Sunday, October 10, 2010

تفتكري يا مامي؟







-
مامي أنا نفسي غمت على فجأة في المدرسة النهاردة ودخت كدة كذا مرة هناك


-
المدرسة؟ إيه ده يا زيزي هو إنت رحتى كمان النهاردة ؟ مش ممكن يا حبيبتي......أنا مش مصدقة خالص ......من إمتى يا زوزة بقيتي بتحبي كدة المدرسة؟

-خلاص بقى ...... أنا ريلي ريلي زهقت من النت والشات خالص وقلت يالا بقى أغير جو ، إيه رأيك مش كدة أحسن برضة؟

-تغيري جو؟ إيه ده يا زوزة؟ هو هاني إبن تانطك فيفي خلاص بقى مشغول عنك ولا إيه؟ مش كان مواعدك تعملو دايفينج في شارم؟ إخص عليه المجرم ده...طب بس اما أشوفه ....الله يرحم أيام الواد سوسو إبن تانطك عزة ....ريلي ريلي كان ولد بجد جنتلمان.... وكان ياروحي على طول و ليل نهار لازق عندنا ... عارفة يا زوزة؟ تقريبا من يوم ما سوسو يا حبيبي دخل الجيش وإنت حاسة كدة بفراغ جامد أووي، ربنا يكون في عونك ويعدي الأيام دي بقى بسرعة


-مامي ......الحكيمة بعد ما كشفت النهاردة عليا قالتلي أنا عايزة أبقى أكلم مامتك ضروري يا زيزي وقالتلي كمان أنا مش عايزة أعملك شوشرة هنا يا بنتي أو حتى أبلغ الناظر بتاعنا دلوقتي بالحكاية دي، وقالت في الآخر ربنا يكون في عونه عشان هو كمان مش ملاحق كدة على المدرسة ومشاكلها


-
الناظر؟ هو الناظر بتاعكم يا زوزة بالزمة بقى فاضيلكم خلاص.........ده من ساعة ما شاف قصة حب في رمضان وهو عمال يعاكس معظم مامات البنات تقريبا في النت....إنت عارفة يا زوزة يا حبيبتي؟ أنا مش ملاحقة أنا كمان رد عليه، ده راجل شكله فاضي أو بقى خلاص بيحب على روحه يابنتي من ساعتها


-نت وحب إيه يامامي؟ بقولك قالتلي شوشرة بس مش عارفة هى كانت تقصد إيه بالكلام ده؟


-
سيبك منها يا زوزة......... هو أنا فاضية لدلع الستات ده..... تلاقيها يا بنتي واحدة فايقة ورايقة، ماهي لو كانت مشغولة زيي كدة في النادي ولا مواعيد الكوافير ما كانتش عملت كدة؟ صحيح الفاضي يعمل بجد قاضي


-
طب أقولها إيه طيب؟ دي كمان سألتني عن الأصحاب الأنتيم بتوعي وعددهم وسنهم وكدة يعني، أنا بصراحة مش فاهمة إيه علاقة ده كله بالدوخة اللي عندي يا مامي؟


-
سيبك منها يا زوزة يا حبيبتي...... وحياتك دي تلاقيها بس غاوية تعملي فيها دكتورة... حاكم هم بتوع التمريض كدة ... معظمهم يا حرام عنده عقد نفسية....حقد طبقي بقى..... عارفة يا زوزة؟ أنا متأكدة إنها واحدة فضولية أو جايز تكون معقدة حبة............... آه خلاص!!!!! تاهت ولاقيتها يا زوزة.....مش يمكن تكون غيرانة منك يا حبيبتي؟


-
غيرانة إيه بس يا مامي؟ دي شكلها كان ريلي زعلان أووي وكانت الدموع نازلة من عينها وهى كانت بتكلمني


-
كل ده عشان تعرف أسامي أصحابك الأنتيم؟ إيه الهبل ده؟ أما ست غريبة بجد!!!!!....خلاص إبقي قوليلها يا حبيبتي أساميهم إذا كان ده بقى اللي ح يريحها...بس إسمعي يا زوزة... إوعي يا حبيبتي تجيبي سيرة عمو عزيز لأحسن ترسم عليه هى كمان وتلهفه .........الراجل ريلي مش ناقص معجبيين


