Tuesday, September 9, 2008

يا عيب البوم

في ناس تحب حيوانات كدة من الباب للطاق وفي ناس تكره حيوانات بالسمع ويمكن عمرها حتي ما شافتها وبرضة تكرها وحتي لو شافتها يمكن راح تحش رقبتها ومن الحيوانات المظلومة دول حبيبة قلبي البومة .. انا اموت في البومة أووي وطول عمري وكل ما اروح جنينة حيوانات محترمة اخش على البومة واكحل عيني بجمالها وافضل أصور فيها واتغزل فيها ويا اختي كميلة لا بتتحرك ولا تتأثر بي بل بالعكس أول ما تشوفني تروح نايمة وتشخر... والبومة لو الناس تعرف والنعمة ح يحبوها زي واكتر اول حاجة شغالة بهمة وببلاش بالليل والناس نايمة تشخر يعني مش بتزعج حد فينا خالص مالص ولا حاجة وحتى لما بتطير بتطير من غير ما تعمل صوت وتنقض على الفيران والحشرات .. طب عايزين ايه يا أخوانا دي شغالة بما يرضي الله و بتكسح الخرابات والمزابل من الفيران.... والناس من غبائها افتكرت ان الخرابات ملايانة بوم وعلشان كدة قالوا دي بتجيب الخراب و مش عارفين ان لولا يا أختى كماله دي كانت الفيران خرجت علينا واحتلت الحارات عندنا... أجمل حاجة في البومة كمان انها الطائر الوحيد اللي بيطبق المثل المصري فتح عينك تاكل ملبن بزمة لانها بتفتح العينين الجوز وهي بتصداد وكمان في الضلمة يعني زي القطط شوفتو بقي كميل اد ايه.. ولو على أنا والنعمه دا انا أديلها لقب صديق الفلاح بدل أبو قردان الكتيان . والمصريين زمان كانوا فعلا أذكى مننا دلوقتي وكانوا بيحبو البوم زي عينيهم ولو بصيت على كل الرسوم القديمة ح تلاقي رسوم للبوم واشهر بومة في التاريخ كانت بومة الملك رمسيس وكان اسمها تاووكت وكانت بومة بكشك عند رمسيس لحد ما يوم طرفت عينه وزعل منها ومعدشي يكلمها بس للامانة ما ضربهاش لا آءة آءة ولا حاجة وبعدين انتقل رمز البومة اللي كان يرمز للحكمة من المصرية القديمة الي اليونانية وبرضه استمرت لحد الان عند اليونايين الحاليين، واحد راح يقولي ما تقصر بقي بومك في يومك ’ بوم ايه؟ وهبل ايه يا تركيب؟ انت عايز ايه بالظبط يا أبا ؟ شوف يا سيدي انا راح أقولك ان الناس والبلاد مختلفة على حاجات كتيرة فمثلا لو قلت لواحد في ألمانيا انت بومة معناها أنت سهار الليالي ولو قلت لواحد في فرنسا انت بومة معناها أنت ذكي ومكار جدا ولو قلت لو احد في اليونان انت بومة معناها أنت حكيم... اما كل الدول المتخلفة وعلى راسها أحنا طبعا لو قلت لواحد انت بومة يبقي ليلتك سودة لانها رمز للشؤم ... طب أيه اللي حصل في مصر كنا زمان بنحب البوم ولما العرب جم عندنا والكترة طبعا تغلب الشجاعة غيرونا وخلونا ما نحب البوم... وهنا عايز أسألكم شوية أسئلة تفتكروا لو في بومة نامت ننة في مصر الاف السنين وخارجة وبتحسب الناس ح توسع لها السكة وتفرش لها الارض رمل وشافت الناس حتزبلها ازاي مش ممكن تطب ساكتة وتموت غيظا ؟ تفتكر لو انت بومة ممكن تفضل عايش في مصر ولا تسافر لفرنسا ولا اليونان على الاقل هناك نظافة واحترام وكمان فيران ترض الروح مش فيرانا المعفنة ؟ تفتكر ممكن يكون أحترام البومة دليل لتقدم الناس حيث أن الدول المتقدمة عارفة قيمتها وذكائها وبتحترمها والدول المتخلفة شايفها في الخرابة بس مش عارفة ان تحت الخرابة فار؟ تفتكر ان كلامي ده ممكن يغير فكرك ويخليك تحب البومة زيي أنا كدة من الباب للطاق؟ ولا المصري ح يفضل طول عمره مصري ومش بيغير رأيه الا بالطبل البلدي وعلى رأي المثل البومة لو فيها خير ما فاتها الصيّاد

1 comment:

Anonymous said...

الحمد لله انى متفائلة مليش فى التشاؤم من البومة او رقم 13 او غيرها من الحاجات العبيطة دى
بس لو كنت بومة مش هفكر اسافر برضه لاى مكان
يعنى اللى بيسافر بيسافر لاسباب كتيرة طبعا
بس مش عشان انا بومة

تشكر على المعلومات والقصة الغرامية دى

نسمات