Sunday, July 3, 2011

السوجارة في العمارة




-أنا برضة اللي أروح وأجيبلك الدخان يا راجل؟

-يا ولية تعبان وشقيان م الصبح فيها حاجة دي؟

-تعبان؟ يا راجل إتكسف على نفسك بقى.....من يوم ما عرفتك وإنت يوماتي ع الاسطوانة دي ...عايزة حاجة يا سنية قبل م أروح الشغل؟ وبعدها تطلع تقعدلى برة ع الدكة... وبالليل تعبان وشقيان يا أولاد...شغل ايه ده يا أبو شغل؟ ده اللي يشوف كدة يقول ده الشغل مقطع بعضه

-أقعد ع الدكة؟ انت بتستهوني يا ولية بالقعدة دي؟ وحياتك إنت ده لولايا أنا لكانت العمارة دي وربنا إتقشطت من زمان وبقت ع الحديدة.....مش كفاية الإنفلات الأمني والفلول اللي ماليين البلد دلوقتي

-لا والنبي ضحكتني ..يا أخي إتلهي.....بزمتك إنت فيك زقة ياراجل؟..أمن إيه؟ ونيلة إيه؟ ده أنت من ساعة ما وعيت ع الدنيا وإنت قاعد القعدة المنيلة دي ... خيال مقاتة وربنا ...قاعد قدام العمارة لا بتهش ولا بتنش.....مش أنا اللي يا حسرة طالع عيني وعين أهلى بطلبات سكان العمارة اللي ما بتخلصش دي.... من كنس لمسح لمجايب خضار لطوابير العيش........بلا نيلة قال تعبان قال م الشغل؟

-يا ولية يا لوكعية روحي بقى الراجل قرب خلاص يقفل

-أروح وأتنيل إيه؟ إنت ياراجل صدقت إني رايحة بجد ولا إيه؟ ..مش كفاية إن صحتك متهببة ومقندلة م السكر تقوم تتنيل وتبوظها أكتر بشرب السجاير؟ وربنا إنت واقف عليا بخسارة وأتحسبت عليا جوازة أونطة والسلام

-يا ولية بقى داخلة ع السبعين ولسة برضة بتفكري في الحاجات دي؟ إخص عليكي... ولية ناقصة بصحيح..طب إتكسفى على دمك...ده إنت ولاد ولادك خلاص بقو بشنبات

-برضة مش رايحة وأعلى ما في خيلك إركبه بقى يا كامل

-طب عليا الطلاق لو ماروحتي دلوقتي للبقال ما انت بايته فيها خالص الليلة

-أنت يعني ح تطردني من قصر العروبة يا خي ؟ إيشحال إنك مسكني في حتة أوضة معفنة في بير السلم؟ شقة إيه دي يا أبو شقة اللي بتحلف بيها دي؟

-يا ولية يا فقرية ماتوجعيش قلبي بقى...أبوس إيدك قولي بس لأحمد البقال علبة سوبر لعم كامل وهو ح يفهم على طول

-مش رايحة

-لا ح تروحي ورجليك فوق رقبتك بقى يا سنية يا بنت أم سنية

-برضة مش رايحة يا كامل يا إبن ستوتة

-وربنا لو ما روحتي دلوقتي لا أرمي عليكي اليمين وذنبك بقى على جنبك

-ههههههههه لا والنبي ياعبده...........برضة ما تقدرشي

- إنت ح تترقصيلى ياولية ولا إيه؟ وما أقدرشي إزاي يعني؟ وما أقدرشي ليه بقى يا حلوة؟ ده أنا من بكرة ممكن وحياتك أتجوز ست ستك وأجيب هنا في الأوضة اللي مش عاجباكي دي كدة بت بدرية ...بت لوز ترجعني شباب من تاني ...توب علينا بقى يارب من صنف النسوان العتاقى ده

-بدارى؟ وعتاقى؟ يا صلاة النبي عليك يا فرارجي الغرام إنت

-وحياة ربنا إنت غلبانة ...دول نسوان بداري يا بوز الغراب ...حاجة كدة ترد الروح.... وزاويز لباني أحلى وأجمل منك ألف مرة...ومفيش أكتر منهم وربنا دلوقتي ..... دول على قفى من يشيل وحياتك...... هى بس النفس اللي تشيل

-تشيل؟ لا جامد يا ديك البرابر...مش كفاية صابرة عليك لحد دلوقتي وحاطة في بقي جزمة باتا وساكتة... وتقوم آخرتها تعملي فيها عنتر؟ لا جامد وجامد وبتشيل ياعنترة

