Tuesday, November 1, 2011

على نار هادئة



-لو سمحت عايزة كيلو مشكل على ذوقك بس ياريت ما يكونش سمين

-عينيا يا هانم ...... شوية كباب ألف هنا وشفا ويستاهلو بق حضرتك

-يخليلي عينيك يا أخويا ...بس ياريت والنبي تكترلي الشطة , جوزي يا أخويا بيموت في حاجة إسمها الشطة
-غالي والطلب رخيص..... بس مش حرام البق المسمسم ده نشطشطوه كدة ع الصبح؟ عارفة يا مدام لو كان بس ينفع
؟ كنت حطيتلك وربنا بإيديا دول عسل نحل في الكباب...أمال..... ماهو الحلو مالوش برضة غيرالحلو
-كلك ذوق يا معلم طب ياريت والنبي تتوصي كمان بقى بالبقدونس .... جوزي يا أخويا بيعشقه أووي ويقول عليه ده بيدي قوة ولا قوة مية حصان

-مية حصان؟ لا ربنا يقوية ويديله الصحة ع الفرسة اللي معاه

-أفندم؟

-لا بس أنا بقول أنا بحسده ع الجوهرة اللي معاه

-تحسده؟ ليه يا أخويا؟ ده إنت ألف واحدة تتمناك يا سي........؟

-عبدة...عبدة كفتة

-عبدة كفتة؟ إيه الإسم الغريب ده؟

-ده أسم وارثه أب عن جد...زي المحل ده برضة

-ياه المحل ده بتاعك؟ مع إنك لسة صغير وشاب يعني

-شاب هههههههههه الشباب شباب القلب ياهانم

-طب إنت عارف...أنا جوزي تقريبا يخلفك

-ياه...يخلفني طب وإيه رماك ع الكندوز يا لباني؟

-أفندم؟

-قصدي حتة كوتليت كدة زي حضرتك تقع في ايد واحد كبارة...صحيح يدي الموزة للي بلا سنان

-موزة؟ ربنا يكرمك...طب ده أنت ما شفتنيش قبل ما أتجوزه...كنت حاجة تانية خالص

-حاجة تانية؟ لا مش معقول ...طب إنت كدة مش ناقصك حاجة خالص ...بصراحة بقى ست الستات وزي ما الكتاب بيقول...طب إنت عارفة يا ست....؟

-نادية يا أخويا

-عاشت الاسامي ....عارفة أول ما هليتي عليا كدة قلت يا صلاة النبي على القمر اللي جاي في عز الضهرده

-قمر؟ ربنا يخليك

-آه وربنا قمر...هو البيه جوز حضرتك مش بيقولك كدة ولا إيه؟

-ينيله بنيلة ده عامل زي البرطة

-حضرتك قلتي حاجة؟

-لا بس كنت بقول خلى بالك م القطة لتخطف الكباب ....لا يا أخويا لا بيقول ولا بيعيد

-لا مالوش حق.... لما إنت مايتقلهاش يا قمر أمال يتقال بس لمين ؟

-يعني إنت بتقول لمراتك برضة كدة؟ قصدي يعني بتدلعها؟

-ياريت ....بس يا خسارة لأ

-ياريت؟ ولأ؟ إيه ده هما الرجالة خلاص إتخرسو الإيام دي ولا إيه؟

-لا حضرتك روحتي لبعيد أووووي...أنا مش متجوزأصلا

-مش متجوز؟ بجد؟ لا والله؟

آه والله أنا زي متقولي كدة متجوز الشغل....والله يرحمها إمي كانت كل حياتي

-وكمان أمك ميتة؟ يا حلاوة

-أفندم؟

-قصدي الله يرحمها ....يعني إنت عايش لوحدك؟ ومفيش حد بيراعيك؟

-آه في شقة طويلة وعريضة في المهندسين وحالتي لا تسر عدو ولا حبيب.....الوحدة وحشة

-طب ليه ماتتجوزش؟ أهو برضة تلاقى واحدة بنت حلال تاخد بالها منك وتحبك وتحبها

-دورت كتير بس للأسف مفيش نصيب

-مفيش نصيب؟ ليه كدة؟ أكيد بقى عايز حاجة خاصة ومفيش منها الأيام دي؟

-لا والله مش كدة ...كل اللي عايزها تكون بس بنت حلال وتكون برضة حلوة كدة زي حضرتك

-ميرسي ده بس من ذوقك....طب ما الحلويين كتير يا عبده....سوري قصدي يا سي عبده
-وسوري ليه؟ ما نخليها كدة بدون ألقاب...طب ده حتى أنا وربنا قلبي إتفتحلك أول ما شفتك يا ست نادية

