-اهلا بيك يا عمو إيه الأخبار
النهاردة؟
-لا أهلا ولا سهلا يا دكتور
-ليه بس كدة إيه اللي حصل؟
-مش عارف إنت عملت معايا إيه يا تامر يا إبني؟
-عملت إيه بس فهمني لو سمحت؟
-إفتكر كدة
-أفتكر؟ آخر مرة كنت عندي في العيادة
كانت تقريبا من إسبوع....إيه بقى اللي جد؟
-طبعا إنت فاكر أنا كنت عندك ليه؟
-آه فاكر طبعا.....موضوع الإنتفاخ والغازات اللي كانت مضايقة حضرتك
- آه
-بس ده عادي وحاجة بتحصل لكل الناس وعلاجها سهل
-عادي؟ لا مش عادي أنا كانت حالتي بسيطة ومش زي كل الناس يا إبني
-بسيطة ومش زي كل الناس؟ إزاي يعني؟
-أينعم كانت حالتي فيها غازات كتيرة ومستمرة على طول بس يا إبني كانت من
غير صوت وريحة
- من غير صوت وريحة؟
- آه وأنا تقريبا كنت الوحيد اللي بأحس بيها
-طيب ما أنا كتبت ليك ساعتها دوا ويارب يكون عمل نتيجة كويسة معاك
-آه طبعا عمل نتيجة بس للأسف عكسية خالص يا إبني
- عكسية؟
-آه..... كدة برضة تعمل فيا العاملة دي إبني؟
-يا حاج شابوكشي فهمني من فضلك..إزاي يعني نتيجة عكسية؟
-كان الأول زي ما إنت عارف من غير صوت وريحة ودلوقتي بقي يا إبني بريحة وحشة
أوووي ومن ساعتها مش طايق نفسي خالص
-عال عال
-عال؟ بقولك مش طايق نفسي وإنت تقولي عال؟ إتخنقت خلاص ...بس الحمد لله لسة
برضه من غير صوت
-طب كويس يبقى نقط المناخير عملت نتيجة معاك ورجعتلك خلاص حاسة الشم من تاني
يا سيدي......والنهاردة بقى نشوف كمان مالها حكاية السمع وياك واكيد طبعا حنلاقى حل
ولو حكم بقى نبقى نعملك سماعة ولا تزعل نفسك تاني يا حاج شابوكشي وبكدة تبقى بقيت طبيعي
وزي كل الناس
27 comments:
هههههههههههههههه
انت اكيد نسيت ((نقطة))هههههههههههه
فكرتني ببرنامج ميس حمدان
ينطبق عليه البوست ده شكلا وموضوعا
حلوة جدا الفكرة بس اكيد ليها اسقاطات حالية على الوضع اللي احنا فيه ولو ماتقصدش انا بقى اقصد
ناس جديد مابتشمش نفسها وتفضل تقول اف خربتو البلد جاتكو القرف
ههههههههههههههههه
تسلم ايدك
بس انت قلت على قصة هابقى اقولك عليها بعدين وماقولتش بعدين اللي هو امتى
اه زي ماقال/ت طيوري , كلها اسقاطات, يعني دكاكيني كده
هههههههههههه
الصراحة متوقعتش النهاية دي
وتوقعت يكون الاسكربت اكبر من كدة
بس بجد جميلة
واسقاط للواقع جميل برضه
استني
عايزة اعمل زي البنات " هو مش انا بنوتة يعني الا اية "
يع
يع
يع
ثلاثة يع
ههههههه
طيوري
تصدقي قاصدها هههههههه وانا صحيح كنت مسمي برنامج ميس حمضان كدة دمها يلطش وكانت الفضائية المصرية مجبراني اشوفها غصب عني....هي صحيح لها اسقاطات على ان الواحد من كتر الفساد ماكانش شامه ولما الثورة فوقتنا قلنا الله يخريببيتك يا دكتور...كان لازم النقط ههههبس برفو عليكي فهمتيها من اول نظرة...
