Sunday, April 8, 2012

مولانا

-الله ينور عليك يا مولانا أهي دي بجد الدروس ولا بلاش

- شكرا يا اخي الكريم جزاك الله خيرا على كلامك الطيب هذا ولا تنسانا من الدعاء

- تصدق يا مولانا؟ أنا متابع لدروسك دي كلها من زمان أوووي و حتى الشرايط بتاعة حضرتك بأشتريها كلها

- نحمده على نعمته تلك وبارك الله فيك ونفع بك وبارك في وقتك

-يا سلام على شرايطك يا مولانا.......أنا حاطتتها جوى عينيا...أنا بأكلها أكل....على طول باسمعها... وبأحفظها حفظ...... درر وربنا درر.. ربنا يخليك لينا كدة ويكرمك يا مفهمنا الدين ويا مشربهلنا بالمعلقة شرب.... إحنا خلاص بقينا بنلعب بالعلم لعب..ياسلام عليك يا داعية العصر وكل عصر يا مولانا إنت يا جميل

- فقهك الله في الدين أكثر وأكثر وهداك إلى أحسن الأخلاق فالعلم يا أخي الفاضل فريضة على كل مسلم ومسلمة

-أه طبعا العلم نور وبيفتح الدماغ كمان حضرتك.....بس بقول لحضرتك إيه؟

- كلي آذان صاغية أخي الكريم

-يخلينا ودان حضرتك يارب.. ولو مافيهاش بس رزالة يعني.... ما الاقيش بس مع حضرتك كبريتة؟

-لا للأسف يا أخي

-ليه بس كدة حضرتك؟ ده انا سميع أوووي ليك ومن زمان ومش معقولة يعني ح تستخسر فيا عود كبريت وتكسر كدة بخاطري يا مولانا؟

-أستخسر؟ ما عاذ الله يا أخي.....لما تقول هذا؟ كل الحكاية وما فيها إني لا أدخن إطلاقا

-لا حضرتك فهمتني غلط أنا مش بسأل على سجاير أنا بس بسأل على كبريتة

-فاهم يا أخي وقلت لك أيضا إني لا أدخن

-ما انا عارف دي وحضرتك برضه قلتلنا زمان إن التدخين كله على بعضه حرام بأمارة الحديث بتاع لا ضرر ولا ضرار...إنت عارف يامولانا؟ أنا ومن ساعتها وانا مبطله خالص ..أمال!!!!! مش بقولك سميع... وسميع إيه؟ قديم كمان ...بس هى المشكلة إني مذنوق دلوقتي في عود الكبريت ده وقلت حضرتك أكيد ح تساعدني........فيها حاجة دي يعني؟

-لا طبعا عادي يا أخي العزيز .....لكن للأسف ليس معي كبريت الآن

-طب دور حضرتك كدة ولا كدة يمكن تلاقي

-يا أخي قلت لك ليس معي... ..........ليس معي...ليس معي ....ليس معيييييييييييييييييييييييييييييييييييييييييييييييييييييييييي

-الله الله هو حضرتك إتنرفزت كدة ليه؟ بقولك سميع قديم وبعدين ده الكلام أخد وعطا برضه يا مولانا

-أنا أتنرفزت؟ أنا أتنرفزززززززززززززززززززت؟

-آه بصراحة آه..إنت نسيت حضرتك قلتلنا إيه النهاردة في الدرس؟

-ماذا قلت فكرني؟

-قلت إن الحلم سيد الأخلاق

-إينعم قلت ذلك

-وقلت كمان إن المؤمن لازم يكظم غيظه

-صحيح

-وقلت كمان إن الواحد لازم يملك نفسه عند الغضب

-صحيح صحيح

- وكمان يعفو ويصفح مش هو ده كلامك؟

-نعم هذا هو كلامي

-يعني سامحتني؟ طيب ما تشوفلي معاك بقى عود الكبريت يا مولانا بس ياريت وحياتك عندي وعشان خاطري ما تتعصبش تاني لو سمحت

-يا أخي أكدت لك بدل المرة ألف إنه ليس معي كبريت و رغم ذلك مازلت تصر على سؤالك هذا؟

