الشفتشي

الزمان :القاهرة 20 يناير 2011

1

-من إمتى لاحظتي الحكاية دي يا شرشر هانم؟
-تقريبا من شهرين كدة ؟
-وبعدين؟
-وبعدين حسيت إنه إتغير مرة واحدة كدة يا دكتورة
-ياه إتغير؟ إزاي يعني؟
-إزاي إيه ماجدة؟ أمال لو ماكناش ستات زي بعض كنت عملتي إيه؟ أكيد فاهمة أنا قصدي إيه بالظبط؟
-فاهمة والله بس عايزاكي تحكيلي شوية بالتفصيل
-بصراحة هي حاجة بجد تكسف أوووووي
- معلش يا هانم..زي ماقلتلك المرة اللي فاتت إن الحكاية عايزة شوية وقت مش أكتر ...بس هو إنت إزاي بجد يعني لاحظتي.... قصدي يعني ...إن جوز حضرتك ....يعني زي ما بتقولي ... كدة إتغير مرة واحدة؟
-شوفي يا دكتورة...هو أنا يعني ح أتوه عنه ولا عن عمايله؟ إنسي إنت بس الأول حكاية صورته الجامدة دي اللي بتطلع دايما في التليفزيون ..عارفة؟ ده كان بس اول مايشوفني لابساله الاحمريكا وده كان بييقي عامل زي التور الهايج ....
-الأحمريكا؟
-قصدي يعني قميص نوم أحمر ..... حاجة كدة شفتشي ترد الروح
-شفتشي؟ إيه الماركة الغريبة دي يا مدام شرشر ؟ أنت عمرك ماكتبتي عنها لينا قبل كدة يعني في الجرايد ... أنا أول مرة بصراحة أسمع عنها
-ههههههه ماركة؟ ماركة إيه بس يا ماجدة؟ إيشحال إنك لسة شابة وأصغر مني بكتير.. شوفي يا ستي ..ده حاجة كدة شفافة و تشرح العين ...عقبال بقى إن شاء الله ما تلبيسها لجوزك قريب
-ميرسي حضرتك....ربنا يخليكي بجد...طب وبعدين؟
-وبعدين؟ وبعدين إيه يا دكتورة؟ بقولك معدش خلاص بيأثر فيه الشفتشي وإنت تقوليلي وبعدين؟
-آسفة و الله..... أنا بس قصدي ...حضرتك عملتي إيه يعني بعد لما الشفتشي خلاص ماجابش معاه نتيجة؟
-في واحدة صاحبتي أوووي ....تقدري تقولي الأنتيم بتاعي يعني و ماسكة دلوقتي صفحة طبيبك الخاص عندنا برضة في الجورنال قالتلي عليكي وبالفلفل الاسود و لو حبكت إتوصي كمان بجوزة الطيب في الأكل ...ولو قدرتي يا شوشو ...إبقى يوم والتاني كدة و إعمليله حمام محشي.. أو حتى إهريه جمبري وسبيط....... المهم تروقيه كدة على الآخر وترجيعه شباب من تاني
-وجات بفايدة الوصفة دي؟
-تصدقي يا دكتورة ماجدة؟ أول م كان بياكلها كنتي تحسي كدة إنه مابقاش خلاص قاعد على بعضه وعمال يلف حوالين نفسه.... وكان في الآخر بيلاقيله أي حجة والسلام عشان يسيبلي البيت ويمشي وكان كل مرة يقولي أنا رايح الجهاز ..ما هي البلد كلها في رقبتي يا شوشو ....ولو نمنا لحظة يا حبيبتي ح يروح الأمن والامان م البلد دي .....وأفضل أنكت أنا بقى في نفسي و أستناه طول الليل ....وفين وفين ....لحد ما يجيلي بسلامته كدة على وش الفجر وطبعا خلصان وهلكان وإنسي بقى الليلة....وكل يوم على كدة
-خلصان وهلكان؟ ليه؟ هو كان بيحارب ولا إيه؟ ومسألتهوش طيب هو بيروح فين حضرتك؟
-طبعا سألته...وسألته والله كتير .. وكان تملي بيقولي: ده شغل والفرع الرئيسي الجديد لازم اروحه كل يوم بعد ما أخلص شغل الوزارة.. ماتشغليش بالك أنت ...ولو مش مصدقاني إبقي إسألي بهيجة بكرة الصبح بقى براحتك
-بهيجة؟ بهيجة مين؟
-بهيجة السكرتيرة
-بهيجة السكرتيرة؟ حلاوته هى الحكاية فيها بقى سكرتيرة وكمان بهيجة؟ يبقى خلاص كدة يا مدام تاهت ولاقيناها
- تاهت إيه ولاقيناها إيه يا دكتورة؟ دي عندها يجي ٧٠ سنة وسكرتيرته من أول ما مسك الوزارة ..تقدري تقولي سكرتيرة كل الوزرا من أيام فؤاد باشا سراج الدين لحد دلوقتي ... يعني حاجة انتيكة كدة..لا طبعا مش ممكن .وبعدين إشمعنى دلوقتي يعني اللي ح يفكر فيها؟ لا طبعا ده جوزي وانا عارفه ذوقه كويس..لا ...لا ما أظنش
-لا في دي بقى عندك حق يا شرشر هانم...بس على فكرة تقريبا جوز حضرتك شكله كده عنده مشكلة ...والله أعلم............. وطبعا فاهمة أنا قصدي إيه بالظبط؟
-أه فاهمة ..فاهمة طبعا
-وعشان كدة بقى بيتهرب منك كتير..بس ضروري بقى إنه يعرض نفسه بسرعة على أي دكتور وطبعا في السر عشان بس نتجنب الشوشرة والمعارضة
-حاضر أبقى أقوله بس ربنا يديني الشجاعة واقدر أنطق قدامه ......بس يارب يسمع بقى الكلام وماينشفش دماغه زي عادته ويروح بقى ويتعالج
-ربنا يسهل وإن شاء الله يروح ...ربنا يطمنا عليه يارب..... طب أشوف حضرتك بقى الأسبوع الجاي .....وإن شاء الله كالعادة زي دلوقتي....إتفقنا؟
-آه طبعا إن شاء الله يا دكتورة ...ربنا يريح قلبك زي ما بتريحيني كدة كل مرة بجد انا بأخرج من عندك مبسوطة أووي .... يالا باي بقى دلوقتي .... يالا سلام
*********************************

2

-ألو ....عدولتي؟ أنا ماجدة ....القرشانة مراتك كانت عندي تاني في العيادة ...بقولك إيه بقى؟ أنا وحياة ربنا خلاص ذهقت ..إنت مش ناوي بقى تقولها ولا إيه؟ بقالك شهرين عمال تقولي مش وقته......مش وقته يا حبيبتي......أمال إمتى بقى بالزمة يعني؟ أنا وحياة ربنا بأبقى ماسكة نفسي كل مرة ع الآخر وبأبقى عايزة بقى أريحها وأقولها ده جوزي وحبيبي يا وحشة إنتي......يا كركوبة إنتي........عادولتي....عادوووووووولتي ....بأقولك إيه يا حبوببتي؟ ماتنساش بقى وأنت جاي النهاردة ياحبي تبقى تجيبلي معاك حاجة كدة شفتشي وعلى ذوقك كدة يا شقي وسيب الباقي بقى عليا.......يالا باي دلوقتي.... في واحدة زبونة مهمة أوووووي جاية بعد شوية...يالا باي...........مووووووواه