر يا سعد ليلة الدخلة أنا قلتلك ساعتها إيه؟

-أما ولية مهوسة بصحيح..هو أنا ياولية ح أقدر افتكرده بذمتك؟ ده أنا كنت زي المتبنج وحياتك م الصدمة....ده بوز يبنج فيل وربنا لوحدة

- الله يسامحك يا سعد...ماشي يا سعد ...أنا يا سعد ساعتها قلتلك إني أوعدك إني ح أكون ليك إنت وبس.... إنت وبس دنيا وآخرة

-يا نهار أبوكي إسود .....دنيا وآخرة؟ إنت ناوية يا ولية تكبسي على قلبي في الآخرة كمان ولا إيه؟ لا يا حلوة يفتح الله....حدقنا كتير بقى في دنيتنا عايزين مرة بقى نحلي

-لا ح يحصل يا سعد وح يحصل وغصب عن عين أمك بهانة الله يرحمها وح أثبتلك دلوقتي كمان إني قد كلمتي دي

-تثبتي؟ ولية؟ إوعي تكوني؟ إوعي تكوني عملتيها؟

-ما أقدرش أستحمل يا سعد..ما أقدرش أستحمل إن بعد العشرة دي كلها تيجي بت مفعوصة زي دي وتاخدك مني...دي عشرة عمر يا سعد...يا جوزي يا أبو عيالي

-عشرة عمر؟ تقومي تسميني يا مجنونة؟ بتسميني يا رمة يا بنت الرمة؟

-ماتشتمش أمي يا سعد شويتين وح نقابلها كلنا وأنت عارف بقى هي قد إيه ماكانتش بتطيقك؟...أحترم نفسك ياراجل بقى على الآواخر ...

- ح نقابل وكلنا؟ إنت؟ إيه دة؟ إنت؟

-أيوة .....أنا شربت معاك برضه الشاي أبو سم

-يا مجنونة يابنت المجنونة

-ماتشتمش أمي يا سعد بقولك

-طب والعيال يا فالحة؟ مين ح يخلى باله منهم لما نتكل كلنا بقى كدة بربطة المعلم

-العيال كبرت خلاص وليهم رب إسمه الكريم يا حبيبي

-حبيبك؟ حبك برص يا شيخة.......ربنا ينتقم منك يا وش الفقر

-ومنك يا حبيبي

-هو في اكتر من كدة إنتقام؟ ده يكفي إنك جاية ورايا حتى فى التربة.....حسبي الله ونعم الوكيل مت شهيد الغباء يا سعد....منك لله يا بعيدة ..وربنا مظلوم وأتسميت أونطة....وماأستاهل النهاية السودة دي أبدا

-مظلوم؟ دلوقتي بقيت مظلوم؟ خلى الهشتكة تنفعك بقى يا بتاع سوسو

-سوسو إيه ونيلة إيه؟ يا ولية إعقلي هي بذمتك سوسو اللي زي القمر ح ترضى تتجوزني على إيه؟ على صحتي المخسعة؟ ولا شبابي اللي راح من أول ما شفتك؟ منك لله.....ضيعتي مستقبل حياتي أونطة

-يعني مفيش سوسو؟

-يا ولية ده شكل واحد برضه يقدر على سوسو؟ ....ده أنا مقدرتش في شبابي ح أقدر دلوقتي؟ ده أنا أعتزلت الفن من أول ما عرفتك...ده إنت تخلي الرجالة ما يهوبوش ناحية صنف الحريم ده بتاتا...ده إنت ذو قوة قتل ثلاثية يا بعيدة

-سامحني يا سعد يقطعني

-أسامحك؟ بقى بعد ما موتيني عايزاني برضة أسامحك؟

-أموتك؟ إنت صدقت يا عبيط ولا إيه؟ تتقطع إيدي يا أبو سامبو...ده كلام كان كدة وكدة بس من غيظي.....هو إنت برضه تهون عليا يا راجل؟