-أنا قلت يمكن حضرتك معاك وناسي لو مؤاخذة؟

-يا أبا مش ناسي وحياة أمي ما ناسي

-وحياة أمك؟

-عفوا لقد طفح بي الكيل

-طفح؟ وبعدين بتجيب سيرة الحاجة ليه؟ هو في شيخ برضه بيعرف حاجة عن امه الأيام دي؟

-عفوا أخي المغفرة مجرد ذلة لسان

-وبعدين هو مش حضرتك قلتلنا زمان إن الرسول صلى الله عليه وسلم قال لا تحلفوا بآبائكم ولا بأمهاتكم ولا تحلفوا إلا بالله؟

-نعم قلت هذا لكن هذا لا يعني أن أحلف بالله من أجل عود ثقاب؟ ماهذا الهُراء يا رجل؟

-يا سلام!!!!!!! ودي فيها أيه بقى يعني؟ إنت مش حضرتك قلتنا برضه إن عبد الله بن مسعود قال لإن أحلف بالله كاذبا خير من أحلف بغيره صادقا؟

-نعم قلت ذلك ...ويا ليتني ما قلته حتى لا تأخذه على الآن.... أرجوك أتوسل إليك لاتخرجني عن الموضوع الرئيسي يا أخي

-عينيا يا مولانا ده إنت بركتنا وربنا

-ومن فضلك وكما ترى الآن وبدون عصبية.....ليس معي كبريت.......ليس معي كبريييييييييييييييت......حلفتك بكل ما هو غالي عليك أن تصدقني فإني متعب يا أخي الكريم وأكدت لك مراراً وتكراراً ليس معي كبريت........ ليس معي كبريتتتتتتتتتتتت

-تحلفني بحاجة غير ربنا؟ أستغفر الله العظيم يا مولانا......إنت نسيت حضرتك ولا إيه؟

-نسيت؟ ماذا نسيت؟

-مش إنت مرة زمان أوووي كدة برضه قلت في شريط م الشرايط يعني إن الحلف بغير الله ليس بيمين شرعي لا يلزمه الفعل ولا الكفارة؟

-جرى إيه ياجدع؟

-ياجدع؟ فين يا مولانا النحوي؟ جرالك إيه؟

-بلا نحوي بلا زفت فقعت مرارة أمي م الصبح

- مرارة أمك؟ يا مولانا فيه إيه؟

-إنت خلاص يعني ح تعملي فيها عالم عشان سمعتلك شريط هنا ولا هناك؟ حاجة تفلق بصحيح

-يا مولانا أعصابك

-بلا أعصاب بلا قرف ده زمن إيه الأغبر ده؟

-ليه كدة بس يا مولانا؟ إنت نسيت كلامك تاني ولا إيه؟

-كلامي؟ ماله الزفت كلامي؟

-آه كلامك .. إنت مش كنت قلت لنا حديث للنبي بيقول فيه لا يسب أحدكم الدهر فإن الله هو الدهر؟...أنت نسيت ولا إيه؟ إستغفر الله العظيم قوام يا مولانا عشان خاطري

-أستغفرك ربي واتوب إليك................لا حول ولا قوة إلا بالله ....أخرجتني عن شعوري يا أخي.....عفوا

-ليه بس كدة؟ كل ده عشان حتة كبريتة؟ ح نخسر ربنا عشان حتة كبريتة؟ ده كلام؟ وبعدين مش يمكن لما تدور كدة ولا كدة في جيبك إحتمال برضه تلاقى ونخلص بقى؟

-الله يخربيت أم الكبريت ويلعن أبو اليوم اللي إخترعوه فيه على اليوم اللي شوفتك فيه يا أخي

- يخربيت؟ ويلعن اليوم؟ ايه ده؟ اييييييييييييييييييييييييه ده يا مولانا؟ إنت نسيت قلتنا إيه زمان؟

-نسيت؟ منك لله ده أنا نسيت حتى إسمي....وياترى إتنيلت وقلت إيه زمان يا فلحوس عصرك وزمانك؟

