Thursday, March 22, 2012

الكنز

-إيه ده؟ هو ده بقى السر اللي إنت كنتي واجعة دماغي بيه على طول؟

-واجعة دماغك؟ طب تصدق إني وربنا كنت خايفة أووي م اليوم ده يا فتحي؟

-خايفة؟ يا ولية بلاش كلام فاضي..أربعين سنة واجعة دماغي بأم الصندوق ده... وأوعى تفتحه وبلاش تفتحه الا لما أموت او لما يجي الأوان يا فتحي

-وأهو جه الأوان خلاص وأديك عرفت السر وإتبطيت

-إتبطيت؟ بزمتك مش ديه والنبي خيابة؟ بقى أفضل ده كله صابر وفي الآخر ألاقي شوية كلام فاضي في حتة صندوق معفن

-كلام فاضي؟ بقى بتسمي الذكريات بتاعتي كلام فاضي؟ ماشي يا فتحي

-آه فاضي ونص كان ...طب تصدقي؟ أنا كنت فاكره ح يطلع كنز.....هههههههههه وأنا بخيابتي اللي كنت فاكر إنه ممكن كان يغنيني عن وقفة المعاش وزحمة البوستة كل شهر

-كنز؟

-آه كنز...ماتعرفيش يعني إيه كنز؟... طب بزمتك مش لو كنتي بس حوشتيلنا جنيه كل يوم ومن ساعتها كنا زمانا عدينا.... منك لله يا سنية

-يا فتحي ابوس إيديك بلاش بقى تصعب عليا الحكاية يا أخويا

-حكاية؟ حكاية إيه يا ولية يا مهبولة إنت؟ بقى بتسمي تلات أزايز بيرة فاضيين حكاية؟ هههههه ...ماشي يا سنية ...بقى كنتي بتعملي دماغ من ورايا السنين دي كلها يا سنية؟ لا جامدة يا بت وبتشربي ستلا كمان؟

-ماهي ستلا دي هى لب الموضوع بقى

-لب؟ لب وسوداني إيه؟ كركبتي بطني ... ماتقولي بقى فيه إيه وتخلصيني؟

-بصراحة بقى ومن غير مقدمات أنا خنتك يا فتحي وربنا بقى يسامحني

-خنتيني؟ إزاي؟ وأمتى وفين؟ ردي..ردي عليا ردت المية في زورك..ردي عليا قبل ما أقوم أفتح دماغك بإزازة الإستلا دي

-حاضر... ح أحكيلك ...بس إهدى إنت شوية كدة...إنت مش ناقص يا أخويا ..كفاية عليك الضغط والسكر والقلب .. بس إوعدني والنبي تسامحني بقى بعد ما أحكيلك

-أهدى؟ وأسامحك؟

-آه تسامحني فيها حاجة دي؟ وخصوصا إنها بقى حكاية أكل عليها الدهر وشرب..وكمان أنا العشرة خلاص غيرتني أووي والله يا فتحي

-غيرتك؟ إزاي يعني مش فاهم

-شوف يا فتحي إنت عارف أنا قد إيه بحبك؟ وشيلاك يا اخويا من ع الأرض شيل.... مش كدة؟

-الله ما طولك ياروح...يا ولية خشي بقى قوام في الموضوع دوغري وبلاش شغل اللف والدوران ده

-خلاص يا أخويا ح أتكلم ..شوف يا فتحي.... إحنا أول ما إتجوزنا كنت بصراحة يعني مش بحبك وبصراحة ماكنتش كمان طيقاك خالص

-مش بتحبيني؟ كدة برضة؟ كدة برضة يا سنية؟ هي دي آخرتها؟ ده أنا ضيعت صحتي عليكي

- بقولك يا فتحي أول ما إتجوزنا وبعدين ده كان زمان مش دلوقتي

-وبعدين؟

-وبعدين إتعرفت على واحد كدة يعني وإفتكرت ساعتها إنه يا أخويا ح يكون فارس أحلامي

-إفتكرتي؟

-آه بس يا خسارة

-ياخسارة؟

-آه إكتشفت بعدها إنه مش بيحبني وإنه شخص مش ولابد كدة وكان يعني بيضحك عليا

-وبعدين؟

-وبعدين أول ما قطعت علاقتي بيه قررت إني أنسى بقى الموضوع دة بصراحة برمته كدة من أساسه