-ياولية يا مهفوفة هو يعني حرام على دلوقتي إني أعمر الطاسة؟

-مهما تعمل برضة مش رايحة واللي يحصل يحصل بقى..هي دي بقى آخرتها ياكامل؟ بتهددني بالطلاق يا ناقص برضة عشان سوجارة ؟ إيشحال إنك كاتب عليا عرفي

-يا ولية يا مرضعة قلاوون هو كان في على أيامنا غير العرفي؟ ماهو الكفر بتاعنا كله إتجوز كدة......... إيشمعنى إحنا بس اللي ح نختلف عنهم؟

-خلاص أديك أخدت حقك مني تالت ومتلت وبربع جنيه مهر كمان..عايز إيه تاني؟ ح تنهب؟.. سيبني بقى أشوف حالي ومستقبلى وأستت نفسي

-مستقبلك؟ مستقبل إيه يا ولية يا مجنونة إنت؟ سبعين سنة زفت وطين زي وشك ولسه برضة بتفكري في المستقبل؟ ح تجيبيلى السوجارة ولا اقوم أكسر أم العصايا دي على دماغك ودماغ أمك في تربتها؟

-.................................................

- إنت ما بترديش عليا ليه يا ولية؟ فيلم جديد ده؟ ولا ملعوب من ألاعيبك السودة؟

-........................................

-ياولية ردي عليا ردت المية في زورك

-خخخخخ...............................

-يبقى أكيد نمتي...

-خخخخخخخخ......................

-نامت عليكي حيطة يا بعيدة ...

-خخخخخخخخخخخخخخخخخخخ.........

-جتك القرف ولية لزقة ..ساعة بحالها عمال أزحلق فيها وبرضة مش عارف............زي ما تقول يا أخويا قلبها حاسس إني مخبي منها البسبوسة زي كل مرة.............ممممممممممممم الله يا ناس ع والحلاوة والطعامة.......ممممممممممممم دي مش بسبوسة دي زبدة وربنا.......سبحان الله الشوام دول بجد فظاع في عمايل الحلويات.... لا تقولي عبد الهادي ولا زفت......مممممممممممم ..شقيان يا ناس وربنا .......شقيان يا عالم ومحتاج للغذا.........ممممممممممممم طعمة ... لذيذة أووي ...لا بجد إفترى ....جتك القرف ولية ساو باصالي في أم اللقمة م الصبح....ماهو يا رمة لو كنت بتتعبي زيي كدة؟ كنت أكيد ح تقدري التعب اللي الواحد بيشوفه طول النهار ع الدكة.... ....شقيان.....شقيان يا عالم .........ممممممممممممم لا وبجد أحلى من بتاعة إمبارح بكتير.

66 comments:

ياسمين said...

يانهار أبيض دا كله عشان البسبوسة ...دا بخيل اوووي...ياريت يبعث لي حته كدا اصلي بحبها ههههههه ولا اقولك بللاش يخليني انا كمان اجيب سجاير وانا ضد الموضوع دا هههههه
جميلة جداا ونهاياتك بجد غير متوقعة نهائي..
بس ملحوظة: بلاش تقول والنبي...لان مفيش فاصل بين ربنا والبعد
ولما تيجي تحلف تقول بالله عليك...مجرد تصحيح بس...
شكرااا

Kem said...

هاهاهااهاهاه , باااسبوسة بااسبوسة انتى يا لوزة يا لوزة شايلة البسبوسة و الله احلوتى يا حلوة و بقيتى عروسة :))))

Haytham Kilany said...

ههههههههههههههههههههههههههه
جامد جامد جامد
هيطلق الوليه علشان حته بسبوسه
ههههههههههههههههههههه
تسلم ايدك

~ISLAM~ said...

هههههههههههه
الناس العواجيز بيبقى بينهم شوية قفشات بنت لذينه
وبعدين فيها ايه لما يديها حته بسبوسه
ليه الدناوه دى يا عم كامل

Ramy said...

هههههههههههههههه

يا نهار ابيض

(:

بقى هى بقت بسبوسه
(:

Ms Venus said...

هههههههههههههه العالم هتقطع بعضها يا جدعان

^

جميلة يا تركيب

أمل حمدي said...

كل دا وفي الآخر بسبوسة
ههههههههههه
راجل .......
هههههههههههههههه

Anonymous said...

بثبوثة وطعمة

reemaas said...

ههههههههههههههههه
انا برده قلت استحاله كل ده بسبب السجارة لازم فى ان
اتاريها بسبوسة

الميكروباص said...

هههههههههههههههههههههههههههههه

أحمد محمدي said...

