Tuesday, January 10, 2012

عيد الجواز الذهبي

-كل سنة وانت طيبة يا حبيبتي

- وانت طيب يا برعي

-ياه خمسين سنة جواز يا حياتي ..ده أكتر من مؤبد يا نبوية

- ربنا يطول سجنك كمان وكمان يا رب

-عارفة يا نبوية ده أنا عيشت معاكي تقريبا أكتر ما عيشت مع أبويا وأمي

-الله يرحم الجميع....عارف في حاجة بجد خلتني أعيش معاك طول الفترة دي ؟

- أكيد العيال أو ولادهم طبعا

-آه طبعا بس في حاجة أهم من كدة برضه يا برعي

-حاجة أهم؟ إنت لسة برضة ح تلاعبيني في السن ده يا ولية ؟

-ماله السن ده يا راجل؟ إنت ناسي إنك أكبر مني بسبع سنين يا عجوز

-عجوز؟ أنا عجوز يا نغة ...ماشي ... بس ماتنسيش إنك في سبتمبر الجاي ح تكملى خلاص التمانين

-تمانين في عينك راجل ... ده أنا لسة ماشية في التلاتة والسبعين

-ماشي يا شابة إيه هي بقى الحاجة ؟

-حاجة إيه؟

-الحاجة ياولية اللي خليتك تفضلي معايا المدة دي كلها

-الاولاد طبعا يا برعي

-الأولاد؟ إنت مش لسة قايلة لي ..لأ... في حاجة تانية غير العيال

-آه صحيح....آه...عارف؟ لولا ان أهلى وأصحابي كلهم ماتو وشبعو موت كنت زماني بقى شفت حالي وسيبتك يا كركوبة من زمان

-كدة برضة يا نبوية؟ بعد العشرة دي كلها عايزة تسيبيني؟

-ههههههههه أنا بقولك لولا يا برعي...ماتخافش دي تأبيدة يا إبن ستيتة وقاعدة يا أخويا كدة على قلبك لحد آخر العمر

-ربنا يديكي طولة العمر يا نبوتي

-ويديك ويخليكي ليا يا بروعتي

-هي أينعم كانت أيامنا مش كلها عسل كدة على طول ..بس هي دي الدنيا

-لا صدقني يا برعي لما بافكر في عيشتنا سوا بأحمد ربنا أوي وأقول ربنا يديمها عيشة يا رب

-نبوية...نبوية

-في إيه ياراجل؟ طلع عليك عفريت إسمه نبوية؟ ما تتكلم في إيه؟

-بقول يعني...يعني بعد الفترة الطويلة دي لازم نبقى صرحا مع بعض...صح؟ مش كدة؟ ............إيه رأيك؟

-طبعا يا برعي ..هو إحنا لينا غير بعض دلوقتي

-طيب في حاجة عايزة أسألها بس هى محرجة شوية

-حاجة إيه؟ وغوشتني يا راجل قول

-يعني ...يعني ....كنت يعني مخلصة ليا كل الفترة دي كلها؟ قصدي يعني ...دول خمسين سنة.. ...يعني نص قرن بحاله....إوعي تكوني لعبتي بديلك كدة ولا كدة يا نبوية

-لعبت بديلي؟ إخص عليك راجل؟ أنا برضة؟ طب إنت؟ قول ..قول وماتخافشي وسرك في بير يا برعي

-خلاص بقى راحت أيام الشقاوة يا نبوية........منها لله بقى البروستاتا والليمباجو

- البروستاتا والليمباجو؟ يعني ماكنتش مخلص طول الوقت ده يا بتاع البروستاتا؟ قول ...طب قول بقى وماتخافشي يا خلبوص

- بصراحة كل مرة كنت بتكوني فيها حامل كنت بألعب بديلي براني

-كل مرة؟ يخرب بيت أمك ستوتة يا منيل...كل مرة يا مفتري...يعني خنتني؟ يعني خنتني كدة يجي إتناشر مرة...دستة بحالها يعني؟...دستة خيانة زوجية يا أبو العيال؟...إخس عليك راجل دني ماكنتش قادر يعني تستنى لما أولد وأشد نفسي يا ديك البرابر