-تنسيه؟ تنسيه إزاي؟

-يعني زي الأفلام وكدة يا فتحي

-إزاي يعني؟ مش فاهم

-يعني رحت جايبة إزازة بيرة كبيرة ساقعة ومشبرة كدة ورحت شارباها كلها على بق واحد

-ونسيتي بقى؟

-لا طبعا ولا الهوا

-طب وبعدين؟

-ولا قبلين رحت شايلة الإزازة الفاضية بتاعتها زي ما إنت شايف كدة في الصندوق ده ورحت حاطة الصندوق تحت السرير عشان كل ما أشوفه أبقى أفتكر الحكاية المقندلة دي وما أغلطشي الغلطة دي تاني أبدا

-غلطة تانية؟ هى غلطة واحدة دول تلات أزايز يا سنية

-آه ما انا عارفة

-عارفة؟ نهارك أبيض..يعني الإزازتين التانيين دول كانو برضة فوارغ تجارب فاشلة؟

-كدة ومش كدة

-كدة ومش كدة؟ إزاي يعني مش فاهم؟

أصل التجربة التالتة بصراحة ماكانتش يعني فاشلة أووي وبصراحة كانت حاجة خيالية خالص ..تقدر تقول كدة حاجة رومانسية وحب ولا نظام الأفلام الأبيض والأسود يا فتحي

-بخرب بيت أم الأفلام على بيت فتحي على أم الصندوق المعفن ده على اليوم الأسود اللي شفتك فيه يا شيخة

-كدة برضه يا فتحي؟ إخص عليك بقى هى دي آخرة العشرة ياراجل

-آخرة العشرة؟ آه صحيح ..تصدقي وربنا كنت ناسي.......طب ماجاش ليه حبيب الغفلة يتقدملك ويطلب إيدك مني ويخلص؟

-بلاش تريقة والنبي يا فتحي ..أنا فيا يا أخويا اللي مكفيني وربنا

-فيكي اللي مكفيكي؟ ماشي يا موزة.....بجد وربنا ومش تريقة ليه بجد ماجاش؟ أنا عمري ماكنت ح أقف قدام سعادتك....دي عشرة يا سنية مش كدة؟

-الله يرحمه ما لحقش يا عيني

-الله يرحمه؟ ايه ده؟ هو مات..إتكل يعني

-آه مات وشبع موت

-مات أكيد من كتر الحب ؟ أكيد جاله تخمة من كتر الحب..غلبان ...على العموم ربنا رحمه من الخاذوق اللي كان ح يلبسه وح يطلع من عينيه زي حالاتي كدة

-كدة برضة؟ على العموم كتر خيرك يا فتحي ........صحيح ما يعرفش قيمة الجواهر الا الجواهرجي الشاطر

-جواهرجي؟ وشاطر كمان؟ طب جواهرجي ماشي بس شاطر دي مش واسعة شوية؟ هو بذمتك في حد شاطر برضه ويفكر فيكي؟

-كدة برضه؟ طب خليني بقى ساكتة أحسنلي

-ساكتة؟ ماهو أكيد عالم معندهاش نظر اللي هوبت ناحيتك

-معندهاش نظر؟ ماشي.........طب إيه رأييك بقى إن رجالة كتير وأشكال وألوان كانت بتترمي كدة تحت رجلي؟

-تحت رجلك؟ أه أكيد عالم سكة عشان كدة كانو بينقطوكي بالشلنات والبرايز القديمة دي اللي مالين أم الصندوق ...ودول شيلاهم ليه هما كمان؟ حاجة من ريحة الحبايب برضه؟ ولا ذكريات صندوقية؟

-ليك حق تتريق يا فتحي ماهو اللي مايعرفش بيقول برضه عدس

-عدس؟ عدس يا بتاعة أبو شلن؟ لكن نقول إيه مستوي أكيد عرة زي صاحبتهم؟

-عرة؟ أنا عرة برضه يا فتحي؟ على العموم الفلوس اللي إنت عمال بتتريق عليها دي تبقى فلوس الرهن بتاع أزايز الستلا اللي شربتها.......و قلت بدل ما أملى يا أخويا الصندق بأزايز كدة ع الفاضي فالأحسن إني أشيل الرهن بتاعهم.......وأزازة ولا رهن أهو كله برضه بيفكر