-
تفتكري عمو عزيز ممكن يفكر أصلا في الأشكال دي؟


-
وليه لأ؟....إنت لسة صغنونة يا حبيبتي على الحاجات دي ومتعرفيش الستات بتوع الأيام دول بقو إزاي بيوقعو واحد محترم


-برافو عليكي يامامي، إنت بجد حد مفيش زييك... عارفة؟ أنا نفسي ريلي لما أكبر أكون زييك كدة بالظبط


-
ماتستعجليش يا زوزة...بكرة تبقى زيي كدة وأكتر ومش بعيد ياحبيبتي تكوني أحسن مني كمان


-
تفتكري يا مامي؟

74 comments:

Baskouta said...

انا ريلي ريلي
عندي فراغ فظيع في دماغي بعد البوست ده
وريلي ريلي مش لاقية اي كلام يوصف الست التري شيك دي مامة زوزة
وبجد كدة اوفر اوفر اوفر
بس خلاص

richardCatheart said...

ايه دا بوست جديد

يا تيكو يا حديد
اشطات هاروح العنبر اقعد على الكنبه اقرا البوست واجى اعلق
كانفسى فى احتلال بس ماشى
بسكوته مننا بردو ههههههههه

richardCatheart said...

لالالالالالالالالالالالالالالالالالالالالالالالالالالالالالالا

طبعا هاتبقى احسن منها بكتير

دى تفوقت عليها من دلوقتى امال كمان كام سنه هاتعمل ايه

بسم الله ماشاء الله وكل الاعمار ماعتقش البت
اهو فتره تدريب كده عقبال ماربنا يبعتلها ابن التتتتتتتتتتتتت اللى يسعدها

طب وعرفتو الواد ابن مين ولا هايعملو دى ان اف وكده ياعنى

والنبى ابقى ادينى تليفونهم اعرف السبوع امتى بردو معرفه الناس كنوز ودول ناس حقيقى كنزه اوى

حلوه ياريس الحوار عالى اوى
تسلم وعقبال ماتعملنا حاجه حكواتى كده من بتوع باكينام هانم

Haytham Alsayes said...

ههههههههههههههههههههههه
ايه دة دي بتتعامل زى الحكومة بتاعتنا
دى زوبعة في فنجان ياريس
كله تمام يازعيم
هههههههههه

لا بس البت دى مخلصة
هههههههه

جميلة ياتيكوووووو

طيوري said...

حمدالله ع السلامة عاش من شافك

Tears said...

لا واضح انها من دلوقتى طلعت احسن من أمها كتييير

nasamat said...

ههههههههههههه
الست دى ريلى ريلى بتستهبل ومكبرة دماغها
عشان مش فاضية عندها معاد عند الكوافير وبعد كده هتروح النادى مع
عمو عزيز

بس ريلى ريلى حلوة يا معنمى

Anonymous said...

لا طبعا هتعدي البنت دي .... دي مامتها ملاك بالنسبه ليها

ربنا يخليلها مامتها وبابتها والسيد الفاضل ناظر المدرسه :)

تحياتي

طيوري said...

ريلي ريلي دنيا حظوظ ناس ليها دايفينج في شارم وناس ليها ديافينج بلاليع
ما علينا
الست دي غبية غبية طالما مصاحبة بنتها اوي كده ازاي ما تعرفش ان في خبر سعيد مستنيهم
عمو عزيز... عمو عزيز
الراجل ده شكله مش مريحني هو مش مات من ايام الابيض واسود اه ما البنت دي شكلها هربانة من فيلم عائلة زيزي
تسلم ايدك بجد جميلة
وكالعادة
كلمة ونصيحة غير مباشرة وفايدة في المضمون
هي دي الاجازات ولا بلاش
اسكندرية دايما ملهمة الفنانين
دائما للامام يافنان

أمل حمدي said...

هههههههههههههههه
معقول في أمهات كده
يااااربي
مش معقول
دي زوزة دي هاتطلع ايه
هههههههههههه

إنما أنت ملكش حل
حوار عشرة على عشرة
تسلم ايدك بجد
وعلى فكرة انت فين من زمان وايه الغياب دا كله
يارب تكون بخير يا تركيب

أنا - الريس said...