-ديك برابر؟ ماشي يا نبوية...طيب وإنت؟ برضة مش ناوية تعترفي؟ ولا نظام داري على سمعتك تقيد؟ ياولية قولي بقى ....أهو برضة تكفري شوية عن ذنبك...ما إحنا خلاص بقى يالا حسن الختام

-ذنبي؟ وحسن الختام؟ ماشي يا برعي ماشي يا سبعي.. على العموم أنا كنت مخبية عليك حاجة كدة صغيرة بس أدام إنت بقى راجل طفس وبتلعب بديلك خلاص أنا ح أقولك وأمري لله

-شاطرة يا نبويتي...قولي يالا بقى وماتخافيش ...وخلاص يا ستي اللي فات مات

-شوف يا برعي

-أيوة قولي يالا

-هما تلاتة بس

-تلاتة؟ تلاتة إيه؟

-تلات مرات بس وكانو طبعا غصب عني

-تلات مرات؟ تلات مرات وانا نايم هنا زي الكبنش

-مش إنت اللي سألت؟ خلاص ....بلاش بقى ...نسك ع الموضوع دوة عشان مانتخانقش بقى ع المسا

-لا طبعا ما ينفعشي ...قولي ده أنا لازم أعرف دلوقتي...وبالتفصيل الممل كمان

-صدقني غصب عني وربنا

-إزاي؟

- أول مرة كانت مع الجراح اللي عملك عملية القلب؟

-الجراح؟

-آه وكنا لسة متجوزين جداد ومكانشي معانا حق العملية وإضطريت ساعتها إن أجاري الدكتور أبو عين زايغة ده....وكل ده كان عشان أنقذك ساعتها م الموت وربنا...هو ده يعني جزاتي يا برعي؟ يعني كنت أسيبك ساعتها تموت؟ وبعدين قلتلك غصب عني والمضطر بيركب الصعاب

-يركب؟ ماشي يا نبوية في دي ممكن أسامحك وممكن نعتبره جميل

-بجد يا برعي؟ يعني سامحتني خلاص؟ كدة ممكن بقى أتشجع وأقولك ع المرة التانية...وأكيد برضه ح تسامحني

-أيوة يا نبوية قولي وربنا يسهل

-آه والله...وغصب عني برضة....فاكر من أربعين سنة كدة لما كانو عندكم في الشركة تقريبا ح يرفدو كل الموظفين بحجة التوفير والأحلال والتجديد؟

-آه فاكر

-فاكر؟ لما كنت إنت ساعتها زعلان أوووي؟

-آه فاكر

-فاكر بعدها برضه لما ما إترفدتش؟

-آه

وبعدها إترقيت ومسكت ساعتها المصنع

- آه فاكر طبعا

-هي دي بقى كانت المرة التانية يا برعي

-المرة التانية؟ مش فاهم

-مش فاهم؟ بقولك كنت ح تترفد خلاص ولولا إني عملت كدة وطاوعت رئيس مجلس الإدارة بتاعكم كنت زمانك طول الفترة دي عاطل وكنا متنا ساعتها م الجوع

-مدير الإدارة؟ مدير الإدارة ؟ مالقيتيش الا أبو باروكة

-أبو باروكة؟ ياراجل هو يعني كان بمزاجي؟ بقولك كنت ح تترفد وتدور صايع

-ح أترفد؟ ولو برضه....ده بباروكة يا معفنة وصابغ حواجبه

-يا راجل قلتلك غصب عني وكله ده برضه كان عشانك

-عشاني؟ ماشي يا فدائية ....ماشي يا ضحيت هنايا فداك ...طب والمرة التالتة كانت مع مين؟ قولي بقى ماهو أكيد التالتة تابتة

-خلاص ح أقولك.... بس إهدى بس شوية ...عشان أعرف بس أوصلهاك المرة دي ...أصل دي حاجة معقدة شوية يا برعي

-معقدة؟ معقدة إزاي يعني؟ خلاص مش لازم يعني تحكي بالتفصيل قوليلي بس مين وانا ح أفهم على طول

-يعني ح تفهم لو قلتلك

-طبعا بس قولي يلا

-حاضر

-يلا قولي

-مجلس إدراة نادي البلياردو

-ماله؟

-والإنتخابات بتاعتها

-مالها

-فاكرها؟

-آه طبعا فاكرها.... بس إيه علاقة ده بموضوعنا؟

-ما هو ده الموضوع يا برعي

-موضوع؟ إزاي؟ مش فاهم ..فهميني أكتر لو سمحتي

-شوف يا سيدي ...كنت إنت ساعتها ح تموت وترشح نفسك رئيس لمجلس ادارة النادي وكان ناقصلك بس ألفين صوت فاتصرفت يوميها ..