-بيفكرك؟ يخريب بيتك...ده شوية الشلنات والبرايز دول يطلعو رهن أربع أو خمس صناديق بيرة بحالهم..........كل دول عرفتيهم على ومن ورايا يا سنية؟

-مش عارفة يا فتحي بجد صدقني

-مش عارفة؟ طب إزاي؟ إنت ح تستعبطي؟ ما هو لو حسبتيها حتلاقيهم فعلا كدة

-أصلى الأيام الأخيرة غيرت الأسلوب خالص

-إزاي؟

- قلت أسترجل شوية

-ـتسترجلى؟

-آه يا أخويا قلت أشرب بريل

-بريل؟

آه بس يا خسارة العلب بتاعتها معلهاش رهن

34 comments:

P A S H A said...

ههههههههههههههههههههههههههههههههههههههههههههههههههههههههههههههههههه

أنت مشكلة بجد :))

يسعد صباحك ويجعل يومك كله فرحة وسعادة وضحك وبشاير يا معلم

بانبسط بجد لما باقرا لك وباتعلم منك حقيقي يا أستاذنا :)

ربنا يكرمك يا رب وما تبقاش تغيب علينا في المواضيع المشبرة دي يا كبير

مبدع والله

هبة فاروق said...

ههههههههههههههه الراجل عادى كده فرى خالص قاعد يسمع كل ده ومحولش حتى يخبطها بكام ازازه على دماغها
بس بجد ضحكت من قلبى
صباحك مشبر بس بشفشق مايه ساقعه مش حاجه تانيه

شمس النهار said...

:)))))
ياصباح التهييييييسسسسسسسسس

جامدة جدااااا

ريهام المرشدي said...

:)

طيوري said...

هههههههههههههههههههههههههههههه

انها حقا ولية مسكفة آل لب الموضوع ال
واتبطيت وحجات جامدا
بس بجدهي الستات لما تسترجل بتروح في ستين داهية
حلوة اوي وكما توقعت نهاية غير متوقعة
بس كل الابطال اللي بتكتب عنهم رجاله فري اوبن مايندد(تأدبا))بس على فكرة فتشحي فهم سنية غلط
الست كانت بتحوش في الصندوق وبدل ماتشتري من برة فتحت مصنع فيروز

لكن الثورة مستمرة
والشعب يريد حكواتي جديد

faroukfahmy said...

الحمد لله يا تركيب ان الامر اقتصر على البيرة وعشان هيه خفيفة اتأثرت على طول من البيرةانا حاسس كده انك بتعمل دعاية للبيرة الاستلا والشركة عارفه ان معلقينك كتير اختارت مدونتك للدعاية لا نتاجها ممكن تقوللهم عن مدونتى ولك عمولة يا تركيب والا انت عاوز جقك صندوق بيرة هههههههههههههههههههههههههه

;كارولين فاروق said...

ههههههههههه
ده فتحي ده طلع طيب اوي
ياعيني يا فتحي يا خويا
صدمه رقيقه فعلا
انا متأكده ان الاسعاف جت بعد كده قبل ماتكمل هي مشوارها مع الخيانه
لأ حلوه جدا جدا تسلم اناملك

أمل حمدي said...

ههههههههههههه
ملكش حل والله
ربنا يسعد قلبك زي مابتسعدنا

:))

Israà A. Youssuf said...

هو أهبل وهي بتستهبل وال Post يهلك من الضحك
D:
تحياتي :)

بسمة الورد عطر المشاعر said...

هههههههههههههههه

انت حكايه ياتراكيب
يعنى شدتنى لاخر حرف من حروفك ومعرفتش ايه الموضوع ههههههههههههههههههه

بصراحه جامده اوى ستات لا تخاف ولا تختشى

اضحك الله سنك وريح بالك دايما

beautiful mind said...

ههههههههه
من زمان اوي مضحكتش كدا
بجد الحكاية دي مسخره
تسلم ايدك
دي تنفع تتعمل مسلسل
طيب متفكر في الموضوع دا
والله هتكسب دهب

Noha Saleh said...

بيقولها ماجاش ليه يخطبك انا عمرى ماكنت هقف فى طريق سعادتك
هو فى كده بس:)

حلوة جدا

reemaas said...