كل اللي اقدر اقوله جو سوي تري كونتونت بالفرنسي

انا مش فاكر ترجمتها ..

ربنا يهدي اولادنا ويهدينا احنا وأبائنا

قادر يا كريم

فكرة من الزمن ده said...

فعلا ده الجيل الجديد اللي بيغلط ومس فاهم انه بيغلط حوار هايل بجد تسلم ايدك
تحياتي

beautiful mind said...

تمام ياباشا ادي البنات ولا بلاش
اخر حاجه يعني
تسلم ايدك
بجد طلعتني من حالة الملل بتاعة اليومين دول
تحياتي

Ramy said...

بجد

كتر خير زوزة

و مامتها

بيتعبه

صراحه

هههههههههههههههههههههه

من كل بستان زهرة said...

ههههههههههه
المستقبل كله لزوزه
مامتها دي دقه قديمه

وبعدين ليه الحقد والغيره دي كلها
لآزم تطلعوا اوشعات على البنت
ربنا يرجعلها سوسو بالسلامة
ويخدلها حقها منكم

تركيب
شبطه وحشني
هو مختفي ليه
خليه يرجع بسرعة

Anonymous said...

أزيك يا باشا ؟؟
تفتكرى يا مامى ؟
ههههههههههه
أكيد يا حبيبتى واحسن من مامتك كمان ...
بس ام الصراحة عشرة على عشرة
هههههههههههه
تسلم ايدك يا تراكيب

آخر أيام الخريف said...

هاهاهاهاهاهاها دول عايزين الدقن يقولهم الووووووو يا أمم :)))

نورت مدونتك بعد الغيبة :)

mrmr said...

حمد لله بس بس
بالسلامه يعنى
فينك مختفى ليه
معلش سؤال غبى منى
هو ايه معنى ريلى ريلى
اصلى جاهله بعيد عنك

بس تفتكر انها ح تطلع ذى مامتها
ولا احسن كمان
مامى دى فافى قوى

هو بجد فى ستات كده
مفتكرش ابدا

رحاب صالح said...

صباح الورد الاول
وحمد الله بالسلامة الاول
فينك يا عم من زمااان محدش بيشوفك
بس ريلي ريلي ريلي بوست يجنن
ومن الواقع المرير فعلا
Oh My Gog
مصيبة فعلا الناس اللي بالشكل ده
وفعلا فعلا هي طلعت اشطر كتير من مامتها بس ف خيبتها القوية

Tarkieb said...

أولا ريلي ريلي مبسوط انك علقتي ورغم انك اول واحدة اخدت الصدمة ههههه لكن الحمد لله ما أثرتش عليكي وتمالكتي نفسك في التعليق هههه...مبسوط انها عجبتك...طب انت ليه قافلة التعليقات؟

Tarkieb said...

richardCatheart

روح العنبر واقعد على الكنبه واقرعلق براحتك ههههههه

Tarkieb said...

richardCatheart

ههههههههه اكفي الفازة على فمها تتطلع زوزة لامها.....اصل دول مالهمشي في القدر.....اشك انهم يعملو سبوع ده بيعملوه بس الناس للبلدي ههههههه....

Tarkieb said...

Haytham Alsayes
والله البت غلبانة ياهيثم العيب من امها...تصدق بعد ده كله مش فاهمة.ههههههه...نورت ياملك التاريخ

Tarkieb said...

قرفة
الله يسلمك ويسلم كل اسكندرية

Tarkieb said...

Tears

ولسة ده اكيد التقيل ورا كمان...نورتيني

Tarkieb said...

nasamat

عمو عزيز شغال ع الونجيين هههههه واخد العيلة شروة ههههههه
نورتي يابنت حتتي

Tarkieb said...

فتاه من الصعيد

تصدقي دول لو كانو عندكم في الصعيد كانو طخو المدرسة كلها بالناظر ...نورتي يا دكترة

Tarkieb said...

قرفة

بتعملى ديفينج في بلاليع هههههه....شوفتي بقى ان هاني إبن تانط فيفي كان ممكن سلك ليكي البلاليع بدل قلته هههههه.....عمو عزيز صابغ شعره ومش باين عليه السن....فلوس وعز واكل وز....نورتي يا اسكندراني

Tarkieb said...

