Sunday, February 24, 2013

نهارك أبيض


ساعات كتير بأتعجب من ذاكرة الناس السمكية،  أكنهم يعني مش عارفين إننا برضه فاهمين الفولة، قال إيه؟ كان زمان مفيش تحرش وإن الناس زمان كانت مؤدبة جدا وإن الستات كانت تقدر تمشي عادي كدة بالميني جيب ومحدش طبعا كان بيكلمهم، طب بزمتك ده صحيح؟ طب على الشريف كان بيهبب ايه ورا برلنتي عبد الحميد في فيلم العش الهادي؟ طب الناس أم عيون جريئة اللي كانت مرزوعة عندنا في الحتة ليل ونهار على القهوة كانت بتهبب إيه لأي واحدة معدية في الِشارع؟  أنا أفتكر إن واحد صاحبي لما كنا لسة عيال مراهقة كان كل لما يزهق م  الدنيا أوبنت الجيران تتقل شوية وتختفي كان بيروح واقفله حبة في طابور الجمعية أهو برضة يطرى عن نفسه حبة؛ أنا اتوقع دلوقتي إن  الواد ده بقى أكيد حاجة كبيرة وأكيد شهبندر الثورجية في ميدان التحرير. عارف كان في واحدة وربنا لو شفتها تصعب عليك؟ وكنت ممكن تجرى بسرعة ع الأجزخانة وتجيبلها زجاجة ميكروكروم أو حتى جنتياينا (كوبيا) عشان بس تهديلها شوية الحبوب اللي كانت طافحة في وشها زي المجاري ومدارية على اثار الجدري القديمة اللي كانت هارية سحنتها، تصدق إن الست دي؟ ما كانتش برضة بتسلم هى كمان م المعاكسة، طب تصدق إن التحرش زمان ماكنش بيعتق لا راجل ولا ست؟ وكنت بتسمع صويت الستات و ساعات الرجالة ع الصبح كدة وكان بيقى مختلط طبعا مع صوت أم كلثوم وهي بتصبح علينا أول ما الصبح يشقشق والإتوبيس يتحرك، كانت اسهل حاجة لما تلاقي واحد واخدله كدة ألم أو قفى ع الصبح وبعدها يفضل يحلف أيمانات إنه مظلوم وربنا وإنه يا حرام ماهوبش نحو الست او الجدع من أساسه، أنا فاكر مرة كنت راكب مع أبويا الله يرحمه الاتوبيس وفجأة سمعنا صوت واحد عمال بيزعق لواحد تاني وبيقوله مش حرام عليك؟ بقالك ساعتين يا مفتري واقف وريا لما هرتني وأنا متنيل ساكت، الغريب إن الاتوبيس كله ساب الأفندي اللي كان بيعمل كدة ونزلو تريقة يا حرام على المستغيث، لدرجة إن واحد م الركاب اللي كان مسحوب من لسانه ساعتها قاله ساعتين يا راجل وساكت؟ واللي خلاك سكت ساعتين إستحمل يا معلم؟ الغريب بقى إن المتحرش بيه لم يتحرك وفضل برضة واقف وراه وكل اللي قدر عليه إنه قاله نهارك أبيض، الأغرب بقى هو رد فعل المتحرش به إنه اول ما سمع كلمة نهارك أبيض إتلم وسكت وإسستسلم لقدره ههههههه ياحرام،  وحتى لما روحت البيت وما كنتش فاهم هو في ايه حصل؟ ولسه بسأل أبويا الا لقيت ألم نازل تراخ على وشي، وجات أمي الله يرحمها وقالت نهارك أبيض يا راجل بقى بتضرب عيل صغير  عشان بيٍسألك على حاجة هايفة؟ راح قايلها هي دي برضة حاجة هايفة أو تتحكي؟ يادي نهارك أبيض!!!!  أنا أتعقدت خلاص م الكلمة دي بعد الألم المعتبر اللي أخدته، بس سبحان الله زي ما يكون شكل الراجل اللي قالها لسه برضة محفور في ذاكرتي، شنبه كان رفيع كدة زي أنوكل تيفة (زين العشماوي) الشيك وكان وشه مدي شوية على علاء الأسواني اللي كل ما أسمعه وأشوفه أقول سبحان الله ده مش واخد منه بس الشكل وأفضل مستني لما يقول في نهاية حديثه نهاركم أبيض، بصراحة شخصية لا تمحى أكيد م الذاكرة لا بألم أو من غير ألم، المهم تلف الايام وربنا كرمني وسافرت الى برلين وكان طبعا لزوم المنحة إنك لازم تلتحق بكورس لتعلم اللغة يعني ورغم إني ساعتها كنت دراس اللغة أصلا في مصر وطبعا من غير ماحد يطلب مني دوة وبلغ بيا الجبروت ساعتها إني قعدت كدة يجي خمسة سنين لابد في معهد جوتة، بس للأمانة  كان مستوايا في اللغة الألمانية كدة ولا الريس مرسي وهو بيلعب بالانجليزية لعب، تقدر تقول أبيض يا ورد أبيض يا جير، المهم جاتلنا مدرسة في برلين عايشة في الدور حابة وكانت غاوية فرد عضلات علينا وكانت بتحاول تثبت لينا طول الوقت عظمة اللغة وإن اللغة الألمانية دي دقيقة جدا وإن مفيش كلمة أو فعل في الدنيا دية يا بشر إلا موجود عندهم، بصراحة فكرتني بجارنا فاروق البقال اللي كان زالل إمنا إنه أحسن واحد في البيت بيشوي لحمة، وفضلت ع الحال ده كتير، لحد ما الواحد قرف وأتنفخ منها، وكنت بقول مش لو كنت أعرف أرد كنت وقفتها عند حدها؟  علام ايه القرف ده اللي تعلمته في مصر؟ يكونش الالماني بتاعنا يا واد في مصر مضروب ودايس عليه الترامواي؟   المهم عشان ما أطولش عليكم وتنامو مني آخر ما زهقت من أمها قلتلها نهارك أبيض (بالعربي)، قالتلى أفندم بتقول إيه (طبعا بالالماني)؟   قلتلها أنا أتحداكي يا فراو إنت لو قلتيلى دلوقتي فعل واحد ألماني يوحد ربنا بيوصف واحد واقف لازق ورى واحدة ست في الأتوبيس؟ قالت وواقف ليه وراها؟ ما الاتوبيس كبير، قلتلها واقف بقى وبمزاجه ليك شوق في حاجة؟ قالت ده ممكن يكون نوع من انواع التحرش ويعاقب عليه القانون؟  قلتلها انا عايز الفعل؟ قالت مفيش فعل معين يمكن... قلتلها يمكن؟  طب والنبي بقى تسكتي وتركني بقى على جنب حبه لان أحنا بالصلاة ع النبي عندنا لها فعل ومفيش واحد في مصر ما يعرفوش وبنصرفه زي فعل زاين بتاعكم كدة (فعل يكون بالألماني)، قولي ورايا يا حلوة............ ولا بلاش نهارك أبيض.