-ست نادية؟ إنت مش قلت بلاش فهمي نظمي رسمي

-ههههههه آه صحيح....وربنا نسيت....شوفي بقى أنا بصراحة مش عايز سوسو
-سوسو مين؟
-بصراحة أنا بالصلاة ع النبي عايز نادية وماليش في النوع بتاع سوسو....يعني بصريح العبارة
عايز واحدة زييك بالظبط ....وربنا ح أكون أسعد واحدة لو ده حصل
-يا خسارة لو كنت بس مش متطلقة كنت قلتلك نادية تبقى أسعد واحدة لو إتجوزت واحد زييك يا عبد

-متطلقة؟ هو أنت مش متجوزة ولا إيه؟ أمال إيه حكاية جوزك والشطة دي؟

-دي حكاية طويلة يا عبده...أبقى أحكيهالك بعدين....المهم إنت لسه برضه عايز تاخد نادية؟ ولا عشان يعني متطلقة ماتبقاش قد المقام؟

-مقام إيه وكلام إيه يا نادية ؟ هو أنا بزمتك كنت أحلم مرة بواحدة زييك؟....ياحلاوة يا أولاد ولله وح نتدلعو خلاص يا دنيا ...والله وأمك نظيرة داعيالك قبل ما تموت يا ولا ياعبده....والله أنا في حلم يا أخواتي

أيوة يا دنيا أيوة كدة عمري ما شفتك حلوة كدة.

-بذمتك مش بدل ما أنت عاملي فيها عب الحليم كنت سألتني أحسن ح أطلب إيديك من مين يا نونا؟

-حلاوته....نونا....أموت في نونا وحلاوة نونا....آه صحيح منين يا نوننة قلبي؟ ح أطلبك من مين لا مؤاخذة؟

-من مامتي يا دودو....
-من مامتك؟ طب والحاج الوالد؟ فين يعني؟ فيص لا مؤاخذة؟
-فيص؟ إيه الألفاظ البلدي دي؟ بابي الله يرحمه مات من زمان أووووي...
-الله يرحمه أكيد الحاجة ماما كانت شديدة برضة كدة زييك يا نونا وصحته خسعت يا عيني..ماهو الجمال ده يا جميل وراثة
ولا مؤاخذة

-الله يرحمه...المهم لما تيجي عندنا إبقى هات معاك تشكيلة حلوة كدة ....حاكم ماما تموت هى كمان في الكباب والكفت.....ولو عايز تكسبها ياحلو من أول مرة عليك بقى والنيفا...هبراية كدة ولا فخدة عشان تعرف إنك مريش يا دودو وتوافق عليك على طول

ـياسلام غالي والطلب رخيص إن شاء الله ح أجيبلها معايا نص خروف مشوي تنأنأ فيه كدة بقى براحتها..ربنا يخليها لينا حماة المستقبل يارب

-ويخليك ليا يا غالي....ماتنساش تبقى تتصل بيا قبلها ....وده رقم موبايلي ....وإن شاء الله ناوي تيجي إمتى؟

-بكرة؟ ينفع بكرة؟

-بكرة؟ لا بكرة إيه؟ ده مش سلق بيض يا عبد....تعالى يوم الحد بعد المغرب نكون جهزنا نفسنا وإستعدينا
-ياه لسه ح أستنى ل
يوم الحد ...ربنا يصبرني لحد اليوم ده

-ح تصبر ياعبده أكيد ...يعني صبرت ده كله مش قادر تصبر كمان يومين؟

-يا مسهل يارب
-إن شاء الله خير...أنا ماشية بقى أحسن إتأخرت
-ماشية؟ طب والطلبية؟ دي زمانها حتى بردت خلاص
-ياه....تصدق نسيتها خالص.....متشكرة أوووي يا عبده......خلينا بقى على موبيلات ....أهي النمرة بتاعتي معاك....تقدر تتصل بيا أي وقت....يالا باي


