Sunday, March 30, 2014

الشيتوس




-بذمتك يا عبده مش مكسوف من نفسك يا راجل؟
-أكسف؟ لا طبعا إذا كانت كل الشركة ح تروح هناك جات عليا أنا يعني ووقفت؟ مشي حالك يا سعاد عايزين نكبرونبقي زي الناس الهاي
- أمشي حالي؟  طيب..طب والنبي مش مكسوف من نفسك ياراجل تلبس الحاجات دي وتروح بيها لحفلة تنكرية؟
-قال إيه رماك ع المر؟ مجبرا يا سعاد،  ولزوم بقى الشغلة  الجديدة والابهة وبعدين الناس الهاي لايف دي عندها الحفلات دية أكنها حفلات سبوع أو طهور كدة عندنا بالظبط ولو ماروحتش المرة دي أكيد ح يقولوعليا واحد بلدي وقفل ومتزمت ورجعي
 - طب مسألتش نفسك  أزاي ح تمشي في الحارة بتاعتنا وإنت لابس اللبس المسخرة ده؟
-أمشي في الحارة كدة؟ لا طبعا.. هو انا أتجننت يا سعاد؟ ده كان العيال زفوني في الحتة ههههه
-إلا زفوك يا عبده؟ دول أكيد كانو ح يفتكروك أحمد حلمي وهو لابس الشيتوس ومش قليل كمان لو ماكنوش حدفوك بالطوب
-هههههه لا ماتخافيش أهو ربنا سترها وعارف الحال وأهو المدير بتاعنا الله يكرمه عاملنا أوضه في فيلته الجديدة عشان كلنا بقى نبقى نغير يعني هدومنا هناك وكدة
-أوضة خصوصي؟
-آه مش بقولك كله يا جميل تحت السيطرة ومعمول حسابه بالملي
 - طب مش ممكن زمايلك يا ناصح  يشوفك وانت بتغير ويعرفو مين عم الشيتوس ده...... قصدي يعني مين اللي لابس لبس الشيتوس ويهروك تريقة بكرة في الشغل؟
-لا ياحبيبتي دول ناس واصلة وعارفين وفاهمين إزاي الناس اللي زيينا بتفكر؟
-إزاي يعني مش فاهمة؟
 -أصلهم نبهو علينا إن كل واحد مننا لازم بيحضر في ميعاد معين بالظبط وبالترتيب
-ميعاد معين؟
-آه ميعاد طبعا..مش بقولك نظام سيطرة وعلي مستوى؟ أكيد عايزينا مانتعرفش علي بعض و مين مننا لابس إيه وكدة، عارفنا ما بيتبلش في بقنا فولة،نظام داري علي شمعتك ..طب عارفة؟
-إيه؟ خير؟
- الواد برعي الساعي بتاعنا بيحكيلي، أصله على طول تقريبا هناك زبون مستديم،  بيقولي ولاد الإيه دول بيبقو عاملين حسابهم حتى في الاضاءة
- الاضاءة؟
-آه زي ما بقولك كدة وتقريبا عشان تعرفيش مين قصادك ومتنكر ..أمال مش بقولك سيستم ياحبيبتي سيستم؟... يعني ثقي وتأكدي إنه محدش ح يعرفنا هناك بتاتا
-بتاتا؟ ماشي ياحبيبي يا بتاع بتاتا إنت،  طب إنت وقبلت علي نفسك التهذيق وعادي
-التهذيق؟ كدة برضه؟ بقي الاحتفال يبقي تهذيق
-آه اتهذيق طبعا إنك  تلبس كدة يعني ،  الغريبة بقي إنك عايزني كمان اجي معاكم في حتة معرفهاش؟ وانت عارف إني ماليش في الكلام الفاضي ده
-كل اللي أعرفه إنك فقرية يا سعاد وتحبي الغم زي عنيكي 
-فقرية؟ الله يسامحك
-يا سعاد سيبك بقى من قاعدة البيت مش ح تنفعك القاعدة بحاجة وتعالي بقى وشوفي الدنيا والناس العليوي عايشين إزاي؟ عايزين نقب بقى ونكبر
-عليوي؟
-إيوة عليوي ولعلمك دول ناس كرما جدا كمان
-كرما؟
-آه والله كرما جدا، عارفة؟ المدير قال لنا بعضمة لسانه قدامنا كلنا لازم بقى يا أولاد كلنا النهاردة نبقي نجيب ستاتنا معانا ومن النهاردة ح  نكون كلنا عيلة واحدة مع بعضينا ولازم ننسى الفروق الإجتماعية خالص
-عيلة واحدة مع بعضشينا؟ حلاوتك إنت يا راجل يا إسبور، طب تصدق بقي إن المدير بتاعكم ده وربنا ما بينزليش من زور خالص؟
-من زور؟
-أه وربنا  راجل شايب وعايق
-عايق بقي ولا فايق اهو لنفسه إحنا يعني ح نناسبه؟
-مسكين وربنا يا عبده الحارة عملالك عقده في دماغك
- لا عقدة ولا حاجة ده طموح مش أكتر، طب تصدقي بقى إن المدير ده رغم الهليلة دي والأبهة دي ساعات والله بيصعب أوووي عليا؟
-يصعب عليك؟ ما يصعبش عليك غالي والنبي إنت اللي غلبان يا عبده ومابتعرفش حاجة في الدنيا دي خالص
-ما أعرفش؟
-آه ماتعرفش..وماتعرفش الرجالة أم عين زايغة..وربنا ده أنا أشمهم كدة من بعيد
-عين زايغة؟ يا ولية ده راجل محترم جدا ومهذب
-محترم؟ طب ده أنا وربنا أول ما شفته قلت الراجل ده فيه حاجة مش مظبوطة؟
-يا سعاد حرام عليكي ده راجل كبيروقد أبويا وكمان عايش لوحده من بعد ما مراته الجديدة سابته
-أكيد سابته من عمايله السودا وعينه الزايغة
-لا والله ده راجل طيب.... طب إنت عارفة؟
-خير؟
- ده أول ماعرف اني عمري مارحت الحفلات دي خالص راح علي طول مديني لبس ليا وليكي من عنده
-ياه ده كريم أوووي
-إنت بتتريقي؟ طب ده قالي إمبارح ...يا عبده أنا ح أزعل أوووي لو ماجيتيش إنت والمدام بتاعتك، مش بقلك ده راجل سكرة
-سكرة؟ لا يا شيخ..أنا بقي لا رايحة ولا منيلة
-براحتك
-براحتي؟..ده أنا بس م التفكير جالي صداع فما بالك لو روحت؟
تفكير؟ تفكير إيه؟
-تفكير في البلوى دي اللي عايزني ألبسها.....يالهوي يا أمى بقي على أخر الزمن عايزني يا راجل ألبس كات ومان؟ احييييييييه ده كان أبويا وربنا دبحني....عايزني البس بدلة جلد أسود ..........أحيييييه
-خلاص يا سعاد إنت ح تغنيها؟  أهو أنا عملت اللي عليا وعزمت عليكي وماترجعيش بقى تقولي ده عايز يروح لوحده؟ وإنت حرة وأهي بدلة الكات ومان عندك أهي وأبقي البيسها لنفسك في المرايا لما انزل وابقي إعمليلك كوباية حلبة محوجة وروقي نفسك واحتفلي...سلام  بقي يا كات .يا كاتماندو
-ياعبده ...ياعبده.....إستني ياراجل.............................مشي ...مستعجل أوووي؟ طيب يا إبن ستيتة .إنت ما صدقت؟....... بس ع العموم ده بعدك..... قال ماروحش قال؟ طب كويس....طب كويس إني عرفت اقنعه اني مش رايحة عشان بس يتطمن وياخد راحته، رجالة عينها زايغة بصحيح ومش عايزين غير الست الواعية...الست الدوقرم ...المفتحة اللي عينها في وسط راسها، قال ماروحش قال؟ طيب يا إبن ستيتة العامشة  