-لا يا شيخة ....يعني سيبتي مفاصلي وجبتيلي تلبك معوي وإسهال وعايزاني دلوقتي كدة بكل سهولة أسامحك؟......روح يا شيخة ده إنت هزارك تلم زي أمك الله يرحمها بجد

-مش إنت برضة اللي سرحت بيا وخلتني أصدق إنك إتجوزت عليا؟ خلاص سماح بقى......ودي قصاد دي يا حبي.... يالا تعالى بقى خلاص وهات بوسة وصالحني

-.بوسة إيه وقرف إيه؟ إوعي يا ولية سيبيني..عايز أخش الحمام ح أموت خلاص ....منك لله بطني سابت بسببك

-طب هات البوسة وروح الحمام

-ياولية سيبيني أخش الأول وبعدين أديك البوسة

-يعني مش زعلان خلاص؟

-يا ولية هو أنا لو كنت بزعل منك كنت قدرت إستحملك أو أمك العمر ده كله؟

-أصيل يا سعودتي

-يالا سيبيني بقى مش قادر ... مش قااااادرررر وربنا....لا بجد دي إستوت يا حلوة وطلبت الآكالة

-طب إسمع....إسمع يا سعد

-في إيه تاني؟ إشهلى بقى أحسن خلاص مش قادررررررررررررررر

-بقولك إيه؟ بقولك إيه

-يا ولية خلصي بقى.....اللهم ما طولك يا رووووووح

-ماتنساش يا حبيبي والنبي لما تخلص تبقى تشد الكومبنيشين.....إحنا يا أخويا مش ناقصين قرف ع الصبح

46 comments:

طيوري said...

جميلة ههههههههههه
نهاياتك غير متوقعة كالعادة وكاركتراتك كلها كوميدية والقصص على اختلافها لكن اسلوبك ليه طابع مميز الواحد يتعرف عليه بسهوله
بس ناقصها الصوت والمؤثرات والكمبنيشن

Tarkieb said...

قرفة
ايوة كدة اول تعليق مش بعد الهنا بسنة..اه تنفع صوت بس عايزة رغدة تمثل معايا او جمالات زايد ههههههههه

طيوري said...

اه اوزينات
بس ماشاء الله الزباين كتير
بتبقى مستنية
اشوف البوست بسلطاته ببابا غنوجه
ربنا يزيدك

Ramy said...

هههههههههههههه

يستهلةا الأتنين الصراحة

هى خضة سوسو

و هو خضة السم

بس للأمانة حكاية الكومبنيشن دى صعبة شوية (:

بس تصدق حضرتك انا صدقت انها سمته الصراحة

ما هما فى اللحظات دى مبيتفهموش و لا بيفكروا

صحيح ليه بقالك فترة مفيش صوت زى زمان

(:

أمل حمدي said...

هههههههههههههه
ياربي أنت ملكش حل يا تركيب
:)فنان والله
ضحكتني من قلبي

تسلم ايدك

كريمة سندي said...

والله حوار شيق جدا وأكثر من رائع

فالشخصيتان لهما كاريكتر جميل جدا

أبدعت في الحوار وضحكتني من قلبي

تحياتي المستعطرة

Unknown said...

يعععععع إيه النهايه دي
بس جامده أويييييي بجد مايستاهلوش الا بعض
ضحكتني جداً :)

reemaas said...

ههههههههههههههههههههه
الله يقرفههههههههههم يا شيخ ده ايه دول

اينعم يستاهل اللى يجراله بس ولو حاجة فظيعه يعنى

الحوار رائع على فكره

faroukfahmy said...