**********************************

-ألو أيوة يا متولي أنا نادية
-أيوة إنت فين م الصبح كل ده بتجيبي الكباب يا ولية
-ولية في عينك.... طلقني يا متولي
-إنت إتهبلتي يا بت ولا إيه
؟...كل ده عشان بعتك تجيبي كيلو كباب وكيلو حلاوة طحينية؟
-طلقني يا متولي

إنت عليكي عفريت النهاردة إسمه طلقني ولا إيه؟ مالك يا نونو؟ في حد زعلك عند الكبابجي؟

-برضة لازم تطلقني وتبعتلى ورقتي النهاردة على بيت ماما

-النهاردة؟ كدة برضة يا نونس عايزة تسيبيني وكمان يوم الخميس يا وحشة؟ طب ده أنا محضر نفسي لليوم ده من إسبوع ......طب إسمعي...تعالي وهاتي الكباب والحلاوة وبكرة أطلقك...ماشي؟ إتفقنا؟
-ياراجل يا ناقص ح تفيد بإيه الحلاوة ولا الكباب معاك؟ ده إنت خلصان خالص من يوم ماعرفتك...والنبي لو كلت حتى قالب الحلاوة بحاله برضة مفيش فايدة...خلاص يا متولي...إنسى ....أنا رايحة لماما دلوقتي ومستنية ورقة الطلاق
وسايبالك الجمل بما حمل يا سبع البرمبة........سلام يا جامد....سلام يا جامد أووووي
-ألو.....ألو....الو ....ردي يانادية أبوس إيديكي ردي ....ألوووووووووو

43 comments:

Unknown said...

هههههههه بس الموبايل فصلني كنت حساها في زمن الأبيض و أسود أيام ما كانت الستات هما اللي بيشتروا اللحمة و الجزار يفضل يبصبص :)
بس متوقعه إن عبده ده يطلع شغال في المحل و يبقى ينفع نونس بقى البقدونس :)

nasamat said...

بعد كل ده
الو
طلقنى يا متولى
ههههههههههههههههههههههه

بس غدارة اوى نادية وملهاش امان
المرة الجاية هتروح ل ابو شقرة
وبعدين
الو
طلقنى يا عبده
هههههههههههههههه

حلوة اوى

Anonymous said...

ههههههههههههههه
ههههههههه
تعالي وهاتي الكباب واطلقك بكرة
طب ده يستاهل متولي اللي جراله
حلوة اوي نشطشطوه دي اسكندراني بالأوي
بس بردو ننوس مالهاش حق
كده بردو ياننوس؟؟
مكانش االعشم ياننوس
ليه بس كده ياننوس

عجبتني اوي يدي الموزة للي بلا سنان
ةكندوز ولبانب
بجد تحفة
لا وانا ليا ملاحظة مهمة
كل مرة في موفاجعة في النهاية
المنرة دي موفاجعة وبعدين بعديها موفاجعة
غير متوقعة
وربنا يستر من مفاجئاتك
جميييييلة جدا جدا بجد تسلم ايدك

قرفة

بسمة الورد عطر المشاعر said...

ههههههههههههه
انا بجد فرحانه فى متولى يستاهل علشان يحرم موش يدلع الستات الحلوين

دام ابداعك الساخر

Emtiaz Zourob said...

حلوة كثير .. بس انا مقرأتها انا شفتها قدامي وكأني باتفرج على مشهد من فيلم

بصراحة ابدعت في الوصف والحوار

خليتنا ننشد للبوست من أوله لاخره .. مافوتناش ولا حرف

بس ماكنتش اعرف انه اللحمة بتعمل هيك بالبني ادمين بتغيرهم خالص
لا ومتولي بيقولها هاتي الكباب وبكرة اطلقك

عن جد استمتعت بالقراءة كثير كثير

P A S H A said...

ههههههههههههههههه
لأ حلوة بجد
آهو كده متولي هايطلقها على ورق الحلاوة
:))

Baskouta said...

