Sunday, February 8, 2015

ليلة العمر





الإثنين , 2015 02:02

-       وافقي بقى يا سيدة حرام عليكي
-       مقدرش أظلمك معايا إنت كمان؛ ضميري يا حمودة، ضميري، مقدرشي والله
-       ضميرك؟ ضميرك إيه وكلام فاضي إيه يابت؟ الاعمار بيد الله يا هبلة، مش ذنبك يعني إن كل اللي إتجوزوكي يا إما ماتو يا طفشو؟ نصيبهم بقي ح نعمل إيه يعني؟
-       نصيبهم؟ لا ياحمودة ده مش نصيب، أمي بتقولي ده عمل ومعمولي وبيطفش مني العرسان وتقريبا في ليلة الدخلة
-       عمل إيه وكلام فاضي إيه؟ بلاش هبل، إنت بتصدقي في الكلام الخايب ده؟ با بت ده نصيب وبكرة  لما توافقي ونتجوز ح تعرفي إنه ده كله تهيؤات مش أكتر، وافقي بقي يا سيدة، وربنا ما ح تندمي، مش معقولة يعني ح أفضل أستناكي أكتر من كدة، كل مرة بتتجوزي فيها ببقى ح أتجنن خالص، طب عارفة؟ وربنا ساعتها بأحس إنك خلاص مش ح تبقي بتاعتي وإني ضعت خلاص، يا سيدة إنت حلم حياتي من وإحنا صغيريين وبجد بقى مقدرش أعيش من غيرك، يا ريت تفهمي ده،  وافقي بقي أحب علي أيدك
-       ياحمودة تلاتة غيرك قالولي نفس كلامك ويوم الصباحية قالولي مش طايقين ريحتك، دول قالولي ان ريحتي بتخنقهم يا حمودة، طب اعمل إيه بذمتك؟ دي حاجة بتاعة ربنا ومش بإيدي، وربنا باستحمي يجي خمس مرات في اليوم لما بشت خلاص يا حمودة
-       ريحتك بتخنقهم؟ إيه الهبل ده؟ دول بيستهبلو بجد يا سيدة، دي إنت فل الفل يا بت  وعاملة زي لهطة القشطة قال على رأي المثل ما لقوش في الورد عيب
-       بأقولك ريحتي ياحمودة مش شكلي
-       يا ستي وربنا ما ح تفرق معايا حتى لو بتسلكي المجاري، أنا رايدك كدة، مالكيش دعوة ، أنا عايزك إنت وبس، وان كان ع الريحة يا ستي ولا يهمك أنا حاسة الشم عندي تقريبا راحت من بعد ما رحت الجيش ومنها لله بقى الحروب الكيماوية، شفتي بقي يا ستي إن الحجة الوحيدة للي عندك بقى مالهاش أي معنى خلاص
-       بجد يا حمودة ؟ يعني مش يجي يوم و تندم إنك إتجوزتني؟
-       أندم؟ بقى ده كلام يا سيدة؟ بأقولك إنت حلم وحب عمري يا بت
-       ربنا يخليك ليا يا حمودة ، خلاص إنا  كدة أتطمنت، وخلاص وافقت وخلي ميعاد الفرح زي ما كنا أتفقنا يوم الخميس ده إن شاء الله، ومش ح أكسر بخاطرك أبدا والنبي يا غالي
-       ياه يا سيدة وربنا أنا أمي دعيالي بجد، بحبك بحبك ياروح القلب.









بوابة الأهرام
بقلم: رفعت أبوشادوف
الجمعة , 2015 06:02

لقي زوج بالمنوفية مصرعه وأصيبت زوجته باختناق شديد، إثر تسرب للغاز بحمام شقتهما بقرية أم صالح التابعة لمركز بركة السبع، وتم التحفظ على جثة الزوج ونقله إلى المستشفى أما الزوجة فقد فاقت بعد عمل الأسعافات الأولية لها وتولت النيابة التحقيق.

17 comments:

طيوري said...

لاحول ولا قوة الا بالله
ليلة العمر وكانت اخر ليلة في العمر فعلا
تصدق اتأثرت
بس قلت ده تمثيل
هو لو كان حاسة الشم عنده كويسة كان يمكن شم ريحة الغاز هههههههههههه
جميلة كالعادة
وتسلم الايادي

Tarkieb said...