اخف ظرفائنا
انا اطلقت على ابراهيم رزق اظرف ظرفائنا واسمح لر ياتركيب ان اطلق عليك اخف ظرفاء المدونين بجد حوارك بسمو على اعظم سيناريست فى مصر كلها
كم ارتاح الى حوارك الشعبى ولا تنسى انى خريج حوارى باب الشعرية بتفكرنى بيها خالص يا تركيب والا نهاية كلامك بالرغم ان معظمه كان مع روائح الحمام الا ان كلامك خللآ ريحته زى المسك يا مسك ارجوالا تحرمنا بالمزيد والمزيد من هذه الخواطر
خد نصيحة منى يا تركيب انتت لازم تلتحق بقسم النقد بالمعهد العالى للفنون المسرحية حتى تثقل هذه الموهبة الفذه

أحمد محمدي said...

يبدو ان علي نسخ كلمة " مبدع " ووضعها مباشرةً في التعليقات قبل قراءة الموضوع

شكرا لك

Carmen said...

هههههههههههههههه جميلة اوى وعجبنى الصورة جدا

تسلم ايدك ^_^

~ISLAM~ said...

هههههههههههههه

دول عالم مجانين

اللى يقولك ان الرجاله بتهيس لما بتكبر يبقى غلطان

الرجاله والستات الاتنين بيلسعوا لما بيكبروا

والدليل اهو
سعد وظاظه
الاتنين يجننوا بلد
~~~

الحوار ممتع جدا
واسلوبك ما شاء الله

تحياتى

Unknown said...

الا الكومبنيشن
اللى ا بيتشدش على
الصبح:انتقااااااااااااام

Tarkieb said...

قرفة
اه والله لو بس صوت زيها نعمل اجدعها شغل

Tarkieb said...

Mona
:)

Tarkieb said...

Ramy
اصيل يارامي ودايما كدة منورني واحلى حاجة انك فعلا بتعيش في الحكاية وبيبان من كلامك..شوف ياسيدي مشكلتي في التسجيل بصوت الوقت والصوت الحريمي هههههه لو لقيت دي مش بلاقى التانية

Tarkieb said...

ماما أمولة s
ربنا يسعدك دايما ويسعد قلبك على طول وتنوريني على طول

Tarkieb said...

كريمة سندي
ربنا يخليكي يارب وده شرف لى انك ضحكتي من كلامي ودايما يارب منوراني

Tarkieb said...

شيرين سامي

هههههههههه اهم حاجة انك ضحكتي ودايما منوراني

Tarkieb said...

reemaas
ههههههه دول حلوين وكوميدين والله ومن النوع ده كتير....نورتيني

Tarkieb said...

faroukfahmy58
ياه اخف ظرفاء المدونين مرة واحدة؟ امال مين بقى اللي ضحكنا بحكاية البطة من سوق الجمعة؟ ومستخسر يفتح التعليقات عشان نعلق عنده؟ انا خريج حواري زين العابدين بالسيدة زينب يعني شارحو برضة....وحوراتي مخزون لفترة عيشتها بين الناس الحلوة دي...والحمد لله ان اسلوبي عجبك ...ويارب تفتح التعليقات بقى

Tarkieb said...

أحمد محمدي
منورني يافنان دايما

Tarkieb said...

Carmen
ربنا يخليكي على فكرة الصورة لصاروخان فنان كاريكاتير مصري قديم من اصل ارمني ومات سنة 77

Tarkieb said...

iـــــــــــsــــــــــlــــــــــــaـــــــــm
منورني دايما ومبسوط ان ظاظا عجبك هو والحوار وميرسي على التشجيع

Tarkieb said...

norahaty

ههههههههه ما الدنيا الا كومبنيشين ..منوراني يا نورهاتي

Ms Venus said...

ههههههههههههههه وبعدين معاك

انت متجنى على الستات يا تيكووو


يعنى المرة اللى فاتت خدت قلبه

والمرة دى هتاخد روحه

ههههههههههههه

بس جميلة وبصراحة الاتنين لايقين على بعض

zizi said...