حلو اوي
بوست الموسم ده

ده بوست عيد اللحمة

بس ازاي يعني الخروف اللى هو بطل الموسم ياخد دور هامشي كدة
ياااااادوب نصه هيروح لمامة نادية

عجبني بجد البوست

كل سنة وحضرتك طيب وكل عيد وحضرتك وكل حبايبك بخير وفي احسن حال

زهرة said...

جميله أوى .. وحساه عبدة دة كداب مش عارفه ليه ..

تسلم افكارك يا تيكو

تحياتى :))

ياسمين said...

ايوة بقالنا كثير مش شفنا..القصص الجميلة دي...بجد تحفة ..ندلة اووي نادية دي..والراجل اندل همه ع بطنه ههههه

هبة فاروق said...

هههههههههه
جميلة اوى والحوار جميل شدنى من البداية للنهاية بس كنت متوقعة انها تأخد بمبة من بتاع الكباب
فى اخر القصة
الظاهر حتبقى المنافس القادم بتاعى هههههههه
تحياتى

faroukfahmy said...

تركيب
خوزها بعتها تجيبله كباب يقويه ....وقع فى شر كبابجى شنكله واخ نعجنه لانال الكباب ولا الحلاوة ولا نعجته
قصة سردها جميل ونقلاتها اجمل
الفاروق

Ms Venus said...

صدقنى وانت بتكتب تعليقك عندى يا تيكوو انا هنا بقراء البوست بتاعك

انا عارفة انى مقصرة اوى فى حق كل المدونات وفى مدونتى كمان

حالة احباط بقى ما انت عارف

كل سنة وانت دايما بكل خير ياااارب

انا بس حبيت ارد على تعليقك الجميل

وهروح اكمل قراية للبوسن بتاعك بقى وارد تانى

Ms Venus said...

ههههههههههههه بوست بالتاء مش بالنون معلش بقى ^_^

Ms Venus said...

هههههههههههههه جميلة يا تيكووو

نفسى اعرف بتجيب شخصياتك دى منين

افروديت said...

هههههههههههه نفسي أعرف بتجيب الكلام ده منين اصلا
موتني مي الضحك وبعدين إنت كده بتعمل إعلان لعبده كفته

بس يالا مش خساره فيه لان اكله فعلآ كويس


عجبتني القصه ياتركيب وكنت حابه اسمعها لايف في الراديو

~ISLAM~ said...

هههههههههههه

كلهم عايزين الضرب

بس احلى حاجة ان الكوميديا حاضره

وده المفرح هنا

انت فنان يا صاحبى

كل سنه وانت طيب

أع ـقل مـ ج ـنـونــة said...

ههههههههههههههه
وياتري عبده هيطلع مين في الآخر
شكله صبي الجزاااااار
ويعيشها في العضم بعد كدا

بوست جامد جدي

richardCatheart said...

:)))))))))))))))))))

مافيش تعليق

كل سنه وانت طيب عيد سعيد يا تيكو ان شاء الله

The Royal Couturier said...

هاهاهاهاهااهاهاه
ع فكرة كتير بتحصل حاجات شبه كده فالواقع و يطلع زى شيرين ما قالت
و اتفق برضو مع شيرين فانها تحسها ابيض و اسود لولا الموبايل
دلوقتى بيحصل حاجات شبة بس مع اختلافات زى ما مسلسل زود نسبة الطلاق :)
بس ملعوبة اوى و الله و جامدة تنين :))

hana said...

هههههههههههههههههههههههههههه ياربي قالتلوا طلقني يا متولي كنت فكراااه هيثم ههههههههههههههههه
ايه طعامة الحواار دي ياربي مش ممكن حوار فظيييييييع مش ممكن بجد خرافي وامور خااالص

تسلم الأيادي يا فناااااااان

mrmr said...

دى ناديه دى طلعه واطيه واطيه يعنى ههههههههههههههه
ديما باسعد وانا فى مدونتك يا تراكيبووووووو
كل سنه وانت طيب
عيد اضحى سعيد

reemaas said...

انا متوقعه بومبة مدوية
ههههههههههههههههههههههه

احلى حاجة وهى بتنكر جوازها بعد موال الشطة
جبروت

Unknown said...