24 comments:

;كارولين فاروق said...

ههههههههه
مش عارفه اضحك ولا اعيط ولا ايه
مش عارفه
طب لو كان التحرش بقي من زمان
ماكونوش بيقولوا ليه
نسيوا؟
مااعتقدش
لان الحاجات دي مابتتنسيش
والدليل انك لسه فاكر حاجات اهو
بيتهيألي كانوا نسبه قليله
وكان في خوف اكتر من النهارده
تعرف ان 80 في الميه
بيتعرضوا للتحرش في مصر
فابتسم انت في مصر
تحياتي

richardCatheart said...

ههههههههههههههههههههههههههه الراجل اللى صبر ساعتين دا يستاهل التريقة احااااا ساعتين ليه دا عندة ميول ترابيزة على فكرة ههههههههههههههههههه على العموم بما انى ست وعاية فى مصر احب اقولك ان طول عمر التحمرش موجود بس الحقيقة هو زااااااااااااااااد اوى والحمد لله ان خروجى قليل لان الحقيقة الواحد يمت نفسة اهون له ياعم

ونهااااااااارك ابيض ههههههههههههه من غير ترابيزات

faroukfahmy said...

انا سعيد اليوم ان التقى بكلامك مع صورك وياريت كده على طول يا تركيب لان كلامك قيه جذب ابيض وتسرية بيضه بدون صفار
الانسان هو الانسان يا تركيب سواء كان زمان او دلوقتى
مش التحرش بس بل ايضا صفات كثيرة
خذ مثلا القتل ظهر فى بداية الخلق فى اسرة ابينا آدم
خذ مثلا التحرش من قصة نبى الله يوسف
اللى اختلف بس يا تركيب يا جارى ياابن السيده الاسلوب مش الخوف
كان زمان يتم فى الاتوبيس ودلوقتى مكانه لا يصلح لان جو نهار ام الاتوبيس دلوقتى اسود مخنوق والتحرش عاوز نهار ابيض عشان كده اتنقل الى الميادين العامة
ونهارك ابيض

مصطفى سيف الدين said...

التحرش ثقافة شعب :)

طيوري said...

هههههههههههههههههههههههههههههههههههههههههههههه طب اقول ايه
القصة دي فكرتني بقصة سمعتها بتاعة راجل اقرع ماينفعش تتحكي
بس دي كانت لازم تكون متسجلة صوت وخصوصا ان اخر تسجيل من زمن
يلا تسلم ونهارك ابيض
دي اكيد هانبطل نقولها ههههههههه

Tarkieb said...

;كارولين فاروق

كانت مفيش وسائل إعلام غير حاجات بسيطة...ولا كان في نت ولا فضائيات وكان كلام الجرايد محافظ والناس كانت بتخحل دلوقتي عيارهم فلت...طب انت عارفة ان أحمد عدوية كان ممنوع من الاذاعة هو ومحمد منير عشان مش مستوي خالص هههههههههه..نورتيني

Tarkieb said...

richardCatheart


ظلمتي الراجل الراجل أستحمل وفاض به تقومي تقولي عليه ترابيزة هو لو كان فعلا كده كان فضل لاخر الخط وحط جزمة باتا في بوقة وسكت ولعلمك كان خط دايري يعني كان ممكن يقدي طول اليوم ...سبحان الله اتظلم زمان واتظلم دلوقتي هييييييه اجيال وراى أجيال ...نورتيني ونهارك أبيض ههههههه

Tarkieb said...

faroukfahmy58

ربنا يخلى حضرتك ع الكلام الحلو ده... صدقني الفرق دلوقتي هو إن الناس مش خايفة ....أنا أعرف ناس كانت تتدعي الفضيلة في مصر واول ما سافرت برة فلت عيارها....والناس دلوقتي زي الراهب في قصةتاييس اللي عمره ما أرتكب خطيئة عشان مااتحطش في مواقف بها خطيئة وواول ما تاييس ماتت فجر وتحول الى شيطان ...

Tarkieb said...

مصطفى سيف الدين

التحرش سياسة ناس محرومة من كل حاجة وقصر ديل مش اكتر....نورتني يا فنان

Tarkieb said...

طيوري
هههههههههه نورتيني قصة الاقرع ما اعرفهاشي ...وانا اعتزلت القصص اللي بتحكي ...ادمنت التمثيل مع نفسي هههههههه...نورتيني

أمل حمدي said...

فعلا الناس لم تتغير ولكن الأسلوب
كفاية كدا

ونهارك أبيض :)

بسمة الورد عطر المشاعر said...

والله بدون مبالغه ياتراكيب من اسعد اوقاتى اللى بكون فيها فى قلب مدونتك اللذيذة الكلمات والبسيطة المعانى
حاجه حلوة كده و... المهم نهارك ابيض

من كل بستان زهرة said...

نهارك أبيض يا تيكو على الي أنت كاتبه ده
أنت عايز تشوه اللغة الألماني ياراجل


وللمره المليون رجع شبطه من المنفى يا تيكو حرام عليك أنت بتتقل علينا ليه

افروديت said...

نهارك ابيض هههههههه ضحكتن بجد ياتراكيب يعني كان في تحرش زمان ممكن بس مفتكرش النسبه خالص زي دلوقتي البلد مش بقي فيها اي حاجه غيرالموت والجوع والتحرش والاخوان

Unknown said...

نهارك ابيض
ودمك خفيف زى عوايدك
فينك ياتراكيبووووا مختفى؟
يارب خير يارب خير يارب خير

أمل حمدي said...

فينك يا طيب
هو كل شوية تتوه وندور عليك ولا إيه
ولا بتشوف غلاوتك يعني
اظهر وبان عليك الأمان :)

يارب تكون بخير يارب

Tarkieb said...

