Wednesday, March 5, 2014

شات الغرام





-إنت ليه متخيل إني بأضحك عليك؟
-أتخيل؟ لا طبعا أنا متأكد إنك أول ما تخدي مني الكود ح تختفي
-أختفي؟ ليه بتقول كدة ؟ إخص عليك بقي أنا برضة أعمل فيك كدة ياحبوب؟
-كلكم بتقولو كدة
-كلكم؟ إنت باين عليك شقي بقي يا حمادة
-لا شقي ولا حاجة هو لو كنت شقي كان زمان ده بقي حالي؟
-ماله حالك ما إنت حلو وزي الفل أهو
-الله يكرمك
-ويكرمك يا حبيبي أكتر لو فرجتها بقي عليا دلوقتي  وتخلصني وتديني الكود بتاع كارت الشحن زي ما وعدتني
-أنا وعدتك؟ صحيح أنا ناسي خلاص معلش ثواني واشوفهولك
-ميرسي يا حبيبي
-حبيبي؟ كدة مرة واحدة ده أنا لسه متعرف عليكي من دقايق
-طبعا حبيبي يكفي إنك وقفت معايا في غربتي
-غربتك؟ إزاي هو إنت مش من مصر؟ تبقي إسكندرانية أكيد
-إسكندرانية؟  لا طبعا
-إمال منين حيرتيني يا ؟؟؟؟ الا صحيح هو إسمك إيه؟ تصدقي نسيت أسألك
-ريفال
-ريفال؟ ايه الإسم ده أول مرة أسمع عنه؟ جبتيه منين ده ههههههههه
-جبته منين؟ أبويا اللي سماني كدة وعلي فكرة ده معناه طويلة الشعروكمان المتبخترة في مشيها
-متبخترة؟ طب إتمختري ياحلوة يا زينة هههههه
-إتريق يا حمادة براحتك
-بأهذر معاك يا ريفال..الا صحيح إنت منين بقي
-الجزائر
-الجزائر؟ لا مش ممكن
-ليه مش ممكن
-عشان بتكتبي مصري قصدي عربي باللهجة المصرية
-م التليفزيون والافلام وياحبيبي أكيد
-لا برافو عليكي تصدقي أنا كنت بحسبك مصرية
-ياحمادة خلصني بقي مش ح تجيب الكود ولا إيه؟ ماما وحشاني أوووي يا أخي وعايزه أكلمها
- صحيح تصدقي أنا كنت ناسي خلاص معلش ثواني واشوفهولك...ألا صحيح إنت شكلك إيه؟ أكيد مزة؟ صح؟ أنا أعرف إن الستات عندكم حلوين أوووي
-الكود يا حمادة لو سمحت
-يا ستي هو الكود ح يطير؟ وريني صورتك واول ما أشوفها ح اديكي الكود طوالي
-لازم يعني؟
-اه معلش أصل الفضول ح يموتني وح اموت واعرف شكلك إيه
-ثواني واجيبلك لينك لصورتي....وانت حضر الكود..إتفقنا؟
-إتفقنا؟ آه طبعا إتفقنا ..بس لايميني ع اللينك ...يا مسهل يارب
-لا ياحلو الكود الاول
-إخس عليكي مش واثقة فيا ولا إيه؟
-لا مش حكاية ثقة ولا حاجة
-أمال إيه؟
-عايزة أتاكد إنك بتعاملني غير الناس الوحشين اللي ضحكو عليك
-معلش والله غصب عني كتير إضحك عليا وكل مرة أقول أخر مرة
-وانا مش ح اديك اللينك الا لما تعاملني بطريقة تانية ومختلفة خالص..إتفقنا؟
-حاضر
-ميرسي حبيبي
-شوفي يا ستي الكود هو 12345343789422
-طب ثواني أجربه؟
-تجربيه؟ إيه ده هو إنت مش واثقه فيا؟
-طبعا واثقة يا بيبي بس خايفة تكون غلطت ولا حاجة..ثواني
-ثواني؟ ماشي بس علي الله ماتطلعيش زيهم
-إخص عليك؟ لسه بعد كله ده مش واثق فيا
-معلش حبيبتي اللي بيتلسع م الشوربة بينفخ في الذبادي
-ذبادي وشربة إيه؟ ع العموم الكود شغال ميرسي حبيبي
-ميرسي؟ طب والصورة؟
-آه الصورة؟ تصدق نسيت..معلش ثواني
-ماشي حبيبي مستني علي أحر م الجمر
-خلاص اللينك اهو حبيبي

 وح اقفل دلوقتي اكلم ماما وباليل نكمل كلامنا إن شاء الله
باي حمادة

16 comments:

رحاب صالح said...

ههههههههههههههه
كان حبيبها بيقولها دايما واضح يا حبيبتي ان الحنار مبيتعلمش
هههه
البوست ده فكرني بيهم

faroukfahmy said...

جميله قوى يا تركيب يعيش وياحد غيرها

ياسمين said...

كود ايه ؟ مش فاهمة

بسمة الورد عطر المشاعر said...

والله انت مالكش حل فى طريقه سردك وخفة دم كلماتك ههههه

والله بقضى وقت لذيذ جدا مع اللى بتكتبه وتقدمهولنا كلام هادف وشيق يعنى بتحط العلاج جوة كبسوله من الجمال الله عليك

لذيذة ورده اصلى بحب الورد ههههههه
كل الموده

Tarkieb said...

رحاب صالح
يا مساء البنفسج ومبروم اول تعليق والجايزة وردة البنفسجية هههههه نورتيني

Tarkieb said...

faroukfahmy


والله انت اجمل وربنا ما يحرمنا من طلتك وتعليقاتك

Tarkieb said...

ياسمين
الكود هو الرقم السري اللي لما بتكحتي كارت الشحن بتاع الموبيل وتشحني..في ناس دلوقتي قاعدة في النت بتضحك علي رجالة زي حمادة كدة ويخدو منهم الكود ويشحنو موبايلهم وبعد كدة بيبيعو الرصيد للناس اللي بتشحن ع الهوا وطبعا بسعر ارخص

Tarkieb said...

بسمة الورد
ربنا يخليكي وما يحرمنا من بسمتك ..ولا من تعليقاتك ويجعله عامر

Carmen said...

ههههههههههههههههههههههههه لذيذة اوى فعلا

Tarkieb said...

كارمن

الحمدالله
علي السلامة
تصدقي ماعرفتكيش لما غيرتي الصورة بتاعتك

طيوري said...

هههههههههه
حلوة
عامل مفتح ووقع في نفس الفخ يلا يستاهل
بس ياترى الكارت ده مبلغ يستاهل ولا كارت بعشرة جنيه؟
ههههههه

Tarkieb said...

طيوري
هههههه لا ماهو عشان كدة قالت م الجزائر عشان راسمة.
علي كارت بمية اكيد

P A S H A said...

هههههههههههههههههههههههههه

زمانه خد برد يا عيني

فكرتني بواحد كان قاعد لوحدة وقالب الشقة عربخانة المهم دفع خمسين جنية لواحد تاني علشان يجيب له سونيا تبات معاه .. التاني نصب عليه وجاله الساعة اتنين ونص بالليل وجاب له كلبة بوليسي وربطهاله في أكرة باب الأوضة ، دخل وسرق الشقة وخد دش واتعشا وخد الكلبة ونزل والتاني محبوس جوه في أوضته مش قادر يطلع !!

ههههههههههههههههههههههههههههههههه

سيبك أنت أنا فرحان برجوعك تاني للتدوين منور الدنيا كلها والله
:))

Tarkieb said...

باشا
والله انت معلم وفيك كل حاجة حلوة وربنا يديم المحبة علي طول يارب ومايحرمنا من قصصك وتعليقاتك

Ibrahim Ben Gamal said...

لطيف جدا أسلوبك ومعبر

Tarkieb said...

I.G.B
ربنا يخليك وميرسي ع الزيارة