spiceman
حتى م الاسم دكاكييني ...منور يا محمد وواحشني مووت ومقصر معاك والله بس قريب نتكلم
re7ab.sale7
هههههههههه والله شجاعة في ناس اكيد نفسها حتقلب عليها من العنوان والموضوع لا بجد شجاعة ومش مصدق حكاية يع يع واكيد ريحة البنفسج بتغطي على ريحة عمو شابوكشي اللي خرم ثقب الاوزون ومكانشي واخد باله...منوراني
هههههههههههههههههههههههههه يا خبر يا خبر مش قادرة أمسك نفسي من كتر الضحك :)))
يخرب عقلك بجد فكرة البوست حلوة اوي وياريت الفضائيات والجرايج أياها أم ريحة تجي وتشوف درجة القرف اللي وصلت المتلقي أنه يحط مشبك غسيل علي مناخيره طول الوقت ههههههههههه
آه صحيح نسيت أبارك لك علي البياض الجديد، ربنا يجعلها خضرة عليك علي طول، ويجعله عامر بتدويناتك دايماً :)
ShaiMaa Gaber
ههههههههههههه نورتيني وكيس انك ضحكتي ونفسك ماغمتش عليكي م الموضوع...اكيد جبتي مشابك الغسيل وانت بتقري...الله يبارك فيكي ع البياض ...الخضار شكل مقام سيدي ابو الريش اللي في السيدة
هههههههههههههه كويس اني نجحت
وجبتها من اول نظرة
اكيد ده احنا زباين قدام وعشرة وواخدين على الفكر والاسلوب
نسيت ابارك على النيو بوك مبروك ورق الحائط ربنا يجعله عامر ووشه حلو ولو ان اللون الاخضر مع الابيض مفكرني بالمستشفى ولبس العمليات
ههههههههههههه معلش مقدرش اسكت بس مبروك بردو ههههههههه
الراجل ده حقته يشتغل كمسري وبدل الصفارة ، كل شوية بيب المحطة الجاية .. بيب المحطة الجاية ههههههههههههههههههههههههههههه
وإن كان ع الريحة يحط فلتر هوا
ههههههههههههههههههههههه
بس بوست جامد والله ، معلم كبير وربنا
ههههههههههههههههههههه
طب اقول ايه
جميلة طبعا يا تيكووو
وايوة عنتر حى هههههههههههههههههه
طيوري
اه طبعا زبايين من ايام حكواتي ومغنواتي اللي محدش كان بيسمعها غيركم....اللون عاجبني بمناسبة الرببيع ومفكرني بمقام سيدي محمد السدي المشهور بابو الريش كان كدة خضار وحلاوة....منور ههههه ومريش يا طيوري
P A S H A
ههههههه فكرة بس حلاوتها من غير فلتر عشان محدش يلذق في الاتوبيس ....منورني ياباشا ودايما رافع من روحي المعدنية
Ms Venus
ياه وحشتينا اووووي ويلا بعوده الايام ومعلش بقى المفروض نستقبلك بللورد جه حظك في البوست المقرف ده....منوراني دايما
هههههههه
والله العظيم انت مشكله ياتراكيب
افكارك غايه فى الابداع الساخر الراقى
بجد انا ضحكت واكنى لم اضحك قبلا
اضحك الله سنك وجعلك ممن يرسمون على وجوه العباد الابتسامة
احترامى لافكارك اللى من غير صوت
بسمة الورد
ههههههههههه من غير صوت..منوراني بسمة دايما ويارب تدوب الابتسامة والضحكة
تصدق ياتراكيبووو
انا جيت هنا من ساعتين
تقريبا ومافهمتش حاجة وبقيت
مستغربة من التعليقات
أيه اسقاطات ومش اسقاطات دى؟
أز فجأة كدا دلوكيتى فهمتهااااا:)
فعلا اسقاطات على كبير اووووى:)
norahaty
هههههههه اكيد م الصدمة او نفسك غمت عليكي من الموضوع وبعد ساعتين هديتي حبة..منوراني
حياتنا مليئة بالكركبة من كل اتجاه والشاطر اللي ينقذ نفسه وينظمها
تحياتي الصادقة
شكلك كنت بتتفرج علي تيمون وبومبا وانت بتكتب البوست فتأثرت بالغازات : )
فكرتها رائعة عجبتني جداً
والمهم ان فيه امل في العلاج
ماهو يا نشم ونسمع كلنا يا نفقد الحواس كلنا
استمتعت بمروري كالعادة
تحياتي لقلمك
تعرف انا كنت عمالة افكر ممكن تكون كاتب عن ايه بس بردوا متخيلتش ههههه
بارك الله فيك
مساء الخير ..
سرتى التواجد هنا
سورى على التقصير بسبب الدراسة
تحياتى
كريمة سندي
حمد الله على سلامتك يارب تكوني بخير وعاش من شافك
صاحب الحبر الأسْوَد
ههههههههه لا ماشفتهاش ..ربنا يخليك يا عبقري وما يحرمني من كلامك وابداعاتك
zeze
هههههه اكيد اغمن عليكي م الصدمة ..نورتيني
رحيق الورد
ربنا معاكي ويوفقك يارب وشرفتيني
Post a Comment