38 comments:

P A S H A said...

هههههههههههههههههههههههههههههههه
ألفين صوت !!
ده على كده يحمد ربنا إنه ما رشحش نفسه في انتخابات مجلس الشعب هههههههههههههههه

بجد أنت معلــم وربنا ، موتتني من الضحك ، ربنا يفرح قلبك يا رب

:)

طيوري said...

ههههههههههههههههههههههه
يالهوي 2002 مرة بس
ده تقويم مش اعتراف
دي 2002 دي كانت سنة كبيسة يعلم بيها ربنا
بس بردو الراجل طلع مظلوم فاكر نفسه مخبي الهوايل طلع ياعيني يلا بقى ربنا يصبره على مابلاه
بس الصورة دي تححححححححححفة هابقى اجي اتفرج عليها كل يوم بعد اذن حضرتك يافندم
تسلم تفانينك

عاشقه الرومانسيه said...

هههههههههههههههههههههههههههههه

عباس ابن فرناس said...

ههههه
لا دى فدائية فدئية
دول اتنين خرفو بقا وهيسيحو لبعض

هبة فاروق said...

هههههههههههههههههه
لا فدائيه ومضحيه بصحيح
حلوه اوى فكرتها ده عيد جواز انتهى اكيد بهبوط حاد مع توقف فى ضربات القلب
الرجل راح فطيس يا عينى

faroukfahmy said...

ضحكتنى قوى ياتركيب ماحدش بيضحكنى الا انت وابنتى هبه واخدين نفس الخط ما شاء الله
حكاية واسلوب وحوار مالوش حل
وعجبنى اكتر تعليق الباشا يا باشا لما يحمد ربنا ان لم يرشح نفسه لمجلس الشعب
لماذا يا باشا لا تكتب ايضا فى نفس الخط انا حساس ان خطك هيكون جميل قوى
ما احوجنا هذه الايام يا تركيب لهذا الخط من الكتابه
انا انتظر بفارغ الصبر ما تكتب باين عليك برم قوى وابن بلد من الناس اللى ارتاح لكلامهم وخواطرهم ما تنساش ان جذورى من باب الشعرية جتبك على طول يابن الخليفة
هنيئا لك وهنيئا لنا بك وبنجلتى هبه

ياسمين said...

الله يسامحك ياتراكيب ..مختفي بإبداعاتك دي ليه ههه بصراحة الست تشكر 3 مرات بس هههه

Unknown said...

ياخبر أسوس!!
ياخبر أسوس ومنيل
2000صوت بس!!!!!!!!!
بتحبه اوى الست دى
ومثال لزوجة لا
يحتذى بها

~ISLAM~ said...

هههههههههههههههههههه
2000 بس
وف يوميها

ههههههههههههههههههههه

لا كتر خيرها الست دى

;كارولين فاروق said...

ههههههههههههههه
لأ جامده
الفين صوت يا نبويه اومال لو ماكونتيش نبويه كنتي عملتي ايه
ههههههههههه
استمتعت بقرأتي لأسلوبك
وان شاء الله مش حاتكون الاخيره
تحياتي

شهووووده said...

هههههههههههه.. اسلوب جميل وممتع ..

zizi said...

تركيب ابو التراكيب ..بنت المفترية ..بس بجد خيالك واسع يعني 2000 كنا حانجيبهم منين لكن انت ماشاء الله اتصرفت وفعلاً باشا برضه عنده نفس الخيال ..ايوه ياتركيب عايزين نطلع شوية من الكآبة اللي احنا فيها..وفي انتظار الجديد تسلم افكارك ..

rona ali said...

هههههههههههههههههههههههههههههههههههه
تلاته بس و 2000

المرة اللى جايه ان شاء الله يجيلها اعداد غفيره ^_^

حلوة بيجد :)

بسمة الورد عطر المشاعر said...