بلاها سوسو
خد نادية!!
طب بلاها نادية
خد صوصووو المهم
الهبرة ما تخرجش برهـ!

Sarah .. said...

:)))))
حلو البوست أووى .. شكرا ع عيدية العيد دى :)

كل سنة وانت طيب ..
وعيد سعيد عليك
ان شاء الله ..
:)

Ramy said...

كل سنة و حضرتك طيب يا استاذ تركيب

و عيد أضحى سعيد عليك و على الأسرة

.......

اوعى تفتكر ان البوست فلت منى

أبسولوتلى نوووت

((:

Anonymous said...

كل سنة وانت طيب ياتركيب عيد سعيد عليك يافنان انت والأسرة كلها يارب
بس اكيد انت مالكش في عيد اللحمة ده ههههههههههههههه بس احنا لينا
حضرتك

قرفة

rona ali said...

ههههههههههههههه مافيش فوزيه ههههههههه

جميله بجد يا تركيب :))))

جارة القمر said...

ههههههههههههههههههههههههه حلوة اووووووووووووووى

كل سنة وحضرتك طيب و بكل خير يارب

zizi said...

كل سنة وانت طيب يابو التراكيب ..وبوست حلو قوي وتسلسله تلقائي بس ينفع يبقاله تكملة ان يطلع الجزار ده بيضحك عليه بأي طريقة ..تحياتي وامتناني لقلمك المبدع ..زيزي

Tamer Nabil Moussa said...

شوف ياخويا الستات هههههههه

تسلم ايدك

مع خالص تحياتى

عباس ابن فرناس said...

فتش عن الكباب :) ههههه

ولكل فوزية عيدو
ولكل متولى كببجى
تحياتى وكل سنة ونتا بخير

Ramy said...

طبعاً متأخر قوى

هههههههههه

بس مش عارف انت بتشوفهم فين

الناس دى

((:

بس ست ناصحة قوى ظبطت قبل الطلاق

((:

ساسو said...

ههههههههههههه
عسل يا تيكو وربنا


ياخوفي ليكون عبده كداب
ويكون كلمنجي وبس
وتبقي كده ناديه راحت عليها
ولا طالت عبده ولا متولي

بس النوع دا من الستات ملهوش امان
وزي ماعملت مع متولي هتعمل مع عبده

دايما تزرع البسمه علي كل وجه يا تيكو

اقصوصه said...

هههههههههههههههههههه

الفرصه تمر مر السحاب

والذكي يغتنمها

لووووووووووووووول

Carol said...

انت ممكن تكون سيناريست رائع
مستقبلك في الكتابة الساخرة مشرق
تحياتي لك

Unknown said...

يارب تكون بخير
ياتراكيبوا أتاخرت
علينا

Unknown said...

كومنت مودريشن؟
ليه؟من أمتى دا؟

جايدا العزيزي said...

عام مضى.... بكل ما فيه من اعمال خيرها و شرها .. جعل الله جميع اعمالنا مباركة صالحة .. وأن يغفر الله خطايانا و ذنوبنا..
و عام نستقبله بكلّ الأماني .. و تجديد النيّة فيه بان تكون جميع أعمالنا خالصة لوجه الله .... و العزم على التقرب لله تعالى .. في الصالحات من الاعمال و الافعال

اسمى آيات التهانى و التبريكات الى جميع الاخوة والاخوات ... و الامة الاسلامية و العربية .. بهذه المناسبة العظيمة .. جعلها الله سنة خير و بركة...

و نصر الاسلام و المسلمين ... في شتى بقاع الأرض
كـــــــــــــــــــــــــل عــــــــــام وأنتم بخـــــــــــــير

Anonymous said...

ههههههههههههههههههه
دمها خفيفة
عجبتني جدا

افروديت said...

انت فين ياتركيب

وفين تدويناتك

واضح إن الاكتئاب اصاب كل المصريين ماعداالعباسية

Tarkieb said...

باعتذر اني مارديتش كنت في اجازة طويلة يومين كدة وارد واعمل الواجب اللي عليا بتاع الشهر كله

Unknown said...

لوووووووى
تراكيبووا ظهر
الف حمد لله على السلامة:)

walaa tulip rose said...

اهي دي بجد جامده مووووووووووووووووووت