Saturday, October 3, 2015

سعد الأبيض






-إسمعي كلامي يا نوجة، إوعي تتجنني بقى ولا يطلع حتى في دماغك إنك تقاوميه أو تقوليله لأ
-إنت بتقول إيه؟ بقى هي دي بالذمة المرجلة يا سعد؟
-مجبرين يا ستي مجبرين، وبقى خلاص شعار المرحلة دلوقتي كدة
-مجبرين؟ يعني أسيب الراجل يغتصبني؟ إخص....ياعيب الشوم و قدامك كمان ..أحييييه يا أولاد
-يا ولية إسمعي الكلام ماهو لو ما نفذناش كلامه ممكن يموتنا، يرضيكي يعني كده؟ يرضيكي نموتو فطيس؟ طب مين ح يربي العيال من بعدينا؟ طب بلاش عشان خاطري.. عشان خاطر العيال، و الضرورات بتبيح المحظورات وربنا غفور رحيم يا حبيبيتي
-يتحرقو العيال ، ده أنا أموت يا أخويا بشرفي أحسنلي ولا حد تاني غيرك يلمسني
-أصيلة يا نوجة بس نعملو إيه؟ على عيني
-على عينك؟ طلعت عينك ياراجل يا ناقص
-يا وليه إفهمي.. عارفة؟ لو ماكانش المجرم ده اخدني على خوانة كنت وربنا سويت معاه الهوايل وما خليت فيه نفس، بس يالا بقى النصيب
-النصيب؟ بلا وكسة.. بلا خيبة ...يا راجل ده إنت ما أخدتش في إيديه غلوة
-غلوة؟ كدة برضة؟
 - طبعا كدة وأبو كدة كمان..إنت نسيت إنه ربطك في الكرسي بكل سهولة؟
-حكم القوي بقى يا نوجة
-حكم قوي إيه ونيلة إيه؟ يا راجل ده إنت كنت مستسلمله وعامل زي الخروف في ليلة العيد
 -خروف؟ أنا برضه يتقالي يا خروف؟
-يا أخي إتوكس، طب كنت حتي هوشه باي كلام وطحينة، طب كنت أصرخ.. كنت زعق .. إعمل أي حاجة
-أعمل إيه بس؟
-إعمل أي حاجة والسلام
-يا ولية عايزاني بالذمة أقاوم واحد زي ده طول بعرض وعامل زي الدولاب
-يا سيدي كان كل المطلوب منك يادوب بقيين حمضانيين وخلاص
-ما أنت عرفاني؟
-عارفاك؟ هو يعني كان الواحد قالك إضربه ولا عوره؟ كان نفسي يا سعد وربنا بس تعملك منظر وخلاص، عشان بس ما يكونش شكلك وحش قدامي يا راجل
-يا ستي ربنا عرفوه بالعقل برضه، هو ده يحوق مع أمه بق ولا بقين؟ مش جايز يطلع ظابط ونلبس قضية إرهاب؟
-ظابط؟
-آه ممكن أووي.... يا ولية ربنا يسترها معانا ده إحنا غلابة وماشيين جنب الحيط وبنكمل عشانا نوم
-سععععععععععععععد
-عارف بس عشان خاطر العيال يا ولية
-عشان خاطر العيال؟ ياريتيك تتصرف قبل ما العيال يجو ويشوفونا بالشكل المهبب ده
-أتصرف؟ طب يعني أعمل إيه أنا بس؟ ما إنت شايفة الإيد قصيرة ومربوطة كمان يا نوجة
-طيب ياسعد براحتك خليك كدة سلبي
-سلبي؟ الله أعلم بيعمل إيه كل الوقت ده كله جوة في قلب الحمام؟
-ينيله راجل..مش ممكن.. ده ريحته تقولشي صفيحة زبالة ومعفنة، ده أنا وربنا كان ح يغمي على م الريحة بتاعته وهو عمال بيربطني في السرير
-شكله باينه مجرم أووي يا نوجه وبصراحة مايمشيش ظابط خالص
- ماهو مش ظابط يا سعد ، ده مجرم وبحق و حقيقي ولسه هربان طازة م السجن
-مجرم؟ وعرفتي منين ده كله يا نوجة؟
-كان عمال بيتنيل بيحكيلي وهو كان بيربطني في السرير
-بيحكيلك؟ ولا بيبوسك في رقبتك يا مجرمة
-مجرمة؟ وده إيه بقى كل الحمشنة دي ياعم سعد؟ مرة واحدة كدة؟ لا حوش حوش، ياراجل إنت مش كنت من شوية لسه قايلي سيبيه يعمل اللي عايزه وربنا غفور رحيم
-لا بقى دي نقرة ودي نقرة
-نقرة؟
-أيوة وع العموم إنت لو لفيتي الدنيا كلها يا نوجة وربنا عمرك ما حتلاقي حد برجولتي
-برجولتك؟ يا صلاة النبي
 -أيوة طبعا وإحمدي ربك يا نوجة..لإنه خلاص دقت ساعة العمل.. جه الوقت خلاص اللي ح تبان فيه رجولتي وبطريقة عملية
-رجولة؟ هي فين الرجولة دي ؟ أنا مش شايفة حاجة..بلا خيبة، بقى تقولي أسيبه يعمل اللي هو عايزه فيا وأنت قاعد زي خيبتها وتقولي رجولة؟ بلا وكسة
-مسكينة يا نوجة...الرجولة مش تستسترون بس
-تستسترون؟ لا ياشيخ؟ أمال إيه بقى؟
-الرجولة أدب وحكمة ... الرجولة انك تتفهمي الظروف وتعيشي اللحظة بلحظة،
-بلا وكسة
-الرجولة تكوني ستر وغطا وتقفي جمب مراتك وتشدي من أزرها وقت الشدة
-لا والنبي؟ وفين سترك ده؟
-يا نوجة حادث زي ده، وطبعا أنا عارف إنه أكيد مش بايديكي، بس مين م الرجالة بعدها مش ح يتغير أو يتصدم أول مايحصله ده؟
-بصراحة ما اعرفشي
-شفتي بقى يا نوجة الفرق بيني وبين كل أشباه الرجال؟
-أشباه رجال؟
-آه طبعا ده الواحد منهم بعد ما مراته تتعرض لموقف كدة مش ولابد بتلاقيه على طول إتغير وسابها
-صحيح رجالة رمم
-شوفتي بقى الرجولة مش بس ستر وغطا دي كمان مساندة وفي وقت الشدة
-يعني الرجولة مساندة؟
-أيوة يا نوجة وتضحية كمان
-تضحية؟
-أيوة وطبعا من أجل الأولاد ..وكله عشان بس المركب تمشي
-بقى هي دي الرجولة في نظرك يا سعد؟
-أيوة ..وبصراحة هي دي قمة الرجولة ..وإسمعي كلامي بقى وبلاش مناقشة يا نوجة ح تكسبي وننجى إحنا الإتنين
-الحمد لله وربنا ما يحوجني لرجولتك دي يا سعد أبدا
-نوووووووووووووووووجة
-بلا نوجة بلا زفت، ربنا يقويك بقى يا بطل ع اللي جايلك وشيل يا معلم
-شيل يا معلم؟ قصدك إيه يا نوجة؟ أشيل؟ مش فاهم
-شوف يا سعد المجرم ربنا يكرمه
-ربنا يكرمه؟
-آه طبعا وهو بيربطني طمني وقالي ما تخافيش عمري م ح ألمس شعرة منك
-بجد؟ بجد يا نوجة؟
-آه والله
-الحمد لله يا ما أنت كريم يارب..جات من عند ربنا يابت
-بس ....
-بس إيه؟ في إيه تاني؟
-أصل الحكاية يا سعد إنه ....لا مؤاخذة يعني ....
-إنه إيه؟
-إنه طول المدة الطويلة في السجن دي تقريبا ماعادش بيحب الستات خلاص
-طب ما هو ده حاجة كويسة.. من حظك بقى يا نوووجة و الحمد لله فلتنا بقى
-لا ما فلتناش ولا حاجة يا سعد
-ما فلتناش؟ طب إزاي بقى؟
-أصل الراجل بصراحة أول ما شافك قال هو ده اللي بدور عليه من زمان ومستعد أخش السجن تاني بسببه
-بيدور عليه؟ إزاي يعني مش فاهم
- قال يعني إن جوزك أبيض وملظلظ ويجنن
-أبيض وملظلظ؟ ده أنا؟
-أيوة وحليوة كمان يا سعد
-ده أنا؟
-آه والله زي ما بقولك كدة
-إنت بتقولي إيه يا ولية؟
-بقولك أتاريك عجبته أوي يا سعد...وقال هو ده .. ورزقي بقى في رجليا
-مستحيل
-ماعرفش بيحب فيك إيه يا سعد؟ تقريبا ذوقه منيل زي ريحته ..المهم يالا بقى ورينا الهمة والتضحية.. قصدي الرجولة يا سعد، رجولة يا سعد وبلاش عشاني...عشان خاطر العيال يا بطل