هههههههههههههههههههههه

الله يصلح حالك وحالنا ويسعد قلبك ياتراكيب يارب

والله ما قادرة امسك نفسى من الضحك بس حلوة عايشين 80 سنه مع بعض يااااااااااقلبهم


بس حلوة منك

Tarkieb said...

P A S H A

ههههههههههههههههههههههههههههههه

دي كانت تبقى دايرة على حل شعرها مش دايرة انتخابية ....منورني وتعليقك رهيب هههههه

Tarkieb said...

قرفة
الراجل كان برم وبعد الفترة دي كان ذنبة زي فوايد البنك لمركبة هههههه الاتناشر يقابلهم ا لفين واتنين.....تعرفي نفس حكاية دقة بدقة ولو ذدت لذاد السقى.....نورتني

Tarkieb said...

عاشقه الرومانسيه
مرحبا يارب ماتكون اخر زيارة

Tarkieb said...

عباس ابن فرناس

وبعدها الازهيمر يشتغل وينسو هههههه.....منورني دايما

Tarkieb said...

هبة فاروق

ههههههه ودي كانت نهاية الليلة الرومانسية.......منوراني يا فنانة

Tarkieb said...

faroukfahmy58
ده شرف كبير لي اني كلامي بيعجب حضرتك وصدقني بابقي سعيد جدا بزيارتك......اه انا اصلا م السيدة وزين العابدين.......يعني جيران

Tarkieb said...

ياسمين

هههههه ماشي....بس هي تعبت الفين عليهم......نورتيني

Tarkieb said...

norahaty

هههههههه اه اوووووي .....ومضحية....نورتيني يا نور

beautiful mind said...

ههههههههههه
فكرتني بنكته زيها كدا بالظبط
بتاعة لعيب الكورة اللي مراته خانته مع الجمهور
بس القصة ملعوبة يا معلم
تسلم

Tarkieb said...

iـــــــــــsــــــــــlــــــــــــaـــــــــm

منورني يابرنس البرنسات....هههههههههه كويس اني ضحكتك في وقت الامتحانات

Tarkieb said...

;كارولين فاروق

هههههههههه بس هي غصب عنها اسمها نبوية ...الظاهر حظها وحش الست دي....يارب ماتكون اخر زيارة وياهلا بريحة استاذنا فاروق

Tarkieb said...

شهووووده

فينك من زمان واخبار خالتي فكيه ايه حمد الله ع السلامة

Tarkieb said...

zizi

هههههههههه انا مبسوط انها عجبتك...عشان الشخص الكوميدي صعب اضحاكه وانت ملكة الكوميديا...دايما منوراني

Tarkieb said...

rona ali

تعليقاتك دايما احلى من اي حاجة ويارب دايما منوراني

Tarkieb said...

بسمة الورد
ربنا يسعدك كمان وكمان ياشاعرة السعادة

Tarkieb said...

beautiful mind

ههههههههههه ده نجم الجماهير ..منورني يا معلم

reemaas said...

القفلة كده مش صح يا تراكيبو
هو بقى عمل بعد ال2000 اييييييه
سامحها؟
هههههههههههههههه

كريمة سندي said...

حوار شيق ولذيذ مرررررررة ربنا يسعدهم سعدت بقرائته كثيرا وبالنهاية الغير متوقعة تحياتي لإبداعك

زهرة said...

مش جميله بعقل ..

دى جميله جدا جدا جدا

بجد تسلم افكارك يا تيكو

بحييك :)

واه نسيت اقولك

اضحك الله سنك

Ms Venus said...

هههههههههههههههه يا نهار الوان


جميلة يا تيكووو دايما كده كتاباتك زى العسل


وحشتنى قصصك اوى

وميرسى جدا على سؤالك عنى

صمت الورود Esraa said...

ههههه

جميلة اختى

ادام الفرح لقلبك وللجميع

Beram ElMasry said...

صديقي الحبيب Tarkieb
يسعدني أن تكون كلماتي سببا لأدخال السرور الي نفسك تحياتي والسلام ولا سلام مع بني اسرائيل

richardCatheart said...

ههههههههههههههههههههههههههههههههههههههههههههههههههههههههههههههه فدائية فدائية وراء كل كنبش فدائية هع هع هع هعععععععععععع

Carmen said...

=)) لا بجد جامدة جدا