انت مبدع يا اخي

استوقفتني هذه العبارة : " لا جامد يا ديك البرابر
ههههه

كريمة سندي said...

ولله في خلقة شؤون

ههههههههههههههه

جميلة أوي الله المستعان

saragebaly said...

ههههههههههههههه
كل دة علشان بسبوسة؟؟

هههههههههههههههههه

جميييييييييييلة اوي اوي



:)

Tarkieb said...

ياسمين
ياسلام نبعتولك صاج بسبوسة مرة واحدة..ربنا يخليكي على كلامك الحلو زي البسبوسة..بس تفتكري عم كامل ح يحلف بالله عليك؟ انا لما باكتب باتقمص الشخصية رغم ان لسانه سايب شوية بس اكيد في الحقيقة بيكون اسوء من كدة..نورتيني

Tarkieb said...

اغانى الشتاء
هههههههههه لا ده انت حافظة كويس ..نورتيني

Tarkieb said...

مهاترات عاقل said

ههههههههههه راجل طفس بقى الغريب انه عنده سكر كمان..نورتني يا باشا

Tarkieb said...

iـــــــــــsــــــــــlــــــــــــaـــــــــm

اه بيقي تحب تسمع المناكفة بينهم وكل الكلام بيبقى بق وخلاص موتشاكرين على الزيارة يا ريس

Tarkieb said...

Ramy s
منورني يارامي ايوة البسبوسة تاخد حتة؟

Tarkieb said...

Ms Venus
اه والله وفاكر انه بيتعب ههههههههه كمان ومحتاج غذا وسوايل...منورتيني يا نفيين ههههههه....

Tarkieb said...

ماما أمولة
هههههههههه راجل ندل وجلدة وعنده سكر كمان نورتني كالعادة

Tarkieb said...

Anonymous
سلامة لثانك البثبوثة كانت اكيد ثخنة ههههههههه

Tarkieb said...

reemaas
ههههههههههه دوقرم قلبك كان حاسس ..منوارني ويارب ما نتحرم من زيارتك

Tarkieb said...

لورنس العرب
ايه ياعمي مفيش غير ههههههههههه ..كدة برضه؟

Tarkieb said...

أحمد محمدي
والله انت اللي مبدع شرفتني بالزيارة

Tarkieb said...

كريمة سندي
دايما منوراني يارب

Tarkieb said...

saragebaly
هههههههههههه اه راجل شقيان طول النهار ع الدكة

شمس النهار said...

دي ماكانتش بسبوسة دي اللي هطلق الناس من بعض

:)))))))

بس حوار مالوش حل

حوار واقعي ومضحك كمان

:))))))

Tarkieb said...

شمس النهار
انا مبسوط انه عجبك ودايما منوراني كدة

شهرزاد المصرية said...

لأ عنده حق بجد
ما هى القعدة على الدكة تجنن
طيب ممكن يدينى حتة
ما أنا كمان شقيانة طول النهار قاعدة أمام اللابتوب

جميلة و مضحكة و فعلا رجال الطبقة دى منهم كثير كدة
تحياتى

عباس ابن فرناس said...

انا لو من مراته كنت احط له فى البسبوسة سم وريح دماغى ههههه

بس فى الاخر مش يهون عليها برضو
تحياتى المستعطرة

mrmr said...

بسبوسه شامى!!!!
طيب عنده حق يزحلقها ويستفرد بيها وحده هههههههههههههههه

Carmen said...

كل ده عشان البسبوسة اجيبلكو 2 كيلو :))))))))))))


http://karmenhome.blogspot.com/2011/07/4.html

http://karmenhome.blogspot.com/2011/07/3.html

http://karmenhome.blogspot.com/2011/07/blog-post.html

http://karmenhome.blogspot.com/2011/07/2.html

لك هدية روح استلمها :D

Tarkieb said...

عباس ابن فرناس s

هههههههههه ماهو عنده سكر وشكله ح يتبهدل منه ..زنورتني يا ريس

Tarkieb said...

mrmr said...
اه بتبقى طعكة مش كدة ههههههههه..خدي حتة

Tarkieb said...

Carmen sai

هههههه هديتك احلى من بسبوسة كامل

ندا منير said...

بعنى بعد كل دا وسبعين سنة وعرفى كمان
ههههههههههههه

بس بصراحة راجل بايخ قوى
يعنى ياكل بسبوسة كل يوم لوحده وسايب مراته كدة شقيانة طول اليوم

Beram ElMasry said...

حبيبي تركيب
والله انت الجميل قوي ورقة مشاعرك وحسك النبيل واضح في عباراتك الدقيقة والرقيقة والمعبرة
تحية وسلام ولاسلاام مع بني اسرائيل

Mona said...