**************************************************************
بعد حوالي ساعة

-يا ستي ما ينفعش حضرتك تخشي بدون تنكر
-يا عمي انا لا عايزة اسهر ولا أتنيل أتنكر أنا بس كل اللي عايزاه ثواني أخش اشوف جوزي عبده وح اخرج علي طول
-يا ستي ما تجيبليش والنبي الكلام،  البيه صاحب الفيلا دي مش بيتفاهم وممكن يقطع عيشي لو عرف بس إني  دخلتك بدون تنكر
-يعني لازم أتنكر يا اخويا؟
-أيوة لازم عشان محدش يعرفك هو النظام  في حفلات سعادة البيه كدة
-طب ينفع أوريك البدلة دي بتاعة التنكرعشان بس تعرف اني مستعجلة ومفيش بس وقت البسها؟
-يا ستي ابوس أيديكي ما توجعيش قلبي معاكي،  طالما معاكي البدلة إتفضلي البسيها وخشي غير كدة مع السلامة وشوفي مصلحتك
-أمري لله ..بس هي فين دي الاوضة دي اللي بيقولو عليها عشان اتنيل واغير هدومي واتنكر؟
-عندك ع اليمين يا ستي.... وماتنسيش تبقي تحطي هدومك في أي دولاب م الدولايب اللي عندك جوة هناك وإبقي خدي المفتاح معاكي وبعدين ابقي سيبيهولي لما تخلصي...ماشي؟
-ماشي يا اخويا ومتشكرة خالص
-العفو وربنا معاكي  ...ربنا معاكي يا كات ومان
 ******************************************************
بعد برضة حوالي ساعة

