ياترى هى كمان بتفهم لغة العيون ؟ ما اظنش؟ لو كان كدة بصحيح؟ كانت حست بقى من زمان..... آه من زمان أوووي .....طب هى ليه دلوقتي ماعادتش بتلبس الدبلة خلاص زي زمان؟ هى سابت خطيبها؟ ولا بتخلعها بس كدة وكدة قدامي يعني ؟ آه ...يبقى أكيد خايفة على مشاعري ومش عايزة تضايقني .. يمكن حست اني بأغير عليها أووي؟ ...آه .....ممكن.....ياحبيبتي...بحبك بجد أوووي ...بس هو ايه اللي ممكن ده يا واد؟ قصدك ممكن اي حاجة؟ ....ممكن اي حاجة من دول والسلام؟ ....بس انا حاسس وربنا وأنت عارف ان احساسي دايما كدة ما بيخيبش أبدا.....شكلها سابته وأكيد عشاني....أيوة عشاني ....ويارب ...ويارب تكون بقى بجد سابته مش أشاعة ...يسمع من بقك ربنا.....انا مش عارف هى بتحب فيه ايه ده الراجل ده؟ ده راجل كبير اووووي وشكله بجد الزمن مبهدله خالص ولا دمه بصراحة يلطش وتحس كدة انه منشي كأنه راضع نشا وربنا....طب لو انا صرحتلها دلوقتى بحبي تفتكر مش ممكن بقى تستناني؟ قصدي تستنى لحد ما اخلص يعني واشتغل بقى وأكون نفسي؟ طب وليه لأ؟ هو مين عارف يعنى أنا بكرة ح أبقى أيه؟ تفتكر؟ آه بفتكر ... مش اللي بيحب حد بيستناه برضة؟ آه طبعا بيستناه ونص كمان..عندك حق ...وبعدين أنا لسة المستقبل طويل أووي قدامى...وبعدين أنا بحبها بقى ياعمى ......طب أعمل أيه؟ .فاهم باحبها.......والله اول مرة اعرف معنى الكلمة دي ...أصل ده أول حب ليا بقى وأكيد ح يكون آخر واحد أن شاء الله ...دي جمال...ثقافة ...وثقة بالنفس....كله كله ...وربنا مافيهاش أى عيب خالص....طب وهى؟ تفتكر هى كمان بتحبني زي ما انا كدة بحبها؟و ياترى هى كمان واخده بالها من نظراتي الدايمة ليها ولا لأ؟ طب ياترى هى حاسة بقى بدقات قلبى اللي تملى بتعلى لما باكون جنبها؟ طب مش ممكن كل ده يكون برضة تهيؤات وانا بخيبتي مش واخد بالى؟ تخيلات يعني؟ قصدك كدة؟ آه جايز ..وليه لأ؟ هو يعنى انا كنت دخلت جوة قلبها؟ اخش جوة قلبها؟ ياريييييت .دة أمنية عمري اني ادخل قلبها وما اخرجش منه أبدا....بس هي صوتها بصراحة بيقول برضة ....بيقول برضة انها احتمال تكون واخدة بالها مني وبتداري عشان محدش يتكلم علينا .عشان مش عايزة مشاكل ...صح؟ أية رأيك؟ تصدق احتمال......بصراحة أنا كل لما باسمع صوتها وربنا بانسى الدنيا خالص وعشان كدة انا خايف...أووي ... خايف بجد ان كله ده يكون تهيؤات....تهيؤات عندي؟ يالهوي دي تبقى مصيبة .....يالهوي.....لا ما اظنش ....قال تهيؤات قال؟..طب ايه رأيك بقى؟ اني أنا تقريبا أتأكدت خلاص دلوقتي أنها أكيد واخدة بالها بقى مني و كمان من زمان اوووووي ..وأكيد ملاحظة كمان انى على طول مركز وباصص تملي على شفايفها...اه والله .... على طول بابص عليهم....اصلهم بجد حلوييين اووووي ..حلوين؟ أنت ح تقولى؟ دول وربنا افترى انا عمرى ما شفت شفايف بالحلاوة دي قبل كدة.....انا بجد لما باشوفهم تصدق وربنا بانسى الدنيا....عارف والله ساعات باسرح كتير وبتخيل انى خلاص عمال ابوسهم ..اه بابوسهم.....دي الصراحة ..وبابقى مش عايز اصحى م الخيال دة أو حتى ابطل بوس....بس الحقيقة هى كمان عمرها ما اتضايقت منى او حتى اعترضت أنى بعمل كدة معاها حتى ولو في خيالي ...يبقى بتحبنى ؟ صح؟ اه يبقى اكيد بتحبنى.....الله يطمنك....انا متأكد ....بس المشكلة بتاعتي هى التردد المنيل اللي مش عارف أتخلص منه ..ايوة التردد أوالخجل ....كل مرة اجى افاتحها وابقى عايز خلاص اقولها...الاقي لساني الخايب مش مطاوعني...لدرجة ان الكلام ساعتها بيطير من دماغي خالص...كل مرة اجى واقولها الحقيقة اللي كاتمها من زمان بأحس ان ده مش وقته ولا مكانه ياواد....طب تعرف؟ أنا من شوية كنت خلاص لسه ح اقول لها وما كانت تفرق بقى أذا كان ده قدام الجميع ويحصل بقى اللي يحصل ...المهم عندي كان اني أقول وخلاص ولسة كنت ح اقولها لاقيتها راحت قالت لينا...ايوة قالت لينا كلنا مش أنا بس ....يالا يا اولاد افتحو الكتاب قلت كتاب ؟ قالت أه طبعا الكتاب أمال نعمل ايه غير كدة؟ وعلى الدرس الاول كمان يا شطار ...أحنا ضيعنا وقت كتير ...وقولو ورايا يالا .. ... قولو ورايا...........تفتكر كنت أقدر أفاتحها في الوقت ده ؟ طبعا لا ........وبعدين فول ايه ده اللي عادل بيزرعه أوبيتنيل بيحبه؟ بالزمة حد بيحب الفول؟ ده أيه أم الرومانسية دي يا عم عادل؟ انا باحبك انت ياستى؟ فاهمة ؟ أنت وبس...آه وربنا انت وبس...وكان نفسي بجد انك تفهميني بسرعة بقى من غير كل العذاب ده .أنا بجد بأستغرب ازاي أبلة بالجمال دة ومبتعرفش تقري لغة العيون؟ هي الحاجات دي عايزة دراسة ولا مدرسة؟ دي عايزة بس شوية تركيز وخلاص ......ياريتك بجد...لحظة ................................أية دة؟ يا لهوي ....أوعي تكوني واخدة بالك مني وانا اللي حمار ومش فاهم لغة عيونك؟