أمل حمدي

هههههه نهارك فل يا ست الكل ومنوراني دايما يارب

Tarkieb said...

بسمة الورد

ربنا يخليكي وما يحرمنا من اغنايكي ..بجد كلامك واشعارك اغاني مش محتاجة موسيقي وباستمتع بها وبدون مجاملة انت فنانة..نورتيني

Tarkieb said...

من كل بستان زهرة
ههههههههههه انا اقدر اشوهها لا طبعا دي هي فيها بلاوي مش مستحملة ..شبطة والله واحشني انا كمان بس الناس خلاص معدش لها صبر تسمع اي حاجة حصل لهم تشبع من كل حاجة ...وانا لو عملت حاجة باعملها بس عشان بتبقى خلاص نفسي امثل هههههههه واسمع شبطة وعارف اني يمكن انا الوحيد اللي حيسمعه .. بس اوعدك نعمل شبطة ومنوراني

Tarkieb said...

spiceman
ههههههههه والله واحشني مووت وبقالي كتير مش باخش الماسنجر خالص وشكله اتقفل باين... الليمون دي كانت طريقة الشعب كله الظاهر من بحري لقبلي..شعب مسكين طول عمره افكاره مفقوسة ورغم ذلك بيعملها هههههه قصر ديل بقى

Tarkieb said...

فروديتا
ههههههه نورتيني اه كان في تحرش بس الناس كانت بتستحي وتتنكسف دلوقتي خلاص عيارهم فلت..كان كل شئ مداري دلوقتي ع المفتشر..نورتيني يا ست الافروديتات

Tarkieb said...

norahaty
ربنا يخليكي ..الشغل بس ربنا يسهل وافضى حبه واعمل حاجة كويسة

Tarkieb said...

أمل حمدي

انا هنا يا جهاد ههههههه..انا شاء الله عودة مرة اخري بعد فترة شغل صعبة..وزيارتك دي غاليه علينا اوووي

ahmedabediom said...


شركة داما شركة استضافة مواقع | شركة تصميم مواقع

اكتشف خدمات اشهار المواقع والتسويق الالكتروني المبتكر من شركة داما السعودية
حتي تتمكن من رؤية مستوي تقدم خدمه التسويق الالكتروني الحديث
من خلال شركة داما ...
فاعلم انك متواجد بشكل قوي في محركات البحث المشهورة
ونشاطك او خدماتك في مستوي مرتفع

اطلع علي اخر واهم عروض شركة داما السعودية

عروض التسويق بالبريد الالكتروني
http://www.e-daama.com/mailmarketing-offer.php
عروض الرسائل القصيرة
http://www.e-daama.com/sms-offer.php
عروض تصميم المواقع
http://www.e-daama.com/webdesigen_offer.php

باقات التسويق الالكتروني وتقنيه السيو الحديثة
http://www.e-daama.com/em.php
.

للتواصل والاستفسار :::

info@e-daama.com
sales@e-daama.com
00966566341760

الموقع الرسمي
Web Site http://www.e-daama.com
المدونه الرسميه
Blogger http://www.e-daama.blogspot.com
صفحتنا علي الفيس بوك
Page Facebook http://www.facebook.com/edaamaa
صفجتنا علي لينكد ان
Linked IN http://www.linkedin.com/in/edaama
حساب تويتر الرسمي
Twitter http://www.twitter.com/E_Daama
قناه داما علي اليوتيوب
YouTube http://www.youtube.com/Edaama

E-DAAMA@2013
شركة تصميم مواقع| اشهار مواقع | استضافة مواقع|
شركة داما افضل شركة تصميم مواقع | شركة داما شركة سعودية |شركة تصميم مواقع في مكة | مكة | افضل شركة تصميم في مكة | تصميم مواقع في السعودية | تصميم مواقع مدرسة | تصميم مواقع شركات | تصميم صحيفة الكترونية إلكترونية | تصميم موقع احترافي | تصميمات جرافيك | تصميم تطبيقات ايفون| تصميم تطبيقات اندرويد| تسويق الكتروني | شركة تسويق إلكتروني | تسويق بواسطة الإيميلات| تسويق بواسطة رسائل الموبايل