طيوري
غلبانة كل الشمامين اللي اتجوزوها طفشو والي بعافيه جبة اتكلو هييييه دنيا ...الاعمال بالنيات ودي اكيد معمبوها اعمال بالكميات هههههه نورتيني

زهــــراء said...

ههههههه على فكره تخيلت صوت حموده زي سيد شبطه بالضبط وكمان تخيلت صوتها شبه صوت منير مراد في فيلم نهارك سعيد لما كان بيعمل أصوات نسائيه

المهم ريحه الغاز تسربت إلى الحمام يبقى سيده دي ريحتها فظيعه يا معنمي
كانت تنفع حلقه إذاعية من حلقات الرائعه
بلاش غياب أعمالك بتوحشنا والله لسه فاكره اكاكي من كام يوم وكنت باحكي عنها لبنت اخويا بس غيرت في النهايه شويه عشان تناسب الأطفال

كل التحيات والتقدير

P A S H A said...

أستاذ كبير ولعيب محترف والله
لعبت ع الخبر بحرفنة خلت نهاية القصة غير متوقعة خالص
:)
وما تغيبش تاني علينا يا عمنا وما تخافش مش هاجيب لك سيرة الموضوع اللي بيزعلك بين قوسين السوبيا
D:
واحشني كتير يا تركيب يا ربنا ؛ بلوجر مضلم من غيرك يا غالي

Tarkieb said...


زهراء
حمد الله ع السلامة ياملكة التحليلات والنقد ربنا يخليكي ياه لسه فاكرة اكاكي الله يرحمه بقي، معلش والله باتاخر لطبيعة الشغل بارجع فسيخة كل يوم بس ان شاء الله ما اغيب

كتير نورتيني وسلامي لولا
والناس الحلوين بتوع السايت زمان ايام لما كنا بنشوف عمر اديب الرمة 😀😀😀

زهــــراء said...

ههههههه حاضر يوصل السلام وربنا يقويك ويكرمك وخلاص بقى راحت ايام عمرو أديب وهو في ايه يا عمي ههههههه

Tarkieb said...

شريف باشا
ربنا يخليك يا فنان القلوب عند بعضها والسوبيا عند الرحماني 😀😀😀 معلش والله التاخير بسبب الشغل وان شاء الله ارجع زي زمان وتذهق مني دايما منورني

Unknown said...

إنت فينك من فترة يا أستاذنا
القصة نهليتها فى الخبر الذى أوردته
الزوجة فاقت بعد ما عملوا لها الإسعافات الأولية والرجل إتكل على الله
هههههههههههه
خالص اعتزازى

Tarkieb said...

مدونة الفرسان

انا والله مشغول حبه في الشغل

ومعلش مقصر مع الجميع

وخصوصا بعد ماعزلت بقي وبقي ليك دار جديدة

دايما منورني يارب

Unknown said...

أتمنى صديقى العزيز إدراج مدونة الفرسانفى قائمة المدونات عند حضرتك
خالص احتراماتى

Unknown said...

حمدالله على السلامة
طوووولت الغيبة المرة دى
وكله كوم والريحة الأوفنسف كوووم
نصيبه بقى يبقى الضحية
الرابعة
مكتوبة له :)

Tarkieb said...

مدونة الفرسان
تم ياصديقي اللاضافة

Tarkieb said...

norahaty mo

الله يسلمك ...ههههه ذو قوة قتل ثلاثية...والله صعبت عليا غصب عنها

رحاب صالح said...

ههههههههه
ما هي دي ليلة العمر
يعني اليلة الي بينكتبلك فيها عمر جديد يا ينقصف عمرك خالص هههه
بس مقولتليش تسرب غاز إزاي
وجابوا الغاز منين ..؟
ده حتي الغاز شاحح قوي اليومين دول يا عم تيكو

Tarkieb said...


Blogger رحاب صالح

هههههههه ليله راح فيها العمر نورتيني يا فنانة البنفسج وديما سارب من تألق لتألق

محمد سلامة said...

ههههههههههههههه
جميلة ومضحكة
تقبل تحياتى

Tarkieb said...

محمد سلامة
نورتني يا محمد