Sunday, April 3, 2016

إبن عز



-الستات دول كلهم صنف واحد
-مش كلهم
-لا كلهم وطماعين كمان
-مش كلهم
-كلهم.. اهم حاجة عندهم صدقني الفلوس
-مش كلهم
-مش كلهم؟ جرى إيه يا أحمد إنت معايا ولا معاهم ؟ ولا تكونش بقيت محامي عن الستات يا جدع؟
-لا محامي ولا زفت إنا بس مع الحق... وصوابعك مش زي بعضها يا هندسة
-لا زي بعض
-ههههههههه يعني إنت عشان واحدة ضحكت عليك تشيلها لكل الستات؟ ده كلام بذمتك؟ ده ربنا عرفوه بالعقل يا باشمهندس زغلول
-باشمهندس؟ لا وإنت الصادق باشمغفل.. باش أهبل
-ياجدع ما تقولش كدة..إنت آي واحدة تتمناك وربنا
-آي واحدة؟
طبعا ...بس إنت تشاور.. تلاقيك بس دخلت عليها بطريقتك المهببة دي؟ راحت كشت منك
-  طريقتي المهببة؟ بقى هي الصراحة بذمتك وحشة يا أحمد؟
-لا مش وحشة ولا حاجة ؟ بس

-بس؟ بس إيه؟
-بس بالتدريج مش مرة واحدة
-صدقني أنا أول ما شفتها في النادي مقدرتش أمسك نفسي
-حلوة أكيد..صح؟
-الا حلوة..دي فظيعة وجمال إيه وشياكة إيه؟ بصراحة تجنن
-طب واحدة زي دي أكيد مخطوبة ولا مصاحبة..الحلو زي ده مش بيقعد  
-لا أبدا ..لسة سنجل
-سنجل؟ وعرفت منين طيب؟
-سألت الجرسون في النادي وقال دي لسه سنجل؟ بس عايزة واحد برنس
-برنس؟
-إيوة غني يعني
-غني؟
-آه فسح بقى ولبس والذي منه
-طب ما دي سهلة ياعم زغلول..إنت ماشاء الله عليك غني ومقتدر ومهندس ومن عيلة كويسة كمان
-ما أنا بصراحة دخلت عليها م الحتة دي
-برافو... عملت إيه يعني؟ إحكيلي يا ريس
-حكيتلها كل حاجة
-كل حاجة؟
-آه إني يعني الوريث الوحيد لبابا وان كل المصانع والمحلات دي ح تبقى بتاعتي بعد عمر طويل إن شاء الله
-وبعدين؟
ولا قبلين بعدها بيومين وحياتك لاقيت أبويا جايبها البيت ولامم كل العيلة
-طب ما كويس أهو حظك في رجلك يا معلم جات من عند ربنا أهو
-حظي في رجلي؟ إنت طيب والله أووي يا أحمد..الآنسة راحت لافت علي أبويا قوام في النادي وبسلامته قال إيه؟ عايز يتجوزها

6 comments:

طيوري said...

تبقى في بقك وتقسم لغيرك

ههههههههه دا المفروض يبقى اسمه ابن حظ مش ابن عز
تسلم ياتركيب

زهــــراء said...

الله ينور البت دي معلمه كبييييره وبعدين الباشمهندس ده ولا بيفهم ولا بيعرف اي حاجه في الهندسه
البنت دماغها الماظه
انت عارف اني تخيلت الحوار بالصوت كمان هههههههههه بلاش بخل كنت سجلتها
مساك بيضحك

محمد سلامة said...

البنت دى اسطورة
ولا زوجة سعيد طرابيك فى زمانها
:)

P A S H A said...

لو لسه ما أرتبطش أنا ممكن أتجوزه عادي
:D
حبيبي يا معلمي واحشني كتير والله

رحاب صالح said...

هههههههههههه
علي نياتو يا حرررااام
البنت من دول عايزة اقصر الطرق الي تودي لباريس والشانزليزية والحاجات الحلوة دي ومعادتش ياكل معاها انا الوريث الوحيد والكلام ده
وحشني اقرا مدوناتك اووي
ومش بخل بقي وكلام من ده
كان عندي مشكلة في النت والمدونة ومكنتش بعرف ادخل علي اي مدونات خالص ولا حتي مدونتي

عباس ابن فرناس said...

لاشك أنك فنان ساخر متميز يا معلم تركيب وحشتنا كتاباتك المميزه وكل سنه ونتا طيب