Sunday, February 5, 2012

أول مرة

يااااه أول مرة أشوف بجد لمسة إيديكي وما أحسش بيها....أول مرة أدوق طعم دموعك من غير ما أشوفها.....صدقيني أنا شايفك برغم كل اللي حواليا ده ومانعني عنك...شايف الحزن في عينيكي و شايف حضنك بس يا خسارة مش حاسه ومش قادر حتى أضمك ليا زي زمان.............زمااااااااااااااااان ..........ياه الكلمة دي ح توحشني أووي ...هو إيه اللي إتغير؟ مش عارف...إحساس غريب والله بأحسه لأول مرة ..بس عارفة؟ زمان كنت بأنسى الدنيا خالص لما كنت بتحضنيني كدة...طب إنت ليه ماسكة فيا دلوقتي كدة؟ هو أنا يعني ح أطير؟ شويتين بالكتير وح تلاقيني يا ستي مستنيكي في أودتي أول ماتروحي.....جايز مش ح تقدري تشوفيني بس أكيد ح تحسي بوجودي فيها...طب دول حتى والله كل ما بيبعدوني دلوقتي عنك وبيقفلو المكان دة بأحس بيكي أكتر وأكتر..المهم دلوقتي إنك تكوني خلاص سامحتيني إن رحت غصب عنك ومن وراكي ولو بتحبيني يبقى ياريت برضة تسيبي إخواتي يكملو اللي بدأناه سوا.. وأوعديني كمان إنك برضة ح تستنيني كل يوم ولا خلاص بقى ياست الكل البعيد عن العين بعيد عن القلب؟ وأنا ح أوعدك ياستي ماعدتش أتأخر زي زمان ولعلمك أنا ح بقى أرجع وابص عليكي كل شوية ومعدتش ح أخرج خالص بقى زي زمان وأسيبك تقلقي.. بس إنت بقى تنسى طلبات البيت والمشاوير ياجميل ..مش كدة؟ غريبة...إنت ما بتضحكيش ليه؟ طب خلاص يلا بقى إمسحي دموعك الغالية دي ...وبعدين إنت زعلانة ليه دلوقتي يا ستي؟ هو أنا يعني لوحدي ولا أول واحد يروح؟ أنا معايا أصحاب كتير...وبعدين إنت مش بابا كان برضة واحشك أووي؟ انا خلاص ح أوصله سلامك وسلام شريف ولوزة..يالا بقى سلام ياحبي وربنا يقويكي ويقوي شريف على الايام الجاية

17 comments:

قرفة said...

ياااااااااه مؤلمة اوي
بمرارة الواقع اللي عايشينه
ربنا ينتقم منهم شبكة القذارة والفساد اللي لافة حوالين البلد ويورينا فيهم يوم اسود طويل طب يسقط يسقط حكم العسكر

richardCatheart said...

آآآآآآآآآآآآآآآآآآآآه ياااااااااااااااانى آآآآآآآآآآآآآآآة

لية بس كدا

ربنا يصبرها يارب ويبرد قلبها هى وكل اللى زيها ياااااااااااااااااااارب

حسبى الله ونعم الوكيل قدرنا يارب نردلهم جزء يااااااااااااااارب يارب يااااااااااااارب

;كارولين فاروق said...

حسبنا الله ونعم الوكيل
مؤلمه جدا الاحداث وربنا يستر علي مصر
ربنا يجعلها محروسه دائما

Noha Saleh said...

ربنا يرحم الشهداء ويصبر امهاتهم
ويجازى اللى كان سبب فى حرمان اى ام من ابنها

التدوينة دى مؤلمة جدا

ماما أمولة said...

ألم

no0o0r in my♥ said...

حسبنا الله ونعم الوكيل ...
كلماتك رائعه .. مؤثره
موجعه للقلب :(
تسلم ايديكي
اجدتي الوصف

rona ali said...

:):)

هى فيها سنه الم علي سنه وجع علي حبه ابتسامه ببلاهه في النص
بس حلوة جدآآآ

تسلم ايدك

وربنا يرحم جميع امواتنا ويصبر اهاليهم وامهاتهم بالذات

ويرحمنا احنا كمان من الوجع والالم النفسي دة

من كل بستان زهرة said...

والدايرة لسه بتدور وهنفضل نموت
طالما كلاب المخلوع لسه عايشين

وجع القلب ده ملوش نهايه

ربنا معانا في الايام الي جايه
ويصبر قلوبنا على كل حبيب فقدناه

هبة فاروق said...

حرام عليك بجد قطعت قلبى التدوينه دى
مؤلمه وصعبه جدا
ربنا يرحم شهدائنا ويصبر اهلهم

بسمة الورد said...

ياااااااااااه عليك ياتركيب

كلماتك لامست القلوب والمشاعر

نساله سبحانه ان ينعم على كل ام مكلومه بالصبر والسلوان وان يمن علينا الشعب المظلوم بالامن وعوده حريته الحقيقية

وحسبنا الله فى كل ظالم وغادر


كل التحايا لقلمك واحساسك المرهف

Ms Venus said...

مش لاقية كلام


تعبنا يارب

Migo Mishmish said...

ينفع تعيطنا عالصبح كدة ... مش كفايه اللي احنا فيه
يسقط يسقط حكم العسكر
MishMish

beautiful mind said...

بجد والله تسلم ايدك وقلمك
وربنا يسامحك ع الدموع اللي نزلت تاني دي
بعدما جفت شوية
ربنا يرحم الجميع
ويصبر امهاتنا
وانا لله وانا اليه راجعون

zizi said...

مشاعرواحاسيس صادقة ياتركيب .. سلم ايدك .. وربنا يرحمهم كلهم برحمته يارب وشكراً على تعليقك عندي

well said...

اول مرة "" ادخل بوست وابقى مش عارف اعلق اقول اى
ربنا يصبر كل ام
تحياتى

мαησηα said...

انا على فكرة بقالى كام مرة اجى هنا من يوم ماكتبت البوست ده
وما اعرفش اقولايه بجى اقأه واعيطوامشى
بس لزمن اقول لكمنى عظيم التحية على قلمك المبدع اللى كتب ووصف بالشكل ده
شكرا لك


اول مرة اعمل كومينت :)

Anonymous said...

اللة يرحم الجميع لقد افتكرت كل الاموات حسبى اللة ونعم الوكيل
دعدع