-مش إنت قلتنا برضه إن لو واحد يعني لعن لعنة كدة فاللعنة دي بتطلع فوق للسما؟

-أيوة قلت كدة

-وإن أهل السما بيهربو منها وبيخافو أحسن تصيبهم؟

-أيوة قلت

-وأنه بعدين اللعنة دي بتنزل تاني ع الأرض

-أيوة قلت دة مظبوط كدة

-وإن الناس اللي ع الأرض برضه هما كمان بيخافو منها وبيتجنبوها؟

-أيوة صحيح بالظبط كدة

-وانها بعد كدة بتدور وبتدور على أي حد بيستحقها وتروح لازقه فيه؟

-تمام تمام

-وغالبا بقى ما بتروح لافة لافة وتروح لازقة في اللي قالها في الأول..مش كدة؟

-أيوة صحيح

--يعني كدة ممكن اللعنة دي تلبسك يا مولانا مش كدة؟

-أنا اللعنة ح تلبسني يا متخلف إنت؟

- قال رسول الله صلى الله عليه وسلم ليس المؤمن بالطعان ولا اللعان ولا الفحاش ولا البذيء

-إنت ح تعملى فيها حافظ أحاديث يا جاهل أفندي؟

- والذين يؤذون المؤمنين والمؤمنات بغير ما اكتسبوا فقد احتملوا بهتاناً وإثماً مبينا

-يا واد يا مؤمن!!!!!!!!!!

- ألا فليتق الله أناس تركوا العنان لألسنتهم حتى أوردتهم موارد الهلكة ومراتع الحسرات

-خلاص يا أخي ...خلاص أتوسل إليك ترحمني .......العفو والسماح ..حرمت أنا مش ح أخلص معاك ......أستحلفك بالله ليس معي كبريت..... ثواني بس و ح أروح أجيبلك قاروصة بحالها بنفسي وربنا يسامحنا يا أخي جميعا

-بس حضرتك قلت زمان إن البادىء بالسباب هو بس اللي بيتحمل الإثم وحده مش كدة؟ يعني إثم حضرتك مش أنا؟

-حاضر حاضر...أيوة إثمي أنا ....ربنا يسامحني أنا بس ويعفو عني أنا بس ومعلش تقبل معذرتي يا أخي مرة أخرى.... مبسوط كدة؟

- ولمن إنتصر بعد ظلمه فأولئك ما عليهم من سبيل

- أعفو عني بقى يا أخي الفاضل ولا تنسى أن الصبر والعفو أفضل

-مسامحك يا مولانا ولمن صبر وغفر إن ذلك لمن عزم الأمور

- بارك الله فيكِ تلميذي النجيب

-وفيك يا مولانا....آه تلميذك وسميع قديم كمان

-و جزاكِ الله الجنه ان شاء الله

-وإياكم يا داعية العصر درر وربنا درر

-وابعد عنك عادة التدخين السيئة أخي الكريم

-عادة التدخين؟ بس انا مش بأدخن أصلا يا مولانا

-مش بتتدخن؟

-آه مش بأدخن من إساسه

-يا راجل غلبتني م الصبح و بعد كل ده تقوللي مش بأدخن

-آه تصدق؟ مش بأدخن خالص يا مولانا

-طب وليه الهيصة دي كلها يا أخي؟

-أبدا والله يا مولانا كنت وداني بس بتاكلني شوية وكنت بصراحة ح أموت وأهرشها...... فقلت ناخد كبريته كدة بركة من حضرتك أهرشها بيها .....فيها حاجة دي؟

46 comments:

;كارولين فاروق said...

هههههههه
ده ينرفز بلد
اي نعم اخطأ مولانا بالرغم من نصائحه
بس هو بني آدم معرض للخطأ برده
قصه جميله وحوار اجمل
الا ماكنش عايز عود الكبريت علشان يحرق شرائط التسجيلات مولانا بالمره هههههههههههههه

طيوري said...

هههههههههههههههه
ضوحك متواصل ده اكيد شبطة
شخصية خنييييييييقة بجد في الحقيقة بس فينك ياراجل من زمان واحشنا وايه اخبار السولل والبلل ولادك
ضحكني اوي فكرني بحلقة باسم يوسف في قناة الحافظ عمل زيشبطة بالظببببببببط فضل يقول للشيخ مش كده حرام توبوا بقى حرام عليكم هههههههههههههه والله كانك شوفتها
تسلم الدماغ يادماغ

هبة فاروق said...

