Sunday, February 22, 2015

مفيش فايدة





-خير يا دكتور طمني الله يخليك؟
-للأسف يا حاج سعد مفيش فايدة
-ليه كدة بس يعني مفيش حتى أي أمل؟
-للاسف لا
-حاول تاني والنبي يا دكتور يمكن تلاقي أي مخرج
-حاولت صدقني بس ع الاقل عندي لك خبرين
-خبرين؟ طب ماهو في أمل أهو يا مسهل يارب
 -بس للاسف يا حاج سعد فيهم واحد بصراحة وحش
-وحش؟ لا بقى الحكاية مش ناقصة، طيب خلينا في الحلو يا دكتور ربنا يكرمك
-يعني مش ح تزعل يا حاج لو قلتلك؟
-إزعل؟ بالذمة ده كلام؟ حد يزعل م الاخبار الحلوة؟ ده الغريق بيتعلق بقشة يا دكتور
-غصب عني والله يا عم سعد
-قول بقي يا دكتور سيبت مفاصلي
-شوف يا حاج سعد إنت للأسف ح تعيش بالكتير يومين بحالتك دي
-يا نهار أسود إنت بتقول إيه يا دكتور؟ يومين مش ممكن؟ هو ده بقى بالذمة الخبر الحلو؟ بقي ح أعيش يومين وتقولي ده حلو؟ بذمتك ده كلام؟  ده كلام؟ هو فيه بذمتك أوحش من كدة؟
-في يا حاج
-لا والله ما في أوحش من كدة
-لا في ياحاج وخليني ساكت
-خلاص قول بقي،  قال ساكت قال؟ ما خلاص خربت بقى يا دكتور، قول بقى لو سمحت، وصدقني وربنا مش ح ازعل، مش ح أزعل صدقني
-شوف يا حاج سعد الخبر الوحش هووو
-يادكتور قول بقي أبوس إيديك، العمر بيجري خلاص وإنت سيد العارفين
-شوف يا حاج الخبر الوحش هو إني بقالي يومين عمال أحاول أوصلك عشان تعمل حسابك بسرعة بس للإسف حضرتك كنت قافل الموبايل بتاعك

28 comments:

Unknown said...

أول تعليق
ههه

Unknown said...

يعنى الراجل راح فى توكر
ههه

Unknown said...

إذا كان الراجل هيموت بعد يومين فيه ايه اسوأ من كده
ههه
واضح ان الدكتور شاطر أوى
وكمان بيعلم الغيب
سبحان الله فيه دكاتره اغبيه كده فعلا

Tarkieb said...

مدونة الفرسان

مبروك عليك الجائزة الكبري هههههههه

Tarkieb said...

دونة الفرسان
هههههههههه في ان اللي مش عاجبه يومين ح يترحم عليهم ويقول ياريت اتنين حتي حلوين ونحمد ربنا عليهم لكنهم كمان راحو
قال تعالى" رب لولا أخرتني إلى أجل قريب فأصدقَ وأكنْ من الصالحين
صدق الله العظيم

طيوري said...

الله يرحمه
كان طيب الحج سعد ده
التاتش بتاعك دايما بصمة مميزة
تسلم الايادي
استمر

زهــــراء said...

هو اغيب ساعتين أرجع الاقي الأخ الفرسان محتل الكومنت الأول اشمعنى المره دي نسيت تنادي عليا
ماسي ماسي ههههههههه
هاقرا واتمزج وارجع تاني جيت أثبت حضور يل عمي تيكو و

😁😁😁😁😁😁😁

Tarkieb said...

طيوري
الله يرحم الجميع ويرحم ايام الدكتور ده كان في واحد جارنا فاتح عيادة ماكانش حد بيروحله الا ساعة ما يكون المريض اصلا ايدك منه والقبر وتقريبا كان مش بيرضي ياخد منهم فلوس لانه اول ما كان بيشوف المريض بيقولهم ده مش ح يكمل وفعلا كان راجل خبرة في تحديد مين ح يكمل ومين ومش حيكمل..الاعمار بيد الله صحيح بس لما بيبقي حالة المريض متاخره جدا يبقي لازم التوقع ...منورني ياعم الحاج طيوري

Tarkieb said...