مش قلتلك حابقى مدمنة ..واهو حصل بس انت بتجيب التسلسل الرهيب اللي في الحوار ده ازاي ..دي حاجة جميلة وعلى فكرة انا سايبالكم كلكم ردود على عنتر وعبلة قبل ما اقفل عليها لظروف خاصة كان لازم انقل البوست بتاع المعطف من مدونتي القديمة"القلب الأخضراني "للمدونة دي عشان شيرين تنقلها بدورها لمدونة المعطف وده اللي خلاني اقفل بسرعة على عنتر وعبلة متأسفة ..وعلى فكرة انا عايزة منك الإيميل بتاعك لو سمحت ..تحياتي

zizi said...

اوعى تنسى تشوف الرد على عنتر وعبلة ..

عطش الصبار said...

مش بقولك سيناريست مافيش زيه
بس مش عارفه بتجيب كم المرادفات دى منين دا غير انى لازم اخلص الحوار كله لانى ببقى متوقعه ان فيه مقلب فى الاخر
شكرا على سؤالك احنا مو جودين يا فندم وبعد الشر عنك من عطش الصبار
تحياتى

عباس ابن فرناس said...

هههه
على فكرة الشخصيات دى واقعية لحد الى حد كبير الازواج لما بيكبرؤ فى السن بيكونو قريبين من الصور اللى انتا رسمتها

تحياتى المستعطرة

ابراهيم رزق said...

ايه الجمال ده

كل حلة و لقت غطاها

حوار ملىء بالروائح الطبيعية
هههههههه

تحياتى

شمس النهار said...

صحيح ان كيدهن عظيم
:))))))))

ياسمين said...

هههههه بجد حكاياتك كلها دمها خفيف موت وغير متوقعة بيعجبني انك مش نمطي ...ف حكاياتك ..هههههه ليها حق تقتلة وانا متوقعة ان فيه دم بئا وأكياس بلاستيك ههههههه

شهرزاد المصرية said...

ههههههه
مضحكة جدا
بس انا رأيى إن لو واحدة جوزها إتجوز عليها مفروض تخلعه مش تقتله
و تودى نفسها فى داهية ليه عشان واحدخاين
ما تروحه بالسلامة أحسن

تحياتى

mrmr said...

هههههههههههه
فنان بجد يا تراكيبوووووووووووووا
انا صدقت انه اتجوز عليها وصدقت كمان انها سمته بس النهايه غير متوقعه كالعاده
ربى يفرح قلبك

Anonymous said...

كل عام وانت طيب وبخير يا نركيب



۩ رمضان كريم ۩

Tarkieb said...

Ms Venus
انا برضه متحامل على الستات ازاي ما الراجل اهو خد على عينه ههههههههههه اهو ....نورتيني

Tarkieb said...

zizi
يارب تدمني هنا على طول ده شرف كبير ابا والله.. انا شوفت الرد ومستني الباقى بعد رمضان وكل سنة وانت طيبة

Tarkieb said...

عطش الصبار
ربنا يخليكي على الكلام الحلو ده...وده شرف كبير انك تردي على في اجازتك الطويلة ويارب ترجعي تاني سريعا للمدونة

Tarkieb said...

عباس ابن فرناس
منورني يا عبس وفعلا تحس انها بحق وحقيقة ..تسلم على التحيات المعطرة

Tarkieb said...

براهيم رزق

ده جمال عبد الناصر هههههههههه نورتني يا ملك

Tarkieb said...

شمس النهار
عندك حق دي ست طلعت سوسة هههههههه

Tarkieb said...

ياسمين
ربنا يكرمك على الكلام الحلو ده ويارب تكون دي مش اخر زيارة

Tarkieb said...

شهرزاد المصرية

عندك حق بس ساعات الزعل بيعمي البصر ..نورتيني

Tarkieb said...

mrmr
هههههههههه حمد الله ع السلامة يا ملكة الكوميديا احنا نيجي ايه جنبك..نورتيني

Tarkieb said...

الحــب الجميـــل
يوانت طيبة والله أكرم يا ستي