Thursday, September 10, 2015

الجيران لبعضيها



-ألو
-
أيوة مين معايا
-
أنا نادية، نادية جارتكم اللي في الدور التاسع
-
نادية؟ آه نادية..نادية الصاروخ؟
-
أفندم؟
-
سوري .. قصدي علي الجون اللي جه دلوقتي في الماتش
-
آه الجون
-
بس غريبة جبتي رقمي منين؟
-
اللي بيدوّر على حاجة بيلاقيها يا تامر
-
تامر؟ ياه أول مرة أحب اسمع إسمي ..ياريت تقوليه تاني.. تاني لو سمحتي يا آنسة
-
آنسة؟ إيه بقى لزومها الرسميات دي ... خليك إيزي يا تامورة
-
إيزي؟ حلاوتك يا أبيض
-
أفندم؟ أبيض؟
-
لا أنا قصدي ع الزمالك أصله عامل شغل جامد أووي النهاردة
-
جامد أووي يعني؟
-
جامد؟ ..إلا جامد...ده جامد أوووي...ده جامد ويعجبك
-
بقولك إيه يا تامر؟
-
عينيا
-
فاضي النهاردة؟
-
فاضي؟ إلا فاضي ده أنا مقطوع وقاعد على طول في البيت ومواريش اى حاجة خالص النهاردة
-
حلو جدا يا هاني
-
هاني؟ لحقتي تنسي؟ تامر ...أنا إسمي تااااااامر
-
سوري يا تامر..شوف بقى ...اصل ماما وبابا خرجو من شوية
-
خرجو؟ جميل...ممممممم
-
آه وانا بقي قاعدة دلوقتي لوحدي و زهقانة خالص
-
لوحدك؟ مممممممممم
-
آه وبصراحة كدة أنا مابحبش أقعد لوحدي
-
وانا كمان و الله
-
ومصدقت ماما وبابا خرجو قلت أغير جو
-
وانا كمان و الله من حظي بقى
-
نعم؟
-
قصدي يعني الحرية وكدة
-
آه الحرية والفسح بحبهم أوووي...بس للأسف هم متذمتين اوووي
-
متذمتين؟ واوووي؟ هم مين دول؟
-
ماما وبابا يا اخي......مش تركز بقي معايا؟
-
معلش أصل الماتش سخن اوووي
-
وأنا كمان
-
نعم؟ إنت كمان إيه؟
-
أصل الشقة عندنا حر نار ومحتاجة ضروري أشم هوا
-
والله فكرة جميلة برافو عليكي
-
مش كدة؟ إيه رأيك؟ بس.. بس في مشكلة كدة صغننة
-
مشكلة؟ مشكلة إيه خير؟
-
المشكلة بس إنهم لو عرفو اني خارجة مع ولد ممكن يطينو عيشتي
-
لا ماتخافيش هم يعني ح يعرفو منين؟ إتكلي ع الله و انا جاهز وسداد
-
ميرسي أوي ياهاني ربنا يخليك ليا...مش ح اوصيك بقي
-عينيا
 -خلاص ح استنى منك رنة
-
رنة؟ إيشمعني يعني رنة؟
-
رنة ياراجل ماتعرفش الرنة؟ ...شوف ياسيدي.... اول ماتلاقي بابا وماما داخلين كدة في العمارة تقوم باعتلي رنة على طول عشان بس ألحق أنزل
-
تنزلي؟ تنزلي منين؟
-
من عند أحمد....أحمد جارنا اللي في آخر دور 
-أححححححمد؟
-
ايوة أحمد .. أصلي ح اطلع عنده دلوقتي عشان نتفرج ع الماتش سوا

29 comments:

طيوري said...

Enter your comment...هههههههههههههههههههههههههه
مش مممكن على الفصلان يخربيت كدة
كالعادة نهاية غير متوقعة من تركيب ملك الموفاجعات
تسلم ويسلم دماغك

طيوري said...

التعليق مكانش عايز يتبعت عملت كوبي فاخد معاه تنبيهات بلوجر
انتر يور كومنت

Tarkieb said...

طيوري
هههههههولا يهمك اهم حاجة عجبتك ومبروك عليكي المركز الاول والتاني كمان

P A S H A said...

معقول هتلحق تلبس قصدي تنزل بعد ما يرن لها؟؟ .. الأحسن أن أحمد ينزل لها وتامر يطلع لها (أه كله إلا بر الوالدين!!) .. وتامر يقف في البلكونة يشجع ويتفرج (بس بأدب طبعاً) ويراقب مدخل العمارة .. أول ما أهلها ييجوا يقول: الجمهور نزل الملعب!! .. باقول الجمهور نزل الملعب!! .. (يطلع خرزانة ويضربهم بيها) .. وزي ما احنا شايفين؛ الأمن اتعامل معاهم واللاعيبة طلعت تجري ملط :D

قمة الامتياز said...


شركة مكافحة النمل الابيض بالقصيم

طيوري said...

يخرب بيت كدة
هو ماينفعش تعمل بلوك للنمل؟

Tarkieb said...

P A S H A
ههههههه ليه كدة ده الجيران لبعضيهاياراجل...فرجة تليفزيون مش اكتر ..جيران بقي والنبي وصي علي سابع جار...ماتروحش لبعيد
D;..

.نورتني يا باشا...تعليقك فصلني

Tarkieb said...

رمة الامتياز
...ارحم امي .

Tarkieb said...

طيوري
بلكته

رحاب صالح said...

هههههههههههههههههههههههههههههههه
الصراحة متوقعتش النهاية دي
بس بجد جامد جدا البوست

زهــــراء said...

تامر واحمد وهانى اعتقد انك لو طولت البوست شويه كان احتمال نلاقى عمر ومجدى ووائل وهيثم العماره نقولى عشر ادوار وهى طالعه الدور العاشر عشان الهوا حلو والطرواه كمان انما نية الشعب المصري تيييييييييت دماغنا رايحه فى حتت عجيبه يا اخى
وبعدين الجيران اقرب من الاهل وخد بالك ان رضا الوالدين اهم من رضا ابوك وامك والبنت فعلا حريصه على ان ابوها وامها مايزعلوش انها حقا عائله محترمه
مسا السعاده والضحكه اللى من القلب على حالنا

طيوري said...

ههههههههههههههههه
انا ضحكت على تعليقك لرمة الامتياز
ههههههههههههههه
شكرا انك بلكته بجد اعوذ بالله

طيوري said...

نسيت اقولك الله يرحم امك ويغفرلها افتكرت قصيدة الام اللي كنت كاتبها

romansy said...

ههههههههههههههه حلوه يا هانى
طب كان فيها ايه يعنى لو سمعت الماتش معاهم

Tarkieb said...

رحاب صالح
هههههههههههه طب كويس انك ما توقعت النهاية كدة انا نجحت ...نورتيني

Tarkieb said...

زهــــراء
هههههههههه مساء النور والله برافو عليكي الناس بقت نيتها وحشة فيها ايه لما تشوف مع احممممد هههههههه ...الناس لبعضيها برضة

Tarkieb said...

طيوري
ده شخصية خنيقة وتقريبا ح يخليني احط تاكيد الكلمات في التعليقات عشان يتبط

Tarkieb said...

طيوري

الله يرحم الجميع وميرسي

Tarkieb said...

romansy
هههههههههههههه احمد عامل زي الفريك مالوش شريك بقى نورتيني

Aml Hamdy said...

وحشتني يا صديقي

Tarkieb said...

Aml Hamdy
عاش من شافك يارب تكوني بخير ةيقويكي ويصبرك

طيوري said...

يخربيته ده جه تاني
بتاع الصراصير هاااز نو ايند
هههههههه
قولوا محتاجين دوا الحشرات بتاعك دة عشان نرش منه هنا هههههههههه
يخربيت البرود بجد

richardCatheart said...

ههههههههههههههههههههههههه طبيعى هو متخيل انها كانت غاويه هو هههههههههههههه ... جميل يا تيكو

norahaty mo said...

انا بسلم وامسى
بقى لى مدة ما
سلمتش
كيف الحال؟

norahaty mo said...

أول شىء خطر على بالى
هو المثل العامى بتاعنا
طمنى بنى له بيت
فلسنجى سكن له في

Tarkieb said...

طيوري
هههههههههههه ده راجل رمة خلاني اقفل التعليقات واعملها بكونترول

Tarkieb said...

richardCatheart

هههههههه انت جيت يارمضان حمد الله ع السلامة شهقة يامنيل ههههههههه

Tarkieb said...

norahaty mo

الله يسلمك فينك من زمان

Tarkieb said...

norahaty mo

طمعنجي عايز فلوس فلسنجي يجيب منين ههههههههه لسه فاكره اهو