ايييييييييييه طولة باله دى يا تراكيبو ده هى متاثرة عنه يا اخى ههههههههههههه

Baskouta said...

Mn baskout ela Tarkeib
7awil
How are you my friend?
hope everything is ok.

:)

ana get aslm w b3deen ha2ra el post.

Unknown said...

تدونتك سمعتها ياتراكيبوا
أيوة انا بقرا بقيت كانى سمعاها
انت كاتب سيناريو وحوار متمكن جداً

Mohamed Ashri said...

ايه البجمال ده ... أسف انى مجتش هنا من زمان .. لكن فتحى ده استحمل يكمل الحكاية ازاى لحد وا وصل لبريل ههههههههه ... تسلم تركيب ..

Tarkieb said...

P A S H A
ربنا يخليك يامعلم ...يا باشا انت مش محتاج تعليم انت كدة عشرة على عشرة ....وربنا ما يحرمنا من ذيارتك...منورني دايما

Tarkieb said...

هبة فاروق

هههههه الراجل مافيهش نفس السكر والضغط مبهدلة والمفاجعة صعبة ..نورتيني يافنانة

Tarkieb said...

شمس النهار

يا صباح الشمس بالنهار منورة يا شموشة ..ربنا يكرمك وميرسي ع الزيارة

Tarkieb said...

ريهام المرشدي


ميرسي وشكرا ع التعليق

Tarkieb said...

قرفة

ههههه فتحي اتفتشح يارجالة ...ياه في ناس كتير زي فتشحي وغالبا كل ما الواحد يكون ذو كلمة وهيبة في عمله بيكون هوذق كدة في بيته ....وبعدين حتى لو مافيش فتشحي احنا خيالنا واشع ههههه...ونورتيني

Tarkieb said...

faroukfahmy58
ههههههههههه في دستور ولاية بافاريا اللي انا مش فيها بيقول ان البيرة هي الغذاء الرئيسي للشعب...بس انا مش بحب البيرة ولا ريحتها بس بحب الفيروز هههههههه ومدمن اللي بالاناناس..منورني دايما يارب......

Tarkieb said...

كارولين فاروق
هههههههههههه فتحي دماغه اتفتحت بالصدمة ,,,من فتحي في كتير ...بس كله عامل فيها عنتر هههههه..منوراني

Tarkieb said...

ماما أمولة

ربنا يخليكي وما يحرمنا من طلتك علينا

Tarkieb said...

Israa' A. Youssuf
هههههههههه نظام الهبل ع الشيطنة ...منوراني ويارب ما تكون اخر زيارة

Tarkieb said...

بسمة الورد
ههههههههه ربنا يخليكي بس فتحي برضه شنتل مان ...منوراني

Tarkieb said...

beautiful mind

هههههههههه طب كسبنا فيك ثواب اهو ضحكت عشان كنت زعلان من فترة....انا لو عليا مش عايز فلوس بس ياريت حد يكتشفنا بقى

Tarkieb said...

Noha Saleh


ده بيتريق مش قاصد طبعا يخطب مراته بس احب انا ان الواحد يقول كل حاجة بالذوق وبلاش عنف..والمرجلة مش ضرب على طول هههههههه في شتيمة بس ....منوراني

Tarkieb said...

reemaas

من السكر والضغط اكيد والشلل اللي جاله من الصدمه ههههههههه..منوراني

Tarkieb said...

Baskouta

الله يسلمك يا بسكوت ويارب تكون مبسوط..طيب عجبتك القصة؟ مستني رأيك

Tarkieb said...

norahaty

هههههه القصة طالعة من عيني والله نفسي امثلها كمان بس مشكلتي في صوت الستات مش بلاقى حد يمثله ولما بعمله انا مش بيطلع حلو بالسوفتوير ....يعني لو منى ذكي ترضي تمثل معايا راديو كنت عملتها...ربنا يخليكي بس فعلا انا لما بكتب باتخيل انها مسلسل فعلا...منوراني يادكترة ياملكة قفل التعليقات

Tarkieb said...

Master.ms

ده جمال حضرتك والله وبلوجك هو اللي كله جمال بجد...شرفتني ويارب ماتكون اخر زيارة

رحاب صالح said...

ههههههههههههههههه
والله بجد دي حاجة تجنن

Tarkieb said...

re7ab.sale7


حمد الله ع السلامة يابنفسج