11 comments:

زهــــراء said...

الأول ربنا يستر وما يكون سعد الأبيض اخو ابراهيم الأبيض
مسا الفل

زهــــراء said...

ايه ده بقي الكومنت راح فين يا عمي

زهــــراء said...

اه اخدت بالي ان في رقابه على التعليقات يا عمنا نوجه دي ست واعيه كده وعرفت تلبش عم سعد وتخليه يكلم نفسه وممكن يتجنن على ما عمو الحرامي يخرج من الحمام وبعدين انت ايه حكاية الحمام معاك والروايح الفواحه ههههههههههه
انت عارف الحرامي اصلا جاي ياخد شاور عندهم عشان المايه قاطعه في بيتهم واحنا اللي نيتنا وحشه اوي وهو اكيد من الجيران وانت عارف طبعا الجيران لبعضها
يلا بقى ربنا يجازي عم سعد على قدر نيته

Tarkieb said...

زهــــراء

ههههههههههه مبروك عليكي المركز الاول ماعلش عامل رقابة الراجل بتاع النمل هاريني قلت اريح أمه وما انوهاله

Tarkieb said...

زهــــراء
هههههههههه ح نشوف عم سعد قد كلامه ولا بق ...الراجل صح جاي يستحمي بقاله خمستاشر سنة ما أستحماش

طيوري said...

ههههههههههههههههه
كالعادة ملك المفاجآت والنهايات الغييير متوقعة
سعد الابيض ده اكيييد برهامي الهوى والمعتقد ههههههههه بس بلا خد الشر وراح
على نياتكم ترزقون هههههههه
بجد فنان ماشا الله الحوار مش ممكن سيناريو متقشر على التمثيل على طول
مبدع دايما في كله
تحياتي وبالتوفيق دايما يارب

Tarkieb said...


طيوري
ههههه برهامي الهوي صح واهو طلع يتحب اهو ابيض وحليوة يالا بقي رزقه

محمد سلامة said...

حلوة ومش بطالة :)

Ebtesam Hoseen said...

مساء الابداع والفلسفه والسرد الراقى تركيب

جميل كالعاده يدوم الابداع .. كل الود

Tarkieb said...

محمد سلامة
انت احلى...نورتني

Tarkieb said...

Ebtesam Hoseen
حمد الله ع السلامة يا فنانة...دايما مبدعة