قانون ميرفي وشهبندر الستات
* آه… بس لو أعرف أقرأ أفكار الستات!
* يعني لو عرفت اللي في دماغهم، هتعمل إيه؟
* أعمل إيه؟ ده أنا كنت أبقى شهبندر الستات يا جدع!
* خلاص سهلة دي… كل اللي عليك إنك تنفخ صدرك، وتشد جسمك، وتخش عليها بقلب جامد وتقولها أي حاجة، وخلي عمنا ميرفي يقوم بالواجب.
* ميرفي؟ مين ده؟
* إيه ده؟ إنت ما تعرفش قانون ميرفي؟
* ولا عمري سمعت عنه.
* مسكين بقى… مش عارفه وعايز تبقى شهبندر الستات!
* يا عم فهمني ولك الأجر والثواب.
* شوف يا سيدي… قانون ميرفي بيقول إن كل ما الحاجة تكون مهمة بالنسبة لك، كل ما احتمال إنها تبوظ يبقى أكبر!
* يعني إيه؟
* يعني لو عندك مثلاً سجادة غالية جدًا، ووقع عليها ساندوتش…
* أيوه؟
* كل ما السجادة تكون أغلى، كل ما احتمال إن الساندوتش يقع على الناحية اللي فيها الأكل والصوص والكريمة يبقى أكبر!
* ولو السجادة معفنة؟
* هتلاقي الساندوتش وقع على ناحية العيش!
* طب إيه علاقة ده بالستات؟
* يا عم ده هو كل حاجة! كل ما تكون خايف إنك تطلع غلط، هتوقع على بوزك!
* يعني أعمل إيه؟
* ما تفكرش كتير… خش واثق من نفسك، قول أي حاجة، وسيب عمنا ميرفي يقوم بالواجب!
* طب أقول إيه؟
* قولها مثلاً: عينيكي فيها حزن…
* وبعدين؟
* سيب ميرفي يكمل… وابقى ادعيلي.
المحاولة الأولى
* صباح الخير.
* صباح النور، أي خدمة؟
* عايز واحد كروسان ورغيفين فينو لو سمحتي.
* عينيّا، تطلب حاجة تانية؟
* بصراحة… آه.
* أفندم؟
* أنا ملاحظ إن عينيكي فيها حزن… خير؟
* حزن؟!
* أيوه… حاسس إن ورا الابتسامة دي قصة كبيرة.
* ياااه… ده إنت قديم أوي!
* قديم؟!
* طب ثواني… يا عبده! تعالى يا عبده، في واحد بيستظرف على الصبح، والنبي تروّقه على بال ما أنضف المحل!
* استني بس يا جماعة، أنا كنت—
* تعالى هنا يا حبيبي!
* آآآآه! بالراحة يا عم!
* بس أنا كنت بطبق قانون ميرفييييي!
* طبّقه على نفسك يا حبيبي!
* الله يخرب بيتك يا ميرفي…
المحاولة الثانية
* لا… المرة دي مش هخاف. هدخل واثق من نفسي!
* لو سمحتي… الساعة كام؟
* الساعة واحدة.
* واحدة؟ حلوة كده زيك؟
* لا… واحدة زبالة كده زي حضرتك!
* الله يخرب بيت اليوم اللي عرّفني عليك يا ميرفي الكلب!
المحاولة الثالثة
* مساء الخير يا فندم، معلش هو الكرسي ده فاضي؟
* آه طبعًا… اتفضل استريح.
* شكرًا جدًا، ذوقك… خير؟ أنا ملاحظ إن عينيكي فيها حزن… حزن عميق أوي مش لايق على الملامح دي.
* ياه… بجد؟ أنت أول حد يحس بيا ويقرأ اللي جوايا من أول نظرة.
* القلوب بتحس ببعضها يا فندم.
* عندك حق يا أستاذ؟
* كريم يا فندم… أنا اسمي كريم. مهندس ديكور، وبفهم في الخطوط والملامح… قوليلي بقى، إيه اللي مخبي الضحكة؟
* آآاه يا أستاذ كريم… الدنيا جاية عليا أوي اليومين دول… أنا بجد محتاجة حد يسمعني… بس مكسوفة منك أوي.
* مكسوفة من إيه بس؟ اعتبريني كتاب مفتوح… قوليلي كل اللي تعبك، أنا كلي آذان صاغية!
* يا مامي! أنا آسفة بجد… غصب عني ريحت على كتفك مع الفرامل… أصل جو الأوتوبيس ده بيخنقني والفرامل مفاجئة.
* ولا يهمك يا ستي! خدي راحتك خالص… فداكي كتفي وصاحب كتفي. تحبي ننزل نشرب حاجة في أي كافيه هادي ونتكلم براحتنا؟
* ياريت بجد… أنت حد ذوق جدًا… بس ثواني، الفرامل دي خلتني أحس بدوخة… ممكن لو سمحت تفتح الشباك اللي جنبك شوية؟ مش قادرة أتنفس خالص.
* من عيوني! ثواني… إيه ده؟ الشباك ده معصلج ليه؟ يا مسهل… أيوه… هانت… فتحتهولك خلاص!
* يا نهار مش فايت! أنا نسيت خالص! دي المحطة بتاعتي… لازم أنزل حالًا وإلا هضيع المقابلة! شكرًا ليك جدًا يا كيمو… بجد فرحتني.
* استني طيب! أعرف اسمك طب؟ أخد رقمك؟
* المرة الجاية… القدر هيجمعنا تاني بالتأكيد!
* ياااه… رقيقة رقة… والقدر هيجمعنا…
* إيه ده؟ الآيفون فين؟ الآيفون 17 فين؟ ومحفظتييييي!
* البت سرقتني وأنا بفتح الشباك! يا بت النصابة!
* الله يخرب بيتك يا ميرفي الزفت! ضيعتني زي ما ضيعت الآيفون