زهــــراء

ههههههه الراجل معاه سلاح الفرسان يعني سريع ان شاء الله تكسبي المرة الجاية وخاصة ان الجايزة معنوية ...ومستنين رد بعد القرايا

زهــــراء said...

والله الدكتور ده سكره ليه بيصارح عمو سعد بالحقيقه الله يرحمه بقى
في بعض الأحيان الدكتور مش المفروض يصارح المريض بحالته ومريت عليا تجربه كده هاحكيها بعد شويه نويت اعمل احتلال لغايه ما تيجي تقولي امشي من هنا 😉😉😉😉😉😉

Tarkieb said...

زهرا
الواحد لو خلاص عرف انه العمر انتهي ممكن يلحق نفسه حتي لو له ورثه يجمعهم ويوصيهم علي بعض بدل ما يهتم بحاجه خلاص توووو ليت ومفيش منها امل ..بصراحة الدكتور عنده ضمير ونورتيني وطالما ح تحكي ح اقولك امشي ليه البلوج ده منبر لمن ليس له منبر ولو انك عندك منبر شرك هههه مع لول

زهــــراء said...

تيكو
موشكرين على إتاحة الفرصة بمناسبه كلامك من فتره كنت عملت بوست بعنوان باقي من الزمن ساعه وكانت فكرته لو باقي من عمرك ساعه هتعمل فيها ايه
دخل حد ابن حلال استلم الكومنتات واني كافره وأزاي بافكر بالطريقه دي وخد كلام من العيار الثقيل

يلا كفايه رغي نروح نرغي في المنبر بتاعي وعلى فكره عندي منبر آخر لوحدي على الفيس إسمه شروق إنسان
عن جد مبسوطه بانتظامك في التدوين بس برضه لازلت باطلب منك حاجه صوتيه واعلم انك رجل كريم واحنا نستاهل ولا إيه
تحياتي وتقديري
😊😊😊😊😊😊😊

رحاب صالح said...

ههههههههههههه
يا عم حرام عليك

بسمة الورد عطر المشاعر said...

واضح جدا انه مافيش فايده ههههههههههه
مساء الورد عليك تراكيب

Unknown said...

تفتكر أنهى أحسن؟
انه كان عرف ولا انه معرفش؟
مش عارفة والله ياتراكيبوا
انه عاش اليومين مبسوط
ولا أنه كان حضر نفسه
واهله للنهاية؟
بجد سؤال صعب

أمل حمدي said...

االله يرحمه :)

Tarkieb said...

زهــــراء
كنت قوليله لو حرام وكفر ماتجيش هنا وكبري دماغك م العالم دي امال انت فاتحة ليه عشان تتناقشي ولا اقولي امين ...فكرتيني بواحد في سايت المجحوم عمر اتيب لما عمل كده معايا ورديت عليه بقاضي القضاة ودخل يقول حلوة هههههههه

Tarkieb said...

رحاب صالح
منور يابنفسج وتسلم

Tarkieb said...

Ebtesam Hoseen

ايوة ماتغيبيش عن الابداع ياقطر الشعر الحديث

Tarkieb said...

norahaty mo

انا بحب المدرسة الالمانية في المصارحة بجد حلوة بس ساعات صادمة بس لازم ساعات...نورتني يانور

Tarkieb said...

Aml Hamdy

قافلة البلوج ليه يا ست الكل؟ فين ابداعك متوقف

موجة said...

ده كده هيموت حالاً .. ماكانش قتاله وخلاص وسابه يواجه مصيره :)

Tarkieb said...

موجة

بصراحة حبيت ارد عندك مقدرتش لقيت كلام اوفر اوووي في اخر بوست.. ..ربنا يفتح أعينا جميعا إلي طريق الحق ...

Anonymous said...

هههههههههه
لا بجد حلوه اوى اوى
تحياتى
سعيده بمرورى هنا
تقبل مرورى

Mohamed Ashri said...

هههههههههه
ناااااااااااو يا حلو ..


وحشنا تركيب باشا ..

Tarkieb said...

قمر وليل وغيوم
الحمد لله انها عحبتك يارب ما تكون اخر زيارة

Tarkieb said...

Mohamed Ashri
والله انت اللي وحشنا اعمالك جدا ربنا ما يحرمني من طلتك

Tarkieb said...

Mohamed Ashri
والله انت اللي وحشنا اعمالك جدا ربنا ما يحرمني من طلتك