العنبر

إنت خلاص خفيت يا باشمهندس عدلي...وإن شاء الله بكرة تقدر تخرج -

-خفيت؟ هو أنا كنت عيان؟ وعدلى؟ هو ده بقى إسمي الاصلي؟ وباشمهندز كمان حتة واحدة؟ ربنا يكرمك طب ممكن تكلمني شوية عن نفسي مش يمكن أفتكر حضرتك؟

- بكل سرور يا باشمهندس...حضرتك الأستاذ عدلي كفتة وتقريبا مهندس كبير قد كدة في شركة الكهرباء..ويارب تكون إفتكرت دلوقتي

-كفتة؟ إيه الاسامي الدسمة دي؟ طيب أنا بعمل هنا إيه؟ ومن إمتى حضرتك بالظبط؟

- احنا ح نقعد بقى نلت ونشوي يا كفتة ونسيب بقى بقية العيانين؟ يا أبني العنبر كبير ومش معقولة افضل أتكلم مع كل العيانيين على طول ...كدة مش ح أخلص يا كفتة...

- متأسف .....يعني لو مافيها إحراج ..هو إسم حضرتك ايه بالظبط؟

- إسمي؟ هو أنت يعني كنت فاكر إسمك لما تفتكر إسمي؟

- طب جربني حضرتك...وبكرة تشوف.

- أما أشوف...شوف يا سيدي أنا إسمي .....إسمي........

-إيه ده إنت كمان نسيته؟

-نسيت مين يا كفتة؟ بقولك إيه روح خلص إجراءات الخروج بتاعتك في الحسابات وهناك أكيد ح يقولك بقى إسمي وكمان أسامي الفريق الطبي كله ، يالا قوام لحلح نفسك بقى يا سيد مكرم

- مكرم؟ أنا فاكر إني من شوية كان إسمي عادل...وتقريبا شغال مهندز كبير في شركة المياة...

- عادل؟ لا طبعا إسمك عمره ماكان عادل ولا إنت مهندس ولا حاجة ...إنت ظابط كبير في الجيش وإسمك مكرم زي ما قلتلك من شوية

-ظابط؟ بجد أنا ظابط؟ وإسمي مجدي كمان..أحمدك يارب .. وياترى رتبتي إيه؟

- كل اللي فاكره إنك تقريبا عميد وعلى وش لواء...مبروك ع الترقية يا أفندم ويارب نباركلك بقى لما تبقى محافظ قريب إن شاء الله

-محافظ حتة واحدة؟ يسمع من بقك ربنا...طيب أنا بجد نفسي أسألك سؤال ومكسوف

- لا حضرتك تؤمر بجد...إنت ناسي إنك على وش لواء؟

- آه صحيح وربنا نسيت...شوف أنا نفسي أعرف أنا هنا ليه بجد؟ وكنت خارج أعمل إيه بالظبط في الحسابات؟ معلش فكرنى حضرتك

-تخرج؟ مين قال إنك خارج ياعزوز إنت ح تخرف ولا إيه؟

- عزوز؟ أنا من شوية مش كان إسمي هيثم؟ إنت نسيت ولا إيه؟ طب أنا هنا ليه ومن إمتى؟ ولا دي كمان نسيتها؟

ـ يعنى إنت مالقيتش غيري وجاى تسألني ..هو أنا لو أعرف يا تامر كان بقى ده حالي؟ ده انا بسأل نفسي وربنا نفس السؤال وح أتجنن عشان أعرف إجابة السؤال الصعب ده

-تامر؟ إنت مش لسة يا إبني قايلى إني إسمي الأصلي مدحت؟ وإنى تقريبا ظابط في المرور

-مرور؟ بزمتك ده شكل ظابط مرور؟ إيدك معايا يا صاحبي اجيب سريري جنب سريرك وربنا يسهل بقى وأحكيلك قصتك كلها من طقطق لسلامو عليكم ويارب بقى تفتكر يا زعتر

-زعتر؟