ماما أمولة

كنت بس في اجازة وجيت خلاص....دي شهادة اعتز بيها ان الحوار عجبك...الدنيا مليانة مصايب وفي برضه م الاشكال دي دلوقتي للاسف كتير...نورتيني

Tarkieb said...

MR.PRESIDENT

طب دي انا لسة فاكرها يعني مبسوط مش دي اللي قالها عبده لامينة؟ ههههه جيه ما بل عبده هههههه...نورت ياريس

Tarkieb said...

فكرة من الزمن ده

ده الجيل القديم كمان وحياتك هههههه ومش واخد باله كمان ...معذورين العيب اكيد م السميط

Tarkieb said...

beautiful mind
حمد الله ع السلامة كفارة ياريس ....الجيش ده اصعب فترة بعد كدة مقدور عليها....نورت

Tarkieb said...

Ramy

وحياتك زوزة مظلومة امها السبب ...من شب على شئ شاب عليه....نورت يا رامي

Tarkieb said...

من كل بستان زهرة

مع زوزة البلد بتتقدم بينا.....طب سمعتي القاهرة ٣٠؟ انا بعمل لسه في واحدة لشبطة ووهانت اهو و تسمعي حاجة جديدة وربنا يستر وتتطلع حلوة ......نورتي

Tarkieb said...

الحب الجميل
الحمد لله ....ويارب ما تكوني لسة زعلانة مني وعموما الاختلاف في الراي لا يفسد للود قضية...وبعدين احنا كلنا اخوات وبنتكلم بعشم مش اكتر...وان شاء الله اتابع عندك ويجعله عامر...

Tarkieb said...

آخر أيام الخريف
هههههه احلى م الشرف مفيش ....ربنا يخليكي المدونة منورة بيكي....مش شباك بقى؟ ههههههه

Tarkieb said...

mrmr
الله يسلمك ياستي ...كنت في اجازة ورجعت....وريلي ريلي واحشني نكتك....يعني حقيقي حقيقي واحشني نكتك.....اكيد في ستات كدة الدنيا فيها كل حاجة...تلاقي بس عندكم بيطخوهم اول باول ههههههه......

Tarkieb said...

re7ab.sale7
الله يسلمك....ورجعت خلاص اهو وبكرة تذهقو من موضعاتي هههههه...ميرسي اووووي على كلامك ودي شهادة اعتز بها...نورتيني

Ms Venus said...

دى ست ريلى خالص وبنت ريلى وبنت ريلى خالص

ههههههههههههههههههه

:D

جميلة يا تيكوو بجد

وحمدلله على سلامتك وحشتنا

ريلى وحشتنا هههههههه

جايدا العزيزي said...

هههههههههههه

بجد عجبنى اووووووووووى البوست

ريلى واوفر

لا بس رغم كده لمحت اللهجه المصريه

لو قلت متمكن من الحروف يبقى مش بوفيك حقك

ايه رائيك ارسم انا على اونكل عزيز ده

هههههههههههههههه

ولا البنت ماشالله عليها

قال وبيقولوا اكفى القدرة على فومها تطلع البت لامها

قولهم غلط

هههههههههههه

اتمنى يدوم تواصلنا

وتقرا بعض خواطرى

اشكرك

تحياتى

ستيتة said...

كل اللي اتعجبت له في البوست
مامي اللي ريلي كول وخبرة
معقول مفهمتش الحكيمة المقفلة دي قصدها إيه
ماهي مفروض مامي ريلي كانت في نفس البلاي جروند في السكول برضه ولا مامي ريلي بقت كده على كبر؟ :)

Tarkieb said...

Ms Venus sai

انت كمان والله وحشنا بوستاتك ...وبجد انت ريلي جدعة اووووي....فين الوردة؟ ههههههه

Tarkieb said...

جايدا العزيزي

نورتيني بجد وان شاء الله يدوم التواصل وميرسي على الكلام الحلو

Tarkieb said...