-كفاية بقي يا عبده إنت مالك النهاردة يا أخويا؟ شارب حاجة ولا إيه؟
-ممممممممممم
- يخربيت كدة ياراجل،  هرتني م ساعة ما جيت
-مممممممممم
- يا لهوي يا أمي.... ده أنت يا رجل مابتعملش الحاجات دي لما بنكون لوحدينا
-ممممم
  -حبكت  دلوقتي يعني تعملي فيها أسد الغابة؟
-مممم
- أهدي شوية بقى ياعم الشيتوس عايزه أشوف الحفلة  
- مش قادر يا قطة
- قطة في عينك راجل طفس ما البيت موجود ياراجل ح اروح منك فين يعني؟
-ممممممممم
 -حبكت هنا يعني؟ ما انا علي طول مرزية في البيت ولا حتى بتعبرني؟
-مممممممممم
- ولا انت يا راجل عامل زي الشريك المخالف بتحب المغامرات؟  وبق ع الفاضي؟
-ممممممممم
 -وربنا لو ماجتش معايا دلوقتي وروحت حالا لامشي لوجدي واسيبلك الحفلة تشبع بيها يا أبو عين زايغة؟
-خليكي يا قطة
-أنا غلطانة وربنا اللي سمعت كلامك وجيت مكان زي ده،  أنا مروحة يا عبده وإبقي خلي الشيتوس ينفعك، يالا باي
*************************************************
بعد حوالي خمس ساعات

-حمد الله ع السلامة يا عم الشيتوس كل ده في الحفلة؟
-الله يسلمك يا سعاد
-أمال ياراجل لو ما كنتش وحشاك  كنت جيت إمتي بقي؟
-إسكتي والنبي يا سعاد بلا حفلة بلا كلام فاضي
-كلام فاض؟
-أيوة وربنا إنت كان عندك حاجة بجد حاجة مملة وتعل جدا، ده هم يا دوبك خمس دقايق قعدتهم بالعافية ورحت قالع ام البدلة الهذق دي ورميتها في وش المدير وقلتله بقى انا بصراحة راجل بلدي وابن بلد وماليش في الحاجات دي ورحت واخد بقية العيال أصحابي ورحنا قعدنا ع القهوة ونسينا نفسينا وقعدنا نشيش للصبح
-يا نهار إسود...يا لهوتي يا اما...أحيييييييييييييييييييييييييييييه
-لا ماتخافيش يا سعاد المدير ده راجل اسبور جدا وما زعلش اني رمتله البدلة في وشه ...طب تصدقي ده إتصل بيا تاني وبيشكرني جدا إني  إديته بدلة أم الشيتوس دي في وقتها  لانه بصراحة بيقول إنه لما لبسها  الليلة كانت وش السعد عليه



7 comments:

faroukfahmy said...

جميله قوى يا تركيب والمدير خد راحته مع مراته والبركه قى الاقنعه

I.G.B said...

هما كده النسوان .. مايعجبهمش العجب ولا الصيام عن الشيتوس ..!

بسمة الورد said...

هههههههههههههه .. انت مشكله وربنا

walaa tulip rose said...

تسلسل ممتاز ،، بس معرفش ليه شوفتها سياسة ساخرة اكيد هاجي اقراها تاني ،،، تحياتي

طيوري said...

ههههههههههههه
مفتحة ودوقروم يعني مش اي كلام
من حفر حفرة لاخيه اتدقرم فيها
انت مشكلة وكتاباتك دايما نهايتها غير متوقعة
تسلم الايادي
وماتنساش ت #انتخبوا الشيتوس هههههههههههه

Aml Hamdy said...


ماكانت سمعت الكلام من الأول
هي تستاهل
جميلة يا تركيب

Carmen said...

هههههههههههههههههههههههه يالهووووى .. بس كده :D :D