حلوة وللأسف فيه رجالة نقصة من العينة ديه كتير :(
بس مرسومة حلو
تسلم أفكارك

مونتي بوكيه ورد said...

حلوه اوي يا عالم تركيب عجبني الاسلوب والطبيعه و دي اول زياره وان شاء الله تتكرر
الحمدلله علي نعمة كره السيجاره و شكلها

Tears said...

معلش اعذرينى لتاخيري


لازم تاخد كتاباتك و تحولها لعمل درامى للتلفزيون او للراديو على الاقل عشان خسارة يبقى على المدونة بس


تحياتي لمجهودك

عطش الصبار said...

انت كاتب سيناريوهات رائع
تحياتى

Hadeir said...

هههههههههههههههههههههههههههههه
حلوه جدا ونهايتها عجبتنى اوى :D :D

انا عايزه ادوق البسبوسه اللى حلف على مراتو بالطلاق عشانها دى
هههههههههههههههههههههههههههههههههه

Unknown said...

أنت عايش فى المانيا؟
بجد؟ولسه فاكر كل
الكلام والحوارات
دى؟دا انت
فظيع:):)

Unknown said...

كــله كوم
وفرارجي الغرام
دى كوم تانى:):)

جوجو said...

السلام عليكم
هههههههههه
هى مستحملاه كل ده ازاى
الله يكون فى عونها بصراحة
جميل جدا
تحياتى

r said...

هههه
العقل زينه فى الباترينه صحيح

هديل said...

هههههههههههههههههههههههه
في كده بجد ؟؟؟

zizi said...

تركيب العزيز ...اولاً انا فوجئت
انك عايش في المانيا ..وبعدين اسلوبك رائع وفعلاً السيناريو بتاعك سلس وجميل ..انا اول مرة ادخل مدونتك بس شكلي كده حابقى مدمنة ..وبصيت على حاجات كتير قبل كدة وكلها حاجات خفيفة الدم يسلم ذوقك وياريت لما تنزل مصر نعرف يمكن نقدر نعمل معاك واجب ..تحياتي وتمنياتي الطيبة ..

طيوري said...

ههههههههههههه
مش ممكن الحوار رهيب
ده مشهد يتمثل بجد مايخرش المية
دمهم خفيف اوي

Beram ElMasry said...

حبيب وصديقي تركيب
احسن الله اليك وابقاك خيرا للاحبه ولاصدقاء ولي عندك رجاء الا تحرم كتاباتي من نقد قلمك وتوجيهاته المسدده فمازلت اخاف من ضعف العباره وكلي امل ان اجد عند الاصدقاء التوجيهات النافعة تحيه وسلام ولا سلام مع بني اسرائيل

ابراهيم رزق said...

كل ده عشان البسبوسة و من حلوانى شامى كمان
ههههههههههههه

قصة جميلة و دمها خفيف

تحياتى

Tarkieb said...

ندا منير sa
ههههههه على ايامه ماكنش لسه طلع الشيخ ماذون نورتني

Tarkieb said...

Beram ElMasry
منورني دايما ياعم الشباب والرياضة لا اسكت الله للك صوت

Tarkieb said...

Mona said
ربنا يخليكي نورتيني بجد

Tarkieb said...

مونتي بوكيه ورد s
مستنين الزيارة التانية ان شاء الله

Tarkieb said...

Tears
ياريت والله مين عارف يمكن حد يكتشفني بعد ما نموت

Tarkieb said...

عطش الصبار
حمد الله ع السلامة فينك م زمان

Tarkieb said...

Hadeir sai

لو جيتي تاني فيه بسبوسة ههههههههه

Tarkieb said...

norahaty
هههههههه العالم قرية صغيرة دلوقتي

Tarkieb said...

جوجو

ربتا يخليكي وميرسي ع الزيارة

Tarkieb said...

بسنت
ههههههه اول مرة اسمع المثل ده

Tarkieb said...

هديل s
اه كتيرررررررر

Tarkieb said...

zizi s
دي يحصلي الشرف اكيد ...وسعيد ان البلوج عجب حضرتك ومستني الزيارة التانية

Tarkieb said...

قرفة
هههههههههه انت جيت يارمضان..حمدالله ع السلامة وكويس انك رديت كنت ح ازعل

Tarkieb said...

Beram ElMasry
صدقني كلامك مش عايز نقد ده عايز يتحفظ على طول

Tarkieb said...

ابراهيم رزق said
ربنا يخليك ده شرف لينا انها عجبتك ونورتني