ستيتة حسب الله الحمش

النوع بتاع مامة زوزة مش في دماغه الحاجات دي .وماتفرقش معاه.....يعني ريلي نورمال.......عشان كدة سايبة سوسو وعم عزيز داخل طالع عادي.....لو لاحظتي حضرتك أنها ركزت على مروحها المدرسة وما همها مرضها او دوختها....اي واحد معدي من جنب البلوج بتاعي بعرف ان زوزة اكيد حامل ..يعني حمل زوزوة مش عايز خبرة ولا حاجة.....فاكيد هي برضه عارفة بس لها اولويات تانية...شرفتيني حضرتك...واتمنى ان اكون جاوبت على سؤالك

richardCatheart said...

هههههههههههههههههه

لالالالا دانت مش خبره بقى تعالى اعلمك حاجه للزمن يارابو التركيب يا اخويا

كل الفئات عمال ومستقل بيعملو سبوع للنونو الفرق فى الحشو

الناس اللى زى حالاتنا بيعملو كسكسى وموغات
والهاي كلاس بيقدمو درنك وكيك وجتوهات
شوفت بقى فرق الخبنه يا معنمى
ههههههههههههههههه
ثم انت بتقطع عليهم ليه
لازم انقط زوزه الغاليه تستاهل

Kem said...

اوة لا لا لا
انا عايز مامى من الفرافير دول

Ms Venus said...

وردة واحدة ؟

جنينة ورد بلدى بحالها ليك ههههههههههه


متغيبش كتير

داليـ ـ ـ ـ ـ ـ ــــا said...

هو انا فاهمه ولا مش فاهمه
اكيد فاهمه
انا حاسه انى فاهمه

زمن العجايب فعلا
هى وامها فى الطراوه خالص
ربنا يرحمنا

richardCatheart said...

اللللللللللللللللللله

على النيو لوكات والحاجات والمحتاجات

النور جه ايوا كده نورلى نور

مبروك تعيش وتغير وتعمل عمره يا ابو التيييييييييييييييييك

ربنا يجعله نيو لوك الخير

richardCatheart said...

تيكو
تيكو خلى ى الصوره الاخيره بتاعت الناس المرسومه
دى جنااااااااااان
ههههههههههههههههههههه

richardCatheart said...

ههههههههههههههههههههههههههه

طيب ياسيدى

صبحك سكر

أسكندرية وبس said...

حمد الله على السلامة يا جميل اية الحاجات الجديدة الحلوة اوى دي البوست رائع جدا جدا جدا بصراحة انا معجبة جدا بالأمهات الأفاضل بتوع الزمن الرائع دة انا فعلا بشوف الجاحات دى كل يوم يلا اللة يرحمك يا محسن سرحان 00000000

زهرة said...

ريلى ريلى الموضوع جامد آخر حاجة .. حقيقى أم مثاليه وبعدين يا اخواتى هى البنت هتقطع نفسها ولا تقطع نفسها ولا يمكن تقطع نفسها

بجد تسلم إيدك تركيب :)

شريف القاضى said...

اولا ...مبروك على التجديدات والشكل الجديد للمدونة ..برضوا التغيير مطلوب .....
ثانيا ..بوست دمه خفيف ...ويستاهل الف تحية ....

شهووووده said...

لا ما هو لازم تطلع احسن منها ؟؟ يختي عليها وعلى مامي..
بوست تحفه بجد

طوبه فضه وطوبه دهب said...

اكيد هتبقى احسن مش بيقولوا اقلب القدره على فمها تطلع البنت اعظم من امها

Dr/ walaa salah said...

بوست ظريف اوي اللهم احفظنا

تفتكر ده ممكن يكون حال بعض الامهات في يوم من الايام

ولا نفتكر ايه جايز يكون خلاص بقى فعلا في ناس كده


اللهم عافنا


مدونتك جميله وطريقة كتابتك ظريفه اوي


تقبل مروري المتواضع على مدونتك

RASHA said...

جامدة

Mona said...

معنديش تعليق غير يالهوى
بالصوت الحيانى
تتصور حاجة تحزن لانها حقيقية رغم أنها تبدو مضحكة
تحياتى

كلمات من نور said...

شر البلية ما يضحك ...ممكن أحمد ربنا إني مخلفتش بنات بعد البوست داه .وربي يرزق أبنائي بقى ببنات صالحات بعيد عن زوزو و أم زوزو ..........دول عايزين شعار للشباب خلي بالك من زوزو ( احتراس مش يحطها في عينه)هههههههه

Yasmine said...

عجبنى اوى التعليق بتاع خلى بالك من زوزو دا..بس على فكرة التفاهة دى مش مرتبطة بمستوى اجتماعى معين..دا اسلوب تربية يا يطلع بنى ادمين يا يطلع امثال زوزو و امها

ساسو said...

عسول يا تيكو
مش عارفه بجد انا عايزه اتعاقب
ايه الغياب دا كله
بس سامحني بجد غصب عني
فرح اختي نساني اسمي
هو انا اسمي ايه صحيح

كل حكاويك لذيذه جدا
وبجد ببقي مستمتعه اوي
وببقي عايزه اسكن في مدونتك الرقيقه دي

تسلم ايديك يا تيكو

Anonymous said...

شكرا على البوست

Beram ElMasry said...

صديقي العزيز تراكيب
الله عليك انت يامبدع ومتميز باستمرار
اتمني لك الخير دائما
تحية وسلام ولاسلام مع بني اسرائيل

صدى الصمت - عاشقة الورد - said...

هههههههه
الله عليك
ونعم الأمهات الفاضلة
بس لو كنت سجلتها فى راديو تراكيب كانت هتبقى جامدة جداً
تحياتى لإبداعاتك

فشكووول said...

هو ايه الموضوع
اصلهم ناس فاضيين
وبعدين وراهم ايه غير الرغى
انت بس تفتح لهم التسجيل وهما يقولوا اللى عايزينه
تحياتى

Anonymous said...

مش زعلانة :)
أكيد
تحياتى

سكندري said...

أيه ده انا ماكمنتش ضايف المدونة عندي في المدونات اللي أنا بتابعها و عمال أقول
هو تيكو مش بيكتب حاجة جديدة ليه ؟؟؟

علي العموم الف مبروك يا كبير علي التجديدات في المدونة و بجد بجد بوست جميل جداً

بس هو ده بقي حوار الأجيال اللي بيقولوا عليه ... لازم الناس الكبيرة تقعد من أولادها علشان ينقلوا الخبرة دي لولادهم

دي حاجة تشل ... بس ما تقلقش أكيد أي واحد من ولاد أي طنط هيتجوزها و خلاص

ostora said...

"إذا كان رب البيت بالدف ضارب فشيمت أهل البيت الرقص"
لو ده حال الام بالتأكيد مش نلوم ان ده حال البنت للاسف مفيش مسئولية والمجتمع المحيط كله بالنسبه للبنت فاسد يعني لو غلطت مفيش لوم عليها وهي مش هتستنا بكرة علشان تكون زيها لان من الواضح ان الاساس متين وهتكمل المسيرة
حقيقي الله يعين لو في فحياتنا وواقعنا نماذج كده
Tarkieb
شكرا ليك اسلوبك جميل وسلس ومشوق
كل احترامي ليك

Ramy said...

كل سنة و حضرتك طيب

و يعيد عالينا الأيام بخير

سَارةٌ said...

همـآ دول أمهات الألفيه الجديده ولا بلآش :D

أمهات مودرن مش أي كلآم ..

أتـآري مقاعد المرأه عماله تكتر عمال على بطال !! :)

كل سنه وانت طيـب .. :)

noora said...

دي ست عايزالها فرمته
وإعادة تهييء
لا والبنت غامه عليها نفسها يادي العيشه السوداء

Unknown said...

ايه دا؟؟
أنا أزاى مشفتش
التدوينة دى؟
أقولك أيه ربنا
يستر عليها وعلى
اللى زيها ربنا يحفظنا

بس خلاص ... said...

الام مدرسة ادا اعددتها اعددت شعبا طيب الاعراق
ودى مش مدرسة ياصاحبى دى وزارة وهيئة وسلك دبلوماسى كمان ... اه نسيت اقولك تيته كانت بتقول ايه (اكفى القدرة على فمها تطلع زوزة لامها ) مش زوزة برضة
مش هقدر اقولك وووووووووووووووووووولايهمك