الرسول صلى الله عليه وسلم كان رسول وبالرغم من ذلك أخطا عندما عبث وتولى فى وجه الاعمى مهما كان الانسان قوى الايمان فهو بشر فى النهايه ليس معصوم من الخطا
ولكن لا انكر ان هناك اشخاص يدعون الايمان والتقوى وفى باطنهم غير ذلك وهم المنافقون

البوست جميل ودمه خفيف ضحكت كثير فى اكثر من موقف على الكبريت هو ايه حكايه الكبريت معانا عامل ازمه على طول
تحياتى

faroukfahmy said...

تعرف يا تركيب انت هتخللى الشيخ ده يحمل قروصة كبريت معاه لاته اتعقد خالص
وبهذه الطريقة بمكن يوزع اعواد للى عاوز واللى مش عاوز لكى بعفى تفسه من تعب الاجابة على السؤال
وهذ يفكرتى زمان فى المترو كان يطلع بياع ويفرق تعتاع على جميع الراكبين الى عاوز يشترى واللى مش عاوز
وليتك كلها عيدان فل وريحان يا تركيب

rona ali said...

ههههههههههه
انا لو كنت عالمه من علماء الازهر كان زمانى قومت اديتله بالشبشب

بس تعرف احلى حاجه في موضيعك رغم انها بضحك بس وراها حاجه مختلفه بشكل مختلف وكله مختلف مختلف مختلف ههههههههههههههه

اة صحيح والخلاط بايظ عندنى
^_^

شمس النهار said...

:)))

ايوة كده نضحك علي الصبح
مش عمر سليمان اللي نكد عليا علي الصبح
:)))

Baskouta said...

كالعادة انت رائع
والحوار يشد اي حد انه يكمله

ربنا يسعد أوقاتك
:)

بسمة الورد عطر المشاعر said...

صباحك هنا وسعاده ياتراكيب

قصتك مهمة جدا وحوارها اللى بينرفز ده بيوحى بالصبر والتعقل يعنى الشيخ كان ممكن يروح يشتريله علبه كبريت ويريح نفسه اصلا من المشكله والرغى ده كله هههههههه

بجد راق لى وقتى البسيط الذى قضيته ف رحاب مدونتك

دام فكرك مستنيرا

مودتى واعجابى بقلمك

Amr Omar said...

أنا أتفقعت مرارتي منه ... ده لو فيه بني آدم غتيت بالشكل ده كنت قتلته و دفعت ديته ... و اقى عملت خير في كل بني البشر


حرررام عليك بطني و جعتني من كتر الضحك

صاحب الحبر الأسْوَد said...

احلي حاجة في كتابتك انك بتخليني اتفعال مع الموقف والشخصيات بشكل كبير
والموضوع هادف جداً وفي النفس الوقت يموت من الضحك
وفكرتني بحلقة باسم يوسف علي قناة الحافظ لما قعد يهدي الشيخ ويقوله
توب إلي الله يا بيه

يسلم قلمك المبدع
شكراً علي الضحكة
تحياتي

Tarkieb said...

كارولين فاروق
هههههههههه تصدقي ماجتش في دماغي حرق شرايطه بس الشيخ اكيد حيجيب كبريت يولع فيه ..نورتيني ويارب دايما

Tarkieb said...

قرفة
هههههههههه شبطة بعد ماباع كلية سامبو اتغتى بقى والعرسان بيجرو ورى سلو وبلو ....اه تصدقي ده ثبت المذيع تثبيتة جامدة وعجبني باسم اوووي...منوراني

Tarkieb said...

هبة فاروق
هو بصراحة راجل شبطة يكفر بلد بحالها انا صعب عليا الشيخ بجد انا وانا بكتب كنت عايز اضربه ههههههههه...منوراني يا فنانة

Tarkieb said...

faroukfahmy58
هههههههههه ده الشيخ والله صبور جدا انا اللي كنت ح اروح افرق نعناع العدالة في الاتوبيسات وعليها علب كبريت...بس أنا بصراحة حظي حلو ان الشيخ صبور او انه معاهوش لا مشط كبريت او ولاعة ولا كانت باظت القصة هههههههه...منورني يا أستاذي وكل عائلة الفاروق الكريمة

Tarkieb said...

rona ali
وحياتك حتى مش لو م الازهر ده كان عايز قبقاب من بتوع الميضة بتاعة السيدة زيتب ونزل على دماغة كان حرم هههههههههه...منوراني دايما يارب

Tarkieb said...

شمس النهار
ههههههههههه عمر سليمان جايبلى مغص من سحنته ...منوراني يا شمس

Tarkieb said...

Baskouta
ربنا يخليكي على كلامك الحلو وما يحرمنا من زيارتك ويومك فل يا بسكوت

Tarkieb said...

سمة الورد
ربنا ما يحرمنا من طلتك وكلماتك الجميلة يا شاعرة ..وميرسي اوي على تعليقك ومنوراني دايما يارب

Tarkieb said...

Amr Oamr

ده انا كدة ح اتحسد ربنا ما يحرمنا من زيارتك وتعليقك يارب....منورني يا ملك

Tarkieb said...

صاحب الحبر الأسْوَد
ربنا يخليك وربنا انت اللي مبدع ومبوسط اووي اني متابع مدونتك الان ودايما منورني

Haytham Alsayes said...

ههههههههههههههههههههههههههههههههههههههههه
والله وحشني بوستاتك ياتركيب ياخويا
بصراحة دة راجل رزل اوى ههههههههههه

Beram ElMasry said...

لابن العزيز والفنان الموهوب تراكيب
سعدت جدا بتعليقك وان القصيده اعجبتك وان الصوت كان معبرا ,ومجرد تواجدك يبعث في نفسي الارتياح ويحثني علي الاستمرار فلا تحرمني من المداومه

رحيق الورد said...

مسائك طيب
سرنى التواجد هنا
تحياتى لك
ياسمين

reemaas said...

يالهووووووووووووى ده راجل عاوز الشنق

والشيخ كمان بينى وبين فسكونيا يعنى

هههههههه

P A S H A said...

:))

من فترة .. كانت فيه مسابقة دينية رمضانية هنا في بلوجر ، مش متذكر بصراحة مين اللي كان عاملها (تقريباً الزميل / شارم لايف) ، أنا ما اشتركتش فيها للأسف ، وحتى لو كنت اشتركت فيها ما كنتش هاعرف أجاوب على أغلب الأسئلة اللي كانت فيها .. بس اللي لفت نظري ساعتها إن حضرتك كنت الأول بإكتساح منقطع النظير :)
وعرفت إن صاحب المدونة دي حد تقيل جداً بجد أكتر مما كنت أظن أو أتوقع .. حد عنده مرجعية دينية وزخم ثقافي ومعرفي وموروث شعبي وخبرات وتجارب حياتية لا يستهان بها .. حد يقدر بأسلوبه الفريد جداً ، الذاتي جداً .. أنه يخلليك تجري على مدونته أول ما ينزل بوست جديد علشان تقراه .. ومهما كان البوست طويل ، فأنت بتقراه باستمتاع وعايش معاه بكل حواسك وانفعالاتك وخايف أحسن يخلص ! .. حد قادر يخلليك تضحك من قلبك فِ عز ما أنت متضايق ومخنوق .. لأنه حد بيكتب كوميدي (بجد) وهي أصعب أنواع الكتابة خاصة لشعب دمه خفيف وابن نكتة بالفطرة زينا .. حد بقيت باستنى تعليقه المميز في مدونتي بفارغ الصبر علشن ينكشني :))
ربنا يكرمك يا رب ويفرح قلبك زي ما بتفرحنا و .....

"يعيش مولانا وبوستات مولانا"

شـريف

رحاب صالح said...

لالالالالالالالالالالالالالالالالالاء
حرام كدة
انا بقالي كام يوم اكتب تعليق وميظهرش
انت مصتقصدني بقي ....؟
بجد انا معرفش اقولك اية بقي
يعني انت حيرتني
بس الصراحة انت راااااائع في كل ما تكتب
وانا مع شريف باشا طبعا في كل اللي قاله
ما شاء الله عليك بجد
وترتيب و تفكير رااقي ومتنور جداااا
ده غير الثقافة و الواقع اللي بتكتب فيه وعنه
تحياتي ومساء البنفسج

أمل حمدي said...

معاك عود كبريت ؟؟
ههههههههههه
أولع فيهم هم الاتنين

تسلم يارب يا تركيب
وياريت فعلا كل واحد يصدقمع نفسه ويتطابق قوله مع فعله
مساء المسك والعنبر :)

spiceman said...

الله ينور يا بروف, عجبتني جدا و الللهي و بتحدث كتير و اللهي, يعني لما كنت صغير كان واحد من الاخوان في الجامع و الدقن ماشاء الله ربع متر كان بيشتمنا و ينهي الجمله بأستغفر الله العظيم! و يخرجنا بره بحجه اننا هنقطع المصحف ولما كان حد يعتبه كان يقول ان الله غفورا رحيم .
القصه اكبر دليل عن ان مش كل واحد طلع علي الشاشه يلم معونه يبقي ولي من اولياء الله. احسنت يا تركيب

Noha Saleh said...

هههههههههههه
جميلة جدا
بس الراجل ده رخم اوى

افروديت said...

enta feen ya salama3

dalia said...

كلها اسقاطات ودي أحلى حاجه فيها :)

فشكووول said...

يا راجل منك لله كنت حتخلى الشيخ يشق هدومه وتلاقيه كمان شقها وانت مش راضى تقول لنا على الموضوع

والله انا من اول البوست لحد آخره ما انا قادر امسك نفسى من الضحك .. اضحكك الله اخى

وبعدين هى جت على عود الكبريت يعنى .. دا الكذب والايمان بقت للركب الراجل حلف اليمين ان والدته مش امريكيه .. وهى امريكيه بكل المستندات .. والله ما اناعارف الناس دول بيلعبوا بالكلام ازاى .. اذا كان على يبقى الكذب حرام واذا كان عليه يبقى الكذب حلال .. مشايخ آخر زمن

Tarkieb said...

Haytham Alsayes

إنت كمان والله واحشني وواحشني معلوماتك التاريخية

Tarkieb said...

Beram ElMasry s
ربنا ما يحرمنا من كلامك ولا صوتك الجميل

Tarkieb said...

رحيق الورد

ربنا ما يحرمنا منك ولا وصفاتك الرائعة...وشرفتيني

Tarkieb said...

reemaas
دايما منوراني بضحكتك....شرفتيني

Tarkieb said...

P A S H A
ربنا يخليك على كلامك الحلو ...انا شخص عادي جدا وفي ناس كتير احسن مني اكيد...الفرق انك جميل اووووي والجميل من جوة يشوف كل حاجة جميلة ....مبسوط اوووي بمعرفتك واتبسطت انك تعرف السيدة اكتر مني....المرة الجاية اعزمك على سوبيا الرحماني وح تعجبك اووووي....تحياتي ليك يا فنان

Tarkieb said...

re7ab.sale7

ربنا يخليكي دي شهادة اعتز بها من صحفية المستقبل...وملكة البنفسج....ويارب على طول كدة الرضا والزيارات المتكررة

Tarkieb said...

ماما أمولة
مساءك فل يا ست الكل ...ربنا ما يحرمنا من طلتك وكلامك الحلو ويبعد عنا وعنك الكبريت

Tarkieb said...

spiceman

إزيك يا محمد وازي بلاد الفرنجة يارب تكون بخير...وواحشنا تعليقاتك يا ريس...

Tarkieb said...

Noha Saleh

ربنا يخليكي وشهادة حلوة اعتز بها ...نورتيني

Tarkieb said...

افروديت

انا برضه ههههههه....انت اللي فين حتى الشيكروباس الونش شاله....

Tarkieb said...

dalia

ميرسي ع الزيارة والتعليق ويارب ما تكون الاخيرة....شرفتيني ولينا عودة لمدونتك ان شاء الله

Tarkieb said...

فشكووول

حمد الله على سلامتك ومبسوط اوووي انها عجبتك ...وكويس انك اخدت بالك من التلميحة السريعة عن امه وسط الكلام....انه عصر من برة هالا هالا ومن جوة يعلم الله....شرفتني وماتغيبش تاني بقى

ياسمين said...

فعلا فيه ناس بتقول كلام وتعمل عكسه..!! لكن ف الأول والآخر المشايخ كلهم بشر والبشر بيخطأ...وحلوة القصة ..

Tarkieb said...

ياسمين
اخص عليا ما شفتش تعليقك الا بعد سنتين هههههههه